ನವದೆಹಲಿ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ತೀವ್ರ ಟೀಕೆಗಳು ಮತ್ತು ತೆರಿಗೆ ಬೆದರಿಕೆಗಳ ನಡುವೆಯೂ ಭಾರತದ ತೈಲ ಶುದ್ಧೀಕರಣ ಘಟಕಗಳು ರಷ್ಯಾದಿಂದ ಕಚ್ಚಾ ತೈಲ ಖರೀದಿಯನ್ನು ಮುಂದುವರಿಸಿವೆ ಎಂದು ಹೊಸ ವರದಿಯೊಂದು ಬಹಿರಂಗಪಡಿಸಿದೆ. ಭಾರತವು ರಷ್ಯಾ ತೈಲ ಖರೀದಿಗೆ “ತಾತ್ಕಾಲಿಕ ವಿರಾಮ” ನೀಡಿದೆ ಎಂಬ ವರದಿಗಳು ಸುಳ್ಳು ಎಂದು ಉದ್ಯಮದ ಮೂಲಗಳು ದೃಢಪಡಿಸಿವೆ.
ಸುಂಕ ಪ್ರಹಾರ ನಡೆಸಿದ್ದರ ಪರಿಣಾಮ ಎಂಬಂತೆ ಭಾರತವು ಈಗ ರಷ್ಯಾ ತೈಲ ಖರೀದಿಯನ್ನು ನಿಲ್ಲಿಸಿದೆ ಎಂದು ಹೇಳಿಕೊಂಡಿದ್ದ ಟ್ರಂಪ್ ಅವರು “ಇದೊಂದು ಉತ್ತಮ ಹೆಜ್ಜೆ” ಎಂದೂ ಶ್ಲಾಘಿಸಿದ್ದರು. ಆದರೆ, ಭಾರತ ಸರ್ಕಾರ ಮತ್ತು ಖಾಸಗಿ ರಿಫೈನರಿಗಳು ತೈಲ ಖರೀದಿಯನ್ನು ಸ್ಥಗಿತಗೊಳಿಸಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿವೆ. ಇತ್ತೀಚಿನ ಕೆಲವು ವಾರಗಳಲ್ಲಿ ಹೊಸ ಖರೀದಿಗಳು ಕಡಿಮೆಯಾಗಿದ್ದರೂ, ಇದು ರಷ್ಯಾದಿಂದ ಸಿಗುತ್ತಿದ್ದ ರಿಯಾಯಿತಿಗಳು ಕಡಿಮೆಯಾದ ಕಾರಣದಿಂದಾಗಿ ಅಷ್ಟೇ ಎಂದು ಮೂಲಗಳು ತಿಳಿಸಿವೆ.
ಭಾರತದ ಪ್ರಮುಖ ಸರ್ಕಾರಿ ರಿಫೈನರಿಗಳಾದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOC), ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ (HPCL), ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ (BPCL) ಮತ್ತು ಮಂಗಳೂರು ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (MRPL) ತಮ್ಮ ಖರೀದಿಗಳನ್ನು ಸಂಪೂರ್ಣವಾಗಿ ನಿಲ್ಲಿಸಿಲ್ಲ. ಖಾಸಗಿ ವಲಯದ ರಿಲಯನ್ಸ್ ಇಂಡಸ್ಟ್ರೀಸ್ ಮತ್ತು ನಯಾರಾ ಎನರ್ಜಿ ಕೂಡ ದೀರ್ಘಕಾಲದ ಒಪ್ಪಂದಗಳನ್ನು ಮುಂದುವರಿಸಿವೆ.
ಕಳೆದ ಜುಲೈ 14ರಂದು ಟ್ರಂಪ್, ರಷ್ಯಾ ತೈಲ ಖರೀದಿಸುವ ದೇಶಗಳ ಮೇಲೆ ಶೇ.100 ತೆರಿಗೆ ವಿಧಿಸುವುದಾಗಿ ಬೆದರಿಕೆ ಹಾಕಿದ್ದರು. ಇದರ ಬೆನ್ನಲ್ಲೇ, ಆಗಸ್ಟ್ 7ರಿಂದ ಜಾರಿಯಾಗುವಂತೆ ಶುಕ್ರವಾರವಷ್ಟೇ ಭಾರತದ ರಫ್ತುಗಳ ಮೇಲೆ ಶೇ.25 ತೆರಿಗೆ ವಿಧಿಸಿದ್ದಾರೆ.
ಭಾರತದ ಒಟ್ಟು ತೈಲ ಆಮದುಗಳಲ್ಲಿ ರಷ್ಯಾ ಸುಮಾರು ಶೇ.35 ಪಾಲನ್ನು ಹೊಂದಿದೆ. ಜಗತ್ತಿನ ಮೂರನೇ ಅತಿದೊಡ್ಡ ತೈಲ ಆಮದುದಾರನಾಗಿರುವ ಭಾರತಕ್ಕೆ ರಷ್ಯಾವು ಕಚ್ಚಾ ತೈಲದ ಪ್ರಮುಖ ಪೂರೈಕೆದಾರನಾಗಿದೆ. ಈ ವಿಚಾರದಲ್ಲಿ ನಮ್ಮ ನಿರ್ಧಾರಗಳು ಸ್ವತಂತ್ರ ಮತ್ತು ರಾಷ್ಟ್ರೀಯ ಹಿತಾಸಕ್ತಿಗಳ ಆಧಾರದಲ್ಲೇ ಇರುತ್ತವೆ ಎಂದು ಈಗಾಗಲೇ ಭಾರತದ ವಿದೇಶಾಂಗ ಸಚಿವಾಲಯ ಸ್ಪಷ್ಟಪಡಿಸಿದೆ.
ಹೊಸ ಸವಾಲುಗಳು
ರಷ್ಯಾದ ತೈಲ ರಿಯಾಯಿತಿಗಳು ಕಡಿಮೆಯಾಗುತ್ತಿರುವುದರಿಂದ, ಭಾರತೀಯ ರಿಫೈನರಿಗಳು ಮಧ್ಯಪ್ರಾಚ್ಯ ಮತ್ತು ಪಶ್ಚಿಮ ಆಫ್ರಿಕಾದ ತೈಲ ಮೂಲಗಳ ಕಡೆಗೆ ಗಮನ ಹರಿಸುತ್ತಿವೆ. ಇದಲ್ಲದೆ, ಯುರೋಪಿಯನ್ ಯೂನಿಯನ್ನ ಹೊಸ ನಿರ್ಬಂಧಗಳು ವಿದೇಶಿ ವ್ಯಾಪಾರವನ್ನು ಮತ್ತಷ್ಟು ಸಂಕೀರ್ಣಗೊಳಿಸುವ ಸಾಧ್ಯತೆಯಿದೆ. ಆದರೂ, ಭಾರತ ತನ್ನ ತೈಲ ಆಮದುಗಳ ಮೂಲಗಳನ್ನು ವೈವಿಧ್ಯಗೊಳಿಸುತ್ತಿದ್ದು, ಯಾವುದೇ ಏಕಪಕ್ಷೀಯ ನಿರ್ಬಂಧಗಳಿಗೆ ಬಗ್ಗುವುದಿಲ್ಲ ಎಂದು ಸರ್ಕಾರ ಹೇಳಿದೆ. ಈ ಬೆಳವಣಿಗೆಗಳು ಅಮೆರಿಕ ಮತ್ತು ಭಾರತದ ನಡುವಿನ ಸಂಬಂಧಗಳಲ್ಲಿ ಹೊಸ ರಾಜಕೀಯ ಮತ್ತು ಆರ್ಥಿಕ ಉದ್ವಿಗ್ನತೆಯನ್ನು ಸೃಷ್ಟಿಸಿವೆ.
