“ಆಕೆ ಸುಂದರವಾಗಿದ್ದಾಳೆಂದರೆ ನೀವು ಗೂಢಚರ್ಯೆಯ ದಾಳ ಎಂದರ್ಥ”: ಚೀನೀ ಗೂಢಚಾರಿಣಿ ವಿವಾದದಲ್ಲಿ ವೈರಲ್ ಆದ ಮಸ್ಕ್ ಹಳೇ ಟ್ವೀಟ್!

ವಾಷಿಂಗ್ಟನ್: ಚಿಪ್ ದೈತ್ಯ ಎನ್‌ವಿಡಿಯಾ ಕಂಪನಿಯ ಸಿಇಒ ಜೆನ್ಸನ್ ಹುವಾಂಗ್ ಅವರು ಶಂಕಿತ ಚೀನೀ ಗೂಢಚಾರಿಣಿ ಅಲಿಸ್ ಹುವಾಂಗ್ ಅವರೊಂದಿಗೆ ಅನೈತಿಕ ಸಂಬಂಧ ಹೊಂದಿದ್ದಾಗಿ ಒಪ್ಪಿಕೊಂಡಿರುವ ಬೆನ್ನಲ್ಲೇ, ಕೋಟ್ಯಧಿಪತಿ ಉದ್ಯಮಿ ಎಲಾನ್ ಮಸ್ಕ್ ಅವರ ಹಳೆಯ ಸಾಮಾಜಿಕ ಜಾಲತಾಣ ಪೋಸ್ಟ್‌ವೊಂದು ಭಾರೀ ವೈರಲ್ ಆಗಿದೆ. ಸಿಲಿಕಾನ್ ವ್ಯಾಲಿ ತಂತ್ರಜ್ಞಾನ ಕ್ಷೇತ್ರದ ಗಣ್ಯರನ್ನು ವಿದೇಶಿ ಗೂಢಚಾರಿಗಳು ತಮ್ಮ ಬಲೆಗೆ ಬೀಳಿಸಿಕೊಳ್ಳುವ ಕುರಿತು ಮಸ್ಕ್ ಈ ಹಿಂದೆ ಮಾಡಿದ್ದ ವ್ಯಂಗ್ಯಾತ್ಮಕ ಹಾಗೂ ಎಚ್ಚರಿಕೆಯ ಪೋಸ್ಟ್ ಅನ್ನು ನೆಟ್ಟಿಗರು ಈಗ ವ್ಯಾಪಕವಾಗಿ ಹಂಚಿಕೊಳ್ಳುತ್ತಿದ್ದಾರೆ.

ಮಸ್ಕ್ ಹೇಳಿದ್ದೇನು?

ಸಿಲಿಕಾನ್ ವ್ಯಾಲಿಯ ಗೌಪ್ಯ ಮಾಹಿತಿಗಳನ್ನು ಕದಿಯಲು ಅಮೆರಿಕದ ಪ್ರಮುಖ ಉದ್ಯಮಿಗಳನ್ನು ಚೀನಾ ಮತ್ತು ರಷ್ಯಾದ ಮಹಿಳಾ ಗೂಢಚಾರಿಗಳು ‘ಹನಿಟ್ರ್ಯಾಪ್’ ಬಲೆಗೆ ಬೀಳಿಸುತ್ತಿದ್ದಾರೆ ಎಂಬ ಮಾಧ್ಯಮ ವರದಿಯೊಂದನ್ನು ಹಂಚಿಕೊಂಡಿದ್ದ ಮಸ್ಕ್, “ಆಕೆ ಅತ್ಯಂತ ಸುಂದರಿ ಅಥವಾ ಸೂಪರ್ ಮಾಡೆಲ್‌ನಂತಿದ್ದರೆ (If she’s a 10), ನೀವು ಗೂಢಚರ್ಯೆಯ ದಾಳವಾಗಿದ್ದೀರಿ (you’re an asset) ಎಂದರ್ಥ” ಎಂದು ಟ್ವೀಟ್ ಮಾಡಿದ್ದರು. ಎನ್‌ವಿಡಿಯಾ ಸಿಇಒ ತಾವೇ ಗೂಢಚರ್ಯೆಯ ಹುನ್ನಾರಕ್ಕೆ ಸಿಲುಕಿರುವ ಶಂಕೆ ವ್ಯಕ್ತವಾಗಿರುವ ಪ್ರಸ್ತುತ ಸನ್ನಿವೇಶದಲ್ಲಿ ಮಸ್ಕ್ ಅವರ ಈ ಹಳೆಯ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಯಾರೀ ಶಂಕಿತ ಗೂಢಚಾರಿಣಿ ಅಲಿಸ್ ಹುವಾಂಗ್?

ಚೀನಾದ ಪ್ರಜೆ ಹಾಗೂ ‘ಹುವಾಂಗ್ ಲೇ’ ಎಂದೂ ಕರೆಯಲ್ಪಡುವ ಅಲಿಸ್ ಹುವಾಂಗ್, ಸಿಂಗಾಪುರ ಮೂಲದ ‘ಮೆಗಾಸ್ಪೀಡ್’ ಡೇಟಾ ಸೆಂಟರ್ ಕಂಪನಿಯ ಉನ್ನತಾಧಿಕಾರಿಯಾಗಿದ್ದರು. ಈ ಮೆಗಾಸ್ಪೀಡ್ ಸಂಸ್ಥೆಯು ಕಳೆದ 2 ವರ್ಷಗಳಲ್ಲಿ ಎನ್‌ವಿಡಿಯಾದಿಂದ ಬರೋಬ್ಬರಿ 4.8 ಬಿಲಿಯನ್ ಡಾಲರ್ ಮೌಲ್ಯದ ಅತ್ಯಾಧುನಿಕ ಎಐ ಚಿಪ್‌ಗಳನ್ನು ಖರೀದಿಸಿತ್ತು. ಚೀನಾದ ಆಂತರಿಕ ಬೇಹುಗಾರಿಕಾ ಸಚಿವಾಲಯದ ಸೂಚನೆಯಂತೆ ಅಲಿಸ್ ಹುವಾಂಗ್ ಎನ್‌ವಿಡಿಯಾ ಸಿಇಒ ಜೊತೆ ನಿಕಟ ಬಾಂಧವ್ಯ ಬೆಳೆಸಿ, ತಾಂತ್ರಿಕ ರಹಸ್ಯಗಳನ್ನು ಸಂಗ್ರಹಿಸಲು ಯತ್ನಿಸುತ್ತಿದ್ದರು ಎಂದು ಅಮೆರಿಕದ ತನಿಖಾ ಸಂಸ್ಥೆಗಳು ಶಂಕಿಸಿವೆ. ಹಿಂದೆ ಚೀನಾದ ಪ್ರಮುಖ ಸುದ್ದಿ ವಾಹಿನಿಗಳಲ್ಲಿ ಹಾಗೂ ಎಚ್‌ಸ್‌ಬಿಸಿ (HSBC) ಬ್ಯಾಂಕ್‌ನಲ್ಲಿ ಕಾರ್ಯನಿರ್ವಹಿಸಿದ ಅನುಭವ ಹೊಂದಿರುವ ಈಕೆ, 2024 ರಿಂದ ಜೆನ್ಸನ್ ಹುವಾಂಗ್ ಜೊತೆಗೆ ಸಾರ್ವಜನಿಕವಾಗಿ ಹಲವು ಬಾರಿ ಕಾಣಿಸಿಕೊಂಡಿದ್ದರು.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪ್ರತಿಕ್ರಿಯೆ

ವಿವಾದಕ್ಕೆ ಸಂಬಂಧಿಸಿದಂತೆ ಮಾಧ್ಯಮಗಳು ಕೇಳಿದ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, “ಇದು ಅತ್ಯಂತ ಸಂಕೀರ್ಣವಾದ ವಿಷಯ. ಜೆನ್ಸನ್ ಹುವಾಂಗ್ ಅತ್ಯಂತ ಬುದ್ಧಿವಂತ ವ್ಯಕ್ತಿ. ಅವರ ಪರಿಸ್ಥಿತಿ ಸರಿಯಾಗಲಿದೆ ಎಂದು ಭಾವಿಸುತ್ತೇನೆ” ಎಂದಿದ್ದಾರೆ. ಅಲ್ಲದೆ, ತಮ್ಮ ಆಡಳಿತ ವ್ಯವಸ್ಥೆಯು ಈ ಪ್ರಕರಣದ ಬಗ್ಗೆ ಅತ್ಯಂತ ನಿಗಾ ವಹಿಸಿ ಪರಿಶೀಲಿಸುತ್ತಿದೆ ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.

ಮಾರುಕಟ್ಟೆಯಲ್ಲಿ ಎನ್‌ವಿಡಿಯಾ ಭವಿಷ್ಯದ ಆತಂಕ

4.5 ಟ್ರಿಲಿಯನ್ ಡಾಲರ್ ಮೌಲ್ಯದ ವಿಶ್ವದ ಅತ್ಯಂತ ಮೌಲ್ಯಯುತ ಕಂಪನಿಯಾಗಿ ಹೊರಹೊಮ್ಮಿರುವ ಎನ್‌ವಿಡಿಯಾದ ಆಡಳಿತ ಮಂಡಳಿಯು ಈಗಾಗಲೇ ಪ್ರಕರಣದ ಸ್ವತಂತ್ರ ತನಿಖೆಗೆ ಆದೇಶಿಸಿದೆ. ರಾಷ್ಟ್ರೀಯ ಭದ್ರತೆ ಅಥವಾ ಕಂಪನಿಯ ರಹಸ್ಯಗಳು ಸೋರಿಕೆಯಾಗಿಲ್ಲ ಎಂದು ಮಂಡಳಿ ಹೇಳಿದೆಯಾದರೂ, ತಂತ್ರಜ್ಞಾನ ಕ್ಷೇತ್ರದಲ್ಲಿ ಹೂಡಿಕೆದಾರರು ಮತ್ತು ವಿಶ್ಲೇಷಕರಲ್ಲಿ ಈ ಘಟನೆ ತೀವ್ರ ಆತಂಕವನ್ನು ಉಂಟುಮಾಡಿದೆ.