ಬೆಂಗಳೂರು : ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ತಂಡವನ್ನು ಮುನ್ನಡೆಸುತ್ತಿರುವ ನಾಯಕ ಶುಭ್ಮನ್ ಗಿಲ್ ತಮ್ಮ ಚುರುಕಾದ ಫೀಲ್ಡಿಂಗ್ ಮೂಲಕ ಕ್ರಿಕೆಟ್ ಅಭಿಮಾನಿಗಳನ್ನು ಬೆರಗುಗೊಳಿಸಿದ್ದಾರೆ. ಗಾಲೆಯ ಅಂತರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದ ಮೂರನೇ ದಿನದಾಟದಲ್ಲಿ ಗಿಲ್ ಹಿಡಿದ ಕಣ್ಣುಕೋರೈಸುವ ಒಂಟಿ ಕೈಯ ಕ್ಯಾಚ್ ಪ್ರೇಕ್ಷಕರನ್ನು ತುದಿಗಾಲಲ್ಲಿ ನಿಲ್ಲುವಂತೆ ಮಾಡಿದೆ. ಈ ಅದ್ಭುತ ಕ್ಯಾಚ್ನ ವಿಡಿಯೋ ಇದೀಗ ಕ್ರೀಡಾ ವಲಯದಲ್ಲಿ ಭಾರಿ ವೈರಲ್ ಆಗಿದ್ದು, ಮಾಜಿ ಕ್ರಿಕೆಟಿಗರು ಹಾಗೂ ದಿಗ್ಗಜರು ಗಿಲ್ ಅವರ ಫಿಟ್ನೆಸ್ ಹಾಗೂ ಚುರುಕುತನವನ್ನು ಕೊಂಡಾಡುತ್ತಿದ್ದಾರೆ.
ಲಂಕಾ ಇನ್ನಿಂಗ್ಸ್ನ ವೇಳೆ ಸ್ಪಿನ್ನರ್ ಕುಲದೀಪ್ ಯಾದವ್ ಅವರ ಎಸೆತವನ್ನು ಎದುರಿಸಿದ ಕಮಿಂದು ಮೆಂಡಿಸ್, ಚೆಂಡನ್ನು ಕವರ್ಸ್ ಕಡೆಗೆ ಬಾರಿಸುವ ಸಾಹಸಕ್ಕೆ ಕೈಹಾಕಿದರು. ಕ್ರೀಸ್ನಿಂದ ಕೊಂಚ ಮುಂದೆ ಬಂದು ಆಡಿದ ಮೆಂಡಿಸ್ ಲೆಕ್ಕಾಚಾರ ಸಂಪೂರ್ಣವಾಗಿ ತಪ್ಪಿತ್ತು. ಚೆಂಡು ಗಾಳಿಯಲ್ಲಿ ಶಾರ್ಟ್ ಎಕ್ಸ್ಟ್ರಾ ಕವರ್ ಕಡೆಗೆ ವೇಗವಾಗಿ ಹಾರಿಬಂತು. ಈ ವೇಳೆ ಅಲ್ಲೇ ಫೀಲ್ಡಿಂಗ್ ಮಾಡುತ್ತಿದ್ದ ನಾಯಕ ಶುಭ್ಮನ್ ಗಿಲ್, ತಮ್ಮ ಎಡಭಾಗಕ್ಕೆ ಗಾಳಿಯಲ್ಲಿ ಸಂಪೂರ್ಣವಾಗಿ ಡೈವ್ ಹೊಡೆದು ಕೇವಲ ಒಂಟಿ ಕೈಯಲ್ಲಿ ಚೆಂಡನ್ನು ಲಪಟಾಯಿಸಿದರು. ಚೆಂಡು ನೆಲಕ್ಕುರುಳುವ ಕೇವಲ ಕೆಲವೇ ಇಂಚುಗಳ ಅಂತರದಲ್ಲಿ ಗಿಲ್ ತಮ್ಮ ಎಡಗೈಯನ್ನು ಚಾಚಿ ಅತ್ಯಂತ ಸುರಕ್ಷಿತವಾಗಿ ಕ್ಯಾಚ್ ಹಿಡಿದರು. ಕ್ಯಾಚ್ ಹಿಡಿದ ತಕ್ಷಣವೇ ಸಂಭ್ರಮದಿಂದ ಎದ್ದು ನಿಂತ ಗಿಲ್, ಚೆಂಡನ್ನು ಗಾಳಿಯಲ್ಲಿ ತೂರಿ ತಮ್ಮ ಆನಂದವನ್ನು ವ್ಯಕ್ತಪಡಿಸಿದರು. ಭಾರತದ ಸಹ ಆಟಗಾರರು ಕೂಡ ಅಷ್ಟೇ ವೇಗವಾಗಿ ಓಡಿಬಂದು ನಾಯಕನ ಈ ಅದ್ಭುತ ಕ್ಯಾಚ್ ಅನ್ನು ಸಂಭ್ರಮಿಸಿದರು.
ಕುಲದೀಪ್ ಯಾದವ್ ಸ್ಪಿನ್ ಮೋಡಿ, ಸಂಕಷ್ಟಕ್ಕೆ ಸಿಲುಕಿದ ಲಂಕಾ
ಭಾರತದ ಬೃಹತ್ ಮೊತ್ತವನ್ನು ಬೆನ್ನಟ್ಟುವ ಒತ್ತಡದಲ್ಲಿದ್ದ ಶ್ರೀಲಂಕಾ ತಂಡಕ್ಕೆ ಭಾರತೀಯ ಸ್ಪಿನ್ನರ್ಗಳು ಆರಂಭಿಕ ಆಘಾತ ನೀಡುವಲ್ಲಿ ಯಶಸ್ವಿಯಾದರು. ಕಮಿಂದು ಮೆಂಡಿಸ್ 25 ಎಸೆತಗಳಲ್ಲಿ ೧೪ ರನ್ ಗಳಿಸಿ ಕ್ರೀಸ್ ಕಚ್ಚಿ ನಿಲ್ಲುವ ಮುನ್ಸೂಚನೆ ನೀಡಿದ್ದರು. ಆದರೆ ಕುಲದೀಪ್ ಯಾದವ್ ಅವರ ಸ್ಪಿನ್ ಮೋಡಿಯೆದುರು ಹಾಗೂ ಗಿಲ್ ಅವರ ಅಸಾಮಾನ್ಯ ಚುರುಕುತನದ ಮುಂದೆ ಅವರ ಆಟ ನಡೆಯಲಿಲ್ಲ. ಮೆಂಡಿಸ್ ವಿಕೆಟ್ ಪತನದೊಂದಿಗೆ ಲಂಕಾ ತಂಡ ಕೇವಲ 59 ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡು ತೀವ್ರ ಸಂಕಷ್ಟಕ್ಕೆ ಸಿಲುಕಿತು. ಕುಲದೀಪ್ ಯಾದವ್, ರವೀಂದ್ರ ಜಡೇಜಾ ಹಾಗೂ ಮಾನವ್ ಸುತಾರ್ ಅವರ ಸ್ಪಿನ್ ದಾಳಿಗೆ ತತ್ತರಿಸಿದ ಆತಿಥೇಯರು ಮೊದಲ ಸೆಷನ್ ಮುಕ್ತಾಯದ ವೇಳೆಗೆ ಕೇವಲ 99 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಪರದಾಡಿದರು.
ದಿಗ್ಗಜರಿಂದಲೂ ಗಿಲ್ ಚುರುಕುತನಕ್ಕೆ ಭಾರೀ ಮೆಚ್ಚುಗೆ
ಶುಭ್ಮನ್ ಗಿಲ್ ಅವರ ಈ ಸ್ಟನ್ನಿಂಗ್ ಕ್ಯಾಚ್ ಕೇವಲ ಕ್ರೀಡಾಂಗಣದಲ್ಲಿದ್ದ ಪ್ರೇಕ್ಷಕರನ್ನು ಮಾತ್ರವಲ್ಲ, ಟಿವಿ ಪರದೆ ಮುಂದೆ ಕುಳಿತಿದ್ದ ದಿಗ್ಗಜ ಕಾಮೆಂಟೇಟರ್ಗಳನ್ನು ಬೆರಗುಗೊಳಿಸಿದೆ. ವೆಸ್ಟ್ ಇಂಡೀಸ್ನ ದಂತಕಥೆ ಇಯಾನ್ ಬಿಷಪ್ ಅವರು ಗಿಲ್ ಕ್ಯಾಚ್ಗೆ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. “ಶುಭ್ಮನ್ ಗಿಲ್ ಹಿಡಿದ ಆ ಕ್ಯಾಚ್… ನಿಜಕ್ಕೂ ಅದ್ಭುತ” ಎಂದು ಅವರು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಇನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳು ಗಿಲ್ ಅವರನ್ನು “ಪ್ರಸ್ತುತ ಅಂತರಾಷ್ಟ್ರೀಯ ಕ್ರಿಕೆಟ್ನ ಅತ್ಯುತ್ತಮ ಫೀಲ್ಡರ್” ಎಂದು ಹಾಡಿ ಹೊಗಳುತ್ತಿದ್ದಾರೆ.
ಭಾರತದ ಬೃಹತ್ ಮೊತ್ತ, ಪಂದ್ಯದ ಮೇಲೆ ಬಿಗಿ ಹಿಡಿತ
ಇದಕ್ಕೂ ಮುನ್ನ ಬ್ಯಾಟಿಂಗ್ ಮಾಡಿದ ಭಾರತ ತಂಡ ತನ್ನ ಮೊದಲ ಇನ್ನಿಂಗ್ಸ್ನಲ್ಲಿ 462 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತ್ತು. ಯುವ ಆಟಗಾರ ದೇವದತ್ ಪಡಿಕ್ಕಲ್ ಅವರ ಚೊಚ್ಚಲ ಹಾಗೂ ಆಕರ್ಷಕ 168 ರನ್ಗಳ ಶತಕ, ಕೆ.ಎಲ್. ರಾಹುಲ್ ಅವರ ರನ್ ಹಾಗೂ ವಿಕೆಟ್ ಕೀಪರ್ ಧ್ರುವ್ ಜುರೆಲ್ ಅವರ ಸಮಯೋಚಿತ 51 ರನ್ಗಳ ನೆರವಿನಿಂದ ಭಾರತ ಲಂಕಾ ಬೌಲರ್ಗಳನ್ನು ಕಾಡಿತ್ತು. ಬ್ಯಾಟಿಂಗ್ನಲ್ಲಿ ಸಾಧಾರಣ ಪ್ರದರ್ಶನ ನೀಡಿದ್ದ ಗಿಲ್, ಫೀಲ್ಡಿಂಗ್ ಹಾಗೂ ತಮ್ಮ ಆಕ್ರಮಣಕಾರಿ ನಾಯಕತ್ವದಲ್ಲಿ ತಂಡವನ್ನು ಮುಂಚೂಣಿಯಿಂದ ಮುನ್ನಡೆಸುವ ಮೂಲಕ ಗಮನ ಸೆಳೆದಿದ್ದಾರೆ. ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡರಲ್ಲೂ ಪ್ರಾಬಲ್ಯ ಮೆರೆದಿರುವ ಟೀಮ್ ಇಂಡಿಯಾ ಗಾಲೆ ಟೆಸ್ಟ್ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿದೆ.
ಇದನ್ನೂ ಓದಿ : ಕಪಿಲ್ ದೇವ್ ಬಳಿಕ 4000 ರನ್, 350 ವಿಕೆಟ್ ಕಬಳಿಸಿದ ವಿಶಿಷ್ಟ ಕ್ಲಬ್ ಸೇರಿದ ಜಡೇಜಾ
