ನವದೆಹಲಿ : ಬರೋಡಾ ಕ್ರಿಕೆಟ್ನ ಅತ್ಯಂತ ಹಳೆಯ ಹಾಗೂ ಹೆಮ್ಮೆಯ ಪ್ರತೀಕವಾಗಿದ್ದ ಐತಿಹಾಸಿಕ ‘ಮೋತಿಬಾಗ್ ಕ್ರಿಕೆಟ್ ಕ್ಲಬ್‘ನ ಮಾನ್ಯತೆಯನ್ನು ರದ್ದುಗೊಳಿಸಲು ಬರೋಡಾ ಕ್ರಿಕೆಟ್ ಸಂಸ್ಥೆ (BCA) ಮುಂದಾಗಿದೆ. ಈ ನಿರ್ಧಾರ ಇದೀಗ ತೀವ್ರ ವಿವಾದಕ್ಕೆ ಕಾರಣವಾಗಿದ್ದು, ಭಾರತ ತಂಡದ ಮಾಜಿ ಆಲ್ರೌಂಡರ್ ಇರ್ಫಾನ್ ಪಠಾಣ್ ಕ್ರಿಕೆಟ್ ಮಂಡಳಿಯ ಆಂತರಿಕ ರಾಜಕೀಯದ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ.
ಇತ್ತೀಚೆಗೆ ನಡೆದ ಬಿ.ಸಿ.ಎ ಉಸ್ತುವಾರಿ ಸಮಿತಿಯ ಸಭೆಯಲ್ಲಿ, ಸಂಯೋಜಿತ ಕ್ರೀಡಾಂಗಣಗಳ ನಿರ್ವಹಣಾ ವೆಚ್ಚ ಹಾಗೂ ಬಳಕೆಯ ಬಗ್ಗೆ ಸುದೀರ್ಘ ಚರ್ಚೆ ನಡೆಸಲಾಗಿತ್ತು. ಈ ವೇಳೆ, ಮೋತಿಬಾಗ್ ಮೈದಾನದ ನಿರ್ವಹಣೆಗೆ ಭಾರಿ ಮೊತ್ತ ವ್ಯಯವಾಗುತ್ತಿದ್ದು, ಅದಕ್ಕೆ ತಕ್ಕಂತೆ ಪಂದ್ಯಗಳಿಗಾಗಲಿ ಅಥವಾ ಅಭ್ಯಾಸಕ್ಕಾಗಲಿ ಮೈದಾನದ ಬಳಕೆಯಾಗುತ್ತಿಲ್ಲ ಎಂಬ ವರದಿಯನ್ನು ಸಮಿತಿ ನೀಡಿದೆ. ಇದರ ಜೊತೆಗೆ, ಇತ್ತೀಚಿನ ದಿನಗಳಲ್ಲಿ ಬಿ.ಸಿ.ಎ ಸಿಬ್ಬಂದಿ ಹಾಗೂ ಕ್ಯುರೇಟರ್ಗಳಿಗೆ ಮೈದಾನದೊಳಗೆ ಪ್ರವೇಶ ನೀಡಲು ನಿರಾಕರಿಸಲಾಗಿದೆ ಎಂಬ ಆರೋಪವೂ ಕೇಳಿಬಂದಿದೆ.
ಈ ಎಲ್ಲಾ ಕಾರಣಗಳ ಹಿನ್ನೆಲೆಯಲ್ಲಿ ಮೋತಿಬಾಗ್ ಕ್ರಿಕೆಟ್ ಕ್ಲಬ್ ಜೊತೆಗಿನ ಒಪ್ಪಂದವನ್ನು ಕೊನೆಗೊಳಿಸಲು ಹಾಗೂ ಮೈದಾನದಲ್ಲಿರುವ ತಮ್ಮ ಎಲ್ಲಾ ಯಂತ್ರೋಪಕರಣಗಳನ್ನು ಹಿಂಪಡೆಯಲು ಕ್ರಿಕೆಟ್ ಸಂಸ್ಥೆ ನಿರ್ಧರಿಸಿದೆ. ಈ ಕುರಿತು ಪ್ರತಿಕ್ರಿಯಿಸಿರುವ ಉಸ್ತುವಾರಿ ಸಮಿತಿಯ ಸದಸ್ಯ ಅಜಿತ್ ಲೇಲೆ, ಒಪ್ಪಂದದ ಪ್ರಕಾರ ಮೈದಾನಕ್ಕೆ ಪ್ರಮಾಣದ ಹಣ ಖರ್ಚು ಮಾಡುತ್ತಿದ್ದರೂ ಅದರ ಸಂಪೂರ್ಣ ಲಾಭ ಪಡೆಯಲು ನಮಗೆ ಸಾಧ್ಯವಾಗುತ್ತಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ನಿರ್ಧಾರ ಅಧಿಕೃತವಾಗಿ ಜಾರಿಯಾದರೆ, ಮೋತಿಬಾಗ್ ಕ್ರಿಕೆಟ್ ಕ್ಲಬ್ ಮುಂಬರುವ ಯಾವುದೇ ಬಿ.ಸಿ.ಎ ಟೂರ್ನಿಗಳಲ್ಲಿ ಪಾಲ್ಗೊಳ್ಳುವ ಅವಕಾಶ ಕಳೆದುಕೊಳ್ಳಲಿದೆ.
ರಾಜಕೀಯದ ಸುಳಿಯಲ್ಲಿ ಕ್ರಿಕೆಟ್ ಭವಿಷ್ಯ: ಆಕ್ರೋಶ ವ್ಯಕ್ತಪಡಿಸಿದ ಇರ್ಫಾನ್ ಪಠಾಣ್
ಮೋತಿಬಾಗ್ ಮೈದಾನದ ವಿವಾದದ ಬಗ್ಗೆ ಜಾಲತಾಣ ಎಕ್ಸ್ (X) ಮುಖಾಂತರ ತಮ್ಮ ಕಳವಳ ವ್ಯಕ್ತಪಡಿಸಿರುವ ಇರ್ಫಾನ್ ಪಠಾಣ್, ಬರೋಡಾ ಕ್ರಿಕೆಟ್ ಸಂಸ್ಥೆಯ ನಿರ್ಧಾರವನ್ನು ಕಟುವಾಗಿ ಟೀಕಿಸಿದ್ದಾರೆ. ದೇಶದ ಅತ್ಯಂತ ಐತಿಹಾಸಿಕ ಕ್ರಿಕೆಟ್ ಮೈದಾನಗಳಲ್ಲಿ ಒಂದಾಗಿರುವ ಮೋತಿಬಾಗ್, ಕೇವಲ ಆಡಳಿತಾತ್ಮಕ ರಾಜಕೀಯದ ಕಾರಣದಿಂದಾಗಿ ಯುವ ಆಟಗಾರರ ಕೈತಪ್ಪಿ ಹೋಗುತ್ತಿರುವುದು ದುರಂತ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.
ಬರೋಡಾದ ಯುವ ಆಟಗಾರರಿಗೆ ಮೈದಾನದ ಗೇಟ್ ತೆರೆದು ಸದಾ ಬೆಂಬಲವಾಗಿ ನಿಲ್ಲುತ್ತಿದ್ದ ಮಹಾರಾಜ ಸಮರ್ಜಿತ್ ಸಿನ್ಹಾ ಗಾಯಕ್ವಾಡ್ ಅವರ ಔದಾರ್ಯವನ್ನು ಪಠಾಣ್ ಇದೇ ವೇಳೆ ಕೊಂಡಾಡಿದರು. ಬರೋಡಾ ಕ್ರಿಕೆಟ್ ಸಂಸ್ಥೆಯಲ್ಲಿರುವ ಕೆಲವೇ ಕೆಲವು ವ್ಯಕ್ತಿಗಳು ಆಟ ಮತ್ತು ಆಟಗಾರರಿಗಿಂತ ರಾಜಕೀಯಕ್ಕೆ ಹೆಚ್ಚಿನ ಮಣೆ ಹಾಕುತ್ತಿದ್ದಾರೆ. ದಿನದ ಕೊನೆಯಲ್ಲಿ ಈ ಕ್ಷುಲ್ಲಕ ರಾಜಕೀಯದಿಂದಾಗಿ ಅತೀ ಹೆಚ್ಚು ನಷ್ಟ ಅನುಭವಿಸುವುದು ನಮ್ಮ ಪ್ರತಿಭಾವಂತ ಕ್ರಿಕೆಟಿಗರು ಮಾತ್ರ ಎಂದು ಪಠಾಣ್ ಆಡಳಿತ ಮಂಡಳಿಯ ವಿರುದ್ಧ ಗುಡುಗಿದ್ದಾರೆ. ಮಂಡಳಿಯ ಈ ನಡೆಯು ಯುವ ಪ್ರತಿಭೆಗಳಿಗೆ ಅತ್ಯುತ್ತಮ ಸೌಲಭ್ಯಗಳಿಂದ ವಂಚಿತರನ್ನಾಗಿಸುವ ಆತಂಕವನ್ನು ಹುಟ್ಟುಹಾಕಿದೆ.
ಬರೋಡಾ ಕ್ರಿಕೆಟ್ನ ತವರೂರಾಗಿದ್ದ ಮೈದಾನದ ಭವಿಷ್ಯ ಡೋಲಾಯಮಾನ
ಬರೋಡಾ ಕ್ರಿಕೆಟ್ ಇತಿಹಾಸದಲ್ಲಿ ಮೋತಿಬಾಗ್ ಮೈದಾನಕ್ಕೆ ತನ್ನದೇ ಆದ ಅತ್ಯುನ್ನತ ಹಾಗೂ ವಿಶೇಷ ಸ್ಥಾನಮಾನವಿದೆ. ಪ್ರಸ್ತುತ ಬಳಕೆಯಲ್ಲಿರುವ ಕೋಟಂಬಿ ಸ್ಟೇಡಿಯಂ ಅಥವಾ ರಿಲಯನ್ಸ್ ಸ್ಟೇಡಿಯಂಗಳಂತಹ ಹೊಚ್ಚಹೊಸ ತಾಣಗಳು ತಲೆಯೆತ್ತುವ ಮುನ್ನ, ಇಡೀ ನಗರದ ಪ್ರಮುಖ ಕ್ರಿಕೆಟ್ ಕೇಂದ್ರವಾಗಿದ್ದೇ ಮೋತಿಬಾಗ್.
ಅನೇಕ ವರ್ಷಗಳ ಕಾಲ ಸುದೀರ್ಘವಾಗಿ ಪ್ರಥಮ ದರ್ಜೆ ಪಂದ್ಯಗಳಿಗೆ ಆತಿಥ್ಯ ವಹಿಸಿದ್ದ ಈ ಮೈದಾನ, ಪಠಾಣ್ ಸಹೋದರರು ಸೇರಿದಂತೆ ಭಾರತೀಯ ಕ್ರಿಕೆಟ್ ತಂಡವನ್ನು ಪ್ರತಿನಿಧಿಸಿದ ಅನೇಕ ಘಟಾನುಘಟಿ ಆಟಗಾರರನ್ನು ದೇಶಕ್ಕೆ ಕೊಡುಗೆಯಾಗಿ ನೀಡಿದೆ. ಇದೀಗ ಉದ್ಭವಿಸಿರುವ ಬಿಕ್ಕಟ್ಟು ಮಾತುಕತೆಯ ಮೂಲಕ ಸುಖಾಂತ್ಯ ಕಾಣಲಿದೆಯೇ ಅಥವಾ ಸುದೀರ್ಘ ಇತಿಹಾಸವುಳ್ಳ ಮೋತಿಬಾಗ್ ಮತ್ತು ಬಿ.ಸಿ.ಎ ನಡುವಿನ ದಶಕಗಳ ನಂಟು ಶಾಶ್ವತವಾಗಿ ಕಡಿದುಹೋಗಲಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಘಟನೆಯ ಕುರಿತು ಮೋತಿಬಾಗ್ ಕ್ರಿಕೆಟ್ ಕ್ಲಬ್ ಈವರೆಗೂ ಯಾವುದೇ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲ.
ಇದನ್ನೂ ಓದಿ : ಕುಲದೀಪ್ ಆಯ್ಕೆ ವಿಚಾರದಲ್ಲಿ ಮತ್ತೆ ತಪ್ಪು ಮಾಡಿದ್ದೀರಿ : ಟೀಮ್ ಇಂಡಿಯಾಗೆ ದೀಪ್ ದಾಸ್ಗುಪ್ತ ಎಚ್ಚರಿಕೆ!
