ಬೆಂಗಳೂರು : ಭಾರತೀಯ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ತನ್ನದೇ ಆದ ಛಾಪು ಮೂಡಿಸಿರುವ ಪ್ರೀಮಿಯಂ ಎಲೆಕ್ಟ್ರಿಕ್ ಮೋಟಾರ್‌ಸೈಕಲ್ ತಯಾರಕ ಕಂಪನಿ ‘ಅಲ್ಟ್ರಾವೈಲೆಟ್‘ ಇದೀಗ ಮೋಟಾರ್‌ಸೈಕಲ್ ಸವಾರರಿಗಾಗಿ ಅಧಿಕೃತ ರೈಡಿಂಗ್ ಅಕಾಡೆಮಿಯೊಂದನ್ನು ಆರಂಭಿಸಿದೆ. ಕುತೂಹಲಕಾರಿ ವಿಷಯವೇನೆಂದರೆ, ಈ ಅಕಾಡೆಮಿಯು ಕೇವಲ ಅಲ್ಟ್ರಾವೈಲೆಟ್ನ ಎಲೆಕ್ಟ್ರಿಕ್ ವಾಹನ ಸವಾರರಿಗೆ ಮಾತ್ರ ಸೀಮಿತವಾಗಿರದೆ, ಸಾಮಾನ್ಯ ಇಂಟರ್ನಲ್ ಕಂಬಶನ್ ಎಂಜಿನ್ ಮೋಟಾರ್‌ಸೈಕಲ್ ಬಳಸುವವರಿಗೂ ಮುಕ್ತವಾಗಿದೆ.
ಸವಾರರ ತಾಂತ್ರಿಕ ಕುಶಲತೆಯನ್ನು ಹೆಚ್ಚಿಸುವ ಹಾಗೂ ಸುರಕ್ಷಿತ ಚಾಲನೆಯನ್ನು ಕಲಿಸುವ ಉದ್ದೇಶದಿಂದ ಈ ರೈಡಿಂಗ್ ಅಕಾಡೆಮಿಯಲ್ಲಿ ‘ಟ್ರಾಕ್ ಅಟ್ಯಾಕ್’ ಮತ್ತು ‘ಇನ್ ಟು ದಿ ವೈಲ್ಡ್’ ಎಂಬ ಎರಡು ವಿಶಿಷ್ಟ ತರಬೇತಿ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ.
ಟ್ರಾಕ್ ಮತ್ತು ಆಫ್-ರೋಡ್: ವಿಭಿನ್ನ ತರಬೇತಿ ಕಾರ್ಯಕ್ರಮಗಳು
ರೈಡಿಂಗ್ ಅಕಾಡೆಮಿಯಲ್ಲಿ ಟ್ರ್ಯಾಕ್ ಹಾಗೂ ಆಫ್-ರೋಡಿಂಗ್ ಅನುಭವಕ್ಕಾಗಿ ಪ್ರತ್ಯೇಕ ಕಾರ್ಯಕ್ರಮಗಳನ್ನು ರೂಪಿಸಲಾಗಿದೆ. ‘ಟ್ರಾಕ್ ಅಟ್ಯಾಕ್’ ಕಾರ್ಯಕ್ರಮವು ಸರ್ಕ್ಯೂಟ್ ಮತ್ತು ಪರ್ಫಾರ್ಮೆನ್ಸ್ ರೈಡಿಂಗ್ ಮೇಲೆ ಹೆಚ್ಚು ಗಮನಹರಿಸುತ್ತದೆ. ಇದರಲ್ಲಿ ರೇಸಿಂಗ್ ಲೈನ್‌ಗಳು, ಬ್ರೇಕಿಂಗ್ ಪಾಯಿಂಟ್‌ಗಳು, ಕಾರ್ನರ್ ಎಂಟ್ರಿ ಮತ್ತು ಎಕ್ಸಿಟ್, ಥ್ರೊಟಲ್ ಕಂಟ್ರೋಲ್, ಬಾಡಿ ಪೊಸಿಶನಿಂಗ್, ಆಕ್ಸಿಲರೇಷನ್ ಹಾಗೂ ಓವರ್‌ಟೇಕಿಂಗ್ ತಂತ್ರಗಳ ಬಗ್ಗೆ ತರಬೇತಿ ನೀಡಲಾಗುತ್ತದೆ. ಇದರ ಜೊತೆಗೆ ಟ್ರ್ಯಾಕ್ ನಿಯಮಗಳು, ಫ್ಲ್ಯಾಗ್ ಪ್ರೋಟೋಕಾಲ್, ಭದ್ರತಾ ಸಜ್ಜುಗಳ ಬಳಕೆ ಮತ್ತು ಮೋಟಾರ್‌ಸೈಕಲ್ ತಪಾಸಣೆಯಂಥ ಪ್ರಾಥಮಿಕ ನಿಯಮಗಳನ್ನೂ ಕಲಿಸಲಾಗುತ್ತದೆ. ಮತ್ತೊಂದೆಡೆ, ‘ಇನ್ ಟು ದಿ ವೈಲ್ಡ್’ ಕಾರ್ಯಕ್ರಮವು ಆಫ್-ರೋಡಿಂಗ್ ಹಾಗೂ ಕಠಿಣ ಭೂಪ್ರದೇಶಗಳಲ್ಲಿ ಬೈಕ್ ನಿಯಂತ್ರಿಸುವ ಕೌಶಲ್ಯವನ್ನು ನೀಡಲು ಮೀಸಲಾಗಿದೆ. ಸಡಿಲವಾದ ಹಾಗೂ ಅಸಮತೋಲಿತ ರಸ್ತೆಗಳಲ್ಲಿ ಬ್ಯಾಲೆನ್ಸ್ ಮಾಡುವುದು, ಆಫ್-ರೋಡ್ ಕಾರ್ನರಿಂಗ್, ಅಡೆತಡೆಗಳನ್ನು ನಿವಾರಣೆ ಮಾಡುವುದು ಹಾಗೂ ಜವಾಬ್ದಾರಿಯುತ ಟ್ರಯಲ್ ರೈಡಿಂಗ್ ಕುರಿತು ಇದರಲ್ಲಿ ವಿಶೇಷ ತರಬೇತಿ ನೀಡಲಾಗುತ್ತದೆ.
ತರಗತಿಗಳು ಹಾಗೂ ಮೂರು ಹಂತಗಳ ಸರ್ಟಿಫಿಕೇಶನ್
ಅಲ್ಟ್ರಾವೈಲೆಟ್ನ ಈ ತರಬೇತಿ ಕಾರ್ಯಕ್ರಮವು ಪ್ರತ್ಯೇಕ ಮೂರು ಹಂತದ (ಲೆವೆಲ್) ಸರ್ಟಿಫಿಕೇಶನ್ ರಚನೆಯನ್ನು ಹೊಂದಿದೆ. ತರಗತಿಯ ಮೂಲಕ ನೀಡುವ ಬೋಧನೆ ಮತ್ತು ಟ್ರ್ಯಾಕ್/ಆಫ್-ರೋಡ್‌ನಲ್ಲಿ ಪ್ರಾಯೋಗಿಕ ತರಬೇತಿ ಎರಡನ್ನೂ ಇದು ಸಂಯೋಜಿಸುತ್ತದೆ. ಮುಂದಿನ ಹಂತಕ್ಕೆ ಸಾಗುವ ಮುನ್ನ ಸವಾರರು ಮೌಲ್ಯಮಾಪನವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವುದು ಕಡ್ಡಾಯ. ‘ಲೆವೆಲ್ 1’ ರಲ್ಲಿ ಮೂಲಭೂತ ರೈಡಿಂಗ್ ತಂತ್ರಗಳು ಮತ್ತು ಸುರಕ್ಷತೆಯ ಪಾಠಗಳಿರುತ್ತವೆ. ‘ಲೆವೆಲ್ 2’ ಸ್ವಲ್ಪ ತಾಂತ್ರಿಕ ಸಂಕೀರ್ಣತೆಯನ್ನು ಹೊಂದಿದ್ದು, ‘ಲೆವೆಲ್ 3’ ರ ಹೊತ್ತಿಗೆ ಅತ್ಯಾಧುನಿಕ ತಂತ್ರ ಹಾಗೂ ಹೆಚ್ಚಿನ ವೇಗದ ಚಾಲನೆಯನ್ನು ಟ್ರ್ಯಾಕ್ ಅಥವಾ ಆಫ್-ರೋಡ್ ಪರಿಸರದಲ್ಲಿ ಕಲಿಸಲಾಗುತ್ತದೆ.
ಯಾರು ಭಾಗವಹಿಸಬಹುದು?
ಬೆಂಗಳೂರು ಮೂಲದ ಅಲ್ಟ್ರಾವೈಲೆಟ್ ಸಂಸ್ಥೆಯು ಇದೇ ಮೊದಲ ಬಾರಿಗೆ F77 ಮತ್ತು X-47 ಮೋಟಾರ್‌ಸೈಕಲ್‌ಗಳಿಗಾಗಿ ಈ ಕಾರ್ಯಕ್ರಮವನ್ನು ರೂಪಿಸಿದ್ದರೂ, ಇದು ಕೇವಲ ಅಲ್ಟ್ರಾವೈಲೆಟ್ ಗ್ರಾಹಕರಿಗೆ ಮಾತ್ರ ಸೀಮಿತವಾಗಿಲ್ಲ. ಬದಲಾಗಿ, ಬೇರೆ ಎಲೆಕ್ಟ್ರಿಕ್ ಬೈಕ್‌ಗಳು ಇರಲಿ, ಅಥವಾ ಐಸಿಇ (ಪೆಟ್ರೋಲ್) ಬೈಕ್‌ಗಳು ಇರಲಿ, ಯಾವುದೇ ಸವಾರರು ಈ ತರಬೇತಿಯಲ್ಲಿ ಪಾಲ್ಗೊಳ್ಳಬಹುದು. ಆದರೆ, ತರಬೇತಿಗೆ ಐಸಿಇ ಮೋಟಾರ್‌ಸೈಕಲ್‌ಗಳನ್ನು ಕಂಪನಿ ಒದಗಿಸುವುದಿಲ್ಲ, ಸವಾರರೇ ತಮ್ಮ ವಾಹನದೊಂದಿಗೆ ಭಾಗವಹಿಸಬಹುದಾಗಿದೆ. ತರಬೇತಿಯನ್ನು ಪೂರ್ಣಗೊಳಿಸಿದವರಿಗೆ ಅಧಿಕೃತ ಪ್ರಮಾಣಪತ್ರವೂ ಸಿಗಲಿದೆ.
ಕಾರ್ಯಕ್ರಮದ ವೇಳಾಪಟ್ಟಿ
ಅಲ್ಟ್ರಾವೈಲೆಟ್ ಸಂಸ್ಥೆಯು ದೇಶದ ವಿವಿಧ ರೇಸ್‌ಟ್ರ್ಯಾಕ್ ಹಾಗೂ ಆಫ್-ರೋಡ್ ಪ್ರದೇಶಗಳಲ್ಲಿ ವರ್ಷಪೂರ್ತಿ ಈ ತರಬೇತಿಯನ್ನು ನಡೆಸಲು ಉದ್ದೇಶಿಸಿದೆ. ಮೊದಲ ‘ಲೆವೆಲ್ 1 ಇನ್ ಟು ದಿ ವೈಲ್ಡ್’ ಸೆಷನ್ ಆಗಸ್ಟ್ ೨೩, ೨೦೨೬ ರಂದು ಬೆಂಗಳೂರಿನಲ್ಲಿ ನಡೆಯಲಿದ್ದು, ಅದನ್ನು ಅನುಸರಿಸಿ ಸೆಪ್ಟೆಂಬರ್ ೨೭ ರಂದು ಮೊದಲ ‘ಟ್ರಾಕ್ ಅಟ್ಯಾಕ್’ ಸೆಷನ್ ಆಯೋಜನೆಗೊಳ್ಳಲಿದೆ. ಬೈಕ್ ಪ್ರಿಯರಿಗೆ ಇದೊಂದು ನೈಜ ಚಾಲನಾ ಅನುಭವದ ಜೊತೆಗೆ ಸುರಕ್ಷತಾ ಕೌಶಲ್ಯಗಳನ್ನು ಅಳವಡಿಸಿಕೊಳ್ಳಲು ಸಿಕ್ಕ ಅತ್ಯುತ್ತಮ ಅವಕಾಶವಾಗಿದೆ ಎಂದು ಕಂಪನಿ ವಿಶ್ವಾಸ ವ್ಯಕ್ತಪಡಿಸಿದೆ.
ಇದನ್ನೂ ಓದಿ : ಸಾಗರದಲ್ಲಿ ಲಾರಿ-ಬೈಕ್ ನಡುವೆ ಭೀಕರ ಅಪಘಾತ ; ಯುವತಿ ಸ್ಥಳದಲ್ಲೇ ಸಾವು!
