ಚೆನ್ನೈ : ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪಾಲಿನ ಆರಾಧ್ಯ ದೈವ ಎಂಎಸ್ ಧೋನಿ ಮತ್ತೊಮ್ಮೆ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಸೃಷ್ಟಿಸಿದ್ದಾರೆ.
ಕ್ರಿಕೆಟ್ ಮೈದಾನದಲ್ಲಿ ತಮ್ಮ ಬ್ಯಾಟಿಂಗ್ ಹಾಗೂ ನಾಯಕತ್ವದ ಮೂಲಕ ಅಭಿಮಾನಿಗಳನ್ನು ರಂಜಿಸುತ್ತಿದ್ದ ‘ಕ್ಯಾಪ್ಟನ್ ಕೂಲ್’, ಇದೀಗ ಚೆನ್ನೈ ಸಮೀಪದ ಇರುಂಗಟ್ಟುಕೋಟೈನಲ್ಲಿರುವ ಮದ್ರಾಸ್ ಇಂಟರ್ನ್ಯಾಷನಲ್ ಸರ್ಕ್ಯೂಟ್ನಲ್ಲಿ ಸೂಪರ್ಬೈಕ್ ಏರಿ ತಮ್ಮ ವೇಗದ ಸವಾರಿ ಮೂಲಕ ಅಭಿಮಾನಿಗಳನ್ನು ರೋಮಾಂಚನಗೊಳಿಸಿದ್ದಾರೆ.
ಟಿವಿಎಸ್ ಯುರೋಗ್ರಿಪ್ ಆಯೋಜಿಸಿದ್ದ ಪ್ರಚಾರ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ಧೋನಿ, ಬ್ರ್ಯಾಂಡಿನ ಹೊಸ ಪ್ರೀಮಿಯಂ ಟೈರ್ಗಳನ್ನು ಟ್ರ್ಯಾಕ್ ಮೇಲೆ ಅತಿ ವೇಗವಾಗಿ ಸವಾರಿ ಮಾಡುವ ಮೂಲಕ ಪರೀಕ್ಷಿಸಿದ್ದಾರೆ. ಅಂತಾರಾಷ್ಟ್ರೀಯ ಗುಣಮಟ್ಟದ ಈ ಮೋಟಾರ್ ರೇಸಿಂಗ್ ಸರ್ಕ್ಯೂಟ್ನಲ್ಲಿ ಅವರು ಫುಲ್ ಥ್ರಾಟಲ್ ನೀಡಿ ಬೈಕ್ ಓಡಿಸುತ್ತಿರುವ ದೃಶ್ಯದ ವಿಡಿಯೋವು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಕ್ರೀಡಾಭಿಮಾನಿಗಳ ಕಣ್ಮನ ಸೆಳೆಯುತ್ತಿದೆ.
ಅಭಿಮಾನಿಗಳಿಗೆ ಧೋನಿ ಸ್ಟೈಲ್ ನಮಸ್ಕಾರ
ತಮ್ಮ ಹೈ-ಸ್ಪೀಡ್ ಬೈಕ್ ಸವಾರಿಯ ನಂತರ ಪಿಟ್ ಲೇನ್ಗೆ ಮರಳಿದ 45 ವರ್ಷದ ಧೋನಿ, ಹೆಲ್ಮೆಟ್ ತೆಗೆದು ನೆರೆದಿದ್ದ ನೂರಾರು ಅಭಿಮಾನಿಗಳತ್ತ ನೋಡಿ ಮುಗುಳ್ನಗುತ್ತಾ ಕೈಬೀಸಿ ವಂದಿಸಿದ್ದಾರೆ. ತಮ್ಮ ನೆಚ್ಚಿನ ಕ್ರಿಕೆಟರ್ನನ್ನು ಇಷ್ಟು ಹತ್ತಿರದಿಂದ ಹಾಗೂ ವಿಭಿನ್ನ ಮೋಟಾರ್ಸ್ಪೋರ್ಟ್ಸ್ ಅವತಾರದಲ್ಲಿ ನೋಡಿದ ಪ್ರೇಕ್ಷಕರು ಹರ್ಷೋದ್ಗಾರ ಮಾಡುವ ಮೂಲಕ ತಮ್ಮ ಪ್ರೀತಿಯನ್ನು ವ್ಯಕ್ತಪಡಿಸಿದ್ದಾರೆ. ಕ್ಯಾಮರಾಮನ್ಗಳು ಹಾಗೂ ಕ್ರೀಡಾಪಟುಗಳು ಈ ಅಪರೂಪದ ಕ್ಷಣವನ್ನು ಸೆರೆಹಿಡಿಯಲು ಮುಗಿಬಿದ್ದ ಕ್ರೀಡಾ ವಲಯದ ಗಮನ ಸೆಳೆದಿದೆ. ಐಪಿಎಲ್ 2026ರ ಟೂರ್ನಿಯ ನಂತರ ಕ್ರಿಕೆಟ್ ಕಣದಿಂದ ಕೊಂಚ ಬಿಡುವು ಪಡೆದುಕೊಂಡಿರುವ ಧೋನಿ, ಮನೆಯಲ್ಲಿರುವ ವಿಶಾಲವಾದ ಗ್ಯಾರೇಜ್ನಲ್ಲಿ ಸಮಯ ಕಳೆಯುತ್ತಾ ತಮ್ಮ ವಾಹನಗಳ ಮೇಲಿನ ಅತೀವ ಪ್ರೀತಿಯನ್ನು ಈ ಮೂಲಕ ಮತ್ತೊಮ್ಮೆ ಅನಾವರಣಗೊಳಿಸಿದ್ದಾರೆ.
ಕುತೂಹಲದಲ್ಲಿ ಸೂಪರ್ ಕಿಂಗ್ಸ್ ಫ್ಯಾನ್ಸ್
ಇದೇ ವೇಳೆ ಧೋನಿ ಅವರ ಈ ಚೆನ್ನೈ ಭೇಟಿ ಹಾಗೂ ಟ್ರ್ಯಾಕ್ ಮೇಲಿನ ಬೈಕ್ ಸವಾರಿಯು ಅವರ ಮುಂಬರುವ ಐಪಿಎಲ್ ಭವಿಷ್ಯದ ಕುರಿತಾದ ವ್ಯಾಪಕ ಚರ್ಚೆಗಳಿಗೆ ನಾಂದಿ ಹಾಡಿದೆ. 2027ರ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಎಂಎಸ್ ಧೋನಿ ಮತ್ತೊಮ್ಮೆ ಹಳದಿ ಜೆರ್ಸಿ ತೊಟ್ಟು ಕಣಕ್ಕಿಳಿಯಲಿದ್ದಾರೆಯೇ ಅಥವಾ ಈಗಾಗಲೇ ಯಾವುದೇ ಸದ್ದಿಲ್ಲದೆ ತಮ್ಮ ಅದ್ಭುತ ಕ್ರಿಕೆಟ್ ಪಯಣಕ್ಕೆ ವಿದಾಯ ಹೇಳಿದ್ದಾರೆಯೇ ಎಂಬ ಗಂಭೀರವಾದ ಪ್ರಶ್ನೆಗಳು ಅಭಿಮಾನಿಗಳಲ್ಲಿ ಹಾಗೂ ವಿಶ್ಲೇಷಕರಲ್ಲಿ ಕಾಡುತ್ತಿವೆ. 2026ರ ಐಪಿಎಲ್ ಋತುವಿನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಭಾಗವಾಗಿದ್ದರೂ, ತೀವ್ರ ಗಾಯದ ಸಮಸ್ಯೆಯಿಂದಾಗಿ ಅವರು ಕೇವಲ ತಂಡದ ಜೊತೆಗಿದ್ದರು ಹಾಗೂ ಅವೇ(ಬೆರಳೆಣಿಕೆಯ) ಪಂದ್ಯಗಳಿಗೆ ಮಾತ್ರ ಪ್ರಯಾಣ ಬೆಳೆಸಲು ಸಾಧ್ಯವಾಗದೆ ದೂರವುಳಿದಿದ್ದರು. ಧೋನಿಯವರನ್ನು ನೋಡಲು ಕ್ರೀಡಾಂಗಣಕ್ಕೆ ಹರಿದುಬಂದಿದ್ದ ಲಕ್ಷಾಂತರ ಅಭಿಮಾನಿಗಳಿಗೆ ಇದು ನಿರಾಸೆ ಮೂಡಿಸಿತ್ತು.
ಸಿಎಸ್ಕೆಯಲ್ಲಿ ಮಹತ್ವದ ಬದಲಾವಣೆಗಳ ಪರ್ವ
ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿ ಒಳಗೆ ಇತ್ತೀಚೆಗೆ ಮಹತ್ವದ ಬೆಳವಣಿಗೆಗಳು ನಡೆಯುತ್ತಿರುವುದು ಧೋನಿ ಭವಿಷ್ಯದ ಮೇಲಿನ ನಿಗೂಢತೆಯನ್ನು ಹೆಚ್ಚಿಸಿದೆ. ಕಳೆದ 18 ವರ್ಷಗಳಿಂದ ಸಿಎಸ್ಕೆ ತಂಡದ ಹೆಡ್ ಕೋಚ್ ಆಗಿದ್ದ ಸ್ಟೀಫನ್ ಫ್ಲೆಮಿಂಗ್ ಅವರು ಇತ್ತೀಚೆಗಷ್ಟೇ ತಂಡದ ಜೊತೆಗಿನ ನಂಟು ಕಡಿದುಕೊಂಡಿದ್ದಾರೆ. ಫ್ಲೆಮಿಂಗ್ ಮತ್ತು ಧೋನಿ ಜೋಡಿ ಸಿಎಸ್ಕೆ ತಂಡಕ್ಕೆ ಬರೋಬ್ಬರಿ ಐದು ಐಪಿಎಲ್ ಟ್ರೋಫಿ ಹಾಗೂ ಎರಡು ಚಾಂಪಿಯನ್ಸ್ ಲೀಗ್ ಪ್ರಶಸ್ತಿಗಳನ್ನು ಗೆದ್ದುಕೊಟ್ಟ ಐತಿಹಾಸಿಕ ಹೆಗ್ಗಳಿಕೆ ಹೊಂದಿದೆ.
ಮುಂದಿನ ಋತುವಿಗಾಗಿ ತಂಡವನ್ನು ಹೊಸದಾಗಿ ರೂಪಿಸುವ ನಿಟ್ಟಿನಲ್ಲಿ ಫ್ರಾಂಚೈಸಿಯು ಬದಲಾವಣೆಯ ಹಾದಿ ಹಿಡಿದಿದ್ದು, ಈ ದಿಗ್ಗಜ ಸಹಯೋಗ ಅಂತ್ಯಗೊಂಡಿರುವುದು ಭಾರಿ ಸಂಚಲನಕ್ಕೆ ಕಾರಣವಾಗಿದೆ. ಸುತ್ತಲೂ ಇಷ್ಟೆಲ್ಲಾ ಊಹಾಪೋಹಗಳು ಮತ್ತು ಚರ್ಚೆಗಳು ನಡೆಯುತ್ತಿದ್ದರೂ, ಎಂದಿನಂತೆ ವಿಚಲಿತರಾಗದ ಮಹೇಂದ್ರ ಸಿಂಗ್ ಧೋನಿ ಅದ್ಭುತವಾದ ತಾಳ್ಮೆ ಪ್ರದರ್ಶಿಸುತ್ತಿದ್ದಾರೆ. ಬಾಹ್ಯ ಒತ್ತಡಗಳಿಗೆ ತಲೆಕೆಡಿಸಿಕೊಳ್ಳದೆ ಮೋಟಾರ್ಸ್ಪೋರ್ಟ್ಸ್ನ ರೋಮಾಂಚನದಲ್ಲಿ ಕಳೆದುಹೋಗಿರುವ ಅವರು, ಕ್ರಿಕೆಟ್ ಭವಿಷ್ಯದ ನಿರ್ಧಾರವನ್ನು ಕಾಲಘಟ್ಟಕ್ಕೆ ಬಿಟ್ಟು ಪ್ರಸ್ತುತ ಕ್ಷಣವನ್ನು ಆನಂದಿಸುತ್ತಿರುವಂತೆ ಕಾಣುತ್ತಿದ್ದಾರೆ.
ಇದನ್ನೂ ಓದಿ : ‘ನೀವು ನಿಜವಾದ ಲೆಜೆಂಡ್’ : ನಿರ್ಗಮಿತ ಫೀಲ್ಡಿಂಗ್ ಕೋಚ್ ದಿಲೀಪ್ಗೆ ರೋಹಿತ್ ಹಾರ್ದಿಕ ವಿದಾಯ
