ಲಕ್ನೋ: ಅಯೋಧ್ಯೆಯಲ್ಲಿ ಬಿಜೆಪಿಗೆ ಸೋಲಾಗಿದ್ದಕ್ಕೆ ಹಲವಾರು ಚರ್ಚೆಗಳು ಶುರುವಾಗಿವೆ. ಹಲವೆಡೆ ಆಕ್ರೋಶ ವ್ಯಕ್ತವಾಗುತ್ತಿದೆ.
ಫೈಜಾಬಾದ್ ನಲ್ಲಿ (Faizabad) ಬಿಜೆಪಿ ಅಭ್ಯರ್ಥಿಯನ್ನು ಮತದಾರರು ಸೋಲಿಸಿದ್ದಕ್ಕೆ ರಾಮಾಯಣ ಧಾರವಾಹಿಯ ಲಕ್ಷ್ಮಣ ಪಾತ್ರಧಾರಿ ಸುನೀಲ್ ಲಾಹ್ರಿ ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ. “ಸೀತೆಯನ್ನೇ ಅನುಮಾನಿಸಿದ ನಾಡು ಅದು. ಸದ್ಯ ರಾಮಮಂದಿರ ನಿರ್ಮಿಸಿದವರಿಗೆ ಮೋಸ ಮಾಡದೇ ಹೇಗೆ ಇರುತ್ತದೆ? ಅಯೋಧ್ಯೆ ಯಾವಾಗಲೂ ನಿಜವಾದ ರಾಜನಿಗೆ ದ್ರೋಹ ಮಾಡುತ್ತಲೇ ಬಂದಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇತ್ತ ಬಿಜೆಪಿಯ ಲಲ್ಲು ಸಿಂಗ್ (Lallu Singh) ಯಾದವ್ ಅವರು, ಸಮಾಜವಾದಿ ಪಾರ್ಟಿಯ ಅವಧೇಶ್ ಪ್ರಸಾದ್ ವಿರುದ್ಧ 54,567 ಮತಗಳ ಅಂತರದಿಂದ ಸೋತಿದ್ದಾರೆ. ಪ್ರಸಾದ್ 5,54,289 ಮತ ಪಡೆದರೆ, ಲಲ್ಲು ಸಿಂಗ್ 4,99,722 ಮತ ಪಡೆದಿದ್ದಾರೆ. 7536 ಮತಗಳು ನೋಟಾಗೆ ಚಲಾವಣೆಯಾಗಿವೆ.
ಅಸಲಿಗೆ ರಾಮ ಜನ್ಮಭೂಮಿಯ ಬಿಜೆಪಿಯ ಈ ಹೀನಾಯ ಸೋಲಿಗೆ ನಾನಾ ಕಾರಣ ಕೇಳಿ ಬರುತ್ತಿದ್ದು, ಅಭಿವೃದ್ಧಿಗಾಗಿ ನಡೆಯುತ್ತಿರುವ ಭೂಸ್ವಾಧೀನ ಪ್ರಕ್ರಿಯೆಯೇ ಬಿಜೆಪಿಯ ಸೋಲಿಗೆ ಪ್ರಮುಖ ಕಾರಣ ಎಂದು ಸ್ಥಳೀಯರು ಆರೋಪಿಸುತ್ತಿದ್ದಾರೆ. ರಾಮಮಂದಿರ (Ram Mandir) ನಿರ್ಮಿಸಿರೋದು ಒಳ್ಳೆಯದು. ಆದರೆ ತಮ್ಮ ಭೂಮಿ ಕಿತ್ತುಕೊಂಡರೆ ನಾವು ಹೇಗೆ ಬದುಕೋದು? ಸರಿಯಾದ ಪರಿಹಾರವನ್ನು ನೀಡುತ್ತಿಲ್ಲ. ಸತತ 2 ಬಾರಿ ಗೆದ್ದಿದ್ದ ಲಲ್ಲುಸಿಂಗ್ ಅಯೋಧ್ಯೆಗೆ (Ayodhya) ಯಾವ ಉಪಕಾರವನ್ನೂ ಮಾಡಿಲ್ಲ ಎಂದು ಮತದಾರರು ಆರೋಪಿಸಿದ್ದಾರೆ.
