ಲಂಡನ್: ನಡೆಯುತ್ತಿರುವ 2026ರ ಐಸಿಸಿ ಟಿ20 ವಿಶ್ವಕಪ್ನ ಸೆಮಿಫೈನಲ್ ಪಂದ್ಯದಲ್ಲಿ ಭಾರತದ ವಿರುದ್ಧ 7 ರನ್ಗಳ ರೋಚಕ ಸೋಲು ಅನುಭವಿಸಿರುವ ಇಂಗ್ಲೆಂಡ್ ತಂಡ ಟೂರ್ನಿಯಿಂದ ಹೊರಬಿದ್ದಿದೆ. ಈ ಬೆನ್ನಲ್ಲೇ ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್ ಅವರು, ಹಾಲಿ ಕೋಚ್ ಬ್ರೆಂಡನ್ ಮೆಕಲಮ್ ಹಾಗೂ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯ (ಇಸಿಬಿ) ಕಾರ್ಯವೈಖರಿಯನ್ನು ತೀವ್ರವಾಗಿ ಟೀಕಿಸಿದ್ದಾರೆ.
“ನಾವು ಕೇವಲ ರೋಚಕ ಕ್ರಿಕೆಟ್ ಆಡುತ್ತಿದ್ದೇವೆಯೇ ಹೊರತು ಟ್ರೋಫಿಗಳನ್ನು ಗೆಲ್ಲುತ್ತಿಲ್ಲ” ಎಂದು ಅವರು ಕ್ರಿಕ್ಬಜ್ ಲೈವ್ ಚರ್ಚೆಯಲ್ಲಿ ಕಟುವಾಗಿ ನುಡಿದಿದ್ದಾರೆ. ಬ್ರೆಂಡನ್ ಮೆಕಲಮ್ ಮಾರ್ಗದರ್ಶನದಲ್ಲಿ ಇಂಗ್ಲೆಂಡ್ ತಂಡವು ಇತ್ತೀಚಿನ ದಿನಗಳಲ್ಲಿ ಟಿ20 ವಿಶ್ವಕಪ್, ಚಾಂಪಿಯನ್ಸ್ ಟ್ರೋಫಿ ಮತ್ತು 2025-26ರ ಆ್ಯಶಸ್ ಸರಣಿ ಸೇರಿದಂತೆ ಯಾವುದೇ ಪ್ರಮುಖ ಟ್ರೋಫಿಗಳನ್ನು ಗೆಲ್ಲುವಲ್ಲಿ ವಿಫಲವಾಗಿರುವುದನ್ನು ಅವರು ಬೊಟ್ಟು ಮಾಡಿದ್ದಾರೆ.
“ಟ್ರೋಫಿ ಇಲ್ಲದೆ ಬರಿ ಮನರಂಜನೆ ನೀಡುತ್ತಿದ್ದೇವೆ”
ಮೈಕಲ್ ವಾನ್ ತಮ್ಮ ಅಸಮಾಧಾನವನ್ನು ಹೊರಹಾಕುತ್ತಾ, “ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯು ವಾಸ್ತವವನ್ನು ಒಪ್ಪಿಕೊಳ್ಳಬೇಕು. ಕಳೆದ ಮೂರು ವರ್ಷಗಳಲ್ಲಿ ನಾವು ಅತ್ಯಂತ ರೋಚಕ ಕ್ರಿಕೆಟ್ ಆಡಿದ್ದೇವೆ ಎಂಬುದು ನಿಜ. ಆದರೆ ನಾವು ‘ಬ್ರೈಡ್ಸ್ಮೇಡ್ಗಳಂತೆ’ (ಅತಿಥಿಗಳಂತೆ) ಆಗುತ್ತಿದ್ದೇವೆ ವಿನಃ ಟ್ರೋಫಿ ಗೆಲ್ಲುತ್ತಿಲ್ಲ. ನಾವು ಆ್ಯಶಸ್ ಸರಣಿ ಗೆದ್ದಿಲ್ಲ, ತವರಿನಲ್ಲಿ ಅಥವಾ ಹೊರಗೆ ಭಾರತವನ್ನು ಸೋಲಿಸಿಲ್ಲ, ಯಾವುದೇ ಐಸಿಸಿ ಈವೆಂಟ್ ಗೆದ್ದಿಲ್ಲ. ಕೆರಿಬಿಯನ್ ನೆಲದಲ್ಲಿ, ಚಾಂಪಿಯನ್ಸ್ ಟ್ರೋಫಿಯಲ್ಲಿ ನಮ್ಮ ಪ್ರದರ್ಶನ ಕಳಪೆಯಾಗಿತ್ತು, ಇದೀಗ ಟಿ20 ವಿಶ್ವಕಪ್ನಲ್ಲೂ ಅದೇ ಪುನರಾವರ್ತನೆಯಾಗಿದೆ” ಎಂದು ಅವರು ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.
ಇಸಿಬಿಗೆ ಬಾರ್ಸಿಲೋನಾ ಫುಟ್ಬಾಲ್ ಕ್ಲಬ್ನ ಉದಾಹರಣೆ
ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯ ನಿರ್ಧಾರಗಳನ್ನು ಪ್ರಶ್ನಿಸಿರುವ ವಾನ್, ಇಡೀ ತಂಡವನ್ನು ಬದಲಾಯಿಸುವ ಬದಲು, ಕೋಚಿಂಗ್ ಮತ್ತು ಮ್ಯಾನೇಜ್ಮೆಂಟ್ ವಿಭಾಗದಲ್ಲಿ ಕೆಲವು ಅಗತ್ಯ ಬದಲಾವಣೆಗಳನ್ನು ಮಾಡಬೇಕು ಎಂದು ಸಲಹೆ ನೀಡಿದ್ದಾರೆ. ಇದಕ್ಕಾಗಿ ಬಾರ್ಸಿಲೋನಾ ಫುಟ್ಬಾಲ್ ಕ್ಲಬ್ನ ಉದಾಹರಣೆ ನೀಡಿದ ಅವರು, “ಬಾರ್ಸಿಲೋನಾ ಯಾವಾಗಲೂ ತಮ್ಮದೇ ಕ್ಲಬ್ನೊಳಗಿನ ತರಬೇತುದಾರರನ್ನು ಪ್ರೋತ್ಸಾಹಿಸುತ್ತದೆ. ಒಬ್ಬ ಮ್ಯಾನೇಜರ್ ಹೋದರೆ, ಅವರ ಜಾಗ ತುಂಬಲು ಮತ್ತೊಬ್ಬರು ಸಿದ್ಧರಿರುತ್ತಾರೆ. ಅದೇ ರೀತಿ ಇಂಗ್ಲೆಂಡ್ ಕ್ರಿಕೆಟ್ನಲ್ಲೂ ಒಂದು ವ್ಯವಸ್ಥೆ ಇರಬೇಕು” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಮುಂದಿನ ಕೋಚ್ ಯಾರು ಎಂಬ ಆತಂಕ
ಇಂಗ್ಲೆಂಡ್ನ ಭವಿಷ್ಯದ ಕೋಚಿಂಗ್ ವ್ಯವಸ್ಥೆಯ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ ವಾನ್, “ನಮ್ಮಲ್ಲಿ ಒಬ್ಬರು ಹೋದರೆ ಎಲ್ಲರೂ ಒಟ್ಟಿಗೆ ಹೋಗುವಂತಹ ವಾತಾವರಣ ಸೃಷ್ಟಿಯಾಗಿದೆ. ಒಂದು ವೇಳೆ ಬ್ರೆಂಡನ್ ಮೆಕಲಮ್ (ಬಾಜ್) ನಾಳೆ ನನಗೆ ಸಾಕು ಎಂದು ಕೋಚ್ ಹುದ್ದೆ ತೊರೆದರೆ, ಅವರ ಜಾಗ ತುಂಬಲು ನಮ್ಮಲ್ಲಿ ಯಾರು ಸಿದ್ಧರಿದ್ದಾರೆ? ಯಾರೊಬ್ಬರೂ ಇಲ್ಲ. ಇದು ನಮ್ಮ ವ್ಯವಸ್ಥೆಯ ಬಹುದೊಡ್ಡ ವೈಫಲ್ಯ” ಎಂದು ಮೈಕಲ್ ವಾನ್ ಎಚ್ಚರಿಸಿದ್ದಾರೆ. ಈ ಮೂಲಕ ಅವರು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯು ತಕ್ಷಣವೇ ಭವಿಷ್ಯದ ನಾಯಕತ್ವವನ್ನು ಸಿದ್ಧಪಡಿಸುವತ್ತ ಗಮನಹರಿಸಬೇಕು ಎಂದು ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ : ಅಭಿಷೇಕ್ ಶರ್ಮಾ ಮತ್ತೆ ಫೇಲ್.. ಅಭಿಮಾನಿಗಳಲ್ಲಿ ನಿರಾಶೆ!
