ಬೆಂಗಳೂರು: ವಿದ್ಯಾರ್ಥಿಯಾಗಿದ್ದಾಗಲೋ, ಕೆಲಸಕ್ಕೆ ಸೇರಿದ ಮೊದಲ ಕಂಪನಿಯಲ್ಲಿ ತೆರೆದ ಬ್ಯಾಂಕ್ ಖಾತೆಯಲ್ಲೋ ಹಣ ಇರುತ್ತದೆ. ಹೊಸ ಬ್ಯಾಂಕ್ ಖಾತೆ ಮಾಡಿಸಿದ ಬಳಿಕ ಅದನ್ನು ವಿತ್ ಡ್ರಾ ಮಾಡುವುದು, ಟ್ರಾನ್ಸ್ ಫರ್ ಮಾಡುವುದನ್ನು ಮರೆತಿರುತ್ತೇವೆ. ಆದರೆ, ಈಗ ಬ್ಯಾಂಕ್ ಖಾತೆ ಸಂಖ್ಯೆ ಬಿಟ್ಟರೆ ಎಟಿಎಂ, ಪಾಸ್ ಬುಕ್ ಏನೂ ಇರುವುದಿಲ್ಲ. ನೆಟ್ ಬ್ಯಾಂಕ್ ರಿಜಿಸ್ಟರ್ ಆಗಿರುವುದಿಲ್ಲ. ಹಾಗಾದರೆ, ಹಳೆಯ ಖಾತೆಯಲ್ಲಿರೋ ಹಣ ಸಿಗುವುದಿಲ್ಲವೇ? ಖಂಡಿತವಾಗಿಯೂ ಸಿಗುತ್ತದೆ ಎನ್ನುತ್ತಿದೆ ಆರ್ ಬಿ ಐ.
ಹೌದು, ನಿಮ್ಮ ಅಥವಾ ನಿಮ್ಮ ಕುಟುಂಬದವರ ಖಾತೆಯು 10 ಅಥವಾ ಅದಕ್ಕಿಂತ ಹೆಚ್ಚಿನ ವರ್ಷಗಳಿಂದ ನಿಷ್ಕ್ರಿಯವಾಗಿದ್ದರೆ, ಆ ಹಣವು RBI ಯ ಠೇವಣಿದಾರರ ಶಿಕ್ಷಣ ಮತ್ತು ಜಾಗೃತಿ (DEA) ನಿಧಿಯಲ್ಲಿರಬಹುದು. ಆದರೆ ನೀವು ಈಗಲೂ ಆಹಣವನ್ನು ಕ್ಲೇಮ್ ಮಾಡಬಹುದು ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಮಾಹಿತಿ ನೀಡಿದೆ.
ಹೌದು, ಹತ್ತು ಅಥವಾ ಅದಕ್ಕಿಂತ ಹೆಚ್ಚಿನ ವರ್ಷಗಳಿಂದ ಉಳಿತಾಯ ಖಾತೆಯಲ್ಲೇ ಉಳಿದ ಹಣವನ್ನು ಕ್ಲೇಮ್ ಮಾಡಲು ಆರ್ ಬಿಐ ಅವಕಾಶ ಮಾಡಿಕೊಟ್ಟಿದೆ. ನಿಮ್ಮ ಹಳೆಯ ಬ್ಯಾಂಕ್ ಖಾತೆಗಳಲ್ಲಿ ಎಷ್ಟು ಹಣ ಉಳಿದಿದೆ ಎಂಬುದನ್ನು ಪರಿಶೀಲಿಸಲು ಗ್ರಾಹಕರು https://udgam.rbi.org.in ಗೆ ಭೇಟಿ ನೀಡಬಹುದಾಗಿದೆ.
ಕ್ಲೇಮ್ ಮಾಡುವುದು ಹೇಗೆ?
- ನಿಮ್ಮ ಬ್ಯಾಂಕಿನ ಯಾವುದೇ ಶಾಖೆಗೆ ಭೇಟಿ ನೀಡಿ
- ಕೆವೈಸಿ ಸಲ್ಲಿಸಿ (ಆಧಾರ್, ಪಾಸ್ಪೋರ್ಟ್, ಮತದಾರರ ಗುರುತಿನ ಚೀಟಿ, ಅಥವಾ DL)
- ಅಲ್ಲಿ ನಿಮ್ಮ ಹಣವನ್ನು ಹಿಂಪಡೆಯಿರಿ (ಬಡ್ಡಿಯೊಂದಿಗೆ, ಅನ್ವಯವಾದರೆ)
ಇದರ ಜತೆಗೆ, ಕ್ಲೇಮ್ ಮಾಡದ ಠೇವಣಿಗಳ ಕುರಿತು ವಿಶೇಷ ಶಿಬಿರಗಳನ್ನು ಕೂಡ ಆರ್ ಬಿಐ ಆಯೋಜಿಸುತ್ತಿದೆ. ಅಕ್ಟೋಬರ್ ನಿಂದ ಡಿಸೆಂಬರ್ ಅವಧಿಯಲ್ಲಿ ಆರ್ ಬಿಐ ವಿಶೇಷ ಶಿಬಿರಗಳನ್ನು ಆಯೋಜಿಸುವ ಮೂಲಕ ನಾಗರಿಕರಿಗೆ ಕ್ಲೇಮ್ ಆಗದ ಹಣವನ್ನು ವಿತ್ ಡ್ರಾ ಮಾಡುವ ಕುರಿತು ಜಾಗೃತಿ ಮೂಡಿಸಲಾಗುತ್ತಿದೆ.
ಇದನ್ನೂ ಓದಿ : ಸಣ್ಣ ಕೈಗಾರಿಕೆಗಳ ಅಭಿವೃದ್ಧಿ ನಿಗಮದಲ್ಲಿ 44 ಹುದ್ದೆಗಳ ನೇಮಕ: 97 ಸಾವಿರ ರೂ. ಸ್ಯಾಲರಿ
