ಐಪಿಎಲ್ ಸೀಸನ್‌ 18ರ ಕದನದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ರಾಯಲ್ ಆಗಿ ಗೆದ್ದು ಬೀಗಿದೆ. 18 ವರ್ಷಗಳ ಕನಸು ಕೊನೆಗೂ ನನಸಾಗಿಸಿ ಐಪಿಎಲ್ ಇತಿಹಾಸದಲ್ಲಿ ಹೊಸ ಭಾಷ್ಯ ಬರೆದಿದೆ. ಕೋಟಿ, ಕೋಟಿ ಅಭಿಮಾನಿಗಳ ಪ್ರಾರ್ಥನೆ, ಪೂಜೆ-ಪುನಸ್ಕಾರ, ಹೋಮ-ಹವನ, ಹರಕೆ ಫಲಿಸಿದೆ. ಮೂರು ಬಾರಿ ಫೈನಲ್‌ಗೆ ಬಂದು ಕಪ್ ಎತ್ತದೆ ನಿರಾಸೆ ಮೂಡಿಸಿದ್ದ ಆರ್‌ಸಿಬಿ, ಚೊಚ್ಚಲ ಬಾರಿ ಐಪಿಎಲ್ ಕಿರೀಟಕ್ಕೆ ಮುತ್ತಿಟ್ಟಿದೆ. ಇದು ಆರ್‌ಸಿಬಿಯ ಲಾಯಲ್‌ ಅಭಿಮಾನಿಗಳನ್ನ ಸಂತಸದಲ್ಲಿ ಮುಳುಗೇಳಿಸಿದೆ.
ಇನ್ನು ತನ್ನ ಪಾಲಿನ 20 ಓವರ್‌ಗಳನ್ನ ಪೂರ್ಣಗೊಳಿಸಿ ಆರ್‌ಸಿಬಿ ಕಾಂಪಿಟಿಟಿವ್‌ ಸ್ಕೋರ್‌ ಕಲೆ ಹಾಕಿತು. 120 ಬಾಲ್‌ಗಳಲ್ಲಿ 191 ರನ್ ಹೊಡೆದು ಪಂಜಾಬ್‌ಗೆ ಸ್ಪರ್ಧಾತ್ಮಕ ಗುರಿಯನ್ನ ನೀಡಿತು. ಬಳಿಕ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನೀಡಿದ ಟಾರ್ಗೆಟ್‌ ಬೆನ್ನತ್ತಿದ್ದ ಪಂಜಾಬ್‌ ಕಿಂಗ್ಸ್‌ ಹುರಿಯಾಳುಗಳು ಒಂದ್‌ ಹಂತದಲ್ಲಿ ಬೀಡು ಬೀಸಾಗಿ ಬ್ಯಾಟ್‌ ಬೀಸಿ ಜಯಲಕ್ಷ್ಮೀಯನ್ನ ತನ್ನತ್ತ ವಾಲಿಸಿಕೊಂಡಿದ್ರು.
ಆರಂಭಿಕರಾಗಿ ಕಣಕ್ಕಿಳಿದಿದ್ದ ಪ್ರಯಾಂಶ್‌ ಆರ್ಯಾ, ಪ್ರಭ್‌ ಸಿಮ್ರನ್‌ ಸಿಂಗ್‌ ಕೇವಲ 4.5 ಓವರ್‌ಗಳಲ್ಲಿ 42ರನ್ ಹೊಡೆದು ಆರ್‌ಸಿಬಿ ಮತ್ತು ಅಭಿಮಾನಿಗಳನ್ನ ತಣ್ಣಗಾಗಿಸಿದ್ರು. ಈ ವೇಳೆ ನಿರೀಕ್ಷೆಯಂತೆ ಜೋಶ್‌ ಹೆಜೆಲ್‌ವುಡ್‌ ಎಸೆದ ಬಾಲ್ ಪ್ರಿಯಾಂಶ್‌ ಆರ್ಯಾರನ್ನ ಬಲೆಗೆ ಕೆಡವಿತ್ತು. ಹೆಜೆಲ್‌ ವುಡ್‌ ಎಸೆದ ಬಾಲ್‌ನ್ನ ಫಿಲ್‌ ಸಾಲ್ಟ್‌ ಅದ್ಭುತವಾಗಿ ಕ್ಯಾಚ್‌ ಪಡೆಯುವಲ್ಲಿ ಸಫಲರಾದ್ರು. ಅಲ್ಲಿಂದ ಆರಂಭವಾಗಿದ್ದೇ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ಪತನ.
ಪ್ರಿಯಾಂಶ್‌ ಆರ್ಯಾ ಔಟ್’ ಆಗುತ್ತಿದ್ದಂತೆ ಪ್ರಭದ್‌ ಸಿಮ್ರನ್‌ ಸಿಂಗ್‌ 22 ಬಾಲ್‌ಗೆ 25 ರನ್ ಹೊಡೆದು ಕೃನಾಲ್‌ ಪಾಂಡ್ಯಗೆ ವಿಕೆಟ್‌ ಒಪ್ಪಿಸಿದ್ದರು.
ನಂತರ ಬ್ಯಾಟಿಂಗ್‌ಗೆ ಇಳಿದ ಜೋಶ್‌ ಇಂಗ್ಲಿಸ್‌ ಪ್ರತಿರೋಧ ಒಡ್ಡಿ 23 ಎಸೆತಗಳಲ್ಲಿ 39 ರನ್ ಸಿಡಿಸಿ ಔಟ್ ಆದರು. ಬಳಿಕ ಕ್ರೀಸ್‌ಗೆ ಬಂದ ಶ್ರೇಯಸ್‌ ಅಯ್ಯರ್‌ ಕೇವಲ 1 ರನ್ ಹೊಡೆದು ಬಂದ ದಾರಿಗೆ ಸುಂಕ ಇಲ್ಲದಂತೆ ಫೆವಿಲಿಯನ್‌ ಸೇರಿದರು. ಆದರೆ, ಮತ್ತೊಂದೆಡೆ ವಿಕೆಟ್‌ ಉರುಳುತ್ತಿದ್ದರೂ ಬಂಡೆಯಂತೆ ನಿಂತು, ಒತ್ತಡಕ್ಕೆ ಒಳಗಾದೆ ಶಶಾಂಕ್‌ ಸಿಂಗ್‌ 31 ಬಾಲ್ ನಲ್ಲಿ 61 ರನ್ ಗಳಿಸಿ, ಒಟ್ ಆಗದ ಉಳಿದರು. ಅಷ್ಟೊತ್ತಿಗಾಗ್ಲೇ ಮಾರ್ಕಸ್‌ ಸ್ಟೋಯಿನಿಸ್, ಅಜ್ಮತುಲ್ಲಾ ಒಮ್ರಾಜಿ ಒಂದಂಕಿ ಒಳಗೆ ವಿಕೆಟ್‌ ಒಪ್ಪಿಸಿದರು. ಈ ವೇಳೆಗಾಗಲೇ ಆರ್‌ಸಿಬಿ ಗೆಲುವಿನ ನಗೆ ಬೀರಿಯಾಗಿತ್ತು. ಆರು ರನ್‌ಗಳಿಂದ ಜಯ ದಾಖಲಿಸಿ 18 ವರ್ಷಗಳ ಕನಸನ್ನು, ಕಪ್ ಬರವನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ರಾಯಲ್ ಆಗಿ ನೀಗಿಸಿಕೊಂಡಿತು.
