ವಾಷಿಂಗ್ಟನ್ : ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಅಮೆರಿಕ ಆಡಳಿತಕ್ಕೆ ಭಾರೀ ಹಿನ್ನಡೆಯೆಂಬಂತೆ, ತಂತ್ರಜ್ಞಾನ ವಲಯ ಸೇರಿದಂತೆ ಉನ್ನತ ಕೌಶಲ್ಯ ಹೊಂದಿರುವ ವಿದೇಶಿ ಉದ್ಯೋಗಿಗಳಿಗೆ ನೀಡಲಾಗುವ ಎಚ್-1ಬಿ (H-1B) ವೀಸಾಗಳ ಮೇಲೆ ಟ್ರಂಪ್ ಸರ್ಕಾರ ವಿಧಿಸಿದ್ದ 1 ಲಕ್ಷ ಡಾಲರ್ (ಸುಮಾರು 83 ಲಕ್ಷ ರೂಪಾಯಿ) ಭಾರಿ ಮೊತ್ತದ ವೀಸಾ ಶುಲ್ಕವನ್ನು ಬೋಸ್ಟನ್ನ ನ್ಯಾಯಾಲಯವು ರದ್ದುಗೊಳಿಸಿದೆ. ಸರ್ಕಾರದ ಈ ನಿರ್ಧಾರವು ಸಂಸತ್ತಿನ ಅನುಮೋದನೆ ಇಲ್ಲದ “ಕಾನೂನುಬಾಹಿರ ತೆರಿಗೆ” ಎಂದು ಕೋರ್ಟ್ ಕಟುವಾಗಿ ಟೀಕಿಸಿದೆ.
ಡೆಮಾಕ್ರಟಿಕ್ ಪಕ್ಷದ ಹಿನ್ನೆಲೆಯುಳ್ಳ 20 ರಾಜ್ಯಗಳ ಅಟಾರ್ನಿ ಜನರಲ್ಗಳು ಟ್ರಂಪ್ ಸರ್ಕಾರದ ಈ ಆದೇಶವನ್ನು ಪ್ರಶ್ನಿಸಿ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಈ ಅರ್ಜಿಯ ವಿಚಾರಣೆ ನಡೆಸಿದ ಯುಎಸ್ ಜಿಲ್ಲಾ ನ್ಯಾಯಾಧೀಶ ಲಿಯೋ ಸೊರೊಕಿನ್, “ಅಮೆರಿಕದ ಸಂಸತ್ತು (ಕಾಂಗ್ರೆಸ್) ಕಾನೂನಿನ ಮೂಲಕ ಅಧಿಕಾರ ನೀಡದ ಹೊರತು, ವೀಸಾ ಮೇಲೆ ಇಂತಹ ಭಾರಿ ತೆರಿಗೆ ವಿಧಿಸಲು ಅಧ್ಯಕ್ಷರಿಗೆ ಯಾವುದೇ ಹಕ್ಕಿಲ್ಲ,” ಎಂದು ತೀರ್ಪು ನೀಡಿದ್ದಾರೆ. ಟ್ರಂಪ್ ಆಡಳಿತವು ಇದನ್ನು ವೀಸಾ ನಿಯಂತ್ರಣದ ಭಾಗವಾಗಿ ವಿಧಿಸಲಾದ ಹಣಕಾಸಿನ ದಂಡ ಎಂದು ಸಮರ್ಥಿಸಿಕೊಳ್ಳಲು ಯತ್ನಿಸಿತಾದರೂ, ನ್ಯಾಯಾಲಯ ಅದನ್ನು ಸಂಪೂರ್ಣವಾಗಿ ತಿರಸ್ಕರಿಸಿ, ಆದೇಶವನ್ನು ರದ್ದುಗೊಳಿಸಿದೆ.
ಅರ್ಜಿಗಳ ಸಂಖ್ಯೆಯಲ್ಲಿ ಭಾರಿ ಕುಸಿತ
ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಟ್ರಂಪ್ ಈ ನೂತನ ನೀತಿಯನ್ನು ಘೋಷಿಸಿದ್ದರು. ಇದಕ್ಕೂ ಮುನ್ನ ಉದ್ಯೋಗದಾತರು ಎಚ್-1ಬಿ ವೀಸಾಕ್ಕಾಗಿ ಕೇವಲ 2000 ದಿಂದ 5000 ಡಾಲರ್ ಪಾವತಿಸುತ್ತಿದ್ದರು. ಆದರೆ ಶುಲ್ಕವನ್ನು ಏಕಾಏಕಿ 1 ಲಕ್ಷ ಡಾಲರ್ಗೆ ಏರಿಸಿದ್ದರಿಂದ ವಿದೇಶಿ ಉದ್ಯೋಗಿಗಳನ್ನು ನೇಮಿಸಿಕೊಳ್ಳಲು ಕಂಪನಿಗಳು ಹಿಂದೇಟು ಹಾಕಿದ್ದವು. ಸರ್ಕಾರದ ಅಂಕಿ-ಅಂಶಗಳ ಪ್ರಕಾರ, ಫೆಬ್ರವರಿ 15ರ ವೇಳೆಗೆ ಕೇವಲ 85 ಸಂಸ್ಥೆಗಳು ಮಾತ್ರ ಈ ಹೊಸ ಶುಲ್ಕವನ್ನು ಪಾವತಿಸಿದ್ದವು. ಇದರ ಪರಿಣಾಮವಾಗಿ, ಕಳೆದ ಆರ್ಥಿಕ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಎಚ್-1ಬಿ ವೀಸಾ ಅರ್ಜಿಗಳ ಸಂಖ್ಯೆ ಶೇ.38.5ರಷ್ಟು ಭಾರಿ ಕುಸಿತ ಕಂಡಿದೆ.
ಟ್ರಂಪ್ ಸರ್ಕಾರದ ವಾದವೇನಿತ್ತು?
ಅಮೆರಿಕದ ನಾಗರಿಕರ ಉದ್ಯೋಗಾವಕಾಶಗಳನ್ನು ರಕ್ಷಿಸುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಟ್ರಂಪ್ ಆಡಳಿತ ಪ್ರತಿಪಾದಿಸಿತ್ತು. ಎಚ್-1ಬಿ ವೀಸಾ ವ್ಯವಸ್ಥೆಯನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದ್ದು, ಅಮೆರಿಕನ್ನರ ಬದಲಿಗೆ ಕಡಿಮೆ ವೇತನಕ್ಕೆ ಸಿಗುವ ವಿದೇಶಿ ಉದ್ಯೋಗಿಗಳನ್ನು ತುಂಬಿಕೊಳ್ಳಲಾಗುತ್ತಿದೆ ಎಂದು ಸರ್ಕಾರ ಆರೋಪಿಸಿತ್ತು. ಇದರಿಂದ ಸ್ಥಳೀಯವಾಗಿ ವೇತನ ಮಟ್ಟ ಕುಸಿಯುತ್ತಿದ್ದು, ದೇಶದ ಆರ್ಥಿಕ ಮತ್ತು ರಾಷ್ಟ್ರೀಯ ಭದ್ರತೆಗೆ ಧಕ್ಕೆಯಾಗುತ್ತಿದೆ ಎಂಬುದೂ ಶ್ವೇತಭವನದ ವಾದವಾಗಿತ್ತು.
ಭಾರತೀಯ ಐಟಿ ವಲಯಕ್ಕೆ ನಿಟ್ಟುಸಿರು
ಅಮೆರಿಕದ ಈ ವೀಸಾ ನೀತಿಯಿಂದಾಗಿ ಭಾರತ ಹಾಗೂ ಭಾರತೀಯ ಉದ್ಯೋಗಿಗಳಿಗೆ ಭಾರಿ ಹೊಡೆತ ಬಿದ್ದಿತ್ತು. ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಬೆಳವಣಿಗೆಯಿಂದಾಗಿ ಈಗಾಗಲೇ ಸಾವಿರಾರು ಐಟಿ ಉದ್ಯೋಗಗಳು ನಷ್ಟವಾಗುತ್ತಿರುವ ಬೆನ್ನಲ್ಲೇ, ವೀಸಾ ಶುಲ್ಕದ ಹೆಚ್ಚಳದಿಂದ ಉದ್ಯೋಗ ಕಳೆದುಕೊಂಡ ಅನೇಕ ಭಾರತೀಯರು ನಿಗದಿತ 60 ದಿನಗಳ ಒಳಗೆ ಹೊಸ ಕೆಲಸ ಸಿಗದೆ ತಾಯ್ನಾಡಿಗೆ ಮರಳುವಂತಾಗಿತ್ತು. ಇತ್ತೀಚೆಗಷ್ಟೇ ಭಾರತದ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು ಅಮೆರಿಕದ ವಿದೇಶಾಂಗ ಸಚಿವ ಮಾರ್ಕೊ ರೂಬಿಯೋ ಅವರೊಂದಿಗೆ ಈ ಬಗ್ಗೆ ಕಳವಳ ಹಂಚಿಕೊಂಡಿದ್ದರು. ಸದ್ಯ ನ್ಯಾಯಾಲಯದ ಈ ತೀರ್ಪು ಅಮೆರಿಕದಲ್ಲಿ ನೆಲೆಸಲು ಬಯಸುವ ಸಾವಿರಾರು ಭಾರತೀಯ ಐಟಿ ವೃತ್ತಿಪರರಿಗೆ ಹಾಗೂ ಭಾರತದ ಸಾಫ್ಟ್ವೇರ್ ಸಂಸ್ಥೆಗಳಿಗೆ ಬಹುದೊಡ್ಡ ಸಮಾಧಾನ ತಂದಿದೆ.
ಇದನ್ನೂ ಓದಿ : 754 ಕೋಟಿ ಸಾಲ ವಂಚನೆ ಆರೋಪ : ಶಾಸಕ ಉದಯ್ ಗರುಡಾಚಾರ್ ವಿರುದ್ಧ EDಗೆ ದೂರು!
