“ಭಾರತದಲ್ಲಿ ತಯಾರಿಸಿ, ಜಗತ್ತಿಗಾಗಿ ತಯಾರಿಸಿ”: ಜಪಾನ್‌ನಲ್ಲಿ ಪ್ರಧಾನಿ ಮೋದಿ ಪ್ರತಿಪಾದನೆ

ಟೋಕಿಯೋ: ಪ್ರಧಾನಿ ನರೇಂದ್ರ ಮೋದಿಯವರ 2 ದಿನಗಳ ಜಪಾನ್ ಪ್ರವಾಸ ಆರಂಭವಾಗಿದೆ. ಟೋಕಿಯೋದಲ್ಲಿ ನಡೆದ ಭಾರತ-ಜಪಾನ್ ಜಂಟಿ ಆರ್ಥಿಕ ವೇದಿಕೆಯನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, ಆತ್ಮನಿರ್ಭರ ಭಾರತಕ್ಕೆ ಒತ್ತು ನೀಡುತ್ತಾ “ಭಾರತದಲ್ಲಿ ತಯಾರಿಸಿ, ಜಗತ್ತಿಗಾಗಿ ತಯಾರಿಸಿ” (make in India, make for the world) ಎಂದು ಜಾಗತಿಕ ಹೂಡಿಕೆದಾರರಿಗೆ ಆಹ್ವಾನ ನೀಡಿದ್ದಾರೆ. ಈ ಪ್ರವಾಸದ ವೇಳೆ ಅವರು ಜಪಾನ್ ಪ್ರಧಾನಿ ಶಿರು ಇಶಿಬಾ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಲಿದ್ದಾರೆ.

ಭಾರತ-ಜಪಾನ್ ಜಂಟಿ ಆರ್ಥಿಕ ವೇದಿಕೆಯಲ್ಲಿ ಮಾತನಾಡಿದ ಪ್ರಧಾನಿ ಮೋದಿ, ಭಾರತ ಮತ್ತು ಜಪಾನ್ ನಡುವಿನ ಬಾಂಧವ್ಯವನ್ನು ಬಲಪಡಿಸುವ ಮಹತ್ವವನ್ನು ಒತ್ತಿ ಹೇಳಿದರು. “ಸೆಮಿಕಂಡಕ್ಟರ್‌ಗಳಿಂದ ಹಿಡಿದು ಸ್ಟಾರ್ಟ್‌ಅಪ್‌ಗಳವರೆಗೆ, ಜಪಾನ್ ಭಾರತದ ಪ್ರಮುಖ ಪಾಲುದಾರನಾಗಿದೆ. ಈಗಾಗಲೇ ಜಪಾನಿನ ಕಂಪನಿಗಳು ಭಾರತದಲ್ಲಿ 40 ಶತಕೋಟಿ ಡಾಲರ್‌ಗೂ ಹೆಚ್ಚು ಹೂಡಿಕೆ ಮಾಡಿವೆ” ಎಂದು ತಿಳಿಸಿದರು.

ಜಪಾನ್‌ನಿಂದ ದಶಕದ ಬೃಹತ್ ಹೂಡಿಕೆ:

ಜಪಾನ್ ಮೂಲದ ಮಾಧ್ಯಮ ವೇದಿಕೆ ‘ನಿಕ್ಕಿ ಏಷ್ಯಾ’ ವರದಿ ಮಾಡಿರುವಂತೆ, ಮುಂದಿನ ದಶಕದಲ್ಲಿ ಭಾರತದೊಂದಿಗೆ ದ್ವಿಪಕ್ಷೀಯ ವ್ಯಾಪಾರವನ್ನು ಹೆಚ್ಚಿಸಲು ಜಪಾನ್ 10 ಟ್ರಿಲಿಯನ್ ಯೆನ್ (68 ಶತಕೋಟಿ ಡಾಲರ್) ಹೂಡಿಕೆ ಮಾಡಲು ಯೋಜಿಸಿದೆ. ಈ ಹೂಡಿಕೆಯು ಕೃತಕ ಬುದ್ಧಿಮತ್ತೆ (ಎಐ), ಸೆಮಿಕಂಡಕ್ಟರ್‌ಗಳು, ಪರಿಸರ ಮತ್ತು ವೈದ್ಯಕೀಯ ಸೇರಿದಂತೆ ಹಲವು ಪ್ರಮುಖ ವಲಯಗಳ ಮೇಲೆ ಕೇಂದ್ರೀಕೃತವಾಗಿದೆ.

ಭಾರತದ ಆರ್ಥಿಕ ಪ್ರಗತಿಯತ್ತ ಗಮನ ಸೆಳೆದ ಮೋದಿ:

“ಭಾರತದಲ್ಲಿರುವ ಜಪಾನಿನ ಶೇ. 80ರಷ್ಟು ಕಂಪನಿಗಳು ತಮ್ಮ ವಹಿವಾಟನ್ನು ವಿಸ್ತರಿಸಲು ಬಯಸುತ್ತಿವೆ ಮತ್ತು ಶೇ. 75ರಷ್ಟು ಕಂಪನಿಗಳು ಈಗಾಗಲೇ ಲಾಭದಲ್ಲಿವೆ. ಕಳೆದ 11 ವರ್ಷಗಳಲ್ಲಿ ಭಾರತವು ರಾಜಕೀಯ ಸ್ಥಿರತೆ, ಆರ್ಥಿಕ ಸ್ಥಿರತೆ ಮತ್ತು ನೀತಿಗಳಲ್ಲಿ ಪಾರದರ್ಶಕತೆಯಂತಹ ಅಭೂತಪೂರ್ವ ಪರಿವರ್ತನೆಗಳನ್ನು ಕಂಡಿದೆ. ಭಾರತವು ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆಯಾಗಿದ್ದು, ಶೀಘ್ರದಲ್ಲೇ ಮೂರನೇ ಅತಿದೊಡ್ಡ ಆರ್ಥಿಕತೆಯಾಗಲಿದೆ” ಎಂದು ಪ್ರಧಾನಿ ಮೋದಿ ವಿಶ್ವಾಸ ವ್ಯಕ್ತಪಡಿಸಿದರು.

ಬುಲೆಟ್ ಟ್ರೈನ್ ಯೋಜನೆ:

ತಮ್ಮ ಪ್ರವಾಸದ ಭಾಗವಾಗಿ ಪ್ರಧಾನಿ ಮೋದಿ, ಟೋಕಿಯೋದಲ್ಲಿರುವ ‘ಎಲೆಕ್ಟ್ರಾನ್ ಫ್ಯಾಕ್ಟರಿ’ ಮತ್ತು ಬುಲೆಟ್ ಟ್ರೈನ್ ಕೋಚ್‌ಗಳನ್ನು ನಿರ್ಮಿಸುವ ಸೆಂಡೈನಲ್ಲಿರುವ ‘ತೋಹೊಕು ಶಿಂಕಾನ್‌ಸೆನ್’ ಸ್ಥಾವರಕ್ಕೆ ಭೇಟಿ ನೀಡಲಿದ್ದಾರೆ. ಈ ಸಂದರ್ಭದಲ್ಲಿ ಅವರ ಜೊತೆ ಜಪಾನ್ ಪ್ರಧಾನಿ ಇಶಿಬಾ ಕೂಡ ಇರಲಿದ್ದು, ಭಾರತದ ಬುಲೆಟ್ ಟ್ರೈನ್ ಯೋಜನೆಯಲ್ಲಿ ಟೋಕಿಯೋದ ಭಾಗವಹಿಸುವಿಕೆಯ ಕುರಿತು ಮಹತ್ವದ ಮಾತುಕತೆ ನಡೆಸುವ ನಿರೀಕ್ಷೆಯಿದೆ.

“ನಾವು ಒಟ್ಟಾಗಿ ‘ಗ್ಲೋಬಲ್ ಸೌತ್’, ವಿಶೇಷವಾಗಿ ಆಫ್ರಿಕಾದ ಅಭಿವೃದ್ಧಿಗೆ ಮಹತ್ವದ ಕೊಡುಗೆ ನೀಡಬಹುದು. ‘ಸುಜುಕಿ’ ಮತ್ತು ‘ಡೈಕಿನ್’ ಕಂಪನಿಗಳ ಯಶೋಗಾಥೆಗಳು ನಿಮ್ಮ ಯಶಸ್ಸಿನ ಕಥೆಗಳೂ ಆಗಬಹುದು” ಎಂದು ಹೇಳುವ ಮೂಲಕ ಜಪಾನಿನ ಉದ್ಯಮಿಗಳಿಗೆ ಭಾರತದಲ್ಲಿ ಹೂಡಿಕೆ ಮಾಡಲು ಪ್ರಧಾನಿ ಮೋದಿ ಮತ್ತೊಮ್ಮೆ ಕರೆ ನೀಡಿದ್ದಾರೆ.