ನವದೆಹಲಿ : ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆ (CGHS) ವ್ಯಾಪ್ತಿಗೆ ಒಳಪಡದ ಪ್ರದೇಶಗಳಲ್ಲಿ ವಾಸಿಸುವ ಅಥವಾ ಸೇವೆ ಸಲ್ಲಿಸುತ್ತಿರುವ ಕೇಂದ್ರ ಸರ್ಕಾರಿ ನೌಕರರಿಗೆ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು ಗುಡ್ ನ್ಯೂಸ್ ನೀಡಿದೆ. ಸಿಜಿಎಚ್ಎಸ್ ಅನ್ವಯ ಇದುವರೆಗೆ ಭೌಗೋಳಿಕ ಮಿತಿಗಳನ್ನು ತೆರವುಗೊಳಿಸಲಾಗಿದ್ದು, ಅಂತಹ ನೌಕರರು ಈಗ ಸಿಜಿಎಚ್ಎಸ್ ಸೌಲಭ್ಯವನ್ನು ಆಯ್ಕೆ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ. ಇದರಿಂದಾಗಿ ಉದ್ಯೋಗಿಗಳು ಈಗ ಕ್ಯಾಶ್ ಲೆಸ್ ಚಿಕಿತ್ಸೆ ಪಡೆಯಲು ಸಾಧ್ಯವಾಗುತ್ತದೆ.
ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಹೊರಡಿಸಿರುವ ನೂತನ ಆದೇಶದ ಪ್ರಕಾರ, ಸಿಜಿಎಚ್ಎಸ್ ಕೇಂದ್ರಗಳಿಂದ 5 ಕಿಲೋ ಮೀಟರ್ ಗಿಂತ ದೂರದಲ್ಲಿರುವ ಅಥವಾ ಸಿಜಿಎಚ್ಎಸ್ ಸೌಲಭ್ಯವಿಲ್ಲದ ನಗರಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ನೌಕರರು ಒಂದು ಬಾರಿಯ ಅವಕಾಶವಾಗಿ ಈ ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಬಹುದು. ಇಲ್ಲಿಯವರೆಗೆ ಇಂತಹ ನೌಕರರು ಕಡ್ಡಾಯವಾಗಿ CS(MA) ನಿಯಮಗಳು 1944ರ ಅಡಿಯಲ್ಲಿ ಬರುತ್ತಿದ್ದರು.
ಹೊಸ ನಿಯಮಗಳ ಪ್ರಮುಖಾಂಶಗಳು
• ನಗದು ರಹಿತ ಚಿಕಿತ್ಸೆ: CS(MA) ನಿಯಮದ ಅಡಿಯಲ್ಲಿ ನೌಕರರು ಆಸ್ಪತ್ರೆಗಳಲ್ಲಿ ಮೊದಲು ಹಣ ಪಾವತಿಸಿ ನಂತರ ಮರುಪಾವತಿ ಪಡೆಯಬೇಕಿತ್ತು. ಆದರೆ CGHS ಆಯ್ಕೆ ಮಾಡಿಕೊಳ್ಳುವುದರಿಂದ ನೋಂದಾಯಿತ ಆಸ್ಪತ್ರೆಗಳಲ್ಲಿ ನಗದು ರಹಿತ (Cashless) ವೈದ್ಯಕೀಯ ಚಿಕಿತ್ಸೆ ಪಡೆಯಬಹುದು.
• ಒಂದು ಬಾರಿಯ ನಿರ್ಧಾರ: ಈ ಆಯ್ಕೆಯು ಅಂತಿಮವಾಗಿದ್ದು, ನೌಕರ ಹಾಗೂ ಅವರ ಸಂಪೂರ್ಣ ಕುಟುಂಬಕ್ಕೆ ಅನ್ವಯಿಸುತ್ತದೆ.
• ಚಂದಾದಾರಿಕೆ: ಸಿಜಿಎಚ್ಎಸ್ ಆಯ್ಕೆ ಮಾಡಿಕೊಳ್ಳುವ ನೌಕರರು ನಿಗದಿತ ಮಾಸಿಕ ವಂತಿಕೆಯನ್ನು ಪಾವತಿಸಬೇಕಾಗುತ್ತದೆ.
• ದ್ವಿಮುಖ ಸೌಲಭ್ಯವಿಲ್ಲ: ನೌಕರರು CS(MA) ಮತ್ತು CGHS ಎರಡೂ ಯೋಜನೆಗಳ ಪ್ರಯೋಜನಗಳನ್ನು ಒಟ್ಟಿಗೆ ಪಡೆಯಲು ಸಾಧ್ಯವಿಲ್ಲ.
• ಪ್ರಯಾಣ ಭತ್ಯೆ ಇಲ್ಲ: ಚಿಕಿತ್ಸೆ ಅಥವಾ ಔಷಧಗಳನ್ನು ಪಡೆಯಲು ಯಾವುದೇ ಪ್ರಯಾಣ ಭತ್ಯೆ ನೀಡುವುದಿಲ್ಲ.
ಇದನ್ನೂ ಓದಿ : ಸಚಿನ್ ದಾಖಲೆ ಹಿಂದಿಕ್ಕಿದ ಜೋ ರೂಟ್ ; 23 ಸಾವಿರ ರನ್ಗಳ ಮೈಲುಗಲ್ಲು.. ದ್ರಾವಿಡ್ ದಾಖಲೆ ಮೇಲೆ ಕಣ್ಣು!
