ಬೆಂಗಳೂರು: ಮಧ್ಯಪ್ರಾಚ್ಯದ ಸಂಘರ್ಷದಿಂದಾಗಿ ಷೇರು ಮಾರುಕಟ್ಟೆಯು ಕುಸಿತ ಕಾಣುತ್ತಿದೆ. ಚಿನ್ನ ಹಾಗೂ ಬೆಳ್ಳಿಯ ಮೇಲೆ ಹೂಡಿಕೆ ಮಾಡಿದವರು ಕೂಡ ನಷ್ಟ ಅನುಭವಿಸುತ್ತಿದ್ದಾರೆ. ಹಾಗಾಗಿ, ಹೆಚ್ಚಿನ ಜನ ಸುರಕ್ಷತೆ ಇರುವ ಯೋಜನೆಗಳಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ. ಹೀಗೆ ನೀವು ಕೂಡ ಸುರಕ್ಷಿತ ಯೋಜನೆಗಳಲ್ಲಿ ಹೂಡಿಕೆ ಮಾಡಬೇಕು ಎಂದರೆ, ಪೋಸ್ಟ್ ಆಫೀಸ್ ಆರ್ ಡಿ ಯೋಜನೆ ಉತ್ತಮವಾಗಿದೆ. ಅದರಲ್ಲೂ, ತಿಂಗಳಿಗೆ 10 ಸಾವಿರ ರೂ. ಹೂಡಿಕೆ ಮಾಡಿದರೂ ಸಾಕು, 5 ವರ್ಷದಲ್ಲಿಯೇ 1.13 ಲಕ್ಷ ರೂ. ಬಡ್ಡಿಯ ಲಾಭ ಪಡೆಯಬಹುದಾಗಿದೆ.
ಯೋಜನೆಯ ಪ್ರಮುಖ ಲಕ್ಷಣಗಳು
ಕನಿಷ್ಠ ಹೂಡಿಕೆ: ತಿಂಗಳಿಗೆ ಕೇವಲ 100 ರೂಪಾಯಿಯಿಂದ ಹೂಡಿಕೆ ಆರಂಭಿಸಬಹುದು. ಗರಿಷ್ಠ ಮಿತಿಯಿಲ್ಲ.
ಅವಧಿ: ಈ ಯೋಜನೆಯು ಕಡ್ಡಾಯವಾಗಿ 5 ವರ್ಷಗಳ (60 ತಿಂಗಳು) ಅವಧಿಯದ್ದಾಗಿರುತ್ತದೆ.
ಖಾತೆ ತೆರೆಯುವಿಕೆ: ಒಬ್ಬರೇ ಅಥವಾ ಗರಿಷ್ಠ ಮೂವರು ಸೇರಿ ಜಂಟಿ (Joint) ಖಾತೆ ತೆರೆಯಬಹುದು. ಅಪ್ರಾಪ್ತ ವಯಸ್ಸಿನವರ ಹೆಸರಲ್ಲೂ ಪೋಷಕರು ಖಾತೆ ಆರಂಭಿಸಬಹುದು.
ಹೀಗಿದೆ ಹೂಡಿಕೆ, ಲಾಭದ ಲೆಕ್ಕಾಚಾರ
ಮಾಸಿಕ ಹೂಡಿಕೆ: 10 ಸಾವಿರ ರೂಪಾಯಿ
ಹೂಡಿಕೆ ಅವಧಿ: 5 ವರ್ಷಗಳು (60 ತಿಂಗಳು)
ಒಟ್ಟು ಹೂಡಿಕೆ ಮೊತ್ತ: 6 ಲಕ್ಷ ರೂಪಾಯಿ
ಬಡ್ಡಿಯ ಲಾಭ: 1,13,658 ರೂಪಾಯಿ
ಒಟ್ಟು ಗಳಿಕೆ: 7,13,658 ರೂಪಾಯಿ
ಅಂಚೆ ಕಚೇರಿ ಆರ್ ಡಿ ಯೋಜನೆಯಲ್ಲಿ ಪ್ರಸ್ತುತ (2026ರ ಜನವರಿ – ಮಾರ್ಚ್ ತ್ರೈಮಾಸಿಕದಂತೆ) ಶೇ. 6.7ರಷ್ಟು ವಾರ್ಷಿಕ ಬಡ್ಡಿ ದರವನ್ನು ನಿಗದಿಪಡಿಸಲಾಗಿದೆ. ಬಡ್ಡಿಯನ್ನು ಪ್ರತಿ ತ್ರೈಮಾಸಿಕಕ್ಕೊಮ್ಮೆ ಅಸಲಿಗೆ ಸೇರಿಸಲಾಗುತ್ತದೆ. ಇದು ಕೇಂದ್ರ ಸರ್ಕಾರದ ಬೆಂಬಲವಿರುವ ಯೋಜನೆಯಿರುವ ಕಾರಣ ನಿಶ್ಚಿತ ಆದಾಯವನ್ನು ಪಡೆಯಬಹುದಾಗಿದೆ.
