ವಾಷಿಂಗ್ಟನ್ : ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಆಮದು ಸುಂಕ ಹೆಚ್ಚಳದ ನಿರ್ಧಾರ ಮತ್ತೊಮ್ಮೆ ತೀವ್ರ ಕಾನೂನು ಸಂಘರ್ಷಕ್ಕೆ ಕಾರಣವಾಗಿದೆ. ಭಾರತ ಸೇರಿದಂತೆ 60 ವ್ಯಾಪಾರ ಪಾಲುದಾರ ದೇಶಗಳ ಮೇಲೆ ಟ್ರಂಪ್ ಆಡಳಿತ ವಿಧಿಸಿರುವ ನೂತನ ‘ಸೆಕ್ಷನ್ 301’ ಸುಂಕಗಳನ್ನು ಪ್ರಶ್ನಿಸಿ ಅಮೆರಿಕದ 25 ಡೆಮಾಕ್ರಟಿಕ್ ಆಡಳಿತವಿರುವ ರಾಜ್ಯಗಳು ಸೋಮವಾರ ನ್ಯಾಯಾಲಯದ ಬಾಗಿಲು ತಟ್ಟಿವೆ. ನ್ಯೂಯಾರ್ಕ್ನಲ್ಲಿರುವ ಅಮೆರಿಕದ ಅಂತಾರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯದಲ್ಲಿ ಈ ದೂರು ಸಲ್ಲಿಕೆಯಾಗಿದ್ದು, ಟ್ರಂಪ್ ಆಡಳಿತವು ತನ್ನ ಅಧಿಕಾರ ವ್ಯಾಪ್ತಿಯನ್ನು ಮೀರಿದೆ ಎಂದು ರಾಜ್ಯಗಳು ಆರೋಪಿಸಿವೆ.
60 ದೇಶಗಳ ಮೇಲೆ ಹೊಸ ಸುಂಕದ ಬಿಸಿ
ಕಳೆದ ತಿಂಗಳು ಜಾರಿಗೆ ಬಂದ ಈ ನೂತನ ಕಾನೂನಿನಡಿ 60 ದೇಶಗಳಿಂದ ಅಮೆರಿಕಕ್ಕೆ ಆಮದಾಗುವ ಸರಕುಗಳ ಮೇಲೆ ಶೇ.10ರಿಂದ 12.5 ರಷ್ಟು ಸುಂಕವನ್ನು ವಿಧಿಸಲಾಗಿದೆ. ಬಲವಂತದ ದುಡಿಮೆ ಅಥವಾ ಕಾರ್ಮಿಕರ ಶೋಷಣೆ (Forced Labour) ತಡೆಯುವಲ್ಲಿ ವಿಫಲವಾಗಿರುವ ದೇಶಗಳನ್ನು ಗುರಿಯಾಗಿಸಿಕೊಂಡು ಈ ತೆರಿಗೆ ಹೇರಲಾಗಿದೆ ಎಂದು ಟ್ರಂಪ್ ಆಡಳಿತ ಸಮರ್ಥಿಸಿಕೊಂಡಿದೆ. ಆದರೆ, ಈ ತೆರಿಗೆ ನೀತಿಯಲ್ಲಿ ಕೆಲವು ದೇಶಗಳಿಗೆ ರಿಯಾಯಿತಿ ನೀಡಲಾಗಿದ್ದು, ಭಾರತದ ಮೇಲಿನ ಸುಂಕವನ್ನು ಶೇಕಡಾ 12.5ರಿಂದ 10 ಕ್ಕೆ ಇಳಿಸಲಾಗಿದೆ. ಅಷ್ಟೇ ಅಲ್ಲದೆ ತೈಲ, ನೈಸರ್ಗಿಕ ಅನಿಲ, ಗೊಬ್ಬರ ಮುಂತಾದ ಅಗತ್ಯ ವಸ್ತುಗಳಿಗೆ ಈ ಸುಂಕದಿಂದ ವಿನಾಯಿತಿ ನೀಡಲಾಗಿದೆ.
ಕೋರ್ಟ್ ತೀರ್ಪುಗಳಿಗೆ ಟ್ರಂಪ್ ಸವಾಲು
ಒರೆಗಾನ್ ಮತ್ತು ನ್ಯೂಯಾರ್ಕ್ ಸೇರಿದಂತೆ 25 ರಾಜ್ಯಗಳು ಸಲ್ಲಿಸಿರುವ ಅರ್ಜಿಯಲ್ಲಿ, ಈ ಹಿಂದೆ ನ್ಯಾಯಾಲಯಗಳು ಅಕ್ರಮ ಎಂದು ರದ್ದುಗೊಳಿಸಿದ್ದ ಆಮದು ತೆರಿಗೆಗಳನ್ನು ಟ್ರಂಪ್ ಆಡಳಿತವು ಬೇರೊಂದು ಕಾನೂನು ನೆಪವೊಡ್ಡಿ ಮರಳಿ ತರಲು ಯತ್ನಿಸುತ್ತಿದೆ ಎಂದು ವಾದಿಸಲಾಗಿದೆ. “ಹಿಂದಿನ ಪ್ರಕರಣಗಳಲ್ಲಿ ಪ್ರತಿಯೊಂದು ಹಂತದಲ್ಲೂ ಹಿನ್ನಡೆ ಅನುಭವಿಸಿದ್ದರೂ, ಟ್ರಂಪ್ ಅವರು ಅಮೆರಿಕದ ಶ್ರಮಿಕ ಕುಟುಂಬಗಳು ಮತ್ತು ಸ್ಥಳೀಯ ಉದ್ಯಮಗಳ ಮೇಲೆ ಮತ್ತೆ ಆರ್ಥಿಕ ಗೊಂದಲವನ್ನು ಹೇರಲು ಯತ್ನಿಸುತ್ತಿದ್ದಾರೆ” ಎಂದು ಒರೆಗಾನ್ನ ಅಟಾರ್ನಿ ಜನರಲ್ ಡಾನ್ ರೇಫೀಲ್ಡ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಕಾನೂನು ಹಾದಿ ಬದಲಿಸಿದ ಶ್ವೇತಭವನ
ತಮ್ಮ ಆರ್ಥಿಕ ಕಾರ್ಯಸೂಚಿಯ ಪ್ರಮುಖ ಭಾಗವಾಗಿರುವ ಸುಂಕ ನೀತಿಯನ್ನು ಉಳಿಸಿಕೊಳ್ಳಲು ಟ್ರಂಪ್ ಹೊಸ ತಂತ್ರ ಅನುಸರಿಸಿದ್ದಾರೆ. ಈ ಹಿಂದೆ ಜಾಗತಿಕ ಸುಂಕ ಹೇರಲು ಬಳಸಿದ್ದ ‘ಅಂತಾರಾಷ್ಟ್ರೀಯ ತುರ್ತು ಆರ್ಥಿಕ ಅಧಿಕಾರ ಕಾಯ್ದೆ’ (IEEPA) ಯನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿತ್ತು. ಅದಾದ ಬಳಿಕ ತಂದ ಇತರ ತಾತ್ಕಾಲಿಕ ಕಾಯ್ದೆಗಳಿಗೂ ಹಿನ್ನಡೆಯಾಗಿತ್ತು. ಹೀಗಾಗಿ, ಈ ಬಾರಿ 1974ರ ಟ್ರೇಡ್ ಆಕ್ಟ್ನ ‘ಸೆಕ್ಷನ್ 301’ ಅನ್ನು ಬಳಸಿಕೊಂಡು ತೆರಿಗೆ ವಿಧಿಸಲಾಗಿದೆ. ಆದರೆ ಈ ನಿಯಮವನ್ನು ಇಡೀ ಜಗತ್ತಿಗೆ ಅನ್ವಯಿಸುವ ಬದಲು ನಿರ್ದಿಷ್ಟ ದೇಶಗಳ ವಿರುದ್ಧ ಮಾತ್ರ ಬಳಸಬಹುದು ಎಂಬುದು ರಾಜ್ಯಗಳ ವಾದವಾಗಿದ್ದು, ಈ ಪ್ರಕರಣವು ಟ್ರಂಪ್ ಸರ್ಕಾರದ ವಾಣಿಜ್ಯ ನೀತಿಗೆ ಹೊಸ ಸವಾಲಾಗಿ ಪರಿಣಮಿಸಿದೆ.
ಇದನ್ನೂ ಓದಿ : ಟೀಮ್ ಇಂಡಿಯಾದಲ್ಲಿ ಭಿನ್ನಮತದ ಹೊಗೆ : ಗಂಭೀರ್ ಕಾರ್ಯವೈಖರಿ ಬಗ್ಗೆ ಹಿರಿಯ ಆಟಗಾರರ ಅಸಮಾಧಾನ!
