ಮೈಸೂರು ಅರಮನೆ ಹಾಗೂ ಅಂಬಾರಿ ವಿಚಾರದಲ್ಲಿ ದಸರಾ ದಂಗಲ್ ಮತ್ತೊಂದು ಸುತ್ತಿನ ಚರ್ಚೆಗೆ ಕಾರಣವಾಗಿದ್ದು, ಇಂದು ಬೆಳಗ್ಗೆ ಅರಮನೆಯ ತಮ್ಮ ನಿವಾಸದಲ್ಲಿ ಪ್ರಮೋದಾದೇವಿ ಒಡೆಯರ್ ಸುದ್ದಿಗೋಷ್ಠಿ ನಡೆಸಲಿದ್ದಾರೆ. “ಅಂಬಾರಿ ನಮ್ಮದು” ಎಂಬ ಪ್ರಮೋದಾದೇವಿ ಒಡೆಯರ್ ಹೇಳಿಕೆಗೆ, “ಅರಮನೆ ಸರ್ಕಾರದ್ದು, ಅಂಬಾರಿಗೆ ದುಡ್ಡು ಕೊಡ್ತೀವಿ” ಎಂದು ಸಚಿವ ಡಾ. ಯತೀಂದ್ರ ನೀಡಿದ್ದ ಹೇಳಿಕೆ ತೀವ್ರ ವಿರೋಧಕ್ಕೆ ಕಾರಣವಾಗಿತ್ತು.
ಸಚಿವ ಯತೀಂದ್ರ ಹೇಳಿಕೆ ಖಂಡಿಸಿ ಮೈಸೂರಿನ ನಾಗರಿಕರು ಅರಮನೆ ಎದುರು ಹೋರಾಟ ನಡೆಸಿದ್ದಲ್ಲದೆ, ‘ಸೇವ್ ಹಿಂದೂ ಟೆಂಪಲ್’ ವತಿಯಿಂದ ರಾಜ್ಯಾದ್ಯಂತ ಪೋಸ್ಟ್ ಕಾರ್ಡ್ ಚಳವಳಿಯೂ ನಡೆದಿತ್ತು. ಈ ಪರ-ವಿರೋಧದ ಹೇಳಿಕೆಗಳಿಗೆ ಪ್ರಮೋದಾದೇವಿ ಒಡೆಯರ್ ಇಂದಿನ ಸುದ್ದಿಗೋಷ್ಠಿಯಲ್ಲಿ ಉತ್ತರ ನೀಡಲಿದ್ದಾರೆ.
