ಬೆಂಗಳೂರು : ಪಿಎಫ್ ಖಾತೆಯಲ್ಲಿರುವ ಹಣ ವಿತ್ ಡ್ರಾ ಮಾಡಲು ಕ್ಲೇಮ್ ಸಲ್ಲಿಸುವುದು ಸೇರಿ ಹಲವು ರೀತಿಯ ಅರ್ಜಿ ಸಲ್ಲಿಸುವವರಿಗೆ ಮಹತ್ವದ ಅಪ್ಡೇಟ್ ಇದೆ. ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯ (ಇಪಿಎಫ್ಒ) ವೆಬ್ ಪೋರ್ಟಲ್ ನಲ್ಲಿ ತಾಂತ್ರಿಕ ಬದಲಾವಣೆಯ ಹಿನ್ನೆಲೆಯಲ್ಲಿ ಇಂದು ಮಧ್ಯ ರಾತ್ರಿಯಿಂದ (ಜೂನ್ 26) ಮೂರು ದಿನಗಳವರೆಗೆ ಇಪಿಎಫ್ಒ ಪೋರ್ಟಲ್ ಸ್ಥಗಿತಗೊಂಡಿರುತ್ತದೆ ಎಂದು ಇಪಿಎಫ್ಒ ಮಾಹಿತಿ ನೀಡಿದೆ. ಹಾಗಾಗಿ, ಕ್ಲೇಮ್ ಅರ್ಜಿ ಸಲ್ಲಿಸುವವರಿಗೆ ಮೂರು ದಿನ ಅಡಚಣೆಯಾಗಲಿದೆ.
ಸ್ಥಗಿತದ ಸಮಯ
ಸೇವೆ ಸ್ಥಗಿತ ಆರಂಭ : ಜೂನ್ 26ರಂದು ಮಧ್ಯರಾತ್ರಿ 12:00 ಗಂಟೆಯಿಂದ (00:00 Hrs).
ಸೇವೆ ಪುನರಾರಂಭ : ಜೂನ್ 28ರ ರಾತ್ರಿ 11:59 ಗಂಟೆಯವರೆಗೆ (23:59 Hrs) ಸ್ಥಗಿತ ಇರಲಿದ್ದು, ಜೂನ್ 29 ರ ಮಧ್ಯರಾತ್ರಿಯಿಂದ ಸೇವೆಗಳು ಎಂದಿನಂತೆ ಲಭ್ಯವಿರಲಿವೆ.
ಯಾವ ಸೇವೆಗಳ ಮೇಲೆ ಪರಿಣಾಮ ಬೀರಲಿದೆ?
ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ತನ್ನ ಪೋರ್ಟಲ್ನಲ್ಲಿ ಪ್ರಮುಖ ಸಾಫ್ಟ್ ವೇರ್ ಅಪ್ ಗ್ರೇಡ್ ಮತ್ತು ಡೇಟಾಬೇಸ್ ಸುಧಾರಣಾ ಕೆಲಸಗಳನ್ನು ಕೈಗೆತ್ತಿಕೊಳ್ಳುತ್ತಿರುವುದರಿಂದ ಮೂರು ದಿನಗಳ ಕಾಲ ಆನ್ ಲೈನ್ ಸೇವೆಗಳು ಲಭ್ಯವಿರುವುದಿಲ್ಲ ಎಂದು ತಿಳಿದುಬಂದಿದೆ. ಇದರಿಂದಾಗಿ ಪಿಎಫ್ ಕ್ಲೇಮ್, ಪಿಎಫ್ ಖಾತೆಯಲ್ಲಿರುವ ಹಣ ವರ್ಗಾವಣೆ, ನಾಮಿನಿಗಳ ಹೆಸರು ಸೇರ್ಪಡೆ ಸೇರಿ ಹಲವು ಸೇವೆಗಳು ಲಭ್ಯ ಇರುವುದಿಲ್ಲ.
ಹಾಗೆಯೇ, ಜೂನ್ 26ಕ್ಕಿಂತ ಮುಂಚಿತವಾಗಿ ಸಲ್ಲಿಸಿರುವ ಕ್ಲೈಮ್ ಗಳನ್ನು ಈ ಅವಧಿಯಲ್ಲಿ ಪ್ರೊಸೆಸ್ ಮಾಡಲಾಗುವುದಿಲ್ಲ. ಪೋರ್ಟಲ್ ರಿಸೆಟ್ ಆದ ನಂತರವೇ ಅವುಗಳ ಪ್ರಕ್ರಿಯೆ ಮುಂದುವರಿಯುತ್ತದೆ. ಇದರಿಂದಾಗಿ ಕೆಲವು ಕ್ಲೇಮ್ ಗಳು ವಿಳಂಬವಾಗಬಹುದು ಎಂದು ಕೂಡ ತಿಳಿದುಬಂದಿದೆ. ಆದಾಗ್ಯೂ, ಗ್ರಾಹಕರು ಬ್ಯಾಲೆನ್ಸ್ ಚೆಕ್ ಮಾಡಲು ಎಸ್ಎಂಎಸ್, ಉಮಾಂಗ್ ಆ್ಯಪ್ ಹಾಗೂ ವಾಟ್ಸ್ ಆ್ಯಪ್ ಮೊರೆ ಹೋಗಬಹುದು ಎಂದು ಇಪಿಎಫ್ಒ ಮಾಹಿತಿ ನೀಡಿದೆ.
ಇದನ್ನೂ ಓದಿ : ಹಣದಾಸೆಗೆ ನಕಲಿ ಜಾತಿ ಪ್ರಮಾಣ ಪತ್ರ ನೀಡಿದ್ರಾ ಆರ್ಐ? ; ಕೂಡ್ಲಿಗಿ ಕಂದಾಯ ನಿರೀಕ್ಷಕರ ವಿರುದ್ಧ ಗಂಭೀರ ಆರೋಪ!
