ತಮಿಳುನಾಡು ರಾಜಕೀಯಕ್ಕೆ ನಟ ರಾಘವ ಲಾರೆನ್ಸ್ ದಿಢೀರ್ ಎಂಟ್ರಿ : ಸಿಎಂ ವಿಜಯ್‌ರಿಂದ ತೆರವಾದ ಕ್ಷೇತ್ರದಲ್ಲಿ ಕಣಕ್ಕೆ?

ಚೆನ್ನೈ : ಸಿನಿಮಾ ರಂಗದಿಂದ ರಾಜಕೀಯಕ್ಕೆ ಎಂಟ್ರಿ ಕೊಡುವ ತಮಿಳುನಾಡಿನ ದಶಕಗಳ ಸಂಪ್ರದಾಯಕ್ಕೆ ಈಗ ಮತ್ತೊಂದು ಪ್ರಮುಖ ಸೇರ್ಪಡೆಯಾಗಿದೆ. ಖ್ಯಾತ ನಟ, ನಿರ್ದೇಶಕ ಹಾಗೂ ನೃತ್ಯ ಸಂಯೋಜಕ ರಾಘವ ಲಾರೆನ್ಸ್ ಅವರು ಇದೀಗ ಅಧಿಕೃತವಾಗಿ ರಾಜಕೀಯ ಪ್ರವೇಶಿಸುವುದಾಗಿ ಪ್ರಕಟಿಸಿದ್ದಾರೆ. ತಮ್ಮ ಆಪ್ತ ಸ್ನೇಹಿತ ಹಾಗೂ ತಮಿಳುನಾಡಿನ ನೂತನ ಮುಖ್ಯಮಂತ್ರಿ ದಳಪತಿ ವಿಜಯ್ ಅವರಿಂದ ತೆರವಾಗಿರುವ ‘ತಿರುಚಿ ಪೂರ್ವ’ ವಿಧಾನಸಭಾ ಕ್ಷೇತ್ರದಿಂದ ಲಾರೆನ್ಸ್ ಮುಂಬರುವ ಉಪಚುನಾವಣೆಯಲ್ಲಿ ಸ್ಪರ್ಧಿಸಲಿದ್ದಾರೆ ಎಂಬ ವದಂತಿಗಳ ನಡುವೆಯೇ ಈ ದಿಢೀರ್ ಬೆಳವಣಿಗೆ ನಡೆದಿದೆ.

ಈ ಕುರಿತು ತಮ್ಮ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಂಡಿರುವ ರಾಘವ ಲಾರೆನ್ಸ್, ತಾವಾಗಿಯೇ ರಾಜಕೀಯಕ್ಕೆ ಬರಬೇಕು ಎಂದು ಎಂದಿಗೂ ಅಂದುಕೊಂಡಿರಲಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. “ಯಾವುದೇ ಫಲಾಪೇಕ್ಷೆ ಇಲ್ಲದೆ ನಿಮ್ಮ ಕರ್ತವ್ಯವನ್ನು ಪ್ರಾಮಾಣಿಕವಾಗಿ ಮಾಡಿ. ನನಗೆ ನಿಮ್ಮ ಸಲಹೆ ಮತ್ತು ಮಾರ್ಗದರ್ಶನದ ಅಗತ್ಯವಿದೆ” ಎಂದು ಪೋಸ್ಟ್ ಆರಂಭಿಸಿರುವ ಅವರು, ತಾವು ಹಣ ಗಳಿಸುವ ಉದ್ದೇಶದಿಂದ ಅಥವಾ ಕೇವಲ ಅಧಿಕಾರದ ಆಸೆಯಿಂದ ಈ ಕ್ಷೇತ್ರಕ್ಕೆ ಬರುತ್ತಿಲ್ಲ ಎಂದಿದ್ದಾರೆ. “ನಾನು ನಂಬಿದ ಮತ್ತು ನನಗೆ ತೀರಾ ಹತ್ತಿರವಾಗಿರುವ ವ್ಯಕ್ತಿಯೊಬ್ಬರು ರಾಜಕೀಯಕ್ಕೆ ಬಂದಾಗ, ಅವರ ಜೊತೆ ನಿಂತು ವೈಯಕ್ತಿಕ ಮಟ್ಟಕ್ಕಿಂತಲೂ ದೊಡ್ಡದಾಗಿ ಸಮಾಜ ಸೇವೆ ಮಾಡಬೇಕು ಎಂಬುದು ನನ್ನ ಆಲೋಚನೆಯಾಗಿತ್ತು. ಆದರೆ ಇಂದು ಬದಲಾಗಿರುವ ಸನ್ನಿವೇಶಗಳು ನನ್ನನ್ನು ನೇರವಾಗಿ ರಾಜಕೀಯಕ್ಕೆ ಪ್ರವೇಶಿಸುವಂತೆ ಮಾಡಿದೆ” ಎಂದು ಲಾರೆನ್ಸ್ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.

ಇತ್ತೀಚೆಗೆ ನಡೆದ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಮುಖ್ಯಮಂತ್ರಿ ವಿಜಯ್ ಅವರು ‘ಪೆರಂಬೂರ್’ ಮತ್ತು ‘ತಿರುಚಿ ಪೂರ್ವ’ ಎರಡೂ ಕ್ಷೇತ್ರಗಳಿಂದ ಸ್ಪರ್ಧಿಸಿ, ಎರಡರಲ್ಲೂ ಭರ್ಜರಿ ಜಯ ಸಾಧಿಸಿದ್ದರು. ತಿರುಚಿ ಪೂರ್ವ ಕ್ಷೇತ್ರದಲ್ಲಿ ಡಿಎಂಕೆ ಅಭ್ಯರ್ಥಿ ಇನಿಗೊ ಇರುದಯರಾಜ್ ಅವರನ್ನು 27,416 ಮತಗಳ ಅಂತರದಿಂದ ವಿಜಯ್ ಸೋಲಿಸಿದ್ದರು. ಆದರೆ, ಚುನಾವಣಾ ನಿಯಮಗಳ ಪ್ರಕಾರ ಒಬ್ಬರು ಒಂದೇ ಕ್ಷೇತ್ರವನ್ನು ಉಳಿಸಿಕೊಳ್ಳಬೇಕಾದ್ದರಿಂದ, ಸಚಿವಾಲಯಕ್ಕೆ ಹತ್ತಿರವಿರುವ ಪೆರಂಬೂರ್ ಕ್ಷೇತ್ರವನ್ನು ವಿಜಯ್ ತಮ್ಮ ಬಳಿ ಉಳಿಸಿಕೊಂಡು, ತಿರುಚಿ ಪೂರ್ವ ಕ್ಷೇತ್ರವನ್ನು ತ್ಯಜಿಸಿದ್ದರು. ಇದೀಗ ವಿಜಯ್ ತೆರವುಗೊಳಿಸಿರುವ ಈ ಪ್ರಭಾವಿ ಕ್ಷೇತ್ರಕ್ಕೆ ಅವರ ಆಪ್ತ ಗೆಳೆಯ ರಾಘವ ಲಾರೆನ್ಸ್ ಅವರೇ ಸೂಕ್ತ ಅಭ್ಯರ್ಥಿ ಎಂಬ ಚರ್ಚೆಗಳು ತಮಿಳುನಾಡು ರಾಜಕೀಯ ವಲಯದಲ್ಲಿ ದಟ್ಟವಾಗಿವೆ.

ನೃತ್ಯ ನಿರ್ದೇಶಕನಿಂದ ಸಮಾಜ ಸೇವಕನವರೆಗೆ

ಸಿನಿಮಾ ರಂಗದಲ್ಲಿ ಕೊರಿಯೋಗ್ರಾಫರ್ ಆಗಿ ವೃತ್ತಿ ಬದುಕು ಆರಂಭಿಸಿದ ರಾಘವ ಲಾರೆನ್ಸ್, ನಂತರ ನಟ ಹಾಗೂ ನಿರ್ದೇಶಕರಾಗಿ ತಮಿಳು ಮತ್ತು ತೆಲುಗು ಚಿತ್ರರಂಗದಲ್ಲಿ ದೊಡ್ಡ ಯಶಸ್ಸು ಕಂಡವರು. 2003ರಲ್ಲಿ ತೆರೆಕಂಡ ವಿಜಯ್ ನಟನೆಯ ‘ತಿರುಮಲೈ’ ಚಿತ್ರದಲ್ಲಿ ಲಾರೆನ್ಸ್ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಾಗಿನಿಂದ ಇಬ್ಬರ ನಡುವೆ ಗಾಢವಾದ ಸ್ನೇಹವಿದೆ. ಸಿನಿಮಾಗಳ ಆಚೆಗೂ ಲಾರೆನ್ಸ್ ಕಳೆದ ಹಲವು ದಶಕಗಳಿಂದ ತಮ್ಮದೇ ಆದ ಟ್ರಸ್ಟ್ ಮೂಲಕ ಬಡವರು, ಅಂಗವಿಕಲರು ಹಾಗೂ ಅನಾಥ ಮಕ್ಕಳಿಗೆ ಶಿಕ್ಷಣ ಮತ್ತು ವೈದ್ಯಕೀಯ ನೆರವು ನೀಡುತ್ತಾ ದೊಡ್ಡ ಮಟ್ಟದ ಜನಪ್ರಿಯತೆ ಗಳಿಸಿದ್ದಾರೆ.

ವಿಡಿಯೋ ಮೂಲಕ ಅಭಿಪ್ರಾಯ ಕೋರಿದ ನಟ

ರಾಜಕೀಯ ಪ್ರವೇಶದ ಪೋಸ್ಟ್ ಬೆನ್ನಲ್ಲೇ ಲಾರೆನ್ಸ್ ವಿಶೇಷ ವಿಡಿಯೋ ಒಂದನ್ನು ಬಿಡುಗಡೆ ಮಾಡಿದ್ದಾರೆ. ಈ ವಿಡಿಯೋದಲ್ಲಿ ರಾಜಕೀಯದ ಕುರಿತು ತಮಗಿರುವ ತಿಳಿವಳಿಕೆ, ರಾಜಕೀಯ ಅವರ ಜೀವನವನ್ನು ಪ್ರವೇಶಿಸಿದ ರೀತಿ, ಅವರ ತಾಯಿಯ ದೃಷ್ಟಿಕೋನ ಮತ್ತು ಅವರ ಬದುಕಿನ ಪಯಣವನ್ನು ಬದಲಿಸಿದ ಕೆಲವು ಪ್ರಮುಖ ಘಟನೆಗಳ ಬಗ್ಗೆ ಅತ್ಯಂತ ಪ್ರಾಮಾಣಿಕವಾಗಿ ಮಾತನಾಡಿದ್ದಾರೆ. ತಮ್ಮ ಈ ಹೊಸ ರಾಜಕೀಯ ಪಯಣಕ್ಕೆ ಅಭಿಮಾನಿಗಳು ಹಾಗೂ ತಮಿಳುನಾಡಿನ ಜನರ ಆಶೀರ್ವಾದ, ಸಲಹೆ ಮತ್ತು ಮಾರ್ಗದರ್ಶನ ಅತ್ಯಂತ ಅಮೂಲ್ಯ ಎಂದು ಅವರು ಕೋರಿದ್ದಾರೆ. ಲಾರೆನ್ಸ್ ಅವರ ಈ ನಿರ್ಧಾರದಿಂದ ತಮಿಳುನಾಡು ರಾಜಕೀಯ ಮತ್ತಷ್ಟು ರಂಗೇರುವಂತಾಗಿದೆ.

ಇದನ್ನೂ ಓದಿ : ಏರ್‌ ಇಂಡಿಯಾ ವಿಮಾನ ದುರಂತಕ್ಕೆ ವರ್ಷ ಪೂರ್ಣ : ದುರಂತ ಸ್ಥಳದಲ್ಲಿ ತಲೆಎತ್ತಲಿದೆ 547 ಕೋಟಿ ವೆಚ್ಚದ ಹೆಲ್ತ್ ಹಬ್!