ಟ್ರಂಪ್‌ಗೆ ಅಮೆರಿಕದಲ್ಲಿ ಅಗ್ನಿಪರೀಕ್ಷೆ! ಮಧ್ಯಂತರ ಚುನಾವಣೆ ಸೋತರೆ ಅಧಿಕಾರಕ್ಕೆ ಕಂಟಕವೇ?

ಅಧ್ಯಕ್ಷರ ಕುರ್ಚಿ ಭದ್ರವಾಗಿದ್ದರೂ ಸಂಸತ್ತಿನ ಮೇಲೆ ಹಿಡಿತ ಕಳೆದುಕೊಳ್ಳುವ ಭೀತಿ

ರಿಪಬ್ಲಿಕನ್ನರಿಗೆ ಡೆಮಾಕ್ರಾಟ್‌ ಸವಾಲು… ಅಮೆರಿಕ ರಾಜಕೀಯದಲ್ಲಿ ಮಹತ್ವದ ತಿರುವು ತರಲಿದೆಯೇ ಮಧ್ಯಂತರ ಚುನಾವಣೆ?

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಧಿಕಾರಕ್ಕೆ ಬಂದ ಬಳಿಕ ತೆಗೆದುಕೊಂಡ ಹಲವು ನಿರ್ಧಾರಗಳು ಈಗ ಜಾಗತಿಕ ಮಟ್ಟದಲ್ಲಿ ಚರ್ಚೆಯಾಗುತ್ತಿವೆ. ಸುಂಕ ಸಮರ, ವಲಸೆ ನೀತಿ, ಇರಾನ್‌ನೊಂದಿಗಿನ ಸಂಘರ್ಷ, ಆರ್ಥಿಕ ಪರಿಸ್ಥಿತಿ ಸೇರಿದಂತೆ ಹಲವು ವಿಚಾರಗಳು ಟ್ರಂಪ್ ಆಡಳಿತಕ್ಕೆ ಸವಾಲಾಗಿವೆ. ಇದರ ನಡುವೆಯೇ ಇಂದು(ನವೆಂಬರ್ 3) ನಡೆಯಲಿರುವ ಅಮೆರಿಕದ ಮಧ್ಯಂತರ ಚುನಾವಣೆ ಇಡೀ ಜಗತ್ತಿನ ಗಮನ ಸೆಳೆದಿದೆ.

ಇದು ಕೇವಲ ಕೆಲವು ಸಂಸದರನ್ನು ಆಯ್ಕೆ ಮಾಡುವ ಪ್ರಕ್ರಿಯೆಯಲ್ಲ. ಮುಂದಿನ ಎರಡು ವರ್ಷ ಅಮೆರಿಕವನ್ನು ಯಾರು ನಿಯಂತ್ರಿಸುತ್ತಾರೆ ಎಂಬುದನ್ನು ನಿರ್ಧರಿಸುವ ರಾಜಕೀಯ ಅಗ್ನಿ ಪರೀಕ್ಷೆ. ಅದರಲ್ಲೂ ಟ್ರಂಪ್ ನೇತೃತ್ವದ ರಿಪಬ್ಲಿಕನ್ ಪಕ್ಷ ತನ್ನ ಬಹುಮತವನ್ನು ಉಳಿಸಿಕೊಳ್ಳುತ್ತದೆಯೇ ಅಥವಾ ಡೆಮಾಕ್ರಾಟ್‌ಗಳು ಅಧಿಕಾರದ ಸಮೀಕರಣವನ್ನೇ ಬದಲಿಸುತ್ತಾರೆಯೇ ಎಂಬ ಕುತೂಹಲಕ್ಕೆ ಮತದಾರರು ಉತ್ತರ ನೀಡಲಿದ್ದಾರೆ.

ಏನಿದು ಅಮೆರಿಕದ ಮಧ್ಯಂತರ ಚುನಾವಣೆ?

ಅಮೆರಿಕದಲ್ಲಿ ಅಧ್ಯಕ್ಷರ ಅಧಿಕಾರಾವಧಿ ನಾಲ್ಕು ವರ್ಷ. ಆದರೆ ಅಧ್ಯಕ್ಷರ ಅವಧಿ ಮುಗಿಯುವವರೆಗೂ ಸಂಸತ್ತಿನ ಚುನಾವಣೆಗಾಗಿ ಕಾಯುವುದಿಲ್ಲ. ಪ್ರತಿ ಎರಡು ವರ್ಷಕ್ಕೊಮ್ಮೆ ಸಂಸತ್ತಿನ ಚುನಾವಣೆ ನಡೆಯುತ್ತದೆ. ಅಧ್ಯಕ್ಷರ ನಾಲ್ಕು ವರ್ಷದ ಅಧಿಕಾರಾವಧಿಯ ಮಧ್ಯದಲ್ಲಿ ನಡೆಯುವ ಚುನಾವಣೆಯೇ ಮಧ್ಯಂತರ ಚುನಾವಣೆ.

ಅಮೆರಿಕದ ಸಂಸತ್ತನ್ನು ಕಾಂಗ್ರೆಸ್ ಎಂದು ಕರೆಯಲಾಗುತ್ತದೆ. ಇದರಲ್ಲಿ ಎರಡು ಸದನಗಳಿವೆ. ಒಂದು ಜನಪ್ರತಿನಿಧಿಗಳ ಸಭೆ, ಮತ್ತೊಂದು ಸೆನೆಟ್.
ಜನಪ್ರತಿನಿಧಿಗಳ ಸಭೆ(ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್)ಯಲ್ಲಿ ಒಟ್ಟು 435 ಸ್ಥಾನಗಳಿವೆ. ಈ ಎಲ್ಲ ಸ್ಥಾನಗಳಿಗೂ ಪ್ರತಿ ಎರಡು ವರ್ಷಕ್ಕೊಮ್ಮೆ ಚುನಾವಣೆ ನಡೆಯುತ್ತದೆ. ಆದರೆ ಸೆನೆಟ್‌ನಲ್ಲಿ 100 ಸದಸ್ಯರಿದ್ದು, ಅವರ ಅಧಿಕಾರಾವಧಿ ಆರು ವರ್ಷ. ಹೀಗಾಗಿ ಪ್ರತಿ ಎರಡು ವರ್ಷಕ್ಕೊಮ್ಮೆ ಸುಮಾರು ಮೂರನೇ ಒಂದು ಭಾಗದಷ್ಟು ಸ್ಥಾನಗಳಿಗೆ ಮಾತ್ರ ಚುನಾವಣೆ ನಡೆಯುತ್ತದೆ. 2026ರ ಚುನಾವಣೆಯಲ್ಲಿ 435 ಜನಪ್ರತಿನಿಧಿಗಳ ಸಭೆಯ ಸ್ಥಾನಗಳು ಮತ್ತು 35 ಸೆನೆಟ್ ಸ್ಥಾನಗಳಿಗೆ ಮತದಾನ ನಡೆಯುತ್ತಿದೆ.ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಈ ಚುನಾವಣೆಯಲ್ಲಿ ಅಧ್ಯಕ್ಷರನ್ನು ಆಯ್ಕೆ ಮಾಡುವುದಿಲ್ಲ. ಟ್ರಂಪ್ ಅವರ ಅಧ್ಯಕ್ಷೀಯ ಅಧಿಕಾರಾವಧಿ ಮುಂದುವರಿಯುತ್ತದೆ. ಆದರೆ ಅವರ ಪಕ್ಷದ ಸಂಸತ್ತಿನ ಬಹುಮತಕ್ಕೆ ಪರೀಕ್ಷೆ ಎದುರಾಗುತ್ತದೆ.

ಭಾರತದ ಚುನಾವಣೆಗೂ ಅಮೆರಿಕದ ಚುನಾವಣೆಗೂ ಏನು ವ್ಯತ್ಯಾಸ?

ಭಾರತ ಮತ್ತು ಅಮೆರಿಕ ಎರಡೂ ಪ್ರಜಾಪ್ರಭುತ್ವ ರಾಷ್ಟ್ರಗಳಾದರೂ, ಚುನಾವಣಾ ವ್ಯವಸ್ಥೆಯಲ್ಲಿ ದೊಡ್ಡ ವ್ಯತ್ಯಾಸವಿದೆ.
ಭಾರತದಲ್ಲಿ ಲೋಕಸಭೆ ಚುನಾವಣೆಯಲ್ಲಿ ಬಹುಮತ ಪಡೆದ ಪಕ್ಷ ಅಥವಾ ಮೈತ್ರಿಕೂಟ ಸರ್ಕಾರ ರಚಿಸುತ್ತದೆ. ಪ್ರಧಾನಮಂತ್ರಿ ಲೋಕಸಭೆಯ ಬಹುಮತದ ಬೆಂಬಲದೊಂದಿಗೆ ಆಡಳಿತ ನಡೆಸುತ್ತಾರೆ. ಸರ್ಕಾರ ಬಹುಮತ ಕಳೆದುಕೊಂಡರೆ ವಿಶ್ವಾಸಮತದಲ್ಲಿ ಸೋತು ಅಧಿಕಾರ ಕಳೆದುಕೊಳ್ಳಬಹುದು.

ಆದರೆ ಅಮೆರಿಕದಲ್ಲಿ ಅಧ್ಯಕ್ಷೀಯ ಮತ್ತು ಸಂಸದೀಯ ಚುನಾವಣೆಗಳು ಪ್ರತ್ಯೇಕ ವ್ಯವಸ್ಥೆಯಲ್ಲಿ ನಡೆಯುತ್ತವೆ. ಜನರು ಪ್ರತ್ಯೇಕವಾಗಿ ಅಧ್ಯಕ್ಷರನ್ನು ಆಯ್ಕೆ ಮಾಡುತ್ತಾರೆ. ಕಾಂಗ್ರೆಸ್ ಸದಸ್ಯರನ್ನೂ ಪ್ರತ್ಯೇಕವಾಗಿ ಆಯ್ಕೆ ಮಾಡುತ್ತಾರೆ. ಹೀಗಾಗಿ ಅಧ್ಯಕ್ಷರ ಪಕ್ಷಕ್ಕೆ ಸಂಸತ್ತಿನಲ್ಲಿ ಬಹುಮತ ಇಲ್ಲದಿದ್ದರೂ ಅಧ್ಯಕ್ಷರು ಅಧಿಕಾರದಲ್ಲಿ ಮುಂದುವರಿಯಬಹುದು.ಅಂದರೆ ಭಾರತದಲ್ಲಿ ಲೋಕಸಭೆಯ ಬಹುಮತ ಕಳೆದುಕೊಂಡರೆ ಸರ್ಕಾರವೇ ಬೀಳುವ ಸಾಧ್ಯತೆ ಇರುತ್ತದೆ. ಅಮೆರಿಕದಲ್ಲಿ ಕಾಂಗ್ರೆಸ್‌ನ ಬಹುಮತ ಕಳೆದುಕೊಂಡರೂ ಅಧ್ಯಕ್ಷರ ಕುರ್ಚಿ ಖಾಲಿಯಾಗುವುದಿಲ್ಲ. ಇದೇ ಎರಡೂ ದೇಶಗಳ ಚುನಾವಣಾ ವ್ಯವಸ್ಥೆಯ ಪ್ರಮುಖ ವ್ಯತ್ಯಾಸ.

ಡೆಮಾಕ್ರಾಟ್‌ಗಳು ಗೆದ್ದರೆ ಟ್ರಂಪ್‌ಗೆ ಏನಾಗುತ್ತದೆ?

ಇಲ್ಲಿಯೇ ಈ ಚುನಾವಣೆಯ ನಿಜವಾದ ರಾಜಕೀಯ ಮಹತ್ವ ಅಡಗಿದೆ.ಸದ್ಯ ಅಮೆರಿಕದ ಜನಪ್ರತಿನಿಧಿಗಳ ಸಭೆಯಲ್ಲಿ ರಿಪಬ್ಲಿಕನ್ನರಿಗೆ 218 ಮತ್ತು ಡೆಮಾಕ್ರಾಟ್‌ಗಳಿಗೆ 214 ಸ್ಥಾನಗಳಿವೆ. ಸೆನೆಟ್‌ನಲ್ಲಿ ರಿಪಬ್ಲಿಕನ್ನರು 53 ಮತ್ತು ಡೆಮಾಕ್ರಾಟ್‌ಗಳು 47 ಸ್ಥಾನಗಳನ್ನು ಹೊಂದಿದ್ದಾರೆ. ಅಂದರೆ ಎರಡೂ ಸದನಗಳಲ್ಲಿ ರಿಪಬ್ಲಿಕನ್ನರ ಬಹುಮತ ಬಹಳ ಕಡಿಮೆ ಅಂತರದಲ್ಲಿದೆ. ಬಹುಮತ ಪಡೆಯಲು ಡೆಮಾಕ್ರಾಟ್‌ಗಳಿಗೆ ಎರಡೂ ಸದನಗಳಲ್ಲಿ ಸುಮಾರು ನಾಲ್ಕು ಸ್ಥಾನಗಳ ನಿವ್ವಳ ಹೆಚ್ಚಳದ ಅಗತ್ಯವಿದೆ.ಡೆಮಾಕ್ರಾಟ್‌ಗಳು ಜನಪ್ರತಿನಿಧಿಗಳ ಸಭೆಯಲ್ಲಿ ಬಹುಮತ ಗಳಿಸಿದರೆ ಮೊದಲನೆಯದಾಗಿ ಸಂಸತ್ತಿನ ಸಮಿತಿಗಳ ಮೇಲಿನ ಹಿಡಿತ ಬದಲಾಗುತ್ತದೆ. ಟ್ರಂಪ್ ಆಡಳಿತದ ನೀತಿಗಳು, ಸರ್ಕಾರಿ ವೆಚ್ಚಗಳು, ವಲಸೆ ನೀತಿ, ವಿದೇಶಾಂಗ ನೀತಿ ಮತ್ತು ಆಡಳಿತಾತ್ಮಕ ನಿರ್ಧಾರಗಳ ಬಗ್ಗೆ ತನಿಖೆ ನಡೆಸಲು ಅವರಿಗೆ ಹೆಚ್ಚಿನ ಅವಕಾಶ ಸಿಗುತ್ತದೆ.

ಅಧ್ಯಕ್ಷರ ನಿರ್ಧಾರಗಳನ್ನು ಪ್ರಶ್ನಿಸುವುದು, ಅಧಿಕಾರಿಗಳಿಂದ ವಿವರಣೆ ಕೇಳುವುದು, ದಾಖಲೆಗಳನ್ನು ತರಿಸಿಕೊಳ್ಳುವುದು ಮತ್ತು ಆಡಳಿತದ ವಿರುದ್ಧ ವಿಚಾರಣೆ ನಡೆಸುವುದು ಸುಲಭವಾಗುತ್ತದೆ. ಟ್ರಂಪ್ ಬಯಸಿದ ಕಾನೂನುಗಳನ್ನು ಜಾರಿಗೊಳಿಸುವುದಕ್ಕೂ ಅಡೆತಡೆ ಎದುರಾಗಬಹುದು.
ಇನ್ನು ಡೆಮಾಕ್ರಾಟ್‌ಗಳು ಸೆನೆಟ್‌ನಲ್ಲೂ ಬಹುಮತ ಪಡೆದರೆ ಟ್ರಂಪ್‌ಗೆ ಮತ್ತಷ್ಟು ಸಂಕಷ್ಟ. ಏಕೆಂದರೆ ಉನ್ನತ ಸರ್ಕಾರಿ ಹುದ್ದೆಗಳು, ರಾಯಭಾರಿಗಳು ಮತ್ತು ನ್ಯಾಯಾಧೀಶರ ನೇಮಕಾತಿಗಳಿಗೆ ಸೆನೆಟ್‌ನ ಅನುಮೋದನೆ ಮುಖ್ಯ. ಟ್ರಂಪ್ ಆಯ್ಕೆ ಮಾಡುವ ಅಭ್ಯರ್ಥಿಗಳ ನೇಮಕಾತಿಯನ್ನು ಡೆಮಾಕ್ರಾಟ್‌ಗಳು ತಡೆಹಿಡಿಯಬಹುದು ಅಥವಾ ವಿಳಂಬ ಮಾಡಬಹುದು.ಆದರೆ ಇದರಿಂದ ಟ್ರಂಪ್ ಎಲ್ಲ ಅಧಿಕಾರವನ್ನೂ ಕಳೆದುಕೊಳ್ಳುತ್ತಾರೆ ಎಂದರ್ಥವಲ್ಲ. ಅಧ್ಯಕ್ಷರಿಗೆ ತಮ್ಮ ನಿರ್ದಿಷ್ಟ ಅಧಿಕಾರಗಳಿರುತ್ತವೆ. ಸಂಸತ್ತು ಅಂಗೀಕರಿಸಿದ ಮಸೂದೆಗೆ ಅವರು ವೀಟೊ ಅಧಿಕಾರ ಬಳಸಬಹುದು. ಹೀಗಾಗಿ ಸರ್ಕಾರ ಮತ್ತು ಸಂಸತ್ತಿನ ನಡುವೆ ಸಂಘರ್ಷ ಹೆಚ್ಚಾಗಬಹುದು.

ಮಧ್ಯಂತರ ಚುನಾವಣೆಯಲ್ಲಿ ಸೋತರೆ ಅಧ್ಯಕ್ಷ ಸ್ಥಾನಕ್ಕೆ ಕಂಟಕವೇ?

ಇದು ಅತ್ಯಂತ ಕುತೂಹಲಕಾರಿ ಪ್ರಶ್ನೆ. ಡೆಮಾಕ್ರಾಟ್‌ಗಳು ಗೆದ್ದ ತಕ್ಷಣ ಟ್ರಂಪ್ ಅಧ್ಯಕ್ಷ ಸ್ಥಾನ ಕಳೆದುಕೊಳ್ಳುವುದಿಲ್ಲ. ಆದರೆ ಅವರ ವಿರುದ್ಧ ಮಹಾಭಿಯೋಗ ಪ್ರಕ್ರಿಯೆ ಆರಂಭಿಸುವ ರಾಜಕೀಯ ಅವಕಾಶ ಅವರಿಗೆ ಸಿಗಬಹುದು.ಅಮೆರಿಕದ ಸಂವಿಧಾನದ ಪ್ರಕಾರ, ಜನಪ್ರತಿನಿಧಿಗಳ ಸಭೆಯಲ್ಲಿ ಸರಳ ಬಹುಮತದಿಂದ ಮಹಾಭಿಯೋಗದ ಆರೋಪಗಳನ್ನು ಅಂಗೀಕರಿಸಬಹುದು. ನಂತರ ಸೆನೆಟ್‌ನಲ್ಲಿ ವಿಚಾರಣೆ ನಡೆಯುತ್ತದೆ. ಅಧ್ಯಕ್ಷರನ್ನು ಅಧಿಕಾರದಿಂದ ತೆಗೆದುಹಾಕಲು ಸೆನೆಟ್‌ನಲ್ಲಿ ಹಾಜರಿರುವ ಸದಸ್ಯರ ಮೂರನೇ ಎರಡರಷ್ಟು ಬೆಂಬಲ ಅಗತ್ಯ.ಹೀಗಾಗಿ ಜನಪ್ರತಿನಿಧಿಗಳ ಸಭೆಯಲ್ಲಿ ಡೆಮಾಕ್ರಾಟ್‌ಗಳು ಬಹುಮತ ಪಡೆದರೂ, ಅಧ್ಯಕ್ಷರನ್ನು ಅಧಿಕಾರದಿಂದ ಕೆಳಗಿಳಿಸುವುದು ಸುಲಭವಲ್ಲ. ಅದಕ್ಕೆ ಸೆನೆಟ್‌ನಲ್ಲೂ ಅಗತ್ಯ ಬೆಂಬಲ ಬೇಕು. ಟ್ರಂಪ್ ಮೊದಲ ಅವಧಿಯಲ್ಲೇ ಎರಡು ಬಾರಿ ಮಹಾಭಿಯೋಗಕ್ಕೆ ಒಳಗಾಗಿದ್ದರು. ಆದರೆ ಎರಡೂ ಬಾರಿ ಸೆನೆಟ್‌ನಲ್ಲಿ ದೋಷಿ ಎಂದು ತೀರ್ಮಾನವಾಗಿರಲಿಲ್ಲ.

ಇತಿಹಾಸದಲ್ಲಿ ಆಡಳಿತ ಪಕ್ಷಕ್ಕೆ ಮುಖಭಂಗವಾಗಿದ್ದೇ ಹೆಚ್ಚು!

ಅಮೆರಿಕದ ಚುನಾವಣಾ ಇತಿಹಾಸವನ್ನು ಗಮನಿಸಿದರೆ ಮಧ್ಯಂತರ ಚುನಾವಣೆಗಳು ಆಡಳಿತಾರೂಢ ಅಧ್ಯಕ್ಷರಿಗೆ ಬಹುತೇಕ ಅಗ್ನಿಪರೀಕ್ಷೆಯಾಗಿವೆ.
1994ರಲ್ಲಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಆಡಳಿತ ನಡೆಸುತ್ತಿದ್ದಾಗ ರಿಪಬ್ಲಿಕನ್ ಪಕ್ಷ ಭರ್ಜರಿ ಗೆಲುವು ಸಾಧಿಸಿತ್ತು. ಜನಪ್ರತಿನಿಧಿಗಳ ಸಭೆಯಲ್ಲಿ ಡೆಮಾಕ್ರಾಟ್‌ಗಳು ಬರೋಬ್ಬರಿ 54 ಸ್ಥಾನಗಳನ್ನು ಕಳೆದುಕೊಂಡಿದ್ದರು. ಇದು ಅಮೆರಿಕದ ರಾಜಕೀಯದಲ್ಲಿ ದೊಡ್ಡ ಅಧಿಕಾರ ಬದಲಾವಣೆಗೆ ಕಾರಣವಾಗಿತ್ತು.

2006ರಲ್ಲಿ ಜಾರ್ಜ್ ಬುಷ್ ಅಧ್ಯಕ್ಷರಾಗಿದ್ದಾಗ ಇರಾಕ್ ಯುದ್ಧ ಮತ್ತು ಆಡಳಿತದ ವಿರುದ್ಧದ ಅಸಮಾಧಾನ ರಿಪಬ್ಲಿಕನ್ ಪಕ್ಷಕ್ಕೆ ಹಿನ್ನಡೆ ತಂದಿತ್ತು. ಪಕ್ಷ ಜನಪ್ರತಿನಿಧಿಗಳ ಸಭೆಯಲ್ಲಿ 30 ಸ್ಥಾನಗಳನ್ನು ಮತ್ತು ಸೆನೆಟ್‌ನಲ್ಲಿ ಆರು ಸ್ಥಾನಗಳನ್ನು ಕಳೆದುಕೊಂಡಿತ್ತು.2010ರಲ್ಲಿ ಬರಾಕ್ ಒಬಾಮಾ ಅಧ್ಯಕ್ಷರಾಗಿದ್ದಾಗ ಡೆಮಾಕ್ರಾಟ್‌ಗಳಿಗೆ ಭಾರಿ ಹೊಡೆತ ಬಿದ್ದಿತ್ತು. ಜನಪ್ರತಿನಿಧಿಗಳ ಸಭೆಯಲ್ಲಿ ಬರೋಬ್ಬರಿ 63 ಸ್ಥಾನಗಳನ್ನು ಕಳೆದುಕೊಂಡು ರಿಪಬ್ಲಿಕನ್ ಪಕ್ಷಕ್ಕೆ ಬಹುಮತ ಬಿಟ್ಟುಕೊಟ್ಟಿದ್ದರು.

2018ರಲ್ಲಿ ಟ್ರಂಪ್ ಅವರ ಮೊದಲ ಅಧ್ಯಕ್ಷೀಯ ಅವಧಿಯಲ್ಲೇ ಮಧ್ಯಂತರ ಚುನಾವಣೆ ನಡೆದಿತ್ತು. ಆಗ ರಿಪಬ್ಲಿಕನ್ ಪಕ್ಷ ಜನಪ್ರತಿನಿಧಿಗಳ ಸಭೆಯಲ್ಲಿ 41 ಸ್ಥಾನಗಳನ್ನು ಕಳೆದುಕೊಂಡಿತ್ತು. ಡೆಮಾಕ್ರಾಟ್‌ಗಳು ಬಹುಮತ ಪಡೆದಿದ್ದರು. ಆದರೆ ಸೆನೆಟ್‌ನಲ್ಲಿ ರಿಪಬ್ಲಿಕನ್ನರು ಎರಡು ಸ್ಥಾನಗಳನ್ನು ಹೆಚ್ಚಿಸಿಕೊಂಡಿದ್ದರು.2022ರಲ್ಲಿ ಜೋ ಬೈಡನ್ ಅಧ್ಯಕ್ಷರಾಗಿದ್ದಾಗ ಡೆಮಾಕ್ರಾಟ್‌ಗಳು ಜನಪ್ರತಿನಿಧಿಗಳ ಸಭೆಯಲ್ಲಿ ಒಂಬತ್ತು ಸ್ಥಾನಗಳನ್ನು ಕಳೆದುಕೊಂಡರೂ ಸೆನೆಟ್‌ನಲ್ಲಿ ಒಂದು ಸ್ಥಾನ ಹೆಚ್ಚಿಸಿಕೊಂಡಿದ್ದರು.ಅಂದರೆ ಮಧ್ಯಂತರ ಚುನಾವಣೆಯಲ್ಲಿ ಅಧ್ಯಕ್ಷರ ಪಕ್ಷಕ್ಕೆ ಹಿನ್ನಡೆಯಾಗುವುದು ಸಾಮಾನ್ಯ. ಆದರೆ ಎರಡೂ ಸದನಗಳ ಫಲಿತಾಂಶ ಒಂದೇ ರೀತಿಯಾಗಿರಬೇಕೆಂದಿಲ್ಲ.

ಟ್ರಂಪ್ ವಿರುದ್ಧ ಜನಾಕ್ರೋಶಕ್ಕೆ ಕಾರಣವೇನು?

ಹಾಗಾದರೆ 2026ರ ಚುನಾವಣೆಯಲ್ಲಿ ಟ್ರಂಪ್ ಪಕ್ಷಕ್ಕೆ ಹಿನ್ನಡೆಯಾಗುವ ಸಾಧ್ಯತೆ ಏಕೆ ಹೆಚ್ಚಾಗಿದೆ?ಮುಖ್ಯವಾಗಿ ಜನರ ದೈನಂದಿನ ಬದುಕಿನ ಮೇಲೆ ಪರಿಣಾಮ ಬೀರುತ್ತಿರುವ ಆರ್ಥಿಕ ವಿಚಾರಗಳು ಈ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ಟ್ರಂಪ್ ವಿಧಿಸಿರುವ ಆಮದು ಸುಂಕಗಳು, ವಸ್ತುಗಳ ಬೆಲೆ ಏರಿಕೆ, ಇಂಧನ ವೆಚ್ಚ ಮತ್ತು ಜೀವನ ನಿರ್ವಹಣೆಯ ಖರ್ಚು ಮತದಾರರ ಅಸಮಾಧಾನಕ್ಕೆ ಕಾರಣವಾಗಿವೆ.ಇದರ ಜೊತೆಗೆ ಇರಾನ್‌ನೊಂದಿಗಿನ ದೀರ್ಘಕಾಲದ ಸಂಘರ್ಷವೂ ಟ್ರಂಪ್ ಆಡಳಿತಕ್ಕೆ ಸವಾಲಾಗಿದೆ. ತಮ್ಮ ನೀತಿಗಳನ್ನು ಪ್ರಶ್ನಿಸುವವರ ವಿರುದ್ಧ ಟ್ರಂಪ್ ತೋರುತ್ತಿರುವ ಕಠಿಣ ನಿಲುವು ಮತ್ತು ಪಕ್ಷದ ಅಭ್ಯರ್ಥಿಗಳ ಆಯ್ಕೆಯಲ್ಲಿ ಅವರ ಹಸ್ತಕ್ಷೇಪವೂ ಚರ್ಚೆಯಲ್ಲಿದೆ.

ನವೆಂಬರ್ 2ರಂದು ಪ್ರಕಟವಾದ ರಾಯಿಟರ್ಸ್ ಮತ್ತು ಇಪ್ಸೋಸ್ ಸಮೀಕ್ಷೆಯ ಪ್ರಕಾರ ಟ್ರಂಪ್ ಅವರ ಜನಪ್ರಿಯತೆ ಶೇಕಡಾ 32ರಷ್ಟಿತ್ತು. ಸಂಸತ್ತಿನ ಚುನಾವಣೆಯಲ್ಲಿ ಡೆಮಾಕ್ರಾಟ್‌ಗಳಿಗೆ ಶೇಕಡಾ 46ರಷ್ಟು ಬೆಂಬಲವಿದ್ದರೆ, ರಿಪಬ್ಲಿಕನ್ನರಿಗೆ ಶೇಕಡಾ 38ರಷ್ಟು ಬೆಂಬಲವಿತ್ತು. ಅಂದರೆ ಎಂಟು ಅಂಕಗಳ ಮುನ್ನಡೆಯನ್ನು ಡೆಮಾಕ್ರಾಟ್‌ಗಳು ಹೊಂದಿದ್ದರು. ಆದರೆ ಈ ಸಮೀಕ್ಷೆಯೇ ಅಂತಿಮ ಚುನಾವಣಾ ಫಲಿತಾಂಶವಲ್ಲ.

ಮುಂದೇನು? ಟ್ರಂಪ್‌ಗೆ ಉಳಿದಿರುವ ಸವಾಲುಗಳೇನು?

ಈಗ ಅಮೆರಿಕದ ಮುಂದೆ ಮೂರು ಸಾಧ್ಯತೆಗಳಿವೆ. ಮೊದಲನೆಯದಾಗಿ ರಿಪಬ್ಲಿಕನ್ ಪಕ್ಷ ಎರಡೂ ಸದನಗಳಲ್ಲಿ ಬಹುಮತ ಉಳಿಸಿಕೊಂಡರೆ ಟ್ರಂಪ್ ತಮ್ಮ ಎರಡನೇ ಅವಧಿಯ ಉಳಿದ ಎರಡು ವರ್ಷಗಳನ್ನು ಹೆಚ್ಚು ಸ್ವಾತಂತ್ರ್ಯದಿಂದ ನಡೆಸಬಹುದು.ಎರಡನೆಯದಾಗಿ ಡೆಮಾಕ್ರಾಟ್‌ಗಳು ಜನಪ್ರತಿನಿಧಿಗಳ ಸಭೆಯಲ್ಲಿ ಮಾತ್ರ ಗೆದ್ದರೆ ಟ್ರಂಪ್ ಆಡಳಿತದ ವಿರುದ್ಧ ತನಿಖೆಗಳು ಹೆಚ್ಚಾಗಬಹುದು. ಪ್ರಮುಖ ಮಸೂದೆಗಳನ್ನು ಅಂಗೀಕರಿಸುವುದು ಕಷ್ಟವಾಗಬಹುದು.

ಮೂರನೆಯದಾಗಿ ಎರಡೂ ಸದನಗಳನ್ನು ಡೆಮಾಕ್ರಾಟ್‌ಗಳು ವಶಪಡಿಸಿಕೊಂಡರೆ ಟ್ರಂಪ್ ಆಡಳಿತಕ್ಕೆ ದೊಡ್ಡ ರಾಜಕೀಯ ಹಿನ್ನಡೆಯಾಗಲಿದೆ. ಸರ್ಕಾರದ ನೀತಿಗಳಿಗೆ ತಡೆ, ನೇಮಕಾತಿಗಳಲ್ಲಿ ಅಡೆತಡೆ, ಮಹಾಭಿಯೋಗದ ಪ್ರಯತ್ನಗಳು ಸೇರಿದಂತೆ ಹಲವು ಸವಾಲುಗಳು ಎದುರಾಗಬಹುದು.
ಒಟ್ಟಿನಲ್ಲಿ, ಮಧ್ಯಂತರ ಚುನಾವಣೆ ಟ್ರಂಪ್ ಅವರ ಅಧ್ಯಕ್ಷ ಸ್ಥಾನವನ್ನು ನೇರವಾಗಿ ನಿರ್ಧರಿಸುವುದಿಲ್ಲ. ಆದರೆ ಅವರ ಉಳಿದ ಎರಡು ವರ್ಷಗಳ ಆಡಳಿತ ಹೇಗಿರಲಿದೆ ಎಂಬುದನ್ನು ನಿರ್ಧರಿಸಲಿದೆ.ಒಂದು ಕಡೆ ಅಮೆರಿಕದ ಅಧ್ಯಕ್ಷರಾಗಿ ಟ್ರಂಪ್ ಮುಂದುವರಿದರೂ, ಮತ್ತೊಂದು ಕಡೆ ಅವರ ಪ್ರತಿಯೊಂದು ನಿರ್ಧಾರವನ್ನೂ ಪ್ರಶ್ನಿಸುವ ಸಂಸತ್ತು ನಿರ್ಮಾಣವಾಗಬಹುದು. ಹೀಗಾಗಿ ಈ ಚುನಾವಣೆ ಟ್ರಂಪ್ ಅವರ ರಾಜಕೀಯ ಶಕ್ತಿಗೆ ನಡೆಯುತ್ತಿರುವ ಜನಮತ ಪರೀಕ್ಷೆ ಎಂದೇ ಹೇಳಬಹುದು.