ಬೆಂಗಳೂರು : ದೇಶದ ಸುಮಾರು 7.8 ಕೋಟಿ ಖಾಸಗಿ ಕಂಪನಿಗಳ ಉದ್ಯೋಗಿಗಳಿಗೆ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (ಇಪಿಎಫ್ಒ) ಸಿಹಿ ಸುದ್ದಿ ನೀಡಿದೆ. ಇನ್ನುಮುಂದೆ ಕೇವಲ 3 ದಿನಗಳಲ್ಲಿ ಪಿಎಫ್ ವಿತ್ ಡ್ರಾ ಮಾಡುವ ಕ್ಲೇಮ್ ಅರ್ಜಿಯನ್ನು ವಿಲೇವಾರಿ ಮಾಡಬೇಕು ಎಂಬುದು ಸೇರಿ ಹಲವು ನಿಯಮಗಳನ್ನು ಜಾರಿಗೆ ತಂದಿದೆ. ಇದಕ್ಕಾಗಿ ಉದ್ಯೋಗಿಗಳ ಭವಿಷ್ಯ ನಿಧಿ ಯೋಜನೆ-2026ಅನ್ನು ರೂಪಿಸಿದ್ದು, ಯೋಜನೆ ಅಡಿಯಲ್ಲಿ ಮಾಡಿದ ಪ್ರಮುಖ ಬದಲಾವಣೆಗಳ ಮಾಹಿತಿ ಇಲ್ಲಿದೆ.
- 3 ದಿನಗಳಲ್ಲಿ ಕ್ಲೇಮ್ ಸೆಟಲ್ ಮೆಂಟ್: ಪಿಎಫ್ ಹಿಂಪಡೆಯುವಿಕೆಗಾಗಿ ಸಲ್ಲಿಸಲಾದ ಅರ್ಹ ಅರ್ಜಿಗಳನ್ನು ಇನ್ನು ಮುಂದೆ ಕೇವಲ 3 ದಿನಗಳ ಒಳಗಾಗಿ ವಿಲೇವಾರಿ ಮಾಡಬೇಕೆಂಬ ನಿಯಮವನ್ನು ಜಾರಿಗೆ ತರಲಾಗಿದೆ.
- ಸುಲಲಿತ ಹಿಂಪಡೆಯುವಿಕೆ: ಪಿಎಫ್ ಹಿಂಪಡೆಯುವ ಪ್ರಕ್ರಿಯೆಯನ್ನು ಸರಳೀಕರಿಸಲಾಗಿದೆ. ಈಗ ಅನಾರೋಗ್ಯ, ಶಿಕ್ಷಣ ಮತ್ತು ಮದುವೆ ಎಂಬ ಮೂರು ಮುಖ್ಯ ವಿಭಾಗಗಳ ಅಡಿಯಲ್ಲಿ ಸುಲಭವಾಗಿ ಹಣವನ್ನು ಹಿಂಪಡೆಯಬಹುದು.
- ಉದ್ಯೋಗ ಕಳೆದುಕೊಂಡವರಿಗೆ ನೆರವು: ಕೆಲಸ ಕಳೆದುಕೊಂಡ ಉದ್ಯೋಗಿಗಳು ತಮ್ಮ ಪಿಎಫ್ ಮೊತ್ತದ ಶೇ. 75ರಷ್ಟು ಹಣವನ್ನು ತಕ್ಷಣವೇ ಹಿಂಪಡೆಯಲು ಅವಕಾಶ ಕಲ್ಪಿಸಲಾಗಿದೆ.
- ದಂಡದ ಬಡ್ಡಿ: ಒಂದು ವೇಳೆ ಯಾವುದೇ ಸಮರ್ಪಕ ಕಾರಣವಿಲ್ಲದೆ ಅಧಿಕಾರಿಗಳು ಕ್ಲೇಮ್ ವಿಲೇವಾರಿ ಮಾಡಲು 20 ದಿನಗಳಿಗಿಂತ ಹೆಚ್ಚು ವಿಳಂಬ ಮಾಡಿದರೆ, ಸಂಬಂಧಪಟ್ಟ ಅಧಿಕಾರಿಯ ವೇತನದಿಂದಲೇ ವಸೂಲಿ ಮಾಡಿ, ಅರ್ಜಿದಾರರಿಗೆ ವಾರ್ಷಿಕ ಶೇ. 12ರಷ್ಟು ದಂಡದ ಬಡ್ಡಿಯನ್ನು ಪಾವತಿಸಲಾಗುತ್ತದೆ.
- ಡಿಜಿಟಲೀಕರಣ: ಇಡೀ ಪ್ರಕ್ರಿಯೆಯನ್ನು ಡಿಜಿಟಲೀಕರಣಗೊಳಿಸಲಾಗಿದ್ದು, ಯುಪಿಐ (UPI) ಮತ್ತು ಎಟಿಎಂ (ATM) ಮೂಲಕವೂ ಪಿಎಫ್ ಹಣವನ್ನು ಪಡೆಯುವ ಸೌಲಭ್ಯಗಳನ್ನು ಹಂತಹಂತವಾಗಿ ತರಲಾಗುತ್ತಿದೆ.
- ಸ್ವಯಂಚಾಲಿತ ವಿಲೇವಾರಿ: ಹೆಚ್ಚಿನ ಕ್ಲೇಮ್ ಗಳು ಸ್ವಯಂಚಾಲಿತವಾಗಿ ವಿಲೇವಾರಿಯಾಗಲಿವೆ, ಇದರಿಂದ ಕಚೇರಿಗೆ ಅಲೆಯುವ ಅಗತ್ಯ ಮತ್ತು ದಾಖಲೆ ಸಲ್ಲಿಸುವ ಕೆಲಸ ಕಡಿಮೆಯಾಗಲಿದೆ.
- ಸೇವಾ ಅವಧಿ ಸಡಿಲಿಕೆ: ವಿವಿಧ ಉದ್ದೇಶಗಳಿಗಾಗಿ ಪಿಎಫ್ ಹಿಂಪಡೆಯಲು ಬೇಕಾಗಿದ್ದ ಕನಿಷ್ಠ ಸೇವಾ ಅವಧಿಯನ್ನು 7 ವರ್ಷಗಳಿಂದ 12 ತಿಂಗಳಿಗೆ ಇಳಿಸಲಾಗಿದೆ.
ಇದನ್ನೂ ಓದಿ : ಅರಣ್ಯ, ವನ್ಯಜೀವಿ ಮತ್ತು ಹವಾಮಾನ ಬದಲಾವಣೆ ಪ್ರತಿಷ್ಠಾನದಲ್ಲಿ ನೇಮಕಾತಿ : ಹೀಗೆ ಅರ್ಜಿ ಸಲ್ಲಿಸಿ
