ಕೊಲ್ಕತ್ತಾ : ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ಮುಂಬೈ ಇಂಡಿಯನ್ಸ್ ಹಾಗೂ ಕೊಲ್ಕತ್ತಾ ನೈಟ್ ರೈಡರ್ಸ್ ನಡುವೆ ನಡೆದ ಐಪಿಎಲ್ 2026ರ ನಿರ್ಣಾಯಕ ಪಂದ್ಯವು ಕೆಕೆಆರ್ ತಂಡದ ರೋಚಕ ಗೆಲುವಿಗೆ ಸಾಕ್ಷಿಯಾಯಿತು. ಆದರೆ, ಈ ಪಂದ್ಯವು ಮೈದಾನದ ಆಟಕ್ಕಿಂತಲೂ ಹೆಚ್ಚಾಗಿ ‘ಕನ್ಕಶನ್ ಸಬ್ಸ್ಟಿಟ್ಯೂಟ್’ (ತಲೆಗೆ ಪೆಟ್ಟಾದಾಗ ಬಳಸುವ ಬದಲಿ ಆಟಗಾರ) ನಿಯಮದ ಗೊಂದಲದಿಂದಲೇ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಕೆಕೆಆರ್ ತಂಡದ ಯುವ ತಾರೆ ಅಂಗಕೃಷ್ ರಘುವಂಶಿ ಅವರಿಗೆ ಬೆರಳಿಗೆ ಗಾಯವಾದರೂ, ಫ್ರಾಂಚೈಸಿಯು ಕನ್ಕಶನ್ ನಿಯಮದಡಿ ಬದಲಿ ಆಟಗಾರನನ್ನು ಕಣಕ್ಕಿಳಿಸಿದ್ದು ವಿವಾದದ ಕಿಡಿಯನ್ನು ಹೊತ್ತಿಸಿದೆ.
ರಘುವಂಶಿಗೆ ಗಾಯ, ಶುರುವಾದ ಗೊಂದಲ
ಮುಂಬೈ ಇಂಡಿಯನ್ಸ್ ಇನ್ನಿಂಗ್ಸ್ನ 11ನೇ ಓವರ್ನಲ್ಲಿ ಈ ಹೈಡ್ರಾಮಾ ಶುರುವಾಯಿತು. ವರುಣ್ ಚಕ್ರವರ್ತಿ ಎಸೆತದಲ್ಲಿ ಮುಂಬೈ ಬ್ಯಾಟರ್ ತಿಲಕ್ ವರ್ಮಾ ಚೆಂಡನ್ನು ಗಾಳಿಯಲ್ಲಿ ಬಾರಿಸಿದರು. ಈ ಕ್ಯಾಚ್ ಹಿಡಿಯಲು ಓಡಿಬಂದ ವಿಕೆಟ್ ಕೀಪರ್ ಅಂಗಕೃಷ್ ರಘುವಂಶಿ ಹಾಗೂ ವರುಣ್ ಚಕ್ರವರ್ತಿ ನಡುವೆ ಭಾರಿ ಡಿಕ್ಕಿ ಸಂಭವಿಸಿತು. ಈ ವೇಳೆ ರಘುವಂಶಿ ಅವರ ಬೆರಳಿಗೆ ಪೆಟ್ಟಾಗಿದ್ದು ಕ್ಯಾಮೆರಾಗಳಲ್ಲಿ ಸ್ಪಷ್ಟವಾಗಿತ್ತು. ಗಾಯದ ನಡುವೆಯೂ ಆರಂಭದಲ್ಲಿ ಕೀಪಿಂಗ್ ಮುಂದುವರಿಸಿದ ಅವರು, ಬಳಿಕ 14ನೇ ಓವರ್ನಲ್ಲಿ ಮೈದಾನ ತೊರೆದರು. ಅವರ ಜಾಗಕ್ಕೆ ವಿಕೆಟ್ ಕೀಪರ್ ಆಗಿ ಯುವ ಆಟಗಾರ ತೇಜಸ್ವಿ ಸಿಂಗ್ ದಹಿಯಾ ಮೈದಾನಕ್ಕಿಳಿದರು. ಆದರೆ ಇನ್ನಿಂಗ್ಸ್ ವಿರಾಮದ ವೇಳೆ ಕೆಕೆಆರ್ ಫ್ರಾಂಚೈಸಿಯು, ರಘುವಂಶಿ ಬದಲಿಗೆ ರಮಣ್ದೀಪ್ ಸಿಂಗ್ ಅವರನ್ನು ‘ಕನ್ಕಶನ್ ಸಬ್ಸ್ಟಿಟ್ಯೂಟ್’ ಆಗಿ ಕಣಕ್ಕಿಳಿಸುತ್ತಿರುವುದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಅಧಿಕೃತ ಪೋಸ್ಟ್ ಹಾಕಿತು. ಇಲ್ಲಿಂದಲೇ ಅಸಲಿ ಗೊಂದಲ ಶುರುವಾಯಿತು.
ನಿಯಮಗಳ ಪ್ರಕಾರ ಕನ್ಕಶನ್ ನೀಡಲು ಸಾಧ್ಯವೇ?
ಐಪಿಎಲ್ ನಿಯಮಗಳ ಪ್ರಕಾರ, ಯಾವುದೇ ಒಬ್ಬ ಆಟಗಾರನ ತಲೆ ಅಥವಾ ಕುತ್ತಿಗೆಗೆ ಪೆಟ್ಟಾಗಿ ಕನ್ಕಶನ್ (ತಲೆತಿರುಗುವಿಕೆ ಅಥವಾ ಪ್ರಜ್ಞೆ ತಪ್ಪುವ ಸ್ಥಿತಿ) ಉಂಟಾದರೆ ಅಥವಾ ಅದರ ಲಕ್ಷಣಗಳು ಕಂಡುಬಂದರೆ ಮಾತ್ರ ಬದಲಿ ಆಟಗಾರನನ್ನು ಆಡಿಸಲು ಅವಕಾಶವಿದೆ. ಆದರೆ ಮೈದಾನದಲ್ಲಿ ಕಂಡುಬಂದ ದೃಶ್ಯಗಳ ಪ್ರಕಾರ, ರಘುವಂಶಿ ಕೇವಲ ಬೆರಳಿನ ಗಾಯದಿಂದ ಬಳಲುತ್ತಿದ್ದರು. ಅವರ ತಲೆಗೆ ಯಾವುದೇ ಪೆಟ್ಟಾದಂತೆ ಕಂಡುಬರಲಿಲ್ಲ. ಅಲ್ಲದೆ, ರಘುವಂಶಿಗೆ ತಲೆನೋವು ಅಥವಾ ತಲೆತಿರುಗುವಿಕೆ ಇತ್ತೇ ಎಂಬುದರ ಬಗ್ಗೆ ಕೆಕೆಆರ್ ಫ್ರಾಂಚೈಸಿ ಯಾವುದೇ ಅಧಿಕೃತ ವೈದ್ಯಕೀಯ ಸ್ಪಷ್ಟನೆಯನ್ನು ನೀಡಲಿಲ್ಲ. ಕೇವಲ ಬೆರಳಿಗೆ ಗಾಯವಾದರೆ ಕನ್ಕಶನ್ ನಿಯಮವನ್ನು ಬಳಸಿಕೊಳ್ಳಲು ಹೇಗೆ ಸಾಧ್ಯ ಎಂಬ ಪ್ರಶ್ನೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳಿಂದ ಹಾಗೂ ಕ್ರಿಕೆಟ್ ತಜ್ಞರಿಂದ ತೀವ್ರವಾಗಿ ವ್ಯಕ್ತವಾದವು.
ರಮಣ್ದೀಪ್ ಬದಲು ಕಣಕ್ಕಿಳಿದ ತೇಜಸ್ವಿ ದಹಿಯಾ
ಕೆಕೆಆರ್ ರನ್ ಬೆನ್ನಟ್ಟುವಾಗ ಈ ಗೊಂದಲ ಮತ್ತೊಂದು ನಾಟಕೀಯ ತಿರುವು ಪಡೆಯಿತು. ಗೆಲ್ಲಲು 28 ಎಸೆತಗಳಲ್ಲಿ 24 ರನ್ ಬೇಕಿದ್ದಾಗ ರೋವ್ಮನ್ ಪೊವೆಲ್ ವಿಕೆಟ್ ಒಪ್ಪಿಸಿದರು. ಈ ವೇಳೆ ಮೊದಲೇ ಘೋಷಿಸಿದಂತೆ ಕನ್ಕಶನ್ ಸಬ್ಸ್ಟಿಟ್ಯೂಟ್ ರಮಣ್ದೀಪ್ ಸಿಂಗ್ ಬ್ಯಾಟಿಂಗ್ಗೆ ಬರಬೇಕಿತ್ತು. ಆದರೆ ಅಚ್ಚರಿಯೆಂಬಂತೆ ಐಪಿಎಲ್ಗೆ ಪಾದಾರ್ಪಣೆ ಮಾಡಿದ ಡೆಲ್ಲಿ ಮೂಲದ ಯುವ ಆಟಗಾರ ತೇಜಸ್ವಿ ಸಿಂಗ್ ದಹಿಯಾ ಕ್ರೀಸ್ಗಿಳಿದರು. ಇದಾದ ಕೆಲವೇ ಹೊತ್ತಿನಲ್ಲಿ, ರಮಣ್ದೀಪ್ ಅವರನ್ನು ಬದಲಿ ಆಟಗಾರನನ್ನಾಗಿ ಹೆಸರಿಸಿದ್ದ ಪೋಸ್ಟ್ ಅನ್ನು ಕೆಕೆಆರ್ ಆಡಳಿತ ಮಂಡಳಿಯು ತನ್ನ ಅಧಿಕೃತ ಖಾತೆಯಿಂದ ಸದ್ದಿಲ್ಲದೆ ಅಳಿಸಿಹಾಕಿತು. ಅಂತಿಮವಾಗಿ ಅಧಿಕೃತ ಬದಲಿ ಆಟಗಾರನಾಗಿ ಕಣಕ್ಕಿಳಿದ ದಹಿಯಾ 12 ಎಸೆತಗಳಲ್ಲಿ 11 ರನ್ ಗಳಿಸಿದರು.
ಗೊಂದಲದ ನಡುವೆಯೂ ಕೆಕೆಆರ್ಗೆ ಭರ್ಜರಿ ಜಯ
ಕನ್ಕಶನ್ ನಿಯಮದ ಸುತ್ತ ಎಷ್ಟೇ ಗೊಂದಲಗಳು ಸೃಷ್ಟಿಯಾದರೂ, ಮೈದಾನದ ಒಳಗೆ ಕೆಕೆಆರ್ ಆಟಗಾರರ ಪ್ರದರ್ಶನಕ್ಕೆ ಯಾವುದೇ ಅಡ್ಡಿಯಾಗಲಿಲ್ಲ. ಮುಂಬೈ ಇಂಡಿಯನ್ಸ್ ನೀಡಿದ್ದ 148 ರನ್ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಕೊಲ್ಕತ್ತಾ ತಂಡವು, ಆರಂಭಿಕ ಆಘಾತಗಳ ನಡುವೆಯೂ ಅಂತಿಮವಾಗಿ 4 ವಿಕೆಟ್ಗಳ ರೋಚಕ ಜಯ ಸಾಧಿಸಿತು. ಸ್ಟಾರ್ ಆಟಗಾರ ರಿಂಕು ಸಿಂಗ್ ಬಾರಿಸಿದ ವಿನ್ನಿಂಗ್ ರನ್ನೊಂದಿಗೆ ಕೆಕೆಆರ್ ಗೆಲುವಿನ ನಗೆ ಬೀರಿತು. ಈ ಅಮೂಲ್ಯ ಗೆಲುವಿನೊಂದಿಗೆ 13 ಅಂಕಗಳನ್ನು ಕಲೆಹಾಕಿರುವ ಶ್ರೇಯಸ್ ಅಯ್ಯರ್ ಪಡೆ, ಪ್ಲೇಆಫ್ ರೇಸ್ನಲ್ಲಿ ತನ್ನ ಆಸೆಯನ್ನು ಜೀವಂತವಾಗಿರಿಸಿಕೊಂಡು ಮುನ್ನುಗ್ಗುತ್ತಿದೆ. ನಿಯಮದ ಗೊಂದಲಗಳ ಬಗ್ಗೆ ಬಿಸಿಸಿಐ ಅಥವಾ ಐಪಿಎಲ್ ಆಡಳಿತ ಮಂಡಳಿ ಯಾವ ರೀತಿಯ ಪ್ರತಿಕ್ರಿಯೆ ನೀಡಲಿದೆ ಕಾದುನೋಡಬೇಕಿದೆ.
ಇದನ್ನೂ ಓದಿ : ಫಿನ್ ಅಲೆನ್ ವಿಕೆಟ್ ಪಡೆದು ದೀಪಕ್ ಚಹಾರ್ ವಿಶಿಷ್ಟ ಸಂಭ್ರಮಾಚರಣೆ – ವಿಡಿಯೋ ವೈರಲ್!
