ಬೆಂಗಳೂರು: ಮೊದಲೆಲ್ಲ ಷೇರು ಪೇಟೆ, ಮ್ಯೂಚುವಲ್ ಫಂಡ್ ಗಳಲ್ಲಿ ಹೂಡಿಕೆ ಮಾಡಬೇಕು ಎಂದರೆ ಲಕ್ಷಾಂತರ ರೂಪಾಯಿ ಸಂಬಳ ಇರಬೇಕು. ನಿಮಗೆ ಷೇರು ಪೇಟೆ ಬಗ್ಗೆ ಜ್ಞಾನ ಇರಬೇಕು. ಫಂಡ್ ಮ್ಯಾನೇಜರ್ ಗಳು, ಹೂಡಿಕೆ ತಜ್ಞರ ಪರಿಚಯ ಇರಬೇಕಿತ್ತು. ಆದರೆ, ಸ್ಮಾರ್ಟ್ ಫೋನ್ ಇರುವ ಕಾರಣ ಈಗ ಅಂಗೈಯಲ್ಲೇ ಹೂಡಿಕೆ ಮಾಡಬಹುದಾಗಿದೆ. ಅದರಲ್ಲೂ, ತಿಂಗಳಿಗೆ ಕನಿಷ್ಠ ಒಂದು ಸಾವಿರ ರೂಪಾಯಿಯನ್ನಾದರೂ ಹೂಡಿಕೆ ಮಾಡಬಹುದಾಗಿದೆ. ನೀವು ಹೀಗೆ ತಿಂಗಳಿಗೆ 1 ಸಾವಿರ ರೂಪಾಯಿ ಹೂಡಿಕೆ ಮಾಡಿಯೂ 2 ಲಕ್ಷ ರೂ. ಗಳಿಕೆ ಮಾಡಬಹುದಾಗಿದೆ.
ಹೌದು, ಮ್ಯೂಚುವಲ್ ಫಂಡ್ ಎಸ್ ಐಪಿ ಮೂಲಕ ನೀವು ಸಾವಿರ ರೂ. ಹೂಡಿಕೆ ಮಾಡಬಹುದು. ನೀವು ಪ್ರತಿ ತಿಂಗಳು 1000 ರೂಪಾಯಿಗಳ ಎಸ್ಐಪಿಯನ್ನು ಪ್ರಾರಂಭಿಸುತ್ತೀರಿ ಎಂದು ಭಾವಿಸೋಣ. ನೀವು ವಾರ್ಷಿಕ ಶೇ.12ರಷ್ಟು ಲಾಭವನ್ನು ಪಡೆದರೆ, ನಿಮ್ಮ ಹಣವು ಸಂಯೋಜನೆಯ ಮ್ಯಾಜಿಕ್ ಮೂಲಕ ಬೆಳೆಯುತ್ತದೆ. ಸಂಯೋಜನೆ ಎಂದರೆ ನಿಮ್ಮ ಹಣವು ಅಸಲು ಮೊತ್ತದ ಮೇಲೆ ಮಾತ್ರವಲ್ಲದೆ ಆ ಬಡ್ಡಿಯ ಮೇಲೂ ಬಡ್ಡಿಯನ್ನು ಗಳಿಸುತ್ತದೆ.
ಈಗ ಎಸ್ಐಪಿ ಲೆಕ್ಕಾಚಾರದ ಬಗ್ಗೆ ತಿಳಿಯೋಣ. ನೀವು ಪ್ರತಿ ತಿಂಗಳು 1000 ರೂಪಾಯಿ ಹೂಡಿಕೆ ಮಾಡಿ 12% ಲಾಭ ಪಡೆದರೆ, 4 ವರ್ಷಗಳ ನಂತರ ನಿಮಗೆ 61,015 ರೂಪಾಯಿ ಸಿಗುತ್ತದೆ. ಅಂದರೆ, ಕೇವಲ 4 ವರ್ಷಗಳಲ್ಲಿ ನೀವು 60 ಸಾವಿರ ಪಡೆಯಬಹುದು. ಇದರಲ್ಲಿ 48,000 ರೂಪಾಯಿ ನಿಮ್ಮ ಹೂಡಿಕೆಯಾಗಿರುತ್ತದೆ ಮತ್ತು ಉಳಿದ 13,015 ರೂಪಾಯಿ ಬಡ್ಡಿಯಿಂದ ಗಳಿಸಬಹುದು.
ಇದೇ ರೀತಿ ನೀವು 10 ವರ್ಷಗಳ ಕಾಲ ಹೂಡಿಕೆ ಮಾಡಿದರೆ, ನಿಮ್ಮ ಹೂಡಿಕೆ ಮೊತ್ತ 1,20,000 ರೂಪಾಯಿ ಆಗಿರುತ್ತದೆ ಹಾಗು ನಿಮಗೆ ಬಡ್ಡಿ ರೂಪದಲ್ಲಿ 1,04,036 ರೂಪಾಯಿ ಸಿಗುತ್ತದೆ. ಹಾಗೆಯೇ, ಒಟ್ಟು ನಿಧಿ 2,24,036 ರೂಪಾಯಿ ಆಗಿರುತ್ತದೆ
ಗಮನಿಸಿ
ಮ್ಯೂಚುವಲ್ ಫಂಡ್ ಹೂಡಿಕೆಯ ರಿಟರ್ನ್ಸ್ ಲೆಕ್ಕಾಚಾರವು ಉದಾಹರಣೆಗೆ ಮಾತ್ರ ನೀಡಲಾಗಿದೆ. ಈ ಮಾದರಿಯ ಹೂಡಿಕೆಯು ಅಪಾಯಕಾರಿಯಾಗಿರುವುದರಿಂದ, ಏರಿಳಿತ ಇರುತ್ತದೆ. ಮಾಹಿತಿ ದೃಷ್ಟಿಯಿಂದ ಮಾತ್ರ ನಾವು ಲೇಖನ ಪ್ರಕಟಿಸಿದ್ದೇವೆ. ಯಾವುದೇ ಮಾದರಿಯ ಹೂಡಿಕೆಗಾಗಿ ತಜ್ಞರನ್ನು ಸಂಪರ್ಕಿಸುವುದು ಅತ್ಯಗತ್ಯವಾಗಿದೆ.
