ವಿಶ್ವಸಂಸ್ಥೆಯಿಂದ ಹೊಸ ಜಾಗತಿಕ ನಕ್ಷೆ ಅಂಗೀಕಾರ: ಆಫ್ರಿಕಾ ಖಂಡದ ಗಾತ್ರ ಹೆಚ್ಚಳ, ಅಮೆರಿಕ-ಯುರೋಪ್ ಗಾತ್ರ ಕಡಿತ!

ನ್ಯೂಯಾರ್ಕ್: ವಿಶ್ವದ ಭೂಖಂಡಗಳ ನೈಜ ಭೌಗೋಳಿಕ ವಿಸ್ತೀರ್ಣವನ್ನು ನಿಖರವಾಗಿ ಬಿಂಬಿಸುವ ನಿಟ್ಟಿನಲ್ಲಿ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆ (UNGA) ಹೊಸ ಜಾಗತಿಕ ನಕ್ಷೆಯನ್ನು ಅಂಗೀಕರಿಸಿದೆ. ‘ಈಕ್ವಲ್ ಅರ್ಥ್ ಪ್ರೊಜೆಕ್ಷನ್’ (Equal Earth Projection) ಎಂಬ ಹೆಸರಿನ ಈ ನೂತನ ನಕ್ಷೆಯಲ್ಲಿ ಆಫ್ರಿಕಾ ಖಂಡವು ಹಿಂದಿಗಿಂತ ದೊಡ್ಡದಾಗಿ ಕಾಣಿಸಲಿದ್ದರೆ, ಉತ್ತರ ಅಮೆರಿಕ ಮತ್ತು ಯುರೋಪ್ ಖಂಡಗಳ ಗಾತ್ರ ಕಿರಿದಾಗಲಿದೆ.

164 ರಾಷ್ಟ್ರಗಳ ಬೆಂಬಲ, ಅಮೆರಿಕದಿಂದ ವಿರೋಧ
ಭೂಪ್ರದೇಶಗಳ ನೈಜ ಪ್ರಮಾಣವನ್ನು ಜಗತ್ತಿಗೆ ತೋರಿಸುವ ಉದ್ದೇಶದಿಂದ ಟೋಗೋ ದೇಶವು ಮಂಡಿಸಿದ್ದ ಈ ನಿರ್ಣಯಕ್ಕೆ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಅಭೂತಪೂರ್ವ ಬೆಂಬಲ ವ್ಯಕ್ತವಾಯಿತು. ಒಟ್ಟು 164 ದೇಶಗಳು ನಿರ್ಣಯದ ಪರವಾಗಿ ಮತ ಚಲಾಯಿಸಿದರೆ, ಅಮೆರಿಕ ಇದನ್ನು ತೀವ್ರವಾಗಿ ವಿರೋಧಿಸಿ ವಿರುದ್ಧವಾಗಿ ಮತ ಹಾಕಿತು. ಇನ್ನುಳಿದ ಆರು ದೇಶಗಳು ಮತದಾನದಿಂದ ದೂರ ಉಳಿದವು.

ಶತಮಾನಗಳ ಹಳೆಯ ನಕ್ಷೆಗೆ ವಿದಾಯ
1569ರಲ್ಲಿ ಫ್ಲೆಮಿಶ್ ಕಾರ್ಟೋಗ್ರಾಫರ್ ಗೆರಾರ್ಡಸ್ ಮರ್ಕೇಟರ್ ಎಂಬುವವರು ಸಮುದ್ರಯಾನದ ದಿಕ್ಸೂಚಿಗಾಗಿ ‘ಮರ್ಕೇಟರ್ ಪ್ರೊಜೆಕ್ಷನ್’ ನಕ್ಷೆಯನ್ನು ವಿನ್ಯಾಸಗೊಳಿಸಿದ್ದರು. ಇಷ್ಟು ದಿನ ಜಗತ್ತಿನಾದ್ಯಂತ ಬಳಸಲಾಗುತ್ತಿದ್ದ ಈ ಹಳೆಯ ನಕ್ಷೆಯು ಆಫ್ರಿಕಾ ಖಂಡದ ನೈಜ ಗಾತ್ರವನ್ನು ಸಣ್ಣದಾಗಿ ಹಾಗೂ ಯುರೋಪ್-ಅಮೆರಿಕಗಳನ್ನು ಬೃಹತ್ ಪ್ರಮಾಣದಲ್ಲಿ ಬಿಂಬಿಸುತ್ತಿತ್ತು. ಇದನ್ನು ತಿದ್ದುಪಡಿ ಮಾಡಲು ವಿಶ್ವಸಂಸ್ಥೆ ಈಗ ನೂತನ ‘ಈಕ್ವಲ್ ಅರ್ಥ್’ ನಕ್ಷೆಯನ್ನು ಬಳಸುವಂತೆ ತನ್ನ ಸದಸ್ಯ ರಾಷ್ಟ್ರಗಳಿಗೆ ಕರೆ ನೀಡಿದೆ.

ಐತಿಹಾಸಿಕ ಹೆಜ್ಜೆ ಎಂದ ಆಫ್ರಿಕಾ, ವಿಶ್ವಸಂಸ್ಥೆ ವಿರುದ್ಧ ಅಮೆರಿಕ ಅಸಮಾಧಾನ
ಈ ನಿರ್ಣಯವನ್ನು ಸ್ವಾಗತಿಸಿರುವ ವಿಶ್ವಸಂಸ್ಥೆಯ ಆಫ್ರಿಕನ್ ಮಿಷನ್, “ಇದು ಜಾಗತಿಕ ಭೂಪಟದಲ್ಲಿ ಆಫ್ರಿಕಾದ ನೈಜ ಪ್ರಮಾಣ ಮತ್ತು ಸ್ಥಾನವನ್ನು ಎತ್ತಿಹಿಡಿಯುವ ನಿಟ್ಟಿನಲ್ಲಿ ಇಟ್ಟ ಐತಿಹಾಸಿಕ ಹೆಜ್ಜೆ” ಎಂದು ಬಣ್ಣಿಸಿದೆ. ಆದರೆ, ಅಮೆರಿಕದ ಪ್ರತಿನಿಧಿ ಯಾರಿನಾ ಫೆರೆನ್ಸೆವಿಚ್ ಈ ನಿರ್ಣಯಕ್ಕೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, “ವಿಶ್ವಸಂಸ್ಥೆಯು ಜಗತ್ತಿನ ನೈಜ ಮತ್ತು ಗಂಭೀರ ಸಮಸ್ಯೆಗಳ ಮೇಲೆ ಗಮನ ಹರಿಸುವ ಬದಲು, 16ನೇ ಶತಮಾನದ ನಕ್ಷೆಗಳ ವಿಚಾರದಲ್ಲಿ ಕಾಲಹರಣ ಮಾಡುತ್ತಿದೆ” ಎಂದು ಕಿಡಿಕಾರಿದ್ದಾರೆ.