ಢಾಕಾ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ವಿಶಿಷ್ಟ ಕೇಶವಿನ್ಯಾಸವನ್ನು ಹೋಲುವ ಕಾರಣಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದ ಅಪರೂಪದ ಅಲ್ಬಿನೋ (Albino) ತಳಿಯ ಎಮ್ಮೆ ಈ ಬಾರಿಯ ಈದ್-ಉಲ್-ಅದ್ಹಾ (ಬಕ್ರೀದ್) ಹಬ್ಬದಂದು ಕುರ್ಬಾನಿ (ಬಲಿ) ಆಗಲು ಸಜ್ಜಾಗಿದೆ. ಬಾಂಗ್ಲಾದೇಶದ ರಾಜಧಾನಿ ಢಾಕಾ ಸಮೀಪದ ನಾರಾಯಣಗಂಜ್ನ ಫಾರ್ಮ್ ನಲ್ಲಿ ಸಾಕಲಾಗಿರುವ ಈ ವಿಶಿಷ್ಟ ಎಮ್ಮೆ, ತನ್ನ ವಿಭಿನ್ನ ಶಾರೀರಿಕ ಲಕ್ಷಣಗಳಿಂದಾಗಿ ದೇಶಾದ್ಯಂತ ಭಾರಿ ಜನಪ್ರಿಯತೆ ಗಳಿಸಿತ್ತು. ಹಬ್ಬದ ಪ್ರಯುಕ್ತ ಈ ಎಮ್ಮೆಯನ್ನು ಗ್ರಾಹಕರೊಬ್ಬರಿಗೆ ಈಗಾಗಲೇ ಮಾರಾಟ ಮಾಡಲಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಇದರದ್ದೇ ಚರ್ಚೆ ಶುರುವಾಗಿದೆ.
‘ಡೊನಾಲ್ಡ್ ಟ್ರಂಪ್’ ಹೆಸರು ಬಂದಿದ್ದು ಹೇಗೆ?
ಸುಮಾರು 700 ಕೆಜಿ ತೂಕದ ಈ ನಾಲ್ಕು ವರ್ಷದ ಅಲ್ಬಿನೋ ಎಮ್ಮೆಯ ಹಣೆಯ ಮೇಲೆ ಹೊಂಬಣ್ಣದ ಕೂದಲಿನ ರಾಶಿ ಇದೆ. ಈ ಕೂದಲಿನ ಶೈಲಿಯು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಿಗ್ನೇಚರ್ ಹೇರ್ಸ್ಟೈಲ್ ಅನ್ನು ಹೋಲುವ ಕಾರಣಕ್ಕೆ, ಫಾರ್ಮ್ ಮಾಲೀಕರ ಕಿರಿಯ ಸಹೋದರ ಇದಕ್ಕೆ ಪ್ರೀತಿಯಿಂದ ‘ಡೊನಾಲ್ಡ್ ಟ್ರಂಪ್’ ಎಂದು ಹೆಸರಿಟ್ಟಿದ್ದ. ಮೆಲನಿನ್ ಕೊರತೆಯಿಂದಾಗಿ ಬಿಳಿಮಿಶ್ರಿತ ಗುಲಾಬಿ ಬಣ್ಣದ ಚರ್ಮ, ಗುಲಾಬಿ ಮೂಗು ಮತ್ತು ಹಗುರವಾದ ಹೊಂಬಣ್ಣದ ಕೂದಲನ್ನು ಹೊಂದಿರುವ ಇಂತಹ ಅಲ್ಬಿನೋ ಎಮ್ಮೆಗಳು ಬಾಂಗ್ಲಾದೇಶದಲ್ಲಿ ಅತ್ಯಂತ ಅಪರೂಪ ಎಂದು ಅಲ್ಲಿನ ಪಶುಸಂಗೋಪನಾ ಅಧಿಕಾರಿಗಳು ತಿಳಿಸಿದ್ದಾರೆ.
ರಾತ್ರೋರಾತ್ರಿ ಸೆಲೆಬ್ರಿಟಿ ಸ್ಟೇಟಸ್
ಕಳೆದ ಕೆಲವು ವಾರಗಳಿಂದ ಈ ಎಮ್ಮೆಯ ಚಿತ್ರಗಳು ಮತ್ತು ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಬಿರುಗಾಳಿ ಎಬ್ಬಿಸಿದ್ದವು. ದಿನನಿತ್ಯ ನೂರಾರು ಪ್ರವಾಸಿಗರು, ಸಾರ್ವಜನಿಕರು ಮತ್ತು ಮಕ್ಕಳು ಈ ವಿಚಿತ್ರ ಎಮ್ಮೆಯೊಂದಿಗೆ ಸೆಲ್ಫಿ ಹಾಗೂ ವಿಡಿಯೋ ಮಾಡಲು ಫಾರ್ಮ್ನತ್ತ ಲಗ್ಗೆ ಇಡುತ್ತಿದ್ದರು. ದೂರದ ಜಿಲ್ಲೆಗಳಿಂದಲೂ ಜನರು ಇದನ್ನು ನೋಡಲು ಧಾವಿಸಿ ಬರುತ್ತಿದ್ದರು. ಪ್ರಾಣಿ ಸ್ವಭಾವತಃ ಅತ್ಯಂತ ಶಾಂತ ಮತ್ತು ಸೌಮ್ಯವಾಗಿದ್ದರೂ, ಸಾರ್ವಜನಿಕರ ನಿರಂತರ ಹಾವಳಿ ಮತ್ತು ಅತಿಯಾದ ಗಮನದಿಂದಾಗಿ ಅದು ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿತ್ತು. ಇದರ ಪರಿಣಾಮವಾಗಿ ಎಮ್ಮೆಯ ತೂಕ ಕೂಡ ಕಡಿಮೆಯಾಗಿದ್ದು, ಇತ್ತೀಚೆಗೆ ಸಾರ್ವಜನಿಕ ವೀಕ್ಷಣೆಗೆ ನಿರ್ಬಂಧ ಹೇರಲಾಗಿತ್ತು.
ಮಾಲೀಕರ ಭಾವುಕ ವಿದಾಯ
ಈ ಎಮ್ಮೆಯನ್ನು ಅತ್ಯಂತ ಜೋಪಾನವಾಗಿ ಸಾಕಿದ್ದ ಫಾರ್ಮ್ ಮಾಲೀಕ ಜಿಯಾವುದ್ದೀನ್ ಮೃಧಾ, ಅದರ ಆರೋಗ್ಯ ಕಾಪಾಡಿಕೊಳ್ಳಲು ದಿನಕ್ಕೆ ನಾಲ್ಕು ಬಾರಿ ಸ್ನಾನ ಮಾಡಿಸಿ, ವಿಶೇಷ ಪೌಷ್ಟಿಕ ಆಹಾರ ನೀಡುತ್ತಿದ್ದರು. ಪ್ರಾಣಿಯ ಮಾರಾಟದ ಕುರಿತು ಭಾವುಕರಾಗಿ ಮಾತನಾಡಿರುವ ಅವರು, “ನಾನು ‘ಡೊನಾಲ್ಡ್ ಟ್ರಂಪ್’ ಅನ್ನು ಖಂಡಿತವಾಗಿಯೂ ತುಂಬಾ ಮಿಸ್ ಮಾಡಿಕೊಳ್ಳುತ್ತೇನೆ. ಆದರೆ ತನ್ನ ಪ್ರೀತಿಯ ವಸ್ತುವನ್ನು ದೇವರಿಗಾಗಿ ತ್ಯಾಗ ಮಾಡುವುದೇ ಈದ್-ಉಲ್-ಅದ್ಹಾ ಹಬ್ಬದ ನಿಜವಾದ ಸಂದೇಶ ಮತ್ತು ಮೂಲ ಆಶಯ” ಎಂದು ಹೇಳಿದ್ದಾರೆ. ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರವಾದ ಬಾಂಗ್ಲಾದೇಶದಲ್ಲಿ ಮುಂದಿನ ವಾರವೇ ಹಬ್ಬ ಆಚರಿಸಲಾಗುತ್ತಿದ್ದು, ಇತ್ತೀಚಿನ ವರ್ಷಗಳಲ್ಲಿ ಇಂತಹ ವಿಭಿನ್ನ ಹಾಗೂ ದೈತ್ಯಾಕಾರದ ಪ್ರಾಣಿಗಳು ಹಬ್ಬದ ಸಮಯದಲ್ಲಿ ವೈರಲ್ ಆಗುವುದು ಅಲ್ಲಿ ಸಾಮಾನ್ಯವಾಗಿದೆ.
ಇದನ್ನೂ ಓದಿ : ಚೀನಾದ ಕಲ್ಲಿದ್ದಲು ಗಣಿಯಲ್ಲಿ ಭೀಕರ ಸ್ಫೋಟ ; 82 ಕಾರ್ಮಿಕರು ದುರ್ಮರಣ.. ಹಲವರು ನಾಪತ್ತೆ!
