ತೆರೆಮರೆಯ ಸಮಾಜಸೇವೆಯಿಂದ ಮೊದಲ ಮಹಿಳಾ ಡಿಸಿಎಂ ಹುದ್ದೆಯವರೆಗೆ…| ಮಹಾರಾಷ್ಟ್ರದಲ್ಲಿ ಸುನೇತ್ರಾ ಪರ್ವ ಶುರು

ಮುಂಬೈ: ಮಹಾರಾಷ್ಟ್ರ ರಾಜಕಾರಣದ ದಿಗ್ಗಜ ಅಜಿತ್ ಪವಾರ್ ಅವರ ಅಕಾಲಿಕ ನಿಧನವು ರಾಜ್ಯದಲ್ಲಿ ದೊಡ್ಡ ರಾಜಕೀಯ ಶೂನ್ಯವನ್ನು ಸೃಷ್ಟಿಸಿದೆ. ಈ ಸಂಕಷ್ಟದ ಸಮಯದಲ್ಲಿ ಪವಾರ್ ಕುಟುಂಬದ ಪರಂಪರೆಯನ್ನು ಮುನ್ನಡೆಸಲು ಮತ್ತು ಎನ್‌ಸಿಪಿ ಬಣವನ್ನು ಒಗ್ಗೂಡಿಸಲು ಮುನ್ನೆಲೆಗೆ ಬಂದಿರುವ ಹೆಸರು ಸುನೇತ್ರಾ ಪವಾರ್. ಸದಾ ಪ್ರಚಾರದಿಂದ ದೂರವಿದ್ದು, ಸಮಾಜಸೇವೆಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ಸುನೇತ್ರಾ ಅವರು ಈಗ ಮಹಾರಾಷ್ಟ್ರದ ಮೊದಲ ಮಹಿಳಾ ಉಪಮುಖ್ಯಮಂತ್ರಿಯಾಗುವ ಹೊಸ್ತಿಲಲ್ಲಿದ್ದಾರೆ.

ರಾಜಕೀಯ ಹಿನ್ನೆಲೆಯ ಕುಟುಂಬದಿಂದ ಬಂದ ಪವಾರ್ ಸೊಸೆ

1963 ರಲ್ಲಿ ಅಂದಿನ ಒಸ್ಮಾನಾಬಾದ್‌ನ (ಈಗಿನ ಧಾರಾಶಿವ್) ಪ್ರಭಾವಿ ರಾಜಕೀಯ ಕುಟುಂಬದಲ್ಲಿ ಜನಿಸಿದ ಸುನೇತ್ರಾ ಅವರಿಗೆ ರಾಜಕೀಯ ಹೊಸದೇನಲ್ಲ. ಅವರ ತಂದೆ ಬಾಜಿರಾವ್ ಪಾಟೀಲ್ ಸ್ಥಳೀಯವಾಗಿ ದೊಡ್ಡ ಹೆಸರು ಮಾಡಿದ್ದವರು. ಇನ್ನು ಅವರ ಸಹೋದರ ಪದ್ಮಸಿನ್ಹ ಪಾಟೀಲ್ ರಾಜ್ಯ ರಾಜಕಾರಣದಲ್ಲಿ ಸಚಿವರಾಗಿ ಪ್ರಭಾವ ಬೀರಿದವರು. 1983ರಲ್ಲಿ ವಾಣಿಜ್ಯ ಪದವಿ ಮುಗಿಸಿದ ಸುನೇತ್ರಾ ಅವರು 1985ರಲ್ಲಿ ಅಜಿತ್ ಪವಾರ್ ಅವರನ್ನು ವಿವಾಹವಾಗಿ ಪವಾರ್ ಕುಟುಂಬದ ಸೊಸೆಯಾಗಿ ಬಂದರು. ಅಂದಿನಿಂದ ಸುಮಾರು ನಾಲ್ಕು ದಶಕಗಳ ಕಾಲ ಅವರು ಸಕ್ರಿಯ ರಾಜಕೀಯದಿಂದ ಅಂತರ ಕಾಯ್ದುಕೊಂಡು ಕುಟುಂಬ ಮತ್ತು ಸಮಾಜಸೇವೆಯಲ್ಲೇ ಹೆಚ್ಚು ಆಸಕ್ತಿ ತೋರಿಸಿದ್ದರು.

‘ಗ್ರೀನ್ ವಾರಿಯರ್’ ಮತ್ತು ಮಾದರಿ ಗ್ರಾಮದ ರೂವಾರಿ

ಸುನೇತ್ರಾ ಪವಾರ್ ಅವರ ನಿಜವಾದ ಶಕ್ತಿ ಅಡಗಿರುವುದು ಅವರ ಸಮಾಜಮುಖಿ ಕೆಲಸಗಳಲ್ಲಿ. ಪವಾರ್ ಕುಟುಂಬದ ಪೂರ್ವಜರ ಹಳ್ಳಿಯಾದ ಕಾಠೇವಾಡಿಯನ್ನು ಅವರು ಅಭಿವೃದ್ಧಿಪಡಿಸಿದ ರೀತಿ ಅದ್ಭುತ. ಬಯಲು ಮುಕ್ತ ಶೌಚಾಲಯ ಅಭಿಯಾನದ ಮೂಲಕ ಹಳ್ಳಿಯನ್ನು ಸ್ವಚ್ಛಗೊಳಿಸಿ, 2006 ರಲ್ಲಿ ಕೇಂದ್ರ ಸರ್ಕಾರದ ‘ನಿರ್ಮಲ ಗ್ರಾಮ’ ಪುರಸ್ಕಾರ ದೊರೆಯುವಂತೆ ಮಾಡಿದರು. ಇಂದು ಕಾಠೇವಾಡಿ ಸೌರ ದೀಪಗಳು, ಜೈವಿಕ ಅನಿಲ ಸ್ಥಾವರಗಳು ಮತ್ತು ಸಾವಯವ ಕೃಷಿಯನ್ನು ಒಳಗೊಂಡ ಮಾದರಿ ಪರಿಸರ ಸ್ನೇಹಿ ಗ್ರಾಮವಾಗಿ ಮಾರ್ಪಟ್ಟಿದೆ. ಇದಲ್ಲದೆ, ಬಾರಾಮತಿ ಹೈಟೆಕ್ ಟೆಕ್ಸ್ಟೈಲ್ ಪಾರ್ಕ್‌ನ ಅಧ್ಯಕ್ಷೆಯಾಗಿ ಸುಮಾರು 15,000 ಮಹಿಳೆಯರಿಗೆ ಉದ್ಯೋಗ ನೀಡುವ ಮೂಲಕ ಅವರು ಮಹಿಳಾ ಸಬಲೀಕರಣದ ಮಾದರಿಯಾಗಿ ಗುರುತಿಸಿಕೊಂಡಿದ್ದಾರೆ.

ಚುನಾವಣಾ ರಾಜಕೀಯ

ಹಲವು ದಶಕಗಳ ಕಾಲ ತೆರೆಯ ಮರೆಯಲ್ಲಿದ್ದ ಸುನೇತ್ರಾ ಅವರು ನೇರ ರಾಜಕೀಯಕ್ಕೆ ಬಂದದ್ದು 2024ರಲ್ಲಿ. ಬಾರಾಮತಿ ಲೋಕಸಭಾ ಕ್ಷೇತ್ರದಲ್ಲಿ ತಮ್ಮ ನಾದಿನಿ ಸುಪ್ರಿಯಾ ಸುಳೆ ವಿರುದ್ಧವೇ ಅಜಿತ್ ಪವಾರ್ ಅವರು ಇವರನ್ನು ಕಣಕ್ಕಿಳಿಸಿದಾಗ ಇಡೀ ದೇಶದ ಗಮನ ಸೆಳೆದಿದ್ದರು. ಆ ಚುನಾವಣೆಯಲ್ಲಿ ಅವರು ಸೋತರೂ, ನಂತರ ಅವರನ್ನು ರಾಜ್ಯಸಭೆಗೆ ನಾಮನಿರ್ದೇಶನ ಮಾಡಲಾಯಿತು. ಸಂಸತ್ತಿನಲ್ಲಿ ಸಕ್ರಿಯವಾಗಿ ಚರ್ಚೆಗಳಲ್ಲಿ ಭಾಗವಹಿಸುವ ಮೂಲಕ ಅವರು ಹಂತ ಹಂತವಾಗಿ ಸಾರ್ವಜನಿಕ ಜೀವನಕ್ಕೆ ತೆರೆದುಕೊಂಡರು.

ಸುನೇತ್ರಾ ಮುಂದಿರುವ ಸವಾಲುಗಳು

ಅಜಿತ್ ಪವಾರ್ ಅವರ ಅಕಾಲಿಕ ನಿಧನದ ನಂತರ ಈಗ ಪಕ್ಷದ ಶಾಸಕರು ಮತ್ತು ಕಾರ್ಯಕರ್ತರನ್ನು ಒಗ್ಗೂಡಿಸಿ ಮುನ್ನಡೆಸುವ ಗುರುತರ ಜವಾಬ್ದಾರಿ ಸುನೇತ್ರಾ ಅವರ ಮೇಲಿದೆ. ಒಂದು ಕಡೆ ಮುಖ್ಯಮಂತ್ರಿ ಫಡ್ನವೀಸ್ ನೇತೃತ್ವದ ಸರ್ಕಾರದೊಂದಿಗೆ ಹೊಂದಾಣಿಕೆ ಮಾಡಿಕೊಳ್ಳುವುದು, ಇನ್ನೊಂದೆಡೆ ಶರದ್ ಪವಾರ್ ಬಣದೊಂದಿಗೆ ಹದಗೆಟ್ಟಿರುವ ಸಂಬಂಧವನ್ನು ಸುಧಾರಿಸುವುದು ಅವರ ಮುಂದಿರುವ ದೊಡ್ಡ ಸವಾಲು. ಅಜಿತ್ ಪವಾರ್ ಅವರ ಕೊನೆಯ ಆಸೆಯಂತೆ ಎನ್‌ಸಿಪಿಯ ಎರಡು ಬಣಗಳನ್ನು ಮತ್ತೆ ಒಂದುಗೂಡಿಸುವ ‘ಸೇತುವೆ’ಯಾಗಿ ಸುನೇತ್ರಾ ಪವಾರ್ ಕಾರ್ಯನಿರ್ವಹಿಸುತ್ತಾರೆಯೇ ಎಂಬುದನ್ನು ಇಡೀ ಮಹಾರಾಷ್ಟ್ರ ಕುತೂಹಲದಿಂದ ಗಮನಿಸುತ್ತಿದೆ.

ತಮ್ಮ ಇಬ್ಬರು ಪುತ್ರರಾದ ಪಾರ್ಥ್ ಮತ್ತು ಜಯ್ ಪವಾರ್ ಅವರ ರಾಜಕೀಯ ಭವಿಷ್ಯವನ್ನು ರೂಪಿಸುವ ಹೊಣೆಗಾರಿಕೆಯೂ ಈಗ ಇವರ ಹೆಗಲ ಮೇಲಿದೆ. ಸರಳ ವ್ಯಕ್ತಿತ್ವದ, ಪರಿಸರ ಪ್ರೇಮಿಯಾದ ಸುನೇತ್ರಾ ಪವಾರ್ ಈಗ ಮಹಾರಾಷ್ಟ್ರದ ಶಕ್ತಿಶಾಲಿ ಹುದ್ದೆಗೇರುವ ಮೂಲಕ ಮಹಿಳಾ ನಾಯಕತ್ವದ ಹೊಸ ಪರ್ವ ಆರಂಭಿಸಲು ಸಜ್ಜಾಗಿದ್ದಾರೆ.

ಇದನ್ನೂ ಓದಿ: ಅಜಿತ್ ಪವಾರ್ ಪತ್ನಿ ಸುನೇತ್ರಾ ಪದಗ್ರಹಣ ಕುರಿತು ಶರದ್ ಪವಾರ್ ಹೇಳಿದ್ದೇನು?