ಲಂಡನ್ : ಇಂಗ್ಲೆಂಡ್ನ ದಂತಕಥೆ, ಮಾಜಿ ಆಲ್ರೌಂಡರ್ ಆಂಡ್ರ್ಯೂ ಫ್ಲಿಂಟಾಫ್ ಅವರ 18 ವರ್ಷದ ಪುತ್ರ ರಾಕಿ ಫ್ಲಿಂಟಾಫ್ ಕ್ರಿಕೆಟ್ ವಲಯದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದಾರೆ. ಟೌಂಟನ್ನಲ್ಲಿ ನಡೆದ ಏಕದಿನ ಕಪ್ ಟೂರ್ನಿಯಲ್ಲಿ ಲ್ಯಾಂಕಾಶೈರ್ ತಂಡದ ಪರ ಕಣಕ್ಕಿಳಿದ ರಾಕಿ, ಸೋಮರ್ಸೆಟ್ ವಿರುದ್ಧ ತಮ್ಮ ವೃತ್ತಿಜೀವನದ ಚೊಚ್ಚಲ ವೃತ್ತಿಪರ ಶತಕವನ್ನು ಸಿಡಿಸಿ ಸಂಭ್ರಮಿಸಿದ್ದಾರೆ. ತಂದೆಯಂತೆಯೇ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯನ್ನು ಮೈಗೂಡಿಸಿಕೊಂಡಿರುವ ಅವರು ತಮ್ಮ ಅಮೋಘ ಪ್ರದರ್ಶನದ ಮೂಲಕ ಕ್ರೀಡಾಭಿಮಾನಿಗಳ ಗಮನ ಸೆಳೆದಿದ್ದಾರೆ.
ಬುಧವಾರ ನಡೆದ ಪಂದ್ಯದಲ್ಲಿ ರಾಕಿ ಫ್ಲಿಂಟಾಫ್ ಅವರ ಬ್ಯಾಟಿಂಗ್ ವೈಖರಿ ಅದ್ಭುತವಾಗಿತ್ತು. ಕೇವಲ 76 ಎಸೆತಗಳನ್ನು ಎದುರಿಸಿದ ಅವರು 10 ಆಕರ್ಷಕ ಬೌಂಡರಿ ಹಾಗೂ 7 ಭರ್ಜರಿ ಸಿಕ್ಸರ್ಗಳ ನೆರವಿನಿಂದ 123 ರನ್ ಚಚ್ಚಿದರು. ಲ್ಯಾಂಕಾಶೈರ್ ತಂಡ 138 ರನ್ಗಳಿಗೆ ಮೂರು ವಿಕೆಟ್ ಕಳೆದುಕೊಂಡಿದ್ದಾಗ ಕ್ರೀಸ್ಗೆ ಬಂದ ರಾಕಿ, ಎದುರಾಳಿ ಬೌಲರ್ಗಳನ್ನು ನಿರ್ದಯವಾಗಿ ದಂಡಿಸಿದರು.
ಅವರು ಕೀಟನ್ ಜೆನ್ನಿಂಗ್ಸ್ ಅವರೊಂದಿಗೆ ಸೇರಿ ಕೇವಲ 214 ರನ್ಗಳ ಬೃಹತ್ ಜೊತೆಯಾಟವಾಡಿದರು. ಕೀಟನ್ ಜೆನ್ನಿಂಗ್ಸ್ ಕೂಡ 156 ರನ್ ಗಳಿಸಿ ಮಿಂಚಿದರು. ಕೇವಲ 65 ಎಸೆತಗಳಲ್ಲಿ ಶತಕ ಪೂರೈಸಿದ ರಾಕಿ ಅವರ ಈ ಸ್ಫೋಟಕ ಇನ್ನಿಂಗ್ಸ್ ನೆರವಿನಿಂದ ಲ್ಯಾಂಕಾಶೈರ್ ತಂಡ ನಿಗದಿತ ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 443 ರನ್ ಗಳಿಸಿತು. ಇದು ಆ ಕೌಂಟಿ ಇತಿಹಾಸದಲ್ಲೇ ‘ಲಿಸ್ಟ್ ಎ’ ಕ್ರಿಕೆಟ್ನಲ್ಲಿ ದಾಖಲಾದ ಅತಿ ಗರಿಷ್ಠ ಮೊತ್ತವಾಗಿದೆ. ವಿಶೇಷವಾಗಿ ಮಿಡ್-ವಿಕೆಟ್ ವಿಭಾಗದಲ್ಲಿ ರಾಕಿ ಬಾರಿಸಿದ ಹೊಡೆತಗಳು ಅವರ ತಂದೆ ಆಂಡ್ರ್ಯೂ ಫ್ಲಿಂಟಾಫ್ ಅವರ ಬ್ಯಾಟಿಂಗ್ ಶೈಲಿಯನ್ನು ನೆನಪಿಸುವಂತಿದ್ದವು.
ಚಿಕ್ಕ ವಯಸ್ಸಿನಲ್ಲೇ ಹತ್ತು ಹಲವು ದಾಖಲೆಗಳು
ರಾಕಿ ಫ್ಲಿಂಟಾಫ್ ಅವರಿಗೆ ದಾಖಲೆಗಳು ಹೊಸದೇನಲ್ಲ. 2024 ರಲ್ಲಿ ಲ್ಯಾಂಕಾಶೈರ್ ತಂಡದ ಪರ ಕೇವಲ 16 ವರ್ಷ 113 ದಿನಗಳ ವಯಸ್ಸಿನಲ್ಲಿ ಏಕದಿನ ಕಪ್ಗೆ ಪಾದಾರ್ಪಣೆ ಮಾಡುವ ಮೂಲಕ ಆ ತಂಡದ ಪರ ಆಡಿದ ಅತ್ಯಂತ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಇಂಗ್ಲೆಂಡ್ ಅಂಡರ್-19 ತಂಡದ ಪರ ಶತಕ ಸಿಡಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ಸಾಧನೆ ಮಾಡಿದ ಕೇವಲ ಒಂದು ವಾರದ ನಂತರ ಅವರು ಈ ಮೈಲಿಗಲ್ಲು ತಲುಪಿದ್ದರು. ಅಷ್ಟೇ ಅಲ್ಲದೆ, 2025ರ ಜನವರಿಯಲ್ಲಿ ಕ್ರಿಕೆಟ್ ಆಸ್ಟ್ರೇಲಿಯಾ ವಿರುದ್ಧ ಇಂಗ್ಲೆಂಡ್ ಲಯನ್ಸ್ ಪರ ಶತಕ ಸಿಡಿಸುವ ಮೂಲಕ, ತಂದೆ ಆಂಡ್ರ್ಯೂ ಅವರ ದಾಖಲೆಯನ್ನೇ ಮುರಿದು ಲಯನ್ಸ್ ಪರ ಶತಕ ಬಾರಿಸಿದ ಅತ್ಯಂತ ಕಿರಿಯ ಆಟಗಾರ ಎನಿಸಿಕೊಂಡರು. ಗಾಯದ ಸಮಸ್ಯೆಗಳಿಂದಾಗಿ ಕೆಲವೊಮ್ಮೆ ಹಿನ್ನಡೆ ಅನುಭವಿಸಿದ್ದರೂ, ಮಾರ್ಚ್ನಲ್ಲಿ ಲ್ಯಾಂಕಾಶೈರ್ ಜೊತೆಗಿನ ಒಪ್ಪಂದವನ್ನು ವಿಸ್ತರಿಸಿಕೊಂಡ ನಂತರ ಅವರು ಮತ್ತೆ ಅದ್ಭುತ ಫಾರ್ಮ್ಗೆ ಮರಳಿ ಸೀನಿಯರ್ ತಂಡದಲ್ಲಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಂಡಿದ್ದಾರೆ.
ಕ್ರೀಡಾಂಗಣದಲ್ಲಿ ಇಬ್ಬರು ದಿಗ್ಗಜರ ಪುತ್ರರ ಮುಖಾಮುಖಿ
ಈ ಪಂದ್ಯ ಮತ್ತೊಂದು ವಿಶೇಷತೆಗೂ ಸಾಕ್ಷಿಯಾಯಿತು. ಸೋಮರ್ಸೆಟ್ ತಂಡದ ಪರವಾಗಿ ಇಂಗ್ಲೆಂಡ್ನ ಮಾಜಿ ನಾಯಕ ಮೈಕೆಲ್ ವಾನ್ ಅವರ ಪುತ್ರ, ಸ್ಪಿನ್ನರ್ ಆರ್ಚೀ ವಾನ್ ಕೂಡ ಕಣಕ್ಕಿಳಿದಿದ್ದರು. ಇಂಗ್ಲೆಂಡ್ ಕ್ರಿಕೆಟ್ನ ಇಬ್ಬರು ದಿಗ್ಗಜರ ಪುತ್ರರು ಒಂದೇ ಪಂದ್ಯದಲ್ಲಿ ಮುಖಾಮುಖಿಯಾಗಿದ್ದು ಕ್ರೀಡಾಭಿಮಾನಿಗಳಿಗೆ ರೋಮಾಂಚನ ಉಂಟುಮಾಡಿತು. ಇಂಗ್ಲೆಂಡ್ ಪರ 79 ಟೆಸ್ಟ್, 141 ಏಕದಿನ ಹಾಗೂ 7 ಟಿ-20 ಪಂದ್ಯಗಳನ್ನು ಆಡಿರುವ ಆಂಡ್ರ್ಯೂ ಫ್ಲಿಂಟಾಫ್, 2005ರ ಆ್ಯಶಸ್ ಸರಣಿಯ ಐತಿಹಾಸಿಕ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಈಗ ಅವರ ಮಗ ರಾಕಿ ಕೂಡ ತಂದೆಯ ಹೆಜ್ಜೆಯಲ್ಲೇ ಸಾಗುತ್ತಿದ್ದು, ಇಂಗ್ಲೆಂಡ್ ಕ್ರಿಕೆಟ್ನ ಭವಿಷ್ಯದ ತಾರೆಯಾಗಿ ಹೊರಹೊಮ್ಮುವ ಎಲ್ಲಾ ಮುನ್ಸೂಚನೆಗಳನ್ನು ನೀಡಿದ್ದಾರೆ.
ಇದನ್ನೂ ಓದಿ : ಲಂಕಾ ವಿರುದ್ಧದ ಟೆಸ್ಟ್ ಸರಣಿಗೆ ಸರ್ಫರಾಜ್ ಕಮ್ಬ್ಯಾಕ್ ; BCCI ನಿರ್ಧಾರಕ್ಕೆ ಕೈಫ್ ಸಲಾಂ!
