ಬೆಂಗಳೂರು: ನಕಲಿ ನೋಟುಗಳನ್ನು ತಡೆಯಲು ಭಾರತೀಯ ರಿಸರ್ವ್ ಬ್ಯಾಂಕ್ ಎಷ್ಟೇ ಕ್ರಮಗಳನ್ನು ತೆಗೆದುಕೊಂಡರೂ ನಕಲಿ ನೋಟುಗಳ ಹಾವಳಿ ಜಾಸ್ತಿಯಾಗಿದೆ. ಆಗಾಗ ನಕಲಿ ನೋಟುಗಳು ಪತ್ತೆಯಾಗುವ ಪ್ರಕರಣಗಳು ಕೇಳಿಬರುತ್ತಲೇ ಇರುತ್ತವೆ. ಹಾಗಾಗಿಯೇ, ಆರ್ ಬಿಐ ಮನಿ (MANI) ಎಂಬ ಆ್ಯಪ್ ಅಭಿವೃದ್ಧಿಪಡಿಸಿದ್ದು, ಮೊಬೈಲ್ ನಲ್ಲಿಯೇ ನಮ್ಮ ಬಳಿ ಇರುವ 500 ರೂ. ಸೇರಿ ಯಾವುದೇ ನೋಟುಗಳು ಅಸಲಿಯೋ, ನಕಲಿಯೋ ಎಂಬುದನ್ನು ಪತ್ತೆಹಚ್ಚಬಹುದಾಗಿದೆ.
ಹೌದು, ಆಂಡ್ರಾಯ್ಡ್ ಹಾಗೂ ಐಒಎಸ್ ನಲ್ಲಿ ಮನಿ ಆ್ಯಪ್ ಲಭ್ಯವಿದೆ. ಮೂಲತಃ ಇದನ್ನು ದೃಷ್ಟಿ ಇರದವರಿಗಾಗಿ ಅಭಿವೃದ್ಧಿಪಡಿಸಲಾಗಿದೆ. ಅವರು ನೋಟುಗಳು ನಕಲಿಯೋ, ಅಸಲಿಯೋ ಎಂಬುದನ್ನು ಪತ್ತೆಹಚ್ಚಲು ಡೆವಲಪ್ ಮಾಡಲಾಗಿದೆ. ಆದರೆ, ಯಾರು ಬೇಕಾದರೂ ಈ ಆ್ಯಪ್ ಮೂಲಕ ನೋಟುಗಳ ಅಸಲಿಯತ್ತನ್ನು ಪತ್ತೆಹಚ್ಚಬಹುದಾಗಿದೆ.
ಆ್ಯಪ್ ಬಳಸುವುದು ಹೇಗೆ?
ಮನಿ ಆ್ಯಪ್ ನಲ್ಲಿ ಸುಮಾರು ಒಂದೂವರೆ ಲಕ್ಷ ನೋಟುಗಳ ಡೇಟಾ ವಿಶ್ಲೇಷಣೆ ವರದಿ ಇದೆ. ಯಾರಾದರೂ ಆ್ಯಪ್ ನಲ್ಲಿರುವ ಕ್ಯಾಮೆರಾ ಮೂಲಕ ಒಂದು ನೋಟನ್ನು ಸ್ಕ್ಯಾನ್ ಮಾಡಿದರೆ, ಅದು ನಕಲಿಯೋ, ಅಸಲಿಯೋ ಎಂಬುದನ್ನು ಆ್ಯಪ್ ಕ್ಷಣಾರ್ಧದಲ್ಲಿ ಪತ್ತೆಹಚ್ಚುತ್ತದೆ. ಇದರಿಂದಾಗಿ ಜನಸಾಮಾನ್ಯರು ಕೂಡ ನೋಟುಗಳ ಅಸಲಿಯತ್ತನ್ನು ಪತ್ತೆಹಚ್ಚಬಹುದಾಗಿದೆ.
ನಕಲಿ ನೋಟುಗಳನ್ನು ತಡೆಯಲು ಆರ್ ಬಿಐ ಕೂಡ ನೋಟುಗಳನ್ನು ವಿಶೇಷವಾಗಿ ಮುದ್ರಿಸುತ್ತದೆ. ನೋಟುಗಳ ಮೇಲಿನ ಕೆಲವು ಪದಗಳನ್ನು ಬಹಳ ಸೂಕ್ಷ್ಮ ಅಕ್ಷರಗಳಲ್ಲಿ ಮುದ್ರಿಸಲಾಗುತ್ತದೆ. ಇದನ್ನು ಮೈಕ್ರೋ ಲೆಟರಿಂಗ್ ಎಂದು ಕರೆಯಲಾಗುತ್ತದೆ. ಇವುಗಳನ್ನು ಹೆಚ್ಚಾಗಿ ನಕಲಿ ನೋಟುಗಳಲ್ಲಿ ಸರಿಯಾಗಿ ತಯಾರಿಸಲಾಗುವುದಿಲ್ಲ. ಮೊಬೈಲ್ ಕ್ಯಾಮೆರಾವನ್ನು ಜೂಮ್ ಮೋಡ್ ನಲ್ಲಿ ಇರಿಸಿ, ನೋಟಿನ ಭಾಗಗಳನ್ನು ಸೂಕ್ಷ್ಮವಾಗಿ ಗಮನಿಸಬಹುದು. ಇನ್ನೂ ಹಲವು ಸುರಕ್ಷತಾ ಕ್ರಮಗಳನ್ನು ಕೂಡ ಆರ್ ಬಿಐ ತೆಗೆದುಕೊಂಡಿದೆ.
