ಲಕ್ನೋ: ಪತಿಯ ಸಣ್ಣ ಅಣಕದ ಮಾತು ಯುವತಿಯೊಬ್ಬಳ ಪ್ರಾಣವನ್ನೇ ಕಸಿದುಕೊಂಡ ದಾರುಣ ಘಟನೆಯೊಂದು ಉತ್ತರ ಪ್ರದೇಶದ ಲಕ್ನೋದಲ್ಲಿ ನಡೆದಿದೆ. ಮಾಡೆಲಿಂಗ್ ಕ್ಷೇತ್ರದಲ್ಲಿ ಸಾಧನೆ ಮಾಡುವ ಕನಸು ಕಂಡಿದ್ದ ತನ್ನು ಸಿಂಗ್ (24) ತನ್ನ ಪತಿ ಹಾಸ್ಯಕ್ಕಾಗಿ ಮಾಡಿದ ಕಾಮೆಂಟ್ಗೆ ಮನನೊಂದು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಲಕ್ನೋದ ಇಂದಿರಾನಗರದ ನಿವಾಸಿಯಾದ ತನ್ನು ಸಿಂಗ್ ಮತ್ತು ಪತಿ ರಾಹುಲ್ ಶ್ರೀವಾಸ್ತವ ಅವರು ನಾಲ್ಕು ವರ್ಷಗಳ ಹಿಂದೆ ಪ್ರೀತಿಸಿ ವಿವಾಹವಾಗಿದ್ದರು. ಬುಧವಾರ ಸಂಜೆ ಈ ದಂಪತಿ ಸಂಬಂಧಿಕರ ಮನೆಗೆ ಹೋಗಿ ಮರಳಿದ್ದರು. ರಾತ್ರಿ ಮನೆಯಲ್ಲಿ ಕುಟುಂಬದವರೊಂದಿಗೆ ಹರಟೆ ಹೊಡೆಯುತ್ತಿದ್ದಾಗ, ಪತಿ ರಾಹುಲ್ ತಮಾಷೆಯಾಗಿ ಪತ್ನಿ ತನ್ನು ಅವರನ್ನು ‘ಕೋತಿ’ ಎಂದು ಕರೆದಿದ್ದಾರೆ. ಈ ಸಣ್ಣ ವ್ಯಂಗ್ಯ ತನ್ನು ಅವರ ಮನಸ್ಸಿಗೆ ತೀವ್ರವಾಗಿ ನಾಟಿದ್ದು, ಅದರಿಂದ ಬೇಸರಗೊಂಡು ಅವರು ಪಕ್ಕದ ಕೋಣೆಗೆ ತೆರಳಿದ್ದರು.
ಮೌನವಾಗಿ ಮುಗಿದುಹೋದ ಬದುಕು
ಆಟೋ ಚಾಲಕನಾಗಿ ಕೆಲಸ ಮಾಡುತ್ತಿರುವ ರಾಹುಲ್ ಅವರು, ಸ್ವಲ್ಪ ಹೊತ್ತಿನ ಬಳಿಕ ಹೊರಗಿನಿಂದ ಆಹಾರ ತರಲೆಂದು ಹೋಗಿದ್ದರು. ಅವರು ಮನೆಗೆ ಮರಳಿದಾಗ ಕೊಠಡಿಯೊಳಗಿದ್ದ ಪತ್ನಿ ತನ್ನು ಎಷ್ಟೇ ಕರೆದರೂ ಓಗೊಡಲಿಲ್ಲ. ಗಾಬರಿಗೊಂಡು ಕಿಟಕಿಯಿಂದ ಇಣುಕಿ ನೋಡಿದಾಗ, ತನ್ನು ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ತಕ್ಷಣವೇ ನೆರೆಹೊರೆಯವರ ಸಹಾಯದಿಂದ ಬಾಗಿಲು ಒಡೆದು ಅವರನ್ನು ರಾಮ್ ಮನೋಹರ್ ಲೋಹಿಯಾ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಅಷ್ಟರಲ್ಲೇ ಅವರು ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ.
ಈಡೇರದ ಮಾಡೆಲಿಂಗ್ ಕನಸು
ಮೃತ ತನ್ನು ಸಿಂಗ್ ಮಾಡೆಲಿಂಗ್ ಕ್ಷೇತ್ರದಲ್ಲಿ ಆಸಕ್ತಿ ಹೊಂದಿದ್ದರು ಎಂದು ಕುಟುಂಬದವರು ತಿಳಿಸಿದ್ದಾರೆ. ಸುಂದರವಾಗಿ ಕಾಣಬೇಕು ಮತ್ತು ಈ ಕ್ಷೇತ್ರದಲ್ಲಿ ಹೆಸರು ಮಾಡಬೇಕು ಎಂಬ ತುಡಿತದಲ್ಲಿದ್ದ ಮಹಿಳೆಗೆ, ಪತಿ ತನ್ನ ರೂಪದ ಬಗ್ಗೆ ಮಾಡಿದ ಕೀಟಲೆ ಅತಿಯಾದ ಮಾನಸಿಕ ಒತ್ತಡವನ್ನು ಉಂಟುಮಾಡಿರಬಹುದು ಎಂದು ಶಂಕಿಸಲಾಗಿದೆ. ಸದ್ಯ ಪೊಲೀಸರು ಮೃತದೇಹದ ಮರಣೋತ್ತರ ಪರೀಕ್ಷೆ ನಡೆಸಿದ್ದು, ಕುಟುಂಬದವರಿಂದ ಯಾವುದೇ ಅಧಿಕೃತ ದೂರು ದಾಖಲಾಗಿಲ್ಲ ಎಂದು ತಿಳಿಸಿದ್ದಾರೆ. ಒಂದು ಕ್ಷಣದ ತಮಾಷೆ ಹಾಗೂ ಅಪಹಾಸ್ಯವು ಸುಂದರ ಸಂಸಾರವನ್ನು ಕಣ್ಣೀರಿನಲ್ಲಿ ಮುಳುಗಿಸಿದೆ.
ಇದನ್ನೂ ಓದಿ : ಚಾ.ನಗರದಲ್ಲಿ ವ್ಯಕ್ತಿಯ ಮೇಲೆ ಚಿರತೆ ದಾಳಿ | ಧೈರ್ಯದಿಂದ ಪ್ರತಿರೋಧ ತೋರಿ ಪ್ರಾಣಾಪಾಯದಿಂದ ಪಾರು!
