ಎವರೆಸ್ಟ್ ಹಿಮನದಿ ಕರಗಲು ಮಾನವನ ಮೂತ್ರ ಕಾರಣವೇ? ಬೇಸ್ ಕ್ಯಾಂಪ್‌ನ ಭೀಕರ ವರದಿ ತೆರೆದಿಟ್ಟ ರಹಸ್ಯ!

ಕಠ್ಮಂಡು : ವಿಶ್ವದ ಅತಿ ಎತ್ತರದ ಶಿಖರ ಎವರೆಸ್ಟ್ ತುದಿಯನ್ನು ತಲುಪಲು ಪ್ರತಿವರ್ಷ ಸಾವಿರಾರು ಸಾಹಸಿಗರು ಹಿಮಾಲಯಕ್ಕೆ ಲಗ್ಗೆ ಇಡುತ್ತಾರೆ. ಆದರೆ, ಈ ಮಾನವ ಚಟುವಟಿಕೆಗಳು ಹಿಮಾಲಯದ ಪರಿಸರ ವ್ಯವಸ್ಥೆಯ ಮೇಲೆ ತೀವ್ರತರವಾದ ಪ್ರತಿಕೂಲ ಪರಿಣಾಮ ಬೀರುತ್ತಿದ್ದು, ಎವರೆಸ್ಟ್ ಬೇಸ್ ಕ್ಯಾಂಪ್‌ನಲ್ಲಿ ನೆರೆಯುವ ಪರ್ವತಾರೋಹಿಗಳ ಸಾಲು ಸಾಲು ಹೆಜ್ಜೆಗುರುತುಗಳಿಗಿಂತಲೂ ಗಂಭೀರವಾದ ಸಮಸ್ಯೆಯೊಂದು ಬೆಳಕಿಗೆ ಬಂದಿದೆ. ‘ರೀಜನಲ್ ಎನ್ವಿರಾನ್‌ಮೆಂಟಲ್ ಚೇಂಜ್’ ನಿಯತಕಾಲಿಕೆಯಲ್ಲಿ ಪ್ರಕಟವಾದ ಹೊಸ ಅಧ್ಯಯನದ ಪ್ರಕಾರ, ಎವರೆಸ್ಟ್ ಬೇಸ್ ಕ್ಯಾಂಪ್‌ನಲ್ಲಿ ಮಾನವ ಚಟುವಟಿಕೆಗಳಿಂದ ಉಂಟಾಗುವ ತಾಪಮಾನ ಮತ್ತು ಮಾನವನ ಮೂತ್ರದಿಂದ ಹೊರಹೊಮ್ಮುವ ಶಕ್ತಿಯು ಖುಂಬು ಹಿಮನದಿ (Khumbu Glacier) ವೇಗವಾಗಿ ಕರಗಲು ಕಾರಣವಾಗುತ್ತಿದೆ.

ದಾಖಲೆ ಮಟ್ಟದಲ್ಲಿ ಬಿಸಿಯಾಗುತ್ತಿದೆ ಬೇಸ್ ಕ್ಯಾಂಪ್

ನೇಪಾಳದ ಭೂ ನಿರ್ವಹಣಾ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಸೇರಿದಂತೆ ಅಂತಾರಾಷ್ಟ್ರೀಯ ಸಂಶೋಧಕರ ತಂಡವು 2023ರಲ್ಲಿ ಸಂಗ್ರಹಿಸಿದ ದತ್ತಾಂಶಗಳನ್ನು ಆಧರಿಸಿ ಈ ಅಧ್ಯಯನ ನಡೆಸಿದೆ. ಕಳೆದ 32 ವರ್ಷಗಳ (1991 ರಿಂದ 2023) ಉಪಗ್ರಹ ದತ್ತಾಂಶಗಳನ್ನು ವಿಶ್ಲೇಷಿಸಿದಾಗ, ಎವರೆಸ್ಟ್ ಬೇಸ್ ಕ್ಯಾಂಪ್‌ನ ಮೇಲ್ಮೈ ತಾಪಮಾನವು ಪ್ರತಿ ವರ್ಷ 0.28 ಡಿಗ್ರಿ ಸೆಲ್ಸಿಯಸ್‌ನಷ್ಟು ಏರಿಕೆಯಾಗುತ್ತಿದೆ ಎಂದು ತಿಳಿದುಬಂದಿದೆ. ಇದು ಪಕ್ಕದಲ್ಲೇ ಇರುವ ಖುಂಬು ಹಿಮನದಿಯ ಸಾಮಾನ್ಯ ತಾಪಮಾನ ಏರಿಕೆಯ ದರಕ್ಕಿಂತ ಬರೊಬ್ಬರಿ ದುಪ್ಪಟ್ಟು ವೇಗದಲ್ಲಿದೆ.

2,400 ಟನ್ ಮಂಜುಗಡ್ಡೆ ಕರಗಿಸುವ ಶಕ್ತಿ

ಪರ್ವತಾರೋಹಣ ಋತುವಿನಲ್ಲಿ ಬೇಸ್ ಕ್ಯಾಂಪ್ ಒಂದು ಸಣ್ಣ ತಾತ್ಕಾಲಿಕ ನಗರದಂತೆಯೇ ಬದಲಾಗುತ್ತದೆ. ಇಲ್ಲಿ ಅಡುಗೆ, ಶಾಖ ಹಾಗೂ ವಿದ್ಯುತ್ ಉತ್ಪಾದನೆಗಾಗಿ ಬಳಸಲಾಗುವ ಎಲ್‌ಪಿಜಿ, ಸೀಮೆಎಣ್ಣೆ ಮತ್ತು ಪೆಟ್ರೋಲ್ ಇಂಧನಗಳು ದೊಡ್ಡ ಪ್ರಮಾಣದ ತಾಪಮಾನವನ್ನು ಹೊರಸೂಸುತ್ತವೆ. ಇದರೊಂದಿಗೆ ಸಹಸ್ರಾರು ಜನರ ಮೂತ್ರ ವಿಸರ್ಜನೆಯಿಂದಲೂ ಗಣನೀಯ ಪ್ರಮಾಣದ ತಾಪಮಾನ ಬಿಡುಗಡೆಯಾಗುತ್ತದೆ. 2023ರ ಒಂದೇ ಋತುವಿನಲ್ಲಿ ಈ ಚಟುವಟಿಕೆಗಳಿಂದ ಸುಮಾರು 8,49,174 ಮೆಗಾಜೂಲ್ಸ್‌ನಷ್ಟು ತಾಪಮಾನ ಶಕ್ತಿ ಹೊರಹೊಮ್ಮಿದ್ದು, ಇದು ಅಂದಾಜು 2,492 ಟನ್ ಜಲಾವೃತ ಮಂಜುಗಡ್ಡೆಯನ್ನು ತಕ್ಷಣವೇ ಕರಗಿಸಬಲ್ಲದು ಎನ್ನಲಾಗಿದೆ.

ಕ್ಯಾಂಪ್ ಸ್ಥಳಾಂತರಕ್ಕೆ ವಿಜ್ಞಾನಿಗಳ ಶಿಫಾರಸು

ಜಾಗತಿಕ ಹವಾಮಾನ ವೈಪರೀತ್ಯವು ಇಡೀ ಹಿಮಾಲಯದ ಮೇಲೆಯೇ ದುಷ್ಪರಿಣಾಮ ಬೀರುತ್ತಿರುವುದು ಹೌದಾದರೂ, ಸ್ಥಳೀಯವಾಗಿ ಎವರೆಸ್ಟ್ ಬೇಸ್ ಕ್ಯಾಂಪ್‌ನಲ್ಲಿ ಸಂಗ್ರಹವಾಗುವ ಮಾನವ ಜನ್ಯ ತಾಪಮಾನವು ಪರಿಸ್ಥಿತಿಯನ್ನು ಮತ್ತಷ್ಟು ಸವಾಲಾಗಿಸಿದೆ. ಪ್ರಸ್ತುತ ಬೇಸ್ ಕ್ಯಾಂಪ್ ಅತ್ಯಂತ ಸೂಕ್ಷ್ಮ ಹಿಮನದಿಯ ಮೇಲೆಯೇ ಸ್ಥಾಪಿತವಾಗಿರುವುದರಿಂದ, ಹಿಮನದಿಯ ರಕ್ಷಣೆಗಾಗಿ ಬೇಸ್ ಕ್ಯಾಂಪ್ ಅನ್ನು ನೈಋತ್ಯ ಭಾಗದಲ್ಲಿರುವ ಹೆಚ್ಚು ಸ್ಥಿರವಾದ ನೆಲಕ್ಕೆ ಸ್ಥಳಾಂತರಿಸುವುದು ಸೂಕ್ತ ಎಂದು ಸಂಶೋಧಕರು ಸಲಹೆ ನೀಡಿದ್ದಾರೆ.

ಇದನ್ನೂ ಓದಿ : ಬಾಂಗ್ಲಾ ಕ್ರಿಕೆಟಿಗರಿಗೆ ಬಂಪರ್ ವೇತನ ಹೆಚ್ಚಳ ; BPL ನಡೆಯದಿದ್ದರೂ ಆಟಗಾರರಿಗೆ ಆರ್ಥಿಕ ಭದ್ರತೆ