ಮುಂಬೈ | ಮುಂಬೈ ಇಂಡಿಯನ್ಸ್ ಮತ್ತು ಕೋಲ್ಕತ್ತ ನೈಟ್ ರೈಡರ್ಸ್ (ಕೆಕೆಆರ್) ನಡುವಿನ ಹೈವೋಲ್ಟೇಜ್ ಪಂದ್ಯದಲ್ಲಿ ಎಂದೂ ಅಷ್ಟಾಗಿ ತಪ್ಪು ಮಾಡದ ಅನುಭವಿ ಆಟಗಾರ ರೋಹಿತ್ ಶರ್ಮಾ ಅವರು ಮಾಡಿದ ಒಂದು ಎಡವಟ್ಟು ಕ್ರೀಡಾಂಗಣದಲ್ಲಿದ್ದ ಅಭಿಮಾನಿಗಳನ್ನು ದಿಗ್ಭ್ರಮೆಗೊಳಿಸಿತು.
ಪಂದ್ಯದ 15ನೇ ಓವರ್ನಲ್ಲಿ ಕೆಕೆಆರ್ನ ಯುವ ಬ್ಯಾಟರ್ ಆಂಗ್ಕ್ರಿಷ್ ರಘುವಂಶಿ ನೀಡಿದ ಅತ್ಯಂತ ಸುಲಭವಾದ ಕ್ಯಾಚ್ ಅನ್ನು ರೋಹಿತ್ ಶರ್ಮಾ ಕೈಚೆಲ್ಲಿದರು. ಸಿಎಸ್ಕೆ ಮೂಲದ ಅಫ್ಘಾನ್ ಸ್ಪಿನ್ನರ್ ಅಲ್ಲಾ ಘಜನ್ಫರ್ ಅವರ ಎಸೆತದಲ್ಲಿ ರಘುವಂಶಿ ದೊಡ್ಡ ಹೊಡೆತಕ್ಕೆ ಕೈಹಾಕಿ ಲಾಂಗ್-ಆನ್ನಲ್ಲಿ ಕ್ಯಾಚ್ ನೀಡಿದ್ದರು. ಆದರೆ ಅಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ರೋಹಿತ್, ಚೆಂಡನ್ನು ಹಿಡಿಯುವಲ್ಲಿ ವಿಫಲರಾದದ್ದಲ್ಲದೆ, ಅದು ಬೌಂಡರಿ ಗೆರೆ ದಾಟುವಂತೆ ಮಾಡಿದರು.
ಜೀವದಾನವನ್ನು ಬಳಸಿಕೊಂಡ ರಘುವಂಶಿ ಅಬ್ಬರ
ಕ್ಯಾಚ್ ಕೈಚೆಲ್ಲಿದಾಗ ರಘುವಂಶಿ ಕೇವಲ 21 ರನ್ ಗಳಿಸಿದ್ದರು. ತಮಗೆ ಸಿಕ್ಕ ಈ ಸುವರ್ಣಾವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡ ಅವರು ಮುಂದಿನ ಎಸೆತದಲ್ಲೇ ಭರ್ಜರಿ ಸಿಕ್ಸರ್ ಸಿಡಿಸಿ ಮುಂಬೈ ಬೌಲರ್ಗಳ ಮೇಲೆ ಸವಾರಿ ಮಾಡಿದರು. ರೋಹಿತ್ ಅವರ ಈ ಒಂದು ತಪ್ಪು ಮುಂಬೈ ತಂಡಕ್ಕೆ ದುಬಾರಿಯಾಗಿ ಪರಿಣಮಿಸಿತು. ರಘುವಂಶಿ ಕೇವಲ 28 ಎಸೆತಗಳಲ್ಲಿ 51 ರನ್ ಚಚ್ಚುವ ಮೂಲಕ ಕೆಕೆಆರ್ ತಂಡವು 220 ರನ್ಗಳ ಬೃಹತ್ ಮೊತ್ತವನ್ನು ತಲುಪಲು ಪ್ರಮುಖ ಕಾರಣರಾದರು. ಈ ಘಟನೆಯು ಪಂದ್ಯದ ಗತಿಯನ್ನೇ ಬದಲಿಸಬಹುದಾದ ಕ್ಷಣವಾಗಿತ್ತು ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
ತಪ್ಪನ್ನು ತಿದ್ದಿಕೊಂಡ ‘ಹಿಟ್ ಮ್ಯಾನ್’
ಕ್ಷೇತ್ರರಕ್ಷಣೆಯಲ್ಲಿ ಎಡವಿದರೂ, ಬ್ಯಾಟಿಂಗ್ನಲ್ಲಿ ರೋಹಿತ್ ಶರ್ಮಾ ಅದನ್ನು ಸರಿದೂಗಿಸಿದರು. 221 ರನ್ಗಳ ಗುರಿಯನ್ನು ಬೆನ್ನಟ್ಟುವಾಗ ರೋಹಿತ್ ಶರ್ಮಾ ಸ್ಫೋಟಕ ಬ್ಯಾಟಿಂಗ್ ನಡೆಸಿ ಕೇವಲ 23 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಅಂತಿಮವಾಗಿ 38 ಎಸೆತಗಳಲ್ಲಿ 78 ರನ್ ಗಳಿಸಿದ ಅವರು, ದಕ್ಷಿಣ ಆಫ್ರಿಕಾದ ಆಟಗಾರ ರಿಯಾನ್ ರಿಕಲ್ಟನ್ ಅವರೊಂದಿಗೆ ಸೇರಿ 148 ರನ್ಗಳ ಆರಂಭಿಕ ಜೊತೆಯಾಟವಾಡಿದರು. ರೋಹಿತ್ ಅವರ ಈ ಜವಾಬ್ದಾರಿಯುತ ಆಟದಿಂದಾಗಿ ಮುಂಬೈ ಇಂಡಿಯನ್ಸ್ 13 ವರ್ಷಗಳ ಬಳಿಕ ತನ್ನ ಮೊದಲ ಪಂದ್ಯದಲ್ಲಿ ಜಯ ಸಾಧಿಸುವಲ್ಲಿ ಯಶಸ್ವಿಯಾಯಿತು. ಆದರೂ, ಆ ಸುಲಭ ಕ್ಯಾಚ್ ಕೈಬಿಟ್ಟ ಕ್ಷಣ ಪಂದ್ಯದ ಅತ್ಯಂತ ಚರ್ಚಿತ ವಿಷಯವಾಗಿ ಉಳಿಯಿತು.
ಇದನ್ನೂ ಓದಿ : ಭದ್ರಾವತಿಯಲ್ಲಿ ಹಳ್ಳಕ್ಕೆ ಉರುಳಿದ ಖಾಸಗಿ ಬಸ್.. ಹಲವರ ಸ್ಥಿತಿ ಗಂಭೀರ!
