ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯ (ಇಪಿಎಫ್ಒ) ಕೋಟ್ಯಂತರ ಸದಸ್ಯರಿಗೆ ಭರ್ಜರಿ ಗುಡ್ ನ್ಯೂಸ್ ಲಭಿಸಿದೆ. ಇಪಿಎಫ್ಒ ಸದಸ್ಯರಿಗೆ ಜುಲೈ 15ರೊಳಗೆ ಬಡ್ಡಿ ಜಮೆಯಾಗುತ್ತದೆ ಎಂದು ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವೀಯ ಅವರು ಘೋಷಣೆ ಮಾಡಿದ್ದಾರೆ. ಅದರಂತೆ, ಇಪಿಎಫ್ಒ ಸದಸ್ಯರಿಗೆ ಜುಲೈ 15ರೊಳಗೆ ಪಿಎಫ್ ಖಾತೆಯಲ್ಲಿರುವ ಮೊತ್ತಕ್ಕೆ ಅನುಗುಣವಾಗಿ ಶೇ.8.25ರಷ್ಟು ಬಡ್ಡಿ ಜಮೆಯಾಗಲಿದೆ.
ದೇಶದ 34 ಕೋಟಿ ಪಿಎಫ್ ಖಾತೆಗಳಿಗೆ ಜುಲೈ 15ರೊಳಗೆ ಒಟ್ಟು 1.44 ಲಕ್ಷ ಕೋಟಿ ರೂಪಾಯಿ ಬಡ್ಡಿಯನ್ನು ಜಮೆ ಮಾಡಲಾಗುತ್ತದೆ. ಇತ್ತೀಚೆಗಷ್ಟೇ ಇಪಿಎಫ್ಒ ಪೋರ್ಟಲ್ ಅನ್ನು ಅಪ್ ಗ್ರೇಡ್ ಮಾಡಲಾಗಿದೆ. ಅದರಂತೆ, ಜುಲೈ 15ರೊಳಗೆ ನವೀಕೃತ ಪೋರ್ಟಲ್ ಮೂಲಕ ಖಾತೆದಾರರು ಬಡ್ಡಿ ಜಮೆಯಾಗಿರುವುದನ್ನು ಪರಿಶೀಲನೆ ಮಾಡಿಕೊಳ್ಳಬಹುದು ಎಂದು ಸಚಿವ ಮಾಹಿತಿ ನೀಡಿದ್ದಾರೆ.
2025-26ನೇ ಹಣಕಾಸು ವರ್ಷಕ್ಕೆ ಶೇ.8.25ರಷ್ಟು ಬಡ್ಡಿ ನೀಡಲು ಇಪಿಎಫ್ಒ ಸಭೆಯಲ್ಲಿ ತೀರ್ಮಾನಿಸಲಾಗಿತ್ತು. ಇದಕ್ಕೆ ಕೇಂದ್ರ ಸರ್ಕಾರವು ಅನುಮೋದನೆ ನೀಡಿತ್ತು. ಅದರಂತೆ ಈಗ ಬಡ್ಡಿ ಜಮೆ ಮಾಡಲು ಗಡುವು ನಿಗದಿಪಡಿಸಲಾಗಿದೆ. ಇದಕ್ಕೂ ಮೊದಲು ಸಾಮಾನ್ಯವಾಗಿ ಸೆಪ್ಟೆಂಬರ್ ಹಾಗೂ ಅಕ್ಟೋಬರ್ ತಿಂಗಳಲ್ಲಿ ಬಡ್ಡಿ ಜಮೆ ಮಾಡಲಾಗುತ್ತಿತ್ತು. ಹೊಸ ವ್ಯವಸ್ಥೆ ಮೂಲಕ ಜುಲೈನಲ್ಲಿಯೇ ಜಮೆ ಮಾಡಲಾಗುತ್ತಿದೆ ಎಂದು ಕೇಂದ್ರ ಸಚಿವ ತಿಳಿಸಿದ್ದಾರೆ.
ಬಡ್ಡಿ ಲೆಕ್ಕಾಚಾರ ಹೇಗೆ?
ಉದ್ಯೋಗಿಗಳ ಪಿಎಫ್ ಖಾತೆಯಲ್ಲಿ ಎಷ್ಟು ಮೊತ್ತ ಇದೆ ಎಂಬುದನ್ನು ಆಧರಿಸಿ ಬಡ್ಡಿಯ ಮೊತ್ತವನ್ನು ನಿರ್ಧರಿಸಲಾಗುತ್ತದೆ. ಒಬ್ಬ ಉದ್ಯೋಗಿಯ ಖಾತೆಯಲ್ಲಿ 1 ಲಕ್ಷ ರೂ. ಇದ್ದರೆ, ಶೇ.8.25ರಷ್ಟು ಬಡ್ಡಿ ಲೆಕ್ಕಾಚಾರದಲ್ಲಿ 8,250 ರೂಪಾಯಿ ಬಡ್ಡಿ ಜಮೆಯಾಗುತ್ತದೆ. ಇದೇ ರೀತಿ, ಹೆಚ್ಚು ಮೊತ್ತವಿದ್ದವರಿಗೆ ಹೆಚ್ಚಿನ ಬಡ್ಡಿ ಆದಾಯ ಲಭಿಸುತ್ತದೆ. ದೇಶದಲ್ಲಿ ಇಪಿಎಫ್ಒಗೆ ಒಟ್ಟು 7.8 ಕೋಟಿ ಸದಸ್ಯರಿದ್ದಾರೆ.
ಇದನ್ನೂ ಓದಿ : ಕೇಂದ್ರ ಸರ್ಕಾರಿ ನೌಕರರಿಗೆ ಗುಡ್ ನ್ಯೂಸ್ ನೀಡಿದ ಸರ್ಕಾರ : ಹೂಡಿಕೆಗೆ ಈಗ 2 ಹೊಸ ಆಯ್ಕೆ
