ಮುಂಬೈ: ನಟಿ ಅನುಷ್ಕಾ ಶರ್ಮಾ ಅವರು ಕಳೆದ ಏಳು ವರ್ಷಗಳಿಂದ ಬೆಳ್ಳಿತೆರೆಯಿಂದ ದೂರ ಉಳಿದಿದ್ದಾರೆ. 2018ರಲ್ಲಿ ಶಾರುಖ್ ಖಾನ್ ಮತ್ತು ಕತ್ರಿನಾ ಕೈಫ್ ಜೊತೆ ನಟಿಸಿದ್ದ ‘ಜೀರೋ’ ಅವರ ಕೊನೆಯ ಚಿತ್ರವಾಗಿತ್ತು. ಆ ನಂತರ ಅವರು ‘ಚಕ್ ದ ಎಕ್ಸ್ಪ್ರೆಸ್’ ಚಿತ್ರಕ್ಕಾಗಿ ಚಿತ್ರೀಕರಣ ಮಾಡಿದ್ದರೂ, 2022ರಲ್ಲಿ ಶೂಟಿಂಗ್ ಪೂರ್ಣಗೊಂಡರೂ ಸಿನಿಮಾ ಇನ್ನೂ ಬಿಡುಗಡೆಯಾಗಿಲ್ಲ.
ಆದರೆ, ಇತ್ತೀಚಿನ ವರದಿಯ ಪ್ರಕಾರ, ‘ಚಕ್ ದ ಎಕ್ಸ್ಪ್ರೆಸ್’ ಚಿತ್ರದ ನಿರ್ಮಾಪಕರು ಈಗ ಚಿತ್ರವನ್ನು ಬಿಡುಗಡೆ ಮಾಡಲು ಉತ್ಸುಕರಾಗಿದ್ದಾರೆ.
ಮಿಡ್-ಡೇ ವರದಿಯ ಪ್ರಕಾರ, ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಇತ್ತೀಚಿನ ಐತಿಹಾಸಿಕ ಗೆಲುವಿನ ನಂತರ, ‘ಚಕ್ ದ ಎಕ್ಸ್ಪ್ರೆಸ್’ ಚಿತ್ರತಂಡವು ನೆಟ್ಫ್ಲಿಕ್ಸ್ನ ಉನ್ನತ ಅಧಿಕಾರಿಗಳಿಗೆ ಪತ್ರ ಬರೆದು ಚಿತ್ರವನ್ನು ಬಿಡುಗಡೆ ಮಾಡುವಂತೆ ಒತ್ತಾಯಿಸಿದೆ. “ಜೂಲನ್ ಗೋಸ್ವಾಮಿ ಅವರಂತಹ ದಂತಕಥೆಯ ಜೀವನಚರಿತ್ರೆಯು ಪ್ರೇಕ್ಷಕರನ್ನು ತಲುಪಲೇಬೇಕು. ಈ ನಿಟ್ಟಿನಲ್ಲಿ ನಾವು ನೆಟ್ಫ್ಲಿಕ್ಸ್ ಇಂಡಿಯಾದ ಉನ್ನತ ಅಧಿಕಾರಿಗಳಿಗೆ ಪತ್ರ ಬರೆದಿದ್ದೇವೆ” ಎಂದು ಮೂಲಗಳು ತಿಳಿಸಿರುವುದಾಗಿ ವರದಿಯಾಗಿದೆ.
ಈ ಚಿತ್ರವು ವರ್ಷಗಳಿಂದ ಸ್ಥಗಿತಗೊಳ್ಳಲು ಕಾರಣವೆಂದರೆ, ಚಿತ್ರದ ಅಂತಿಮ ರೂಪದ ಬಗ್ಗೆ ನೆಟ್ಫ್ಲಿಕ್ಸ್ನ ಮುಖ್ಯಸ್ಥರಿಗೆ ಸಮಾಧಾನವಿರಲಿಲ್ಲ ಮತ್ತು ಚಿತ್ರದ ಬಜೆಟ್ ಕೂಡ ಮಿತಿ ಮೀರಿತ್ತು ಎಂದು ಹೇಳಲಾಗಿದೆ. “ಆದರೂ, ಇದೊಂದು ಉತ್ತಮ ಚಿತ್ರ” ಎಂದು ಆಂತರಿಕ ಮೂಲಗಳು ತಿಳಿಸಿವೆ.
‘ಚಕ್ ದ ಎಕ್ಸ್ಪ್ರೆಸ್’ ಚಿತ್ರದ ಹಕ್ಕುಗಳು ಸದ್ಯ ನೆಟ್ಫ್ಲಿಕ್ಸ್ ಬಳಿ ಇವೆ. “ಇತ್ತೀಚಿನ ಗೆಲುವು ಈ ಬಯೋಪಿಕ್ ಮೇಲೆ ಮತ್ತೆ ಗಮನ ಹರಿಸುವಂತೆ ಮಾಡಿದೆ. ಸ್ಟ್ರೀಮಿಂಗ್ ವೇದಿಕೆಯಲ್ಲಿ ಆಂತರಿಕ ಚರ್ಚೆಗಳು ಪ್ರಾರಂಭವಾಗಿದ್ದು, ಹೆಚ್ಚುವರಿ ಕೆಲಸಗಳೊಂದಿಗೆ ಚಿತ್ರವನ್ನು ಬಿಡುಗಡೆ ಮಾಡಬಹುದೇ ಎಂಬುದರ ಕುರಿತು ಈ ತಿಂಗಳು ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ನಿರೀಕ್ಷೆಯಿದೆ” ಎಂದು ಇನ್ನೊಂದು ಮೂಲ ತಿಳಿಸಿದೆ.
‘ಚಕ್ ದ ಎಕ್ಸ್ಪ್ರೆಸ್’ ಭಾರತೀಯ ಕ್ರಿಕೆಟ್ ಆಟಗಾರ್ತಿ ಜೂಲನ್ ಗೋಸ್ವಾಮಿ ಅವರ ಜೀವನಚರಿತ್ರೆಯಾಗಿದ್ದು, ನೆಟ್ಫ್ಲಿಕ್ಸ್ನಲ್ಲಿ ಬಿಡುಗಡೆಯಾಗಲಿದೆ.
ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿದಂತೆ, ವಿರಾಟ್ ಕೊಹ್ಲಿ ಅವರನ್ನು ವಿವಾಹವಾಗಿರುವ ಅನುಷ್ಕಾ ಶರ್ಮಾ, 2024ರಲ್ಲಿ ಲಂಡನ್ಗೆ ಸ್ಥಳಾಂತರಗೊಂಡಿದ್ದು, ಗ್ಲಾಮರ್ ಲೋಕದಿಂದ ದೂರವಿದ್ದಾರೆ. ಅವರು ಕೆಲಸದ ನಿಮಿತ್ತ ಭಾರತಕ್ಕೆ ಭೇಟಿ ನೀಡುತ್ತಿರುತ್ತಾರೆ.
ಇದನ್ನೂ ಓದಿ : ಆಫ್ರಿಕಾದ ಮಾಲಿಯಲ್ಲಿ 5 ಭಾರತೀಯರ ಅಪಹರಣ : ಅಲ್ಖೈದಾ, ಐಸಿಸ್ ಉಗ್ರರ ಕೃತ್ಯದ ಶಂಕೆ
