ಬೆಂಗಳೂರು : ದೇಶದ ಸಾರ್ವಜನಿಕ ವಲಯದ ಬ್ಯಾಂಕ್ ಗಳಲ್ಲಿ ಪ್ರಮುಖವಾಗಿರುವ ಬ್ಯಾಂಕ್ ಆಫ್ ಇಂಡಿಯಾ ಈಗ ಹೂಡಿಕೆದಾರರಿಗೆ ಸಿಹಿ ಸುದ್ದಿ ನೀಡಿದೆ. ನಿಶ್ಚಿತ ಠೇವಣಿ ಮೇಲಿನ ಬಡ್ಡಿದರವನ್ನು ಬ್ಯಾಂಕ್ ಏರಿಕೆ ಮಾಡಿದೆ. ಇದರೊಂದಿಗೆ, ಷೇರು ಮಾರುಕಟ್ಟೆ, ಮ್ಯೂಚುವಲ್ ಫಂಡ್ ಹೂಡಿಕೆಗಳು ಏರಿಳಿತ ಕಾಣುತ್ತಿರುವ ಹೊತ್ತಿನಲ್ಲೇ ಹೂಡಿಕೆದಾರರನ್ನು ಸೆಳೆಯಲು ಬ್ಯಾಂಕ್ ಪ್ರಮುಖ ನಿರ್ಧಾರ ತೆಗೆದುಕೊಂಡಂತಾಗಿದೆ.
ಮೂರು ಕೋಟಿ ರೂ.ಗಿಂತ ಕಡಿಮೆ ಮೊತ್ತವನ್ನು ಎಫ್ ಡಿ ಇರಿಸುವವರಿಗೆ ಬಡ್ಡಿದರಗಳನ್ನು ಪರಿಷ್ಕರಣೆ ಮಾಡಲಾಗಿದೆ. ಅವರು ಠೇವಣಿ ಇರಿಸುವ ಅವಧಿ ಮೇಲೆ ಬಡ್ಡಿ ನಿಗದಿಯಾಗಿದೆ. ಸಾಮಾನ್ಯ ನಾಗರಿಕರು (60 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು) ಹಾಗೂ ಹಿರಿಯ ನಾಗರಿಕರಿಗೆ ಬೇರೆ ಬೇರೆ ರೀತಿಯ ಬಡ್ಡಿದರಗಳನ್ನು ನಿಗದಿಪಡಿಸಲಾಗಿದೆ. ನಿಯಮಿತ ಆದಾಯ ಹಾಗೂ ಸುರಕ್ಷಿತ ಹೂಡಿಕೆ ಮಾಡುವವರಿಗೆ ಇದು ಒಳ್ಳೆಯ ಆಯ್ಕೆಯಾಗಿದೆ.
ಬ್ಯಾಂಕ್ ಆಫ್ ಇಂಡಿಯಾ ನೂತನ ಬಡ್ಡಿದರಗಳ ಪ್ರಕಾರ, 1 ವರ್ಷದಿಂದ 2 ವರ್ಷಕ್ಕಿಂತ ಕಡಿಮೆ ಅವಧಿಗೆ ಎಫ್ ಡಿ ಇರಿಸುವವರಿಗೆ ಇನ್ನುಮುಂದೆ ಶೇ.6.50 ರಷ್ಟು ಬಡ್ಡಿ ಲಭಿಸಲಿದೆ. ಹಾಗೆಯೇ, 2 ವರ್ಷದಿಂದ 3 ವರ್ಷಕ್ಕಿಂತ ಕಡಿಮೆ ಅವಧಿಯ ಠೇವಣಿಗಳು ವಾರ್ಷಿಕ ಶೇ.6.60 ರಷ್ಟು ಬಡ್ಡಿ ಗಳಿಸಲಿವೆ. ಇನ್ನು 3 ವರ್ಷಗಳ ಅವಧಿಯ ಸ್ಥಿರ ಠೇವಣಿಗಳಿಗೆ ವಾರ್ಷಿಕ ಶೇ.6.70 ರಷ್ಟು ಬಡ್ಡಿ ದರ ಸಿಗಲಿದೆ, ಇದು 3 ಕೋಟಿ ರೂ.ಗಿಂತ ಕಡಿಮೆ ಅವಧಿಗೆ ಹೂಡಿಕೆ ಮಾಡುವ ಸಾಮಾನ್ಯ ನಾಗರಿಕರಿಗೆ ಅನ್ವಯವಾಗುತ್ತದೆ.
ಅದೇ ರೀತಿ, ಹಿರಿಯ ನಾಗರಿಕರು 1 ವರ್ಷದಿಂದ 2 ವರ್ಷದೊಳಗೆ ಹೂಡಿಕೆ ಮಾಡಿದರೆ ಶೇ.7ರಷ್ಟು ಬಡ್ಡಿ ಲಭಿಸಲಿದೆ. ಇನ್ನು, 2ರಿಂದ 3 ವರ್ಷ ಎಫ್ ಡಿ ಇರಿಸುವವರಿಗೆ ಶೇ.7.1 ಹಾಗೂ ಸರಿಯಾಗಿ 3 ವರ್ಷ ಹೂಡಿಕೆ ಮಾಡುವವರಿಗೆ ಶೇ.7.45ರಷ್ಟು ಬಡ್ಡಿ ಆದಾಯ ಲಭಿಸಲಿದೆ. ಇಲ್ಲಿ ಹಿರಿಯ ನಾಗರಿಕರಿಗೆ ಮೊದಲಿಗಿಂತ ಶೇ.0.40ರಿಂದ ಶೇ.0.90ರಷ್ಟು ಹೆಚ್ಚಿನ ಬಡ್ಡಿ ಆದಾಯ ಲಭಿಸಲಿದೆ.
ಇದನ್ನೂ ಓದಿ : ಸರ್ಕಾರಿ ಬ್ಯಾಂಕ್ಗಳಿಂದ ಸಾಲದ ವಿಚಾರದಲ್ಲಿ ದೊಡ್ಡ ಸಾಧನೆ : ಇದರಿಂದ ಸಾರ್ವಜನಿಕರಿಗೇನು ಲಾಭ?
