ಬೆಂಗಳೂರು : ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಗಣನೀಯವಾಗಿ ಹಿಂದೆ ಬಿದ್ದಿದ್ದ ಜಪಾನ್ ಮೂಲದ ವಾಹನ ತಯಾರಕ ಸಂಸ್ಥೆ ‘ನಿಸ್ಸಾನ್‘ ಇದೀಗ ಚೇತರಿಕೆಯ ಹಾದಿಯಲ್ಲಿದೆ. ಕೇವಲ ಒಂದು ಕಾರಿನ ಮಾದರಿಯನ್ನು ಮಾತ್ರ ನೆಚ್ಚಿಕೊಂಡಿದ್ದ ನಿಸ್ಸಾನ್, ತನ್ನ ಕಾರ್ಯತಂತ್ರ ಬದಲಾಯಿಸಿ ಹೊಸ ವಾಹನಗಳನ್ನು ಪರಿಚಯಿಸಿದ ಬೆನ್ನಲ್ಲೇ ಜುಲೈ 2026ರ ಮಾರಾಟದಲ್ಲಿ ಭಾರಿ ಏರಿಕೆ ಕಂಡಿದೆ. ಹೊಸದಾಗಿ ಬಿಡುಗಡೆಯಾದ ‘ಟೆಕ್ಟನ್’ ಮಿಡ್ಸೈಜ್ ಎಸ್ಯುವಿ ಮತ್ತು ‘ಗ್ರಾವಿಟೆ’ ಎಂಪಿವಿಗಳ ಆಗಮನವು ನಿಸ್ಸಾನ್ ಸಂಸ್ಥೆಗೆ ದೊಡ್ಡ ಮಟ್ಟದ ಉತ್ತೇಜನ ನೀಡಿದೆ.
218% ರಷ್ಟು ಬೃಹತ್ ಏರಿಕೆ ಕಂಡ ಘಟಕಗಳ ರವಾನೆ
ನಿಸ್ಸಾನ್ ಮೋಟಾರ್ ಇಂಡಿಯಾ ಜುಲೈ 2026 ರಲ್ಲಿ ದೇಶೀಯ ಮಾರುಕಟ್ಟೆಗೆ 4,518 ವಾಹನಗಳನ್ನು ರವಾನಿಸಿದೆ . ಈ ಮೂಲಕ, ಕಳೆದ ವರ್ಷದ ಜುಲೈ (2025) ತಿಂಗಳಿಗೆ ಹೋಲಿಸಿದರೆ ಶೇಕಡಾ 218 ರಷ್ಟು ಮತ್ತು ಜೂನ್ ತಿಂಗಳಿಗೆ ಹೋಲಿಸಿದರೆ ಶೇಕಡಾ 50 ರಷ್ಟು ಬೃಹತ್ ಬೆಳವಣಿಗೆ ಸಾಧಿಸಿದೆ. ದೇಶೀಯ ಮಾರಾಟದ ಜೊತೆಗೆ 4,821 ವಾಹನಗಳನ್ನು ರಫ್ತು ಮಾಡಲಾಗಿದ್ದು, ಒಟ್ಟಾರೆ ಜುಲೈ ತಿಂಗಳಿನ ಮಾರಾಟವು 9,339 ಯುನಿಟ್ಗಳಿಗೆ ತಲುಪಿದೆ.
ಪ್ರಸ್ತುತ ನಿಸ್ಸಾನ್ನ ಚೇತರಿಕೆಯ ಹಂತದಲ್ಲಿ ಈ ದೇಶೀಯ ಮಾರಾಟದ ಸಂಖ್ಯೆಯು ಅತ್ಯಧಿಕ ಮಾಸಿಕ ಸಾಧನೆಯಾಗಿದೆ. ಆದಾಗ್ಯೂ, ಕಳೆದ ವರ್ಷದ ಜುಲೈನಲ್ಲಿ ಕೇವಲ 1,420 ವಾಹನಗಳಷ್ಟೇ ಮಾರಾಟವಾಗಿದ್ದ ಕಾರಣ, ಶೇಕಡಾ 218 ರಷ್ಟು ಏರಿಕೆ ದೊಡ್ಡದಾಗಿ ಕಾಣುತ್ತದೆ ಎಂಬುದನ್ನು ಗಮನಿಸಬೇಕು. ಇಷ್ಟು ಏರಿಕೆಯ ನಡುವೆಯೂ ಪ್ರತಿ ತಿಂಗಳು ಹತ್ತಾರು ಸಾವಿರ ಕಾರುಗಳನ್ನು ಮಾರಾಟ ಮಾಡುವ ಅಗ್ರ ಬ್ರ್ಯಾಂಡ್ಗಳಿಗೆ ಹೋಲಿಸಿದರೆ ನಿಸ್ಸಾನ್ ಇನ್ನೂ ಸಣ್ಣ ಆಟಗಾರನಾಗಿಯೇ ಉಳಿದಿದೆ.
‘ಮ್ಯಾಗ್ನೈಟ್’ ಮೇಲಿನ ಅವಲಂಬನೆ ತಗ್ಗಿಸಿದ ‘ಗ್ರಾವಿಟೆ’ ಮತ್ತು ‘ಟೆಕ್ಟನ್’
ಈ ಹಿಂದೆ ಹಲವು ವರ್ಷಗಳ ಕಾಲ ನಿಸ್ಸಾನ್ ಭಾರತದಲ್ಲಿ ಕೇವಲ ‘ಮ್ಯಾಗ್ನೈಟ್’ ಮಾತ್ರ ಮಾರಾಟ ಮಾಡುತ್ತಿತ್ತು. ಆದರೆ, ಈಗ ಪರಿಸ್ಥಿತಿ ಬದಲಾಗಿದೆ. ಕಾಂಪಾಕ್ಟ್ ಎಸ್ಯುವಿ ವಿಭಾಗದಲ್ಲಿ ಮ್ಯಾಗ್ನೈಟ್, ಕೈಗೆಟುಕುವ ಬೆಲೆಯ 7-ಸೀಟರ್ ಎಂಪಿವಿ ವಿಭಾಗದಲ್ಲಿ ‘ಗ್ರಾವಿಟೆ’ ಮತ್ತು ಮಿಡ್ಸೈಜ್ ಎಸ್ಯುವಿ ವಿಭಾಗದಲ್ಲಿ ‘ಟೆಕ್ಟನ್’ ಕಾರುಗಳು ಈಗ ನಿಸ್ಸಾನ್ ಡೀಲರ್ಶಿಪ್ಗಳಲ್ಲಿ ಲಭ್ಯವಿವೆ.
ಟೆಕ್ಟನ್ ಕಾರುಗಳ ವಿತರಣೆಯು ಜುಲೈ 20 ರಿಂದಷ್ಟೇ ಪ್ರಾರಂಭವಾಗಿದ್ದು, ಜುಲೈ ತಿಂಗಳಲ್ಲಿ ಕೇವಲ ಎರಡು ವಾರಗಳ ಮಾರಾಟ ಮಾತ್ರ ನಡೆದಿದೆ. ಹ್ಯುಂಡೈ ಕ್ರೆಟಾ, ಕಿಯಾ ಸೆಲ್ಟೋಸ್, ಮಾರುತಿ ಸುಜುಕಿ ವಿಕ್ಟಾರಿಸ್ ಮುಂತಾದ ಘಟಾನುಘಟಿ ಕಾರುಗಳಿಗೆ ಪೈಪೋಟಿ ನೀಡಲು ಬಂದಿರುವ ಟೆಕ್ಟನ್, ಆರಂಭಿಕ ಬೆಲೆ 10.49 ಲಕ್ಷ ರೂ. (T160 ಮ್ಯಾನುವಲ್) ಹೊಂದಿದ್ದರೆ, ಶಕ್ತಿಶಾಲಿ T280 ಸರಣಿಯ ಬೆಲೆ 14.99 ಲಕ್ಷ ರೂ.ಗಳಿಂದ ಆರಂಭವಾಗುತ್ತದೆ. ಮತ್ತೊಂದೆಡೆ, ಜೂನ್ನಲ್ಲೇ ನಿಸ್ಸಾನ್ನ ಅತಿ ಹೆಚ್ಚು ಮಾರಾಟವಾದ ಮಾದರಿಯಾಗಿ ಹೊರಹೊಮ್ಮಿದ ಕೇವಲ 5.65 ಲಕ್ಷ ರೂ. ಆರಂಭಿಕ ಬೆಲೆಯ ‘ಗ್ರಾವಿಟೆ’, ಹ್ಯಾಚ್ಬ್ಯಾಕ್ ಬೆಲೆಯಲ್ಲಿ ತ್ರೀ-ರೋ (ಮೂರು ಸಾಲುಗಳ) ವಾಹನ ಬಯಸುವ ಗ್ರಾಹಕರನ್ನು ಆಕರ್ಷಿಸುತ್ತಿದೆ. ಪರಿಣಾಮವಾಗಿ, ಮ್ಯಾಗ್ನೈಟ್ ಮಾರಾಟ ಜೂನ್ನಲ್ಲಿ 1,167 ಯುನಿಟ್ಗಳಿಗೆ ಕುಸಿದಿದೆ.
ಮುಂದಿನ ಸವಾಲುಗಳು ಮತ್ತು ಗುರಿ
ಭಾರತದಲ್ಲಿ ವಾರ್ಷಿಕವಾಗಿ ಎರಡು ಲಕ್ಷ ವಾಹನಗಳನ್ನು (ದೇಶೀಯ ಮತ್ತು ರಫ್ತು ಸೇರಿ) ಉತ್ಪಾದಿಸುವ ಗುರಿಯನ್ನು ನಿಸ್ಸಾನ್ ಹೊಂದಿದೆ. ಜುಲೈ ತಿಂಗಳ ದೇಶೀಯ ಮಾರಾಟದ ವೇಗವನ್ನು ಪರಿಗಣಿಸಿದರೆ, ವಾರ್ಷಿಕ ವಾಲ್ಯೂಮ್ ಸುಮಾರು 54,000 ಯುನಿಟ್ಗಳಷ್ಟಾಗಲಿದ್ದು, ಒಂದು ಲಕ್ಷ ದೇಶೀಯ ಗುರಿಯನ್ನು ತಲುಪಲು ಇನ್ನು ಸಾಕಷ್ಟು ದೂರ ಸಾಗಬೇಕಿದೆ. ಆದರೂ, ಸತತ ಐದನೇ ತಿಂಗಳು ವರ್ಷದಿಂದ ವರ್ಷಕ್ಕೆ (YoY) ಪ್ರಗತಿ ಸಾಧಿರುವುದು ಸಕಾರಾತ್ಮಕ ಬೆಳವಣಿಗೆಯಾಗಿದೆ.
ಟೆಕ್ಟನ್ ಕಾರು ಪ್ರತಿ ತಿಂಗಳು ಸ್ಥಿರವಾಗಿ ಸಾವಿರಾರು ಯುನಿಟ್ ಮಾರಾಟ ಕಾಣಬೇಕಿದೆ, ಗ್ರಾವಿಟೆ ತನ್ನ ಪ್ರಸ್ತುತ ವೇಗವನ್ನು ಕಾಯ್ದುಕೊಳ್ಳಬೇಕಿದೆ ಮತ್ತು ಮ್ಯಾಗ್ನೈಟ್ ಬೇಡಿಕೆ ಮತ್ತಷ್ಟು ಕುಸಿಯದಂತೆ ನೋಡಿಕೊಳ್ಳಬೇಕಿದೆ. ಇದರ ಜೊತೆಗೆ, ಗ್ರಾಹಕರ ಸಂಖ್ಯೆ ಹೆಚ್ಚಾಗುತ್ತಿರುವಂತೆ, ನಿಸ್ಸಾನ್ ತನ್ನ ಸೇವಾ ಕೇಂದ್ರಗಳ (Service network) ಜಾಲವನ್ನು ವಿಸ್ತರಿಸುವ ಅತ್ಯಗತ್ಯವಿದೆ. ಭಾರತದಲ್ಲಿ ಲಾಭದಾಯಕವಾಗಿ ಕಾರ್ಯಾಚರಿಸಬೇಕಾದರೆ, ನಿಸ್ಸಾನ್ ಮತ್ತು ರೆನಾಲ್ಟ್ ಒಕ್ಕೂಟವು ತನ್ನ ಒಟ್ಟು ಮಾಸಿಕ ಉತ್ಪಾದನೆಯನ್ನು ಸುಮಾರು 20,000 ಯುನಿಟ್ಗಳಿಗೆ ದ್ವಿಗುಣಗೊಳಿಸಬೇಕಾದ ಸವಾಲಿದೆ.
ಇದನ್ನೂ ಓದಿ : ಮದ್ರಾಸ್ ಇಂಟರ್ನ್ಯಾಷನಲ್ ಸರ್ಕೀಟ್ನಲ್ಲಿ ಮೊಳಗಿದ ಧೋನಿ ಸೂಪರ್ಬೈಕ್ ಸದ್ದು!
