ಪದ್ಮಶ್ರೀ ಪ್ರಶಸ್ತಿ ಸ್ವೀಕರಿಸುವಾಗ ಆರ್. ಮಾಧವನ್ ಧರಿಸಿದ್ದ ‘ಟೈಟಾನ್’ ವಾಚ್‌ನ ಬೆಲೆ ಎಷ್ಟು ಗೊತ್ತೇ? ಇದರ ಹಿಂದಿದೆ ಅದ್ಭುತ ಕಥೆ!

ನವದೆಹಲಿ: ಇತ್ತೀಚೆಗಷ್ಟೇ ರಾಷ್ಟ್ರಪತಿ ಭವನದಲ್ಲಿ ನಡೆದ ಸಮಾರಂಭದಲ್ಲಿ ಬಹುಭಾಷಾ ನಟ ಆರ್. ಮಾಧವನ್ ಅವರು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಂದ ಪ್ರತಿಷ್ಠಿತ ‘ಪದ್ಮಶ್ರೀ‘ ಪ್ರಶಸ್ತಿಯನ್ನು ಸ್ವೀಕರಿಸಿದ್ದು ಎಲ್ಲರಿಗೂ ಗೊತ್ತಿರುವ ವಿಚಾರ. ನೇವಿ ಬ್ಲೂ ಬಣ್ಣದ ಬಂದ್‌ಗಲಾ ಸೂಟ್‌ನಲ್ಲಿ ಮಿಂಚುತ್ತಿದ್ದ ಮಾಧವನ್ ಅವರ ಕುತ್ತಿಗೆಗೆ ಬಿದ್ದ ಪದ್ಮಶ್ರೀ ಪದಕದಷ್ಟೇ, ಅವರ ಮಣಿಕಟ್ಟಿನಲ್ಲಿದ್ದ ಒಂದು ವಿಶೇಷವಾದ ಗಡಿಯಾರ ಕೂಡ ನೆರೆದಿದ್ದವರ ಹಾಗೂ ಫ್ಯಾಷನ್ ಪ್ರಿಯರ ಗಮನ ಸೆಳೆದಿದೆ. ಕೇವಲ ಸಮಯ ತೋರುವ ಸಾಧನವಾಗಿರದೆ, ಭಾರತೀಯ ಪರಂಪರೆ, ಕಲಾತ್ಮಕತೆ ಮತ್ತು ಅತ್ಯುತ್ತಮ ತಂತ್ರಜ್ಞಾನದ ಸಂಗಮವಾಗಿದ್ದ ಈ ವಾಚ್‌ನ ಬೆಲೆ ಹಾಗೂ ಅದರ ಹಿಂದಿರುವ ಕಥೆ ನಿಜಕ್ಕೂ ಅಚ್ಚರಿ ಮೂಡಿಸುವಂತಿದೆ.

ಮಾಧವನ್ ಅವರು ಧರಿಸಿದ್ದ ಈ ವಾಚ್ ಸಾಮಾನ್ಯವಾದದ್ದಲ್ಲ. ಇದು ಟೈಟಾನ್ ಕಂಪನಿಯ ಅತ್ಯಂತ ಅಪರೂಪದ ‘ನೆಬ್ಯುಲಾ ಜಲ್ಸಾ ಫ್ಲೈಯಿಂಗ್ ಟೂರ್ಬಿಲ್ಲನ್’ (Nebula Jalsa Flying Tourbillon) ಎಂಬ ಸೀಮಿತ ಆವೃತ್ತಿಯ ವಾಚ್. ಇಡೀ ಜಗತ್ತಿನಲ್ಲಿ ಇಂತಹ ಕೇವಲ 10 ಗಡಿಯಾರಗಳನ್ನು ಮಾತ್ರ ತಯಾರಿಸಲಾಗಿದ್ದು, ಇದರ ಬೆಲೆ ಬರೋಬ್ಬರಿ 40.5 ಲಕ್ಷ ರೂಪಾಯಿ! 18 ಕ್ಯಾರೆಟ್ ರೋಸ್ ಗೋಲ್ಡ್ ಕವಚವನ್ನು ಹೊಂದಿರುವ ಈ ವಾಚ್‌ನಲ್ಲಿ, ಜೈಪುರದ ಕೆಂಪು ಮರಳುಗಲ್ಲಿನ ವಾಸ್ತುಶಿಲ್ಪವನ್ನು ಪ್ರತಿಬಿಂಬಿಸುವ ಕೆಂಪು ಅಗೇಟ್ ಹರಳುಗಳನ್ನು ಬಳಸಲಾಗಿದೆ. 144 ಸೂಕ್ಷ್ಮ ಬಿಡಿಭಾಗಗಳು ಮತ್ತು 14 ರತ್ನಗಳನ್ನು ಬಳಸಿ ಟೈಟಾನ್ ಸಂಸ್ಥೆಯು ಈ ವಾಚ್ ಅನ್ನು ಅತ್ಯಂತ ಕಲಾತ್ಮಕವಾಗಿ ವಿನ್ಯಾಸಗೊಳಿಸಿದೆ.

ಇಬ್ಬರು ಪದ್ಮಶ್ರೀ ಪುರಸ್ಕೃತರ ಅಪರೂಪದ ಸಂಗಮ

ಈ ವಾಚ್‌ನ ಅತ್ಯಂತ ಆಕರ್ಷಕ ಹಾಗೂ ವಿಶೇಷವಾದ ಸಂಗತಿಯೆಂದರೆ ಇದರ ಡಯಲ್ (ಮುಖಬಿಲ್ಲೆ). ಇದರ ಮೇಲೆ ಜೈಪುರದ ಐತಿಹಾಸಿಕ ‘ಹವಾ ಮಹಲ್’ನ ಸೂಕ್ಷ್ಮವಾದ ಚಿಕಣಿ ಚಿತ್ರವನ್ನು (ಮಿನಿಯೇಚರ್ ಪೇಂಟಿಂಗ್) ಕೈಯಾರೆ ಬಿಡಿಸಲಾಗಿದೆ. ಈ ಅದ್ಭುತ ಕಲೆಯನ್ನು ಅರಳಿಸಿದವರು ಖ್ಯಾತ ಚಿಕಣಿ ಕಲಾಕಾರ ಎಸ್. ಶಾಕಿರ್ ಅಲಿ. ಕಾಕತಾಳೀಯವೆಂದರೆ, ಈ ಕಲಾವಿದ ಶಾಕಿರ್ ಅಲಿ ಅವರು ಕೂಡ ‘ಪದ್ಮಶ್ರೀ’ ಪುರಸ್ಕೃತರು! ಹೀಗಾಗಿ, ಪದ್ಮಶ್ರೀ ಪುರಸ್ಕೃತರೊಬ್ಬರು ಬಿಡಿಸಿದ ಕಲೆಯುಳ್ಳ ಗಡಿಯಾರವನ್ನು, ಮತ್ತೊಬ್ಬ ಪದ್ಮಶ್ರೀ ಪುರಸ್ಕೃತ ನಟ ತಮ್ಮ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಧರಿಸಿದ್ದು ಒಂದು ಸುಂದರ ಹಾಗೂ ಕಾವ್ಯಾತ್ಮಕ ಕಾಕತಾಳೀಯವಾಗಿತ್ತು.

‘ಜಲ್ಸಾ’ದ ಮಹತ್ವ

ಈ ಗಡಿಯಾರದ ಡಯಲ್‌ನಲ್ಲಿ ಬಿಡಿಸಲಾಗಿರುವ ಚಿತ್ರವು ಹವಾ ಮಹಲ್‌ನ ಮುಂದೆ ಸಾಗುವ ರಾಜವೈಭವದ ಮೆರವಣಿಗೆಯನ್ನು, ಅಂದರೆ ‘ಜಲ್ಸಾ’ (ಸಂಭ್ರಮಾಚರಣೆ) ವನ್ನು ಬಿಂಬಿಸುತ್ತದೆ. ಇದು ವಿಜಯ, ಘನತೆ ಮತ್ತು ವೈಭವದ ಸಂಕೇತವಾಗಿದೆ. 200 ವರ್ಷಗಳ ಸುದೀರ್ಘ ಇತಿಹಾಸವಿರುವ ಹವಾ ಮಹಲ್‌ನ ಪರಂಪರೆಗೆ ಈ ವಾಚ್ ಒಂದು ಗೌರವಾರ್ಪಣೆಯಾಗಿದೆ. ಭಾರತದ ಅತ್ಯುನ್ನತ ನಾಗರಿಕ ಪ್ರಶಸ್ತಿಗಳಲ್ಲಿ ಒಂದನ್ನು ಮಾಧವನ್ ಸ್ವೀಕರಿಸುತ್ತಿರುವ ಈ ಸುಸಂದರ್ಭದಲ್ಲಿ, ಅವರ ಕೈಯಲ್ಲಿದ್ದ ಈ ವಾಚ್ ಅವರ ಸುದೀರ್ಘ ಕಲಾ ಪಯಣದ ಯಶಸ್ಸು ಮತ್ತು ಆಂತರಿಕ ವಿಜಯದ ಸಂಭ್ರಮವನ್ನು ಮೂಕವಾಗಿ ಸಾರುವಂತಿತ್ತು.