ಬೆಂಗಳೂರು : ಈಗಾಗಲೇ ಚಿನ್ನದ ಬೆಲೆ ಜಾಸ್ತಿಯಾಗಿದೆ. ದಸರಾ, ದೀಪಾವಳಿ ಸಂದರ್ಭದಲ್ಲಿ ಇನ್ನಷ್ಟು ಜಾಸ್ತಿಯಾಗಲಿದೆ ಎಂದು ವರದಿಗಳು ತಿಳಿಸಿವೆ. ಇದರ ಬೆನ್ನಲ್ಲೇ, ಹಬ್ಬಗಳ ಸಂದರ್ಭದಲ್ಲಿ ಚಿನ್ನಾಭರಣ ಖರೀದಿಸಬೇಕು ಎಂದು ತೀರ್ಮಾನಿಸಿದ ಗ್ರಾಹಕರಿಗೆ ಶಾಕಿಂಗ್ ನ್ಯೂಸ್ ಕಾದಿದೆ. ಹೌದು, ಚಿನ್ನಾಭರಣಗಳ ಮೇಲಿನ ಹಾಲ್ ಮಾರ್ಕಿಂಗ್ ಶುಲ್ಕವನ್ನು ಜಾಸ್ತಿ ಮಾಡಲಾಗಿದೆ. ಇದರಿಂದಾಗಿ ಜನರಿಗೆ ಹೊರೆಯಾಗಲಿದೆ ಎಂದು ಹೇಳಲಾಗುತ್ತಿದೆ.
ಶುಲ್ಕ ಏರಿಕೆ ಎಷ್ಟು?
ಇದುವರೆಗೆ ಪ್ರತಿ ಚಿನ್ನದ ಆಭರಣಕ್ಕೆ ಇದ್ದ 45 ರೂಪಾಯಿ ಹಾಲ್ ಮಾರ್ಕಿಂಗ್ ಶುಲ್ಕವನ್ನು 75 ರೂಪಾಯಿಗೆ ಹೆಚ್ಚಿಸಲಾಗಿದೆ (ಪ್ರತಿ ಆಭರಣದ ಮೇಲೆ ರೂ. 30 ಹೆಚ್ಚಳ). ಈ ಕುರಿತು ಬ್ಯೂರೋ ಆಫ್ ಇಂಡಿಯನ್ ಸ್ಟಾಂಡರ್ಡ್ಸ್ ಸಂಸ್ಥೆಯು (ಬಿಐಎಸ್) ಆದೇಶ ಹೊರಡಿಸಿದೆ. ಬಿಐಎಸ್ (ಹಾಲ್ಮಾರ್ಕಿಂಗ್) ತಿದ್ದುಪಡಿ ನಿಯಮಗಳು-2026 ರ ಅಡಿಯಲ್ಲಿ ಹೊಸ ದರಗಳು ತಕ್ಷಣದಿಂದಲೇ ಜಾರಿಗೆ ಬಂದಿವೆ.
ಮತ್ತೊಂದು ಸಮಾಧಾನಕರ ಸಂಗತಿ ಎಂದರೆ, ಬೆಳ್ಳಿ ಆಭರಣಗಳ ಹಾಲ್ ಮಾರ್ಕಿಂಗ್ ಶುಲ್ಕದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಬೆಳ್ಳಿಯ ಪ್ರತಿ ಆಭರಣಕ್ಕೆ 35 ರೂಪಾಯಿ ಹಾಲ್ ಮಾರ್ಕಿಂಗ್ ಶುಲ್ಕ ಇರಲಿದೆ. ಹಾಗಾಗಿ, ಬೆಳ್ಳಿ ಖರೀದಿಸುವವರಿಗೆ ಯಾವುದೇ ಹೊರೆಯಾಗುವುದಿಲ್ಲ.
ಗ್ರಾಹಕರ ಮೇಲಿನ ಪರಿಣಾಮವೇನು?
ಹಾಲ್ ಮಾರ್ಕಿಂಗ್ ಶುಲ್ಕ ಹೆಚ್ಚಳವಾಗಿದ್ದರೂ, ಪ್ರತಿಯೊಂದು ಚಿನ್ನದ ವಸ್ತುವಿನ ಮೇಲೆ ಗ್ರಾಹಕರು ಕಡ್ಡಾಯವಾಗಿ 30 ರೂಪಾಯಿಯನ್ನು ಹೆಚ್ಚುವರಿ ನೀಡಬೇಕಿಲ್ಲ. ಈ ಶುಲ್ಕವನ್ನು ಆಭರಣ ತಯಾರಕರು ಹಾಲ್ ಮಾರ್ಕಿಂಗ್ ಕೇಂದ್ರಗಳಿಗೆ ಪಾವತಿಸುತ್ತಾರೆ. ವರ್ತಕರು ಈ ಹೆಚ್ಚುವರಿ ವೆಚ್ಚವನ್ನು ತಾವೇ ಭರಿಸಬಹುದು ಅಥವಾ ಆಭರಣಗಳ ಮೇಕಿಂಗ್ ಚಾರ್ಜಸ್ ವೆಚ್ಚದಲ್ಲಿ ಸೇರಿಸಿ ಗ್ರಾಹಕರಿಗೆ ವರ್ಗಾಯಿಸಬಹುದು.
ಇದನ್ನೂ ಓದಿ : 16 ವರ್ಷದ ಬಾಲಕಿ ಮೇಲೆ 4 ಜನರಿಂದ ಗ್ಯಾಂಗ್‌ರೇಪ್, ಕೊಲೆ : ಶವವನ್ನು ಹರಿದು ಮುಕ್ಕಿದ ಬೀದಿ ನಾಯಿಗಳು!
