ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ಫ್ರಾಂಚೈಸಿಯು ಮುಂಬರುವ ಐಪಿಎಲ್ 2027ರ ಸೀಸನ್‌ಗಾಗಿ ತನ್ನ ಕೋಚಿಂಗ್ ಬಳಗದಲ್ಲಿ ಭಾರೀ ಬದಲಾವಣೆಗಳನ್ನು ಮಾಡಿದೆ. ಭಾರತ ತಂಡದ ಮಾಜಿ ವೇಗಿ ಜಹೀರ್ ಖಾನ್ ಅವರನ್ನು ಮುಖ್ಯ ಕೋಚ್ ಆಗಿ ಹಾಗೂ ಮೋಹಿತ್ ಶರ್ಮಾ ಅವರನ್ನು ಬೌಲಿಂಗ್ ಕೋಚ್ ಆಗಿ ನೇಮಕ ಮಾಡಿದೆ. ಐದು ಬಾರಿಯ ಚಾಂಪಿಯನ್ ಆಗಿರುವ ಸಿಎಸ್ಕೆ ತಂಡದ ಈ ಹೊಸ ಬೆಳವಣಿಗೆಯ ಬಗ್ಗೆ ಮಾಜಿ ಕ್ರಿಕೆಟಿಗರು ಹಾಗೂ ವಿಶ್ಲೇಷಕರು ತಮ್ಮದೇ ಆದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ.ಇದೇ ವೇಳೆ, ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮಾಜಿ ಬ್ಯಾಟರ್ ಎಸ್. ಬದರಿನಾಥ್ ಅವರು ಮೋಹಿತ್ ಶರ್ಮಾ ಅವರ ನೇಮಕಾತಿಯ ಬಗ್ಗೆ ಅಸಮಾಧಾನ ಹಾಗೂ ಅನುಮಾನ ವ್ಯಕ್ತಪಡಿಸಿದ್ದು, ಅವರನ್ನು ‘ಅನುಭವವಿಲ್ಲದ ಕೋಚ್’ (ರೂಕಿ ಕೋಚ್) ಎಂದು ಕರೆದಿದ್ದಾರೆ.
ಎಂಎಸ್ ಧೋನಿ ಜೊತೆಗಿನ ನಂಟೇ ನೇಮಕಕ್ಕೆ ಕಾರಣವಾ?
ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ ಎಸ್. ಬದರಿನಾಥ್, ಮೋಹಿತ್ ಶರ್ಮಾ ಅವರಿಗೆ ಕೋಚಿಂಗ್ ಕ್ಷೇತ್ರದಲ್ಲಿ ಯಾವುದೇ ಹೇಳಿಕೊಳ್ಳುವಂತಹ ಅನುಭವವಿಲ್ಲ ಎಂದು ನೇರವಾಗಿ ನುಡಿದಿದ್ದಾರೆ. ಕೋಚಿಂಗ್‌ಗೆ ಸಂಬಂಧಿಸಿದಂತೆ ಮೋಹಿತ್ ಶರ್ಮಾ ಇನ್ನೂ ಹೊಸಬರಾಗಿದ್ದಾರೆ. ಅವರ ನೇಮಕದ ಹಿಂದೆ ತಂಡದ ಮಾಜಿ ನಾಯಕ ಎಂಎಸ್ ಧೋನಿ ಅವರೊಂದಿಗಿನ ಉತ್ತಮ ಬಾಂಧವ್ಯವೇ ಪ್ರಮುಖ ಕಾರಣವಾಗಿರಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಜಹೀರ್ ಖಾನ್ ಅವರಂತಹ ಅನುಭವಿ ಆಟಗಾರ ಮತ್ತು ಕೋಚ್ ಈಗಾಗಲೇ ಇರುವಾಗ, ಮೋಹಿತ್ ಶರ್ಮಾ ಅವರನ್ನು ಕೇವಲ ಸಹಾಯಕನಾಗಿ ಆಯ್ಕೆ ಮಾಡಿರಬಹುದು ಎಂದು ಬದರಿನಾಥ್ ವಿಶ್ಲೇಷಿಸಿದ್ದಾರೆ. 2013ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮೂಲಕವೇ ಐಪಿಎಲ್ ವೃತ್ತಿಜೀವನ ಆರಂಭಿಸಿದ್ದ ಮೋಹಿತ್ ಶರ್ಮಾ, ಧೋನಿ ನಾಯಕತ್ವದಲ್ಲಿ ಭಾರತ ತಂಡದ ಪರ 2015ರ ಏಕದಿನ ವಿಶ್ವಕಪ್‌ನಲ್ಲೂ ಆಡಿದ್ದರು. 120 ಐಪಿಎಲ್ ಪಂದ್ಯಗಳಿಂದ 134 ವಿಕೆಟ್ ಪಡೆದಿರುವ ಮೋಹಿತ್, ಆಟಗಾರನಾಗಿ ಯಶಸ್ವಿಯಾಗಿದ್ದರೂ, ಕೋಚ್ ಆಗಿ ಅವರ ಸಾಮರ್ಥ್ಯದ ಬಗ್ಗೆ ಬದರಿನಾಥ್ ಅನುಮಾನ ವ್ಯಕ್ತಪಡಿಸಿದ್ದಾರೆ.
ಜಹೀರ್ ಖಾನ್ ಕೋಚಿಂಗ್ ಟ್ರ್ಯಾಕ್ ರೆಕಾರ್ಡ್ ಬಗ್ಗೆಯೂ ಪ್ರಶ್ನೆ
ಕೇವಲ ಮೋಹಿತ್ ಶರ್ಮಾ ಮಾತ್ರವಲ್ಲದೆ, ಮುಖ್ಯ ಕೋಚ್ ಆಗಿ ನೇಮಕಗೊಂಡಿರುವ ಜಹೀರ್ ಖಾನ್ ಅವರ ಟ್ರ್ಯಾಕ್ ರೆಕಾರ್ಡ್ ಬಗ್ಗೆಯೂ ಎಸ್. ಬದರಿನಾಥ್ ಕೆಲವು ಕಟು ವಾಸ್ತವಗಳನ್ನು ಮುಂದಿಟ್ಟಿದ್ದಾರೆ. ಬೌಲರ್ ಆಗಿ ಜಹೀರ್ ಖಾನ್ ಬಗ್ಗೆ ತಮಗೆ ಅಪಾರ ಗೌರವವಿದೆ, ಅವರ ಬಳಿ ಕ್ರಿಕೆಟ್‌ನ ಅಪಾರ ಜ್ಞಾನವಿದೆ ಎಂದು ಹೇಳಿದ ಬದರಿನಾಥ್, ಜಹೀರ್ ಮತ್ತು ಧೋನಿ ನಡುವಿನ ಉತ್ತಮ ಒಡನಾಟದಿಂದಾಗಿಯೇ ಈ ನೇಮಕ ನಡೆದಿರಬಹುದು ಎಂದಿದ್ದಾರೆ. ಆದರೆ, ಈ ಹಿಂದೆ ಲಕ್ನೋ ಸೂಪರ್ ಜೈಂಟ್ಸ್ (ಎಲ್ಎಸ್ಜಿ) ತಂಡಕ್ಕೆ ಮಾರ್ಗದರ್ಶಕರಾಗಿದ್ದ ಜಹೀರ್ ಖಾನ್, ಆ ತಂಡ ಪ್ಲೇ-ಆಫ್ ತಲುಪಲು ವಿಫಲವಾದ ಬಳಿಕ ಕೇವಲ ಒಂದು ಸೀಸನ್‌ನ ನಂತರ ಆ ಸ್ಥಾನದಿಂದ ಕೆಳಗಿಳಿದಿದ್ದರು. ಹೀಗಾಗಿ, ಜಹೀರ್ ಖಾನ್ ಅವರ ಕೋಚಿಂಗ್ ದಾಖಲೆ ಅಷ್ಟೊಂದು ಯಶಸ್ವಿಯಾಗಿಲ್ಲದಿರುವುದು ಕಳವಳಕಾರಿ ಎಂದು ಬದರಿನಾಥ್ ತಿಳಿಸಿದ್ದಾರೆ.
ಸಿಎಸ್ಕೆ ಬೌಲಿಂಗ್ ವಿಭಾಗದ ಮುಂದಿರುವ ಸವಾಲುಗಳು
ಕಳೆದ ಮೂರು ವರ್ಷಗಳಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಪ್ಲೇ-ಆಫ್ ಹಂತಕ್ಕೇರಲು ಸತತವಾಗಿ ವಿಫಲವಾಗುತ್ತಿದೆ. ಇದಕ್ಕೆ ತಂಡದ ದುರ್ಬಲ ಬೌಲಿಂಗ್ ವಿಭಾಗವೇ ಪ್ರಮುಖ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿಯೇ ಬೌಲಿಂಗ್ ವಿಭಾಗವನ್ನು ಬಲಪಡಿಸುವ ಉದ್ದೇಶದಿಂದ ಎಂಎಸ್ ಧೋನಿ ಅವರು ಜಹೀರ್ ಖಾನ್ ಅವರ ಹೆಸರನ್ನು ಸೂಚಿಸಿರಬಹುದು ಎಂದು ಹೇಳಲಾಗಿದೆ. ಆದರೆ, ಜಹೀರ್ ಖಾನ್ ಹಾಗೂ ಮೋಹಿತ್ ಶರ್ಮಾ ಅವರ ಈ ಹೊಸ ಜೋಡಿಯು ಸಿಎಸ್ಕೆ ತಂಡದ ಬೌಲಿಂಗ್ ವಿಭಾಗದ ಸಮಸ್ಯೆಗಳನ್ನು ಪರಿಹರಿಸಿ, ಐಪಿಎಲ್ 2027ರಲ್ಲಿ ತಂಡವನ್ನು ಮತ್ತೆ ಗೆಲುವಿನ ಹಳಿಗೆ ಮರಳಿಸುತ್ತದೆಯೇ ಎಂಬುದು ಸದ್ಯದ ಕುತೂಹಲವಾಗಿದೆ. ಬದರಿನಾಥ್ ಹೇಳುವಂತೆ, ಸಿಎಸ್ಕೆಗೆ ಉತ್ತಮ ಬೌಲಿಂಗ್ ಕೋಚ್ ಅಗತ್ಯವಿದೆ, ಆದರೆ ಈ ಹೊಸ ಕೋಚಿಂಗ್ ಬಳಗ ಎಷ್ಟರ ಮಟ್ಟಿಗೆ ಯಶಸ್ವಿಯಾಗುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.
ಇದನ್ನೂ ಓದಿ :ಸಾರ್ವಜನಿಕರೇ ಗಮನಿಸಿ ; ಆಧಾರ್ ಕಾರ್ಡ್ ತಿದ್ದುಪಡಿಗೆ ಹೊಸ ನಿಯಮಗಳು, ಇಲ್ಲಿದೆ ಡಿಟೇಲ್ಸ್!
