ಫಿಫಾ ವಿಶ್ವಕಪ್ ಫೈನಲ್‌ ; ಏರಿಕ್ ಗಾರ್ಸಿಯಾ ಗಾವಿಗೆ ಪಂಚ್ ಮಾಡಿದ ಲಿಯಾಂಡ್ರೊ ಪರೇಡೆಸ್!

ನ್ಯೂಯಾರ್ಕ್ ​​: ಫಿಫಾ ವಿಶ್ವಕಪ್ ಫೈನಲ್ ಪಂದ್ಯವು ರೋಮಾಂಚಕಾರಿ ಅಂತ್ಯದ ಜೊತೆಗೆ ಮೈದಾನದಲ್ಲಿ ಅಹಿತಕರ ಘಟನೆಗಳಿಗೂ ಸಾಕ್ಷಿಯಾಯಿತು. ಹಾಲಿ ಚಾಂಪಿಯನ್ ಅರ್ಜೆಂಟೈನಾ ತಂಡವನ್ನು ಮಣಿಸಿ ಸ್ಪೇನ್ ವಿಶ್ವಕಪ್ ಕಿರೀಟ ಮುಡಿಗೇರಿಸಿಕೊಳ್ಳುತ್ತಿದ್ದಂತೆಯೇ, ಮೈದಾನದಲ್ಲಿ ಬಿಗುವಿನ ವಾತಾವರಣ ನಿರ್ಮಾಣವಾಯಿತು. ಸೋಲಿನ ಹತಾಶೆಯಲ್ಲಿದ್ದ ಅರ್ಜೆಂಟೈನಾ ಆಟಗಾರರು ತಾಳ್ಮೆ ಕಳೆದುಕೊಂಡಿದ್ದರು.

ನಿರ್ಣಾಯಕ ಪಂದ್ಯದ ಮುಕ್ತಾಯದ ಸಿಳ್ಳೆ ಮೊಳಗುತ್ತಿದ್ದಂತೆಯೇ ವಿಜಯದ ಸಂಭ್ರಮಾಚರಣೆಯಲ್ಲಿದ್ದ ಸ್ಪೇನ್ ಆಟಗಾರರೊಂದಿಗೆ ಅರ್ಜೆಂಟೈನಾ ಮಿಡ್-ಫೀಲ್ಡರ್ ಲಿಯಾಂಡ್ರೊ ಪರೇಡೆಸ್ ಮಾತಿನ ಚಕಮಕಿಗೆ ಇಳಿದ ಪರಿಣಾಮ ಮೈದಾನದಲ್ಲಿ ಗದ್ದಲದ ವಾತಾವರಣ ಸೃಷ್ಟಿಯಾಯಿತು.

ಎರಿಕ್ ಗಾರ್ಸಿಯಾ ಮತ್ತು ಗಾವಿ ಮೇಲೆ ಎರಗಿದ ಪರೇಡೆಸ್

ಗೆಲುವಿನ ಖುಷಿಯಲ್ಲಿದ್ದ ಸ್ಪೇನ್ ತಂಡದ ಡಿಫೆಂಡರ್ ಎರಿಕ್ ಗಾರ್ಸಿಯಾ ಅವರ ಬಳಿ ಆಕ್ರಮಣಕಾರಿಯಾಗಿ ನುಗ್ಗಿದ ಪರೇಡೆಸ್, ಇದ್ದಕ್ಕಿದ್ದಂತೆ ಅವರನ್ನು ಎರಡು ಬಾರಿ ಗುದ್ದಿದರು. ಕ್ರೀಡಾಸ್ಫೂರ್ತಿಗೆ ಮಸಿ ಬಳಿಯುವಂತಹ ಈ ಘಟನೆ ನಡೆಯುತ್ತಿದ್ದಂತೆಯೇ, ತಮ್ಮ ಬಾರ್ಸಿಲೋನಾ ಸಹ ಆಟಗಾರನನ್ನು ರಕ್ಷಿಸಲು ಮತ್ತು ಪರಿಸ್ಥಿತಿಯನ್ನು ತಿಳಿಗೊಳಿಸಲು ಸ್ಪೇನ್ ಆಟಗಾರ ಗಾವಿ ಮಧ್ಯಪ್ರವೇಶಿಸಿದರು.

ಆದರೂ ಕೋಪದ ಭರದಲ್ಲಿದ್ದ ಪರೇಡೆಸ್, ಗಾವಿ ಅವರ ಮೇಲೂ ಹಲ್ಲೆ ಮಾಡಲು ಕೈ ಎತ್ತಿದರು. ಈ ವೇಳೆ ಗಾಬರಿಗೊಂಡ ಅರ್ಜೆಂಟೈನಾದ ಆಟಗಾರ ಥಿಯಾಗೊ ಅಲ್ಮಾಡಾ ತಕ್ಷಣವೇ ಗಾವಿ ಅವರನ್ನು ಹಿಂದಕ್ಕೆ ತಳ್ಳಿ ಘರ್ಷಣೆ ತಪ್ಪಿಸಲು ಯತ್ನಿಸಿದರೂ, ಪರೇಡೆಸ್ ಬಲವಾಗಿ ಬೀಸಿದ ಕೈ ಗಾವಿಯ ಮುಖಕ್ಕೆ ಅಪ್ಪಳಿಸಿತ್ತು. ಪರಿಸ್ಥಿತಿ ಕೈಮೀರುತ್ತಿರುವುದನ್ನು ಅರಿತ ಅರ್ಜೆಂಟೈನಾ ಮ್ಯಾನೇಜರ್ ಲಿಯೋನೆಲ್ ಸ್ಕಲೋನಿ ತಕ್ಷಣವೇ ಮಧ್ಯಪ್ರವೇಶಿಸಿ, ತಮ್ಮ ಆಟಗಾರರನ್ನು ಅಲ್ಲಿಂದ ಎಳೆದುಕೊಂಡು ಹೋಗುವ ಮೂಲಕ ದೊಡ್ಡ ಹೈಡ್ರಾಮಾವನ್ನು ತಡೆದರು. ಈ ಅಶಿಸ್ತಿನ ವರ್ತನೆಗಾಗಿ ಪರೇಡೆಸ್ ಅವರಿಗೆ ರೆಡ್ ಕಾರ್ಡ್ ತೋರಿಸಲಾಯಿತು.

ಹೋರಾಟದ ಪಂದ್ಯದಲ್ಲಿ ಸ್ಪೇನ್‌ಗೆ 1-0 ಅಂತರದ ರೋಚಕ ಜಯ

ಕ್ರೀಡಾಂಗಣದಲ್ಲಿ ನೆರೆದಿದ್ದ ಸಹಸ್ರಾರು ಅಭಿಮಾನಿಗಳಿಗೆ ಈ ಪಂದ್ಯ ನಿಜಕ್ಕೂ ನಾಟಕೀಯ ಅನುಭವವನ್ನು ನೀಡಿತು. ನಿಗದಿತ ಸಮಯದವರೆಗೂ ಎರಡೂ ತಂಡಗಳು ಗೋಲು ಗಳಿಸಲು ವಿಫಲವಾದ ಕಾರಣ, ಪಂದ್ಯವನ್ನು ಹೆಚ್ಚುವರಿ ಸಮಯಕ್ಕೆ ಕೊಂಡೊಯ್ಯಲಾಯಿತು. ಪಂದ್ಯದ 106ನೇ ನಿಮಿಷದಲ್ಲಿ ಸ್ಪೇನ್ ತಂಡದ ಬದಲಿ ಆಟಗಾರ ಫೆರಾನ್ ಟೊರೆಸ್ ಅವರು ಅಮೋಘ ಗೋಲು ಗಳಿಸಿ ತಂಡಕ್ಕೆ 1-0 ಅಂತರದ ಮುನ್ನಡೆ ತಂದುಕೊಟ್ಟರು. ಅಂತಿಮವಾಗಿ ಇದೇ ಗೋಲು ಸ್ಪೇನ್ ತಂಡಕ್ಕೆ ವಿಶ್ವಕಪ್ ಟ್ರೋಫಿಯನ್ನು ಒಲಿಸಿಕೊಟ್ಟಿತು.

ವಿಶೇಷವೆಂದರೆ, ನಿಗದಿತ ಸಮಯ ಮುಗಿಯುವ ಸ್ವಲ್ಪ ಹೊತ್ತಿಗೆ ಮುಂಚಿತವಾಗಿ ಅರ್ಜೆಂಟೈನಾದ ಎಂಜೊ ಫರ್ನಾಂಡಿಸ್ ಅವರು ಎರಡನೇ ಬಾರಿ ಹಳದಿ ಕಾರ್ಡ್ ಪಡೆದು ಮೈದಾನದಿಂದ ಹೊರನಡೆಯಬೇಕಾಯಿತು. ಹೀಗಾಗಿ ಅರ್ಜೆಂಟೈನಾ ಹೆಚ್ಚುವರಿ ಸಮಯವನ್ನು ಕೇವಲ ಹತ್ತು ಆಟಗಾರರೊಂದಿಗೆ ಆಡಬೇಕಾದ ಅನಿವಾರ್ಯತೆಗೆ ಸಿಲುಕಿತ್ತು. ಸ್ಪೇನ್ ತಂಡವು ಪಂದ್ಯದುದ್ದಕ್ಕೂ ಸಂಪೂರ್ಣ ಪಾರುಪತ್ಯ ಮೆರೆದಿದ್ದು, ಬರೋಬ್ಬರಿ 20 ಬಾರಿ ಗೋಲು ಗಳಿಸುವ ಯತ್ನ ಮಾಡಿತು.

ಮೆಸ್ಸಿ ಪಡೆಯ ಕನಸು ಭಗ್ನ ಮತ್ತು ಸ್ಪೇನ್ ತಂಡದ ಐತಿಹಾಸಿಕ ಸಾಧನೆ

ಈ ಸೋಲಿನೊಂದಿಗೆ ಸತತ ಎರಡನೇ ಬಾರಿಗೆ ವಿಶ್ವಕಪ್ ಗೆಲ್ಲುವ ಲಿಯೋನೆಲ್ ಮೆಸ್ಸಿ ಬಳಗದ ಕನಸು ನುಚ್ಚುನೂರಾಗಿದೆ. 2021 ಮತ್ತು 2024ರ ಕೋಪಾ ಅಮೆರಿಕ ಹಾಗೂ 2022ರ ವಿಶ್ವಕಪ್ ಗೆದ್ದು ಬೀಗಿದ್ದ ಅರ್ಜೆಂಟೈನಾ ತಂಡದ ಅದ್ಭುತ ಗೆಲುವಿನ ಓಟಕ್ಕೆ ಬ್ರೇಕ್ ಬಿದ್ದಿದೆ. ಈ ಟೂರ್ನಿಯಲ್ಲಿ ಎಂಟು ಗೋಲು ಮತ್ತು ನಾಲ್ಕು ಅಸಿಸ್ಟ್ ಮಾಡುವ ಮೂಲಕ ಮೆಸ್ಸಿ ಮಿಂಚಿದ್ದರೂ, ಫೈನಲ್ ಪಂದ್ಯದಲ್ಲಿ ತಂಡವನ್ನು ಗೆಲುವಿನ ದಡ ಸೇರಿಸಲು ಅವರಿಂದ ಸಾಧ್ಯವಾಗಲಿಲ್ಲ. ಮತ್ತೊಂದೆಡೆ, ಕೋಚ್ ಲೂಯಿಸ್ ಡೆ ಲಾ ಫ್ಯುಯೆಂಟೆ ಮಾರ್ಗದರ್ಶನದಲ್ಲಿ ಸ್ಪೇನ್ ತಂಡವು ಅದ್ಭುತ ಇತಿಹಾಸವನ್ನು ನಿರ್ಮಿಸಿದೆ. ಕೇವಲ ಒಂದು ಗೋಲನ್ನು ಮಾತ್ರವೇ ಬಿಟ್ಟುಕೊಟ್ಟು ವಿಶ್ವಕಪ್ ಚಾಂಪಿಯನ್ ಆದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಸ್ಪೇನ್ ಪಾತ್ರವಾಗಿದೆ. ಅಲ್ಲದೆ, ಸತತವಾಗಿ ಯುವೇಫಾ ಯುರೋಪಿಯನ್ ಚಾಂಪಿಯನ್‌ಷಿಪ್ ಮತ್ತು ಫಿಫಾ ವಿಶ್ವಕಪ್ ಎರಡನ್ನೂ ಗೆದ್ದ ಏಕೈಕ ರಾಷ್ಟ್ರ ಎಂಬ ತನ್ನದೇ ಹಳೆಯ ದಾಖಲೆಯನ್ನು ಸ್ಪೇನ್ ಪುನರಾವರ್ತಿಸಿದೆ.

ಇದನ್ನೂ ಓದಿ : ಫಿಫಾ ವಿಶ್ವಕಪ್‌ ಫೈನಲ್‌ನಲ್ಲಿ ಮೆಸ್ಸಿ ಪಡೆಗೆ ಸೋಲಿನ ಪೇನ್.. ಗೆದ್ದು ಬೀಗಿದ ಸ್ಪೇನ್!