ಲಂಡನ್: ಸೌದಿ ಅರೇಬಿಯಾದ 29 ವರ್ಷದ ರಾಜಕುಮಾರ ಅಬ್ದುಲ್ಲಾ ಬಿನ್ ಫಹಾದ್ ಬಿನ್ ಅಬ್ದುಲ್ಲಾ ಬಿನ್ ಅಬ್ದುಲ್ ಅಜೀಜ್ ಬಿನ್ ಜಲಾವಿ ಅಲ್ ಸೌದ್ ಅವರು ಲಂಡನ್ನ ಐಷಾರಾಮಿ ಹೋಟೆಲ್ವೊಂದರಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. ಮದ್ಯ, ಪಾರ್ಟಿ ಡ್ರಗ್ಸ್ ಹಾಗೂ ಅತಿ ಹೆಚ್ಚಿನ ಪ್ರಮಾಣದ ನಿದ್ರೆ ಮತ್ತು ಖಿನ್ನತೆ ಶಮನಕಾರಿ ಮಾತ್ರೆಗಳ ಮಾರಕ ಮಿಶ್ರಣವನ್ನು ಸೇವಿಸಿದ್ದರಿಂದ ಉಂಟಾದ ಹೃದಯಾಘಾತದಿಂದ ಅವರು ಮೃತಪಟ್ಟಿದ್ದಾರೆ ಎಂದು ಬ್ರಿಟನ್ ಕೋರ್ಟ್ ವಿಚಾರಣೆ ವೇಳೆ ಬಹಿರಂಗವಾಗಿದೆ.
ಲಂಡನ್ನ ಕೆನ್ಸಿಂಗ್ಟನ್ನಲ್ಲಿರುವ ಪ್ರಸಿದ್ಧ ಮ್ಯಾರಿಯಟ್ ಹೋಟೆಲ್ನ 5ನೇ ಮಹಡಿಯ ಕೊಠಡಿಯ ಸ್ನಾನಗೃಹದಲ್ಲಿ ರಾಜಕುಮಾರನ ಮೃತದೇಹ ಪತ್ತೆಯಾಗಿತ್ತು. ಹೋಟೆಲ್ ನೌಕರರು ತಕ್ಷಣವೇ ಆಂಬ್ಯುಲೆನ್ಸ್ ಮತ್ತು ತುರ್ತು ಸೇವೆಗೆ ಕರೆ ನೀಡಿದರಾದರೂ, ವೈದ್ಯಕೀಯ ಸಿಬ್ಬಂದಿ ಬರುವಷ್ಟರಲ್ಲಿ ಅವರು ಮೃತಪಟ್ಟಿರುವುದಾಗಿ ಘೋಷಿಸಲಾಯಿತು.
ದೇಹದಲ್ಲಿತ್ತು ಭಾರೀ ಪ್ರಮಾಣದ ಡ್ರಗ್ಸ್
ಮರಣೋತ್ತರ ಪರೀಕ್ಷೆ ಹಾಗೂ ವಿಷವಿಜ್ಞಾನ (Toxicology) ವರದಿಯ ಪ್ರಕಾರ, ರಾಜಕುಮಾರ ಅಬ್ದುಲ್ಲಾ ಅವರ ರಕ್ತದಲ್ಲಿ ಭಾರಿ ಪ್ರಮಾಣದಲ್ಲಿ ಮದ್ಯವಿತ್ತು. ಇದು ಬ್ರಿಟನ್ನಲ್ಲಿ ವಾಹನ ಚಾಲನೆಗೆ ಅನುಮತಿಸಲಾದ ಕಾನೂನುಬದ್ಧ ಮಿತಿಗಿಂತ ಮೂರು ಪಟ್ಟು ಹೆಚ್ಚಾಗಿತ್ತು. ಇದರ ಜೊತೆಗೆ ಪಾರ್ಟಿಗಳಲ್ಲಿ ಬಳಸಲಾಗುವ ಅತ್ಯಂತ ಅಪಾಯಕಾರಿ ‘ಜಿಹೆಚ್ಬಿ’ (GHB) ಡ್ರಗ್ ಹಾಗೂ ಗಾಂಜಾ, ಝಾನಾಕ್ಸ್ ಮತ್ತು ಮಾನಸಿಕ ಆತಂಕ ನಿವಾರಿಸುವ ಪ್ರಿಸ್ಕ್ರಿಪ್ಷನ್ ಮಾತ್ರೆಗಳ ಅಂಶಗಳು ಅವರ ದೇಹದಲ್ಲಿ ಪತ್ತೆಯಾಗಿವೆ. ಈ ಎಲ್ಲಾ ರಾಸಾಯನಿಕಗಳ ಮಾರಕ ಸಂಯೋಜನೆಯೇ ಅವರ ಹೃದಯಾಘಾತಕ್ಕೆ ಪ್ರಮುಖ ಕಾರಣ ಎಂದು ವೈದ್ಯಕೀಯ ತಜ್ಞರು ಖಚಿತಪಡಿಸಿದ್ದಾರೆ.
ವ್ಯಸನ ಮುಕ್ತಿ ಯತ್ನದಲ್ಲಿದ್ದ ರಾಜಕುಮಾರ
ರಾಜಕುಮಾರ ಅಬ್ದುಲ್ಲಾ ಅವರು ಸುದೀರ್ಘ ಕಾಲದಿಂದ ಮದ್ಯಪಾನ ಮತ್ತು ಮಾತ್ರೆಗಳ ಅತಿಯಾದ ಸೇವನೆಯ ವ್ಯಸನದಿಂದ ಬಳಲುತ್ತಿದ್ದರು ಎಂದು ಕೋರ್ಟ್ಗೆ ತಿಳಿಸಲಾಗಿದೆ. ಇದಕ್ಕಾಗಿ ಅವರು 2025ರ ಆಗಸ್ಟ್ನಲ್ಲಿ ಲಂಡನ್ನ ಪ್ರಸಿದ್ಧ ಪ್ರಿಯೋರಿ ಕ್ಲಿನಿಕ್ನಲ್ಲಿ ದಾಖಲಾಗಿ, ಡಿಟಾಕ್ಸಿಫಿಕೇಶನ್ (ದೇಹದಿಂದ ನಶೆಯಂಶ ಹೊರಹಾಕುವ) ಚಿಕಿತ್ಸೆಯನ್ನು ಪೂರ್ಣಗೊಳಿಸಿದ್ದರು. ಚಿಕಿತ್ಸೆಯ ನಂತರ ಚೇತರಿಸಿಕೊಂಡಿದ್ದರೂ, ತದನಂತರದ ವೈದ್ಯಕೀಯ ತಪಾಸಣೆಗಳಿಗೆ ಅವರು ಹಾಜರಾಗಿರಲಿಲ್ಲ.
ಪ್ರಕರಣದ ವಿಚಾರಣೆ ನಡೆಸಿದ ಕೋರ್ಟ್, ಇದೊಂದು ಆಕಸ್ಮಿಕ ಅಥವಾ ದುಸ್ಸಾಹಸದ ದುರಂತ (Death by Misadventure) ಎಂದು ತೀರ್ಪು ನೀಡಿದೆ. ರಾಜಕುಮಾರ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲು ಯಾವುದೇ ಡೆತ್ ನೋಟ್ ಅಥವಾ ಸಾಕ್ಷ್ಯಾಧಾರಗಳು ಸಿಕ್ಕಿಲ್ಲ. ಹಾಗೆಯೇ ಕೊಠಡಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅವರ ಮರಣದ ಸಮಯದಲ್ಲಿ ಕೊಠಡಿಯಲ್ಲಿ ಬೇರೆ ಯಾರೂ ಇರಲಿಲ್ಲ ಎಂಬುದು ದೃಢಪಟ್ಟಿದೆ.
ಸೌದಿ ಅರೇಬಿಯಾ ರಾಜಮನೆತನವು ರಾಜಕುಮಾರನ ನಿಧನವನ್ನು ಅಧಿಕೃತವಾಗಿ ದೃಢಪಡಿಸಿದ್ದು, ರಿಯಾದ್ನ ಇಮಾಮ್ ತುರ್ಕಿ ಬಿನ್ ಅಬ್ದುಲ್ಲಾ ಮಸೀದಿಯಲ್ಲಿ ಅಂತಿಮ ವಿಧಿವಿಧಾನಗಳು ನಡೆದಿವೆ.
