ಇಸ್ರೋದ 'ನಾಟಿ ಬಾಯ್' ಕಮಾಲ್ ; ಸರಣಿ ಹಿನ್ನಡೆಯ ನಡುವೆ ಭಾರತಕ್ಕೆ ಅಭೂತಪೂರ್ವ ಗೆಲುವು!

ಶ್ರೀಹರಿಕೋಟ : ಇತ್ತೀಚಿನ ಸರಣಿ ಹಿನ್ನಡೆಗಳಿಂದ ಸವಾಲು ಎದುರಿಸುತ್ತಿದ್ದ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಗೆ (ಇಸ್ರೋ) ಶುಕ್ರವಾರ ಮುಂಜಾನೆ ಹೊಸ ಭರವಸೆಯ ಉದಯವಾಗಿದೆ. ಆಂಧ್ರಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಬಾಹ್ಯಾಕಾಶ ಕೇಂದ್ರದಿಂದ ಜಿಎಸ್‌ಎಲ್‌ವಿ-ಎಫ್‌17 (GSLV-F17) ರಾಕೆಟ್ ಯಶಸ್ವಿಯಾಗಿ ಉಡಾವಣೆಯಾಗುವ ಮೂಲಕ ಭಾರತದ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಬರೆಯಲಾಗಿದೆ.

ದೇಶದ ವಿಶ್ವಾಸಾರ್ಹ ‘ಪಿಎಸ್‌ಎಲ್‌ವಿ’ ರಾಕೆಟ್‌ಗಳ ಹಿನ್ನಡೆಯ ನಡುವೆಯೂ, ಇಸ್ರೋದ “ನಾಟಿ ಬಾಯ್” (ತುಂಟ ಹುಡುಗ) ಎಂದೇ ಕರೆಯಲ್ಪಡುವ ಜಿಎಸ್‌ಎಲ್‌ವಿ, ಅತ್ಯಾಧುನಿಕ ಇಒಎಸ್-05 (EOS-05) ಭೂ ವೀಕ್ಷಣಾ ಉಪಗ್ರಹವನ್ನು ಕಕ್ಷೆಗೆ ತಲುಪಿಸಿ ತನ್ನ ಶಕ್ತಿಯನ್ನು ಸಾಬೀತುಪಡಿಸಿದೆ.

ಜಿಎಸ್‌ಎಲ್‌ವಿ ರಾಕೆಟ್ ಅಭಿವೃದ್ಧಿಯ ಹಾದಿ ಸುಲಭದ್ದಾಗಿರಲಿಲ್ಲ. 1990ರ ದಶಕದಲ್ಲಿ ಅಮೆರಿಕದ ತಂತ್ರಜ್ಞಾನ ತಡೆ ಹಾಗೂ ಜಾಗತಿಕ ಒತ್ತಡಗಳಿಂದಾಗಿ ರಷ್ಯಾ ಭಾರತಕ್ಕೆ ಕ್ರಯೋಜೆನಿಕ್ ತಂತ್ರಜ್ಞಾನ ನೀಡಲು ನಿರಾಕರಿಸಿತ್ತು. ಆದರೆ, ಈ ಹಿನ್ನಡೆಯನ್ನೇ ಸವಾಲಾಗಿ ಸ್ವೀಕರಿಸಿದ ಇಸ್ರೋ ವಿಜ್ಞಾನಿಗಳು ಸುದೀರ್ಘ 20 ವರ್ಷಗಳ ಶ್ರಮಿಸಿ ಸ್ವದೇಶಿ ಕ್ರಯೋಜೆನಿಕ್ ಎಂಜಿನ್ ಅಭಿವೃದ್ಧಿಪಡಿಸಿದರು. 19 ಉಡಾವಣೆಗಳಲ್ಲಿ 6 ವೈಫಲ್ಯಗಳನ್ನು ಕಂಡಿದ್ದರಿಂದ ಈ ರಾಕೆಟ್‌ಗೆ “ನಾಟಿ ಬಾಯ್” ಎಂಬ ಹೆಸರು ಬಂದಿತ್ತು. ಆದರೆ, ಇಂದಿನ ಯಶಸ್ಸು ಭಾರತದ ಬಾಹ್ಯಾಕಾಶ ತಂತ್ರಜ್ಞಾನದ ಸ್ವಾವಲಂಬನೆಗೆ ಸಾಕ್ಷಿಯಾಗಿದೆ.

ಇನ್ನು ಆಗಸದಲ್ಲಿ ಭಾರತದ ‘ನಿರಂತರ ಕಣ್ಣು

2,376 ಕೆಜಿ ತೂಕದ ಇಒಎಸ್-05 ಉಪಗ್ರಹವು ಭೂಸ್ಥಿರ ಕಕ್ಷೆಯಿಂದ (Geosynchronous Orbit) ಭಾರತದ ಮೇಲ್ವಿಚಾರಣೆ ನಡೆಸಲಿರುವ ಮೊದಲ ಅತ್ಯಾಧುನಿಕ ಇಮೇಜಿಂಗ್ ಉಪಗ್ರಹವಾಗಿದೆ. ಸಾಮಾನ್ಯ ಉಪಗ್ರಹಗಳು ನಿರ್ದಿಷ್ಟ ಅವಧಿಯಲ್ಲಿ ಮಾತ್ರ ಭೂಮಿಯ ಫೋಟೋಗಳನ್ನು ನೀಡಿದರೆ, ಇಒಎಸ್-05 ಉಪಗ್ರಹವು ಸುಮಾರು 36,000 ಕಿಮೀ ಎತ್ತರದಲ್ಲಿದ್ದುಕೊಂಡು ಭಾರತೀಯ ಉಪಖಂಡ ಹಾಗೂ ಸುತ್ತಮುತ್ತಲಿನ ಸಮುದ್ರ ಪ್ರದೇಶಗಳ ಮೇಲೆ ‘ನಿರಂತರ ಲೈವ್ ವೀಡಿಯೋ’ ಮಾದರಿಯಲ್ಲಿ ಕಣ್ಣಿಡಲಿದೆ. ಇದು ಬಂಗಾಳ ಕೊಲ್ಲಿಯ ಚಂಡಮಾರುತಗಳು, ಪ್ರವಾಹ, ಕಾಡ್ಗಿಚ್ಚು ಮುಂತಾದ ನೈಸರ್ಗಿಕ ವಿಕೋಪಗಳ ಮೇಲ್ವಿಚಾರಣೆಗೆ ಮಾತ್ರವಲ್ಲದೆ, ಗಡಿ ಭದ್ರತೆ ಮತ್ತು ನೌಕಾಪಡೆಯ ವ್ಯೂಹಾತ್ಮಕ ಕಾವಲಿಗೂ ಮೌಲ್ಯಯುತ ಕೊಡುಗೆ ನೀಡಲಿದೆ.

ಮರುಜೀವ ಪಡೆದ 2021ರ ಅಪೂರ್ಣ ಕನಸು

ಆಗಸ್ಟ್ 2021 ರಲ್ಲಿ ಜಿಎಸ್‌ಎಲ್‌ವಿ-ಎಫ್‌10 ಉಡಾವಣೆಯ ವೇಳೆ ಕ್ರಯೋಜೆನಿಕ್ ಹಂತದಲ್ಲಿ ಎದುರಾದ ತಾಂತ್ರಿಕ ದೋಷದಿಂದ ಜಿಐಎಸ್‌ಎಟಿ-1 ಉಪಗ್ರಹ ಕಾರ್ಯಾಚರಣೆ ವಿಫಲವಾಗಿತ್ತು. ಆ ಅಪೂರ್ಣ ಕನಸನ್ನು ಇಂದಿನ ಇಒಎಸ್-05 ಯಶಸ್ವಿಯಾಗಿ ನನಸು ಮಾಡಿದೆ. 2025 ಮತ್ತು 2026ರ ಆರಂಭದಲ್ಲಿ ಪಿಎಸ್‌ಎಲ್‌ವಿ ಸರಣಿ ಎದುರಿಸಿದ ವೈಫಲ್ಯಗಳ ನಂತರ, ಇಸ್ರೋ ವಿಜ್ಞಾನಿಗಳ ಆತ್ಮವಿಶ್ವಾಸವನ್ನು ಈ ಉಡಾವಣೆ ದ್ವಿಗುಣಗೊಳಿಸಿದೆ. ಈ ಯಶಸ್ಸಿನೊಂದಿಗೆ ಇಸ್ರೋ ಮುಂಬರುವ ‘ಗಗನಯಾನ’ ಯೋಜನೆ ಸೇರಿದಂತೆ ಹಲವು ಮಹತ್ವಾಕಾಂಕ್ಷಿ ಕಾರ್ಯಾಚರಣೆಗಳಿಗೆ ಸಂಪೂರ್ಣ ಸಜ್ಜಾದಂತಾಗಿದೆ.

ಇದನ್ನೂ ಓದಿ : ಬ್ಯಾಂಕ್ ಆಫ್ ಇಂಡಿಯಾದಲ್ಲಿ 205 ಹುದ್ದೆಗಳ ನೇಮಕಾತಿ : 1.2 ಲಕ್ಷ ರೂ. ಭರ್ಜರಿ ಸ್ಯಾಲರಿ

ಬಂಧು ಮಿತ್ರರೇ ನಮಸ್ತೇ,

ನಿಖರ, ಪ್ರಖರ, ಸ್ಪಷ್ಟ ಹಾಗೂ ವಸ್ತುನಿಷ್ಠ ಸುದ್ದಿ ನೀಡುವ ಭರವಸೆಯೊಂದಿಗೆ ನಮ್ಮ “ಕರ್ನಾಟಕ ನ್ಯೂಸ್ ಬೀಟ್” ಸುದ್ದಿ ಮಾಧ್ಯಮವನ್ನು ಚಾಲ್ತಿಗೆ ತಂದಿದ್ದೇವೆ. ಜಿಲ್ಲಾ ಸುದ್ದಿ, ಪ್ರಸ್ತುತ ಸುದ್ದಿ, ವಿಶೇಷ ಅಂಕಣ, ಧರ್ಮ, ಸನಾತನ, ರಾಜಕೀಯ, ಸಿನಿಮಾ, ಅಪರಾಧ, ಕ್ರೀಡೆ, ಆರೋಗ್ಯ, ಆಹಾರ, ತಂತ್ರಜ್ಞಾನ, ಕೃಷಿ, ಪರಿಸರ, ಸಾಹಿತ್ಯ, ವಾಣಿಜ್ಯ, ಜ್ಯೋತಿಷ್ಯ, ಪುರಾಣ, ಇತಿಹಾಸ ಸೇರಿದಂತೆ ಈ ಸಮಾಜದ ಪ್ರತಿ ವಿಭಾಗದಲ್ಲೂ ನಾವು ಕಣ್ಣಿಡುತ್ತಾ, ಅಲ್ಲಿನ ಆಗು-ಹೋಗುಗಳನ್ನು ನಿರಂತರವಾಗಿ ನಿಮ್ಮ ಮುಂದೆ ತೆರೆದಿಡುತ್ತಾ ಸಾಗುತ್ತೇವೆ. ಒಟ್ಟಿನಲ್ಲಿ, ಬರವಣಿಗೆಯಲ್ಲೇ ಭಗವಂತನನ್ನ ಕಾಣುತ್ತಿರುವ, ಸದೃಢ ತಂಡದೊಂದಿಗೆ, ಕರ್ನಾಟಕ ನ್ಯೂಸ್ ಬೀಟ್ ಸುದ್ದಿ ಮಾಧ್ಯಮವು, ವಿಶೇಷವಾಗಿ ಸುದ್ದಿ, ವರದಿ, ಅಂಕಣ, ಚಿತ್ರಣಗಳನ್ನು ಹೊತ್ತು ತರುತ್ತಾ, ಸದಾ ನಿಮ್ಮೊಂದಿಗೆ ಬೆಸೆದುಕೊಂಡಿರಲಿದೆ.