ಲಕ್ನೋ : ಇಲ್ಲಿನ ಏಕಾನಾ ಕ್ರೀಡಾಂಗಣ ಗುರುವಾರ (ಮೇ 7) ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಹಾಗೂ ಲಕ್ನೋ ಸೂಪರ್ ಜೈಂಟ್ಸ್ (ಎಲ್ಎಸ್ಜಿ) ನಡುವಿನ ರೋಚಕ ಹಣಾಹಣಿಯಲ್ಲಿ ಆರ್ಸಿಬಿ ತಂಡವನ್ನು 9 ರನ್ಗಳಿಂದ ಸೋಲಿಸಿದ ಲಕ್ನೋ, ಈ ಆವೃತ್ತಿಯಲ್ಲಿ ಮೂರನೇ ಗೆಲುವು ದಾಖಲಿಸಿತು. ಇತ್ತ ಆರ್ಸಿಬಿ ಸತತ 2ನೇ ಸೋಲು ಅನುಭವಿಸಿ ಪಾಯಿಂಟ್ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲೇ ಉಳಿದಿದೆ.
ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರ ಹಾಗೂ ಲಕ್ನೋ ತಂಡದ ಆರಂಭಿಕ ಬ್ಯಾಟರ್ ಮಿಚೆಲ್ ಮಾರ್ಷ್ ಕೇವಲ 49 ಎಸೆತಗಳಲ್ಲಿ ಸಿಡಿಲಮರಿ ಶತಕ ಸಿಡಿಸಿ ಐಪಿಎಲ್ ಇತಿಹಾಸದಲ್ಲಿ ಲಕ್ನೋ ಪರ ಅತಿ ವೇಗದ ಶತಕ ಬಾರಿಸಿದ ದಾಖಲೆ ಬರೆದಿದ್ದಾರೆ. ಆದರೆ, ಟೂರ್ನಿಯಲ್ಲಿ ಈಗಾಗಲೇ ಹೀನಾಯ ಸ್ಥಿತಿಯಲ್ಲಿರುವ ಲಕ್ನೋ ತಂಡಕ್ಕೆ ಈ ಭರ್ಜರಿ ಪ್ರದರ್ಶನ ತಡವಾಗಿ ಬಂತೇ ಎಂಬ ಪ್ರಶ್ನೆ ಕ್ರಿಕೆಟ್ ವಲಯದಲ್ಲಿ ಮೂಡಿದೆ.
ಮಳೆಯ ಅಡ್ಡಿಯ ನಡುವೆಯೂ ನಿಲ್ಲದ ಮಾರ್ಷ್ ಅಬ್ಬರ ಪಂದ್ಯದ ಆರಂಭದಿಂದಲೇ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಬೌಲಿಂಗ್ ಪಡೆಯ ಮೇಲೆ ಮಿಚೆಲ್ ಮಾರ್ಷ್ ಸವಾರಿ ಮಾಡಿದ್ದಾರೆ.
ಪಂದ್ಯದ ನಡುವೆ ಎರಡು ಬಾರಿ ಮಳೆಯ ಅಡ್ಡಿಯುಂಟಾದರೂ ಸಹ ಮಾರ್ಷ್ ತಮ್ಮ ಬ್ಯಾಟಿಂಗ್ ಲಯವನ್ನು ಕಳೆದುಕೊಳ್ಳಲಿಲ್ಲ. ಜೋಶ್ ಹ್ಯಾಝಲ್ವುಡ್ ಬೌಲಿಂಗ್ನಲ್ಲಿ ಸ್ಟ್ರೈಟ್ ಸಿಕ್ಸರ್ ಬಾರಿಸುವ ಮೂಲಕ ತಮ್ಮ ಅಬ್ಬರ ಶುರುಮಾಡಿದ ಅವರು, ನಂತರ ಭುವನೇಶ್ವರ್ ಕುಮಾರ್ ಅವರ ಓವರ್ನಲ್ಲಿಯೂ ಕವರ್ಸ್ನತ್ತ ಚೆಂಡನ್ನು ಅಟ್ಟಿದರು. ಆರ್ಸಿಬಿ ತಂಡದ ಸ್ಪಿನ್ನರ್ಗಳಾದ ಕೃಣಾಲ್ ಪಾಂಡ್ಯ ಹಾಗೂ ಸುಯಶ್ ಶರ್ಮಾ ಬೌಲಿಂಗ್ಗೂ ಮುಲಾಜಿಲ್ಲದೆ ದಂಡಿಸಿದ ಮಾರ್ಷ್, ಬೃಹತ್ ಸಿಕ್ಸರ್ಗಳು ಹಾಗೂ ಆಫ್-ಸೈಡ್ ಕಡೆಗೆ ಆಕರ್ಷಕ ಕಟ್ಗಳ ಮೂಲಕ ಕೇವಲ 20 ಎಸೆತಗಳಲ್ಲಿ ತಮ್ಮ ಅರ್ಧಶತಕ ಪೂರೈಸಿದರು. ಒಂದೆಡೆ ಯುವ ಆಟಗಾರ ಅರ್ಶಿನ್ ಕುಲಕರ್ಣಿ ರನ್ ಗಳಿಸಲು ಪರದಾಡುತ್ತಿದ್ದರೆ, ಮತ್ತೊಂದೆಡೆ ಮಾರ್ಷ್ ಮೈದಾನದ ಎಲ್ಲಾ ದಿಕ್ಕುಗಳಿಗೂ ಚೆಂಡನ್ನು ದಂಡಿಸುತ್ತಾ ತಮ್ಮ ಬ್ಯಾಟಿಂಗ್ ವೈಭವವನ್ನು ಅತ್ಯಂತ ಸರಳವಾಗಿ ಪ್ರದರ್ಶಿಸುತ್ತಿದ್ದರು. ರಸಿಖ್ ಸಲಾಮ್ ಹಾಗೂ ಹ್ಯಾಝಲ್ವುಡ್ ಅವರ ವೇಗದ ಎಸೆತಗಳಿಗೂ ಬೌಂಡರಿಗಳ ಸುರಿಮಳೆ ಸುರಿಸಿದರು.
ಕೆ.ಎಲ್. ರಾಹುಲ್ ದಾಖಲೆ ಉಡೀಸ್
ತಮ್ಮ ಆಕ್ರಮಣಕಾರಿ ಬ್ಯಾಟಿಂಗ್ ಮುಂದುವರಿಸಿದ ಮಿಚೆಲ್ ಮಾರ್ಷ್, ರೊಮಾರಿಯೊ ಶೆಫರ್ಡ್ ಎಸೆದ ಯಾರ್ಕರ್ ಅನ್ನು ಆಫ್ ಸೈಡ್ ಬೌಂಡರಿಗಟ್ಟಿ ಕೇವಲ 49 ಎಸೆತಗಳಲ್ಲಿ ತಮ್ಮ ಶತಕವನ್ನು ಪೂರೈಸಿದರು. ಹೆಲ್ಮೆಟ್ ತೆಗೆದು ಬ್ಯಾಟ್ ಎತ್ತಿ ಪ್ರೇಕ್ಷಕರ ಹರ್ಷೋದ್ಗಾರವನ್ನು ಸಂಭ್ರಮಿಸಿದ ಅವರು ಲಕ್ನೋ ಫ್ರಾಂಚೈಸಿ ಇತಿಹಾಸದಲ್ಲಿಯೇ ಹೊಸ ಮೈಲುಗಲ್ಲು ನೆಟ್ಟರು. ಈ ಮೂಲಕ 2022ರಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಬ್ರಬೋರ್ನ್ ಕ್ರೀಡಾಂಗಣದಲ್ಲಿ 56 ಎಸೆತಗಳಲ್ಲಿ ಶತಕ ಸಿಡಿಸಿದ್ದ ಕೆ.ಎಲ್. ರಾಹುಲ್ ಅವರ ಹೆಸರಿನಲ್ಲಿದ್ದ ಲಕ್ನೋ ಪರ ‘ಅತಿ ವೇಗದ ಶತಕ’ದ ದಾಖಲೆಯನ್ನು ಮಾರ್ಷ್ ಅಳಿಸಿಹಾಕಿದ್ದಾರೆ. ಇದು ಐಪಿಎಲ್ ಇತಿಹಾಸದಲ್ಲಿ ಮಿಚೆಲ್ ಮಾರ್ಷ್ ಅವರ ಎರಡನೇ ಶತಕವಾಗಿದೆ.
ಲಕ್ನೋಗೆ ಪ್ಲೇಆಫ್ ಕಂಟಕ: ಮಂಕಾಗುವುದೇ ಮಾರ್ಷ್ ಶತಕದ ಸಂಭ್ರಮ?
ವೈಯಕ್ತಿಕವಾಗಿ ಮಿಚೆಲ್ ಮಾರ್ಷ್ ಅದ್ಭುತ ಪ್ರದರ್ಶನ ನೀಡಿದ್ದರೂ, ಲಕ್ನೋ ಸೂಪರ್ ಜೈಂಟ್ಸ್ ಪಾಲಿಗೆ ಇದು ‘ತುಂಬಾ ವಿಳಂಬವಾದ ಯಶಸ್ಸು’ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಪ್ರಸ್ತುತ 2026ನೇ ಸಾಲಿನ ಐಪಿಎಲ್ ಅಂಕಪಟ್ಟಿಯಲ್ಲಿ ಲಕ್ನೋ ತಂಡವು ತಳಭಾಗದಲ್ಲಿದ್ದು, ಟೂರ್ನಿಯಿಂದ ಬಹುಬೇಗನೆ ಹೊರಬೀಳುವ ಭೀತಿ ಎದುರಿಸುತ್ತಿದೆ. ಲಕ್ನೋ ತನ್ನ ಪಾಲಿಗೆ ಉಳಿದಿರುವ ಮುಂದಿನ ಎಲ್ಲಾ ಪಂದ್ಯಗಳನ್ನು ಗೆದ್ದರೂ ಸಹ ಪ್ಲೇಆಫ್ಗೆ ಪ್ರವೇಶಿಸುವುದು ಖಚಿತವಾಗಿಲ್ಲ. ಹೀಗಾಗಿ, ಮಿಚೆಲ್ ಮಾರ್ಷ್ ಅವರ ಈ ಐತಿಹಾಸಿಕ ಮತ್ತು ಸ್ಫೋಟಕ ಶತಕವು ಲಕ್ನೋ ತಂಡದ ಟೂರ್ನಿಯ ಭವಿಷ್ಯವನ್ನು ಬದಲಾಯಿಸಲು ಸಾಧ್ಯವಾಗುತ್ತದೆಯೇ ಎಂಬುದು ಈಗಿರುವ ಅತಿ ದೊಡ್ಡ ಪ್ರಶ್ನೆಯಾಗಿದೆ. ಒಟ್ಟಾರೆಯಾಗಿ, ಮಾರ್ಷ್ ಆಟ ಅಭಿಮಾನಿಗಳಿಗೆ ಭರ್ಜರಿ ಮನರಂಜನೆ ನೀಡಿದರೂ, ತಂಡದ ಸ್ಥಿತಿ ಮಾತ್ರ ಚಿಂತಾಜನಕವಾಗಿಯೇ ಉಳಿದಿದೆ.
ಇದನ್ನೂ ಓದಿ : 50 ಕೋಟಿ ಖರ್ಚು ಮಾಡುವ ಶಕ್ತಿ ನನಗಿಲ್ಲ ; ಚುನಾವಣಾ ರಾಜಕೀಯಕ್ಕೆ ನಿವೃತ್ತಿ ಘೋಷಿಸಿದ ಎಚ್.ವಿಶ್ವನಾಥ್
