‘ಉತ್ತಮ ಬಾಳ ಸಂಗಾತಿ’ ಕುರಿತ ಕಂಗನಾ ಹಳೇ ಹೇಳಿಕೆ ವೈರಲ್ : ವಿವಾದದ ನಡುವೆಯೇ ಸೋನಾಕ್ಷಿ ಲೈಕ್!

ಮುಂಬೈ : ಬಾಲಿವುಡ್ ನಟಿ, ಬಿಜೆಪಿ ಸಂಸದೆ ಕಂಗನಾ ರಣಾವತ್ ಅವರು ಮತ್ತೊಮ್ಮೆ ಸುದ್ದಿಯಲ್ಲಿದ್ದು, ಸೋಮವಾರವಷ್ಟೇ ತಮ್ಮ ಸಿದ್ಧಾಂತದ ಬಗ್ಗೆ ಹಾಗೂ ಬಾಲಿವುಡ್‌ನ ಹಿಂದೂ ನಟಿಯರು ಮತ್ತು ಅಂತರಧರ್ಮೀಯ ವಿವಾಹಗಳ ಕುರಿತು ನೀಡಿರುವ ಹೇಳಿಕೆ ವಿವಾದಕ್ಕೆ ಕಾರಣವಾಗಿದೆ. ಅದರ ಬೆನ್ನಲ್ಲೇ, ಅವರ ಹಳೆಯ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗುತ್ತಿದೆ. ಸುದ್ದಿವಾಹಿನಿಯೊಂದಕ್ಕೆ ನೀಡಿದ್ದ ಸಂದರ್ಶನದ ಈ ವಿಡಿಯೋದಲ್ಲಿ ಕಂಗನಾ, ತಮಗೆ ಎಂತಹ ಬಾಳ ಸಂಗಾತಿ ಬೇಕು ಎಂಬ ಬಗ್ಗೆ ಮಾತನಾಡಿದ್ದು, ಈ ಪೋಸ್ಟ್‌ಗೆ ನಟಿ ಸೋನಾಕ್ಷಿ ಸಿನ್ಹಾ ‘ಲೈಕ್’ ಮಾಡಿರುವುದು ನೆಟ್ಟಿಗರ ಗಮನ ಸೆಳೆದಿದೆ.

ವೈರಲ್ ಆಗಿರುವ ಹಳೆಯ ವಿಡಿಯೋದಲ್ಲಿ ಮಾತನಾಡಿದ್ದ ಕಂಗನಾ, “ನನ್ನ ಸಂಗಾತಿಗೆ 30 ವರ್ಷ ಆಸುಪಾಸಿನ ವಯಸ್ಸಾಗಿರಬೇಕು. ಆತನಿಗೆ ನನ್ನ ಬಗ್ಗೆ ಹೆಚ್ಚು ತಿಳಿದಿಲ್ಲದಿದ್ದರೂ ಪರವಾಗಿಲ್ಲ, ಏಕೆಂದರೆ ಆತನೊಂದಿಗೆ ನಾನು ತೀರಾ ಸಾಮಾನ್ಯ ಜೀವನವನ್ನು ನಡೆಸಲು ಬಯಸುತ್ತೇನೆ. ಜೊತೆಗೆ ನಾನು ಆತನಿಗೆ ಅದ್ಭುತವಾಗಿ ಚಿಕನ್ ಕುರ್ಮಾ, ಚಿಕನ್ ಮುಘಲಾಯಿ ಸೇರಿದಂತೆ ಭಾರತೀಯ ಮತ್ತು ಮೊಘಲ್ ಖಾದ್ಯಗಳನ್ನು ಮಾಡಿಕೊಡುತ್ತೇನೆ” ಎಂದು ಹೇಳಿದ್ದರು. ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ಬಳಕೆದಾರರು, ಕಂಗನಾ ಅವರ ಇತ್ತೀಚಿನ ಹೇಳಿಕೆಗಳಿಗೆ ಇದನ್ನು ಮುಖಾಮುಖಿಯಾಗಿಸಿ ಟ್ರೋಲ್ ಮಾಡಲು ಪ್ರಾರಂಭಿಸಿದ್ದಾರೆ. ಏಕೆಂದರೆ, ಕಂಗನಾ ಇತ್ತೀಚೆಗೆ ಹಾಕಿದ್ದ ಪೋಸ್ಟ್ ನಲ್ಲಿ ಹಿಂದೂ ಮಹಿಳೆಯರು, ಸಂಬಂಧಗಳ ಬಗ್ಗೆ ಪ್ರಸ್ತಾಪಿಸಿ, ವರ್ಷಗಳು ಕಳೆದಂತೆ ತಾವು ಹೇಗೆ ರಾಜಕೀಯವಾಗಿ ಮತ್ತು ಧಾರ್ಮಿಕವಾಗಿ ಬೆಳೆಯುತ್ತಾ ಬಂದೆ ಎಂಬುದನ್ನು ವಿವರಿಸಿದ್ದರು.

ವಿವಾದದ ಕಿಚ್ಚು ಹೊತ್ತಿಸಿದ್ದ ಕಂಗನಾ ಹೇಳಿಕೆ

ಸೋಮವಾರವಷ್ಟೇ ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದ ಕಂಗನಾ ರಣಾವತ್, ಚಿತ್ರರಂಗದಲ್ಲಿರುವ ಕೆಲವು ‘ಹಿಂದೂ ಹೆಣ್ಣುಮಕ್ಕಳು’ ಮುಸ್ಲಿಂ ಪುರುಷರನ್ನು ಮದುವೆಯಾದ ತಕ್ಷಣ ಅಥವಾ ಅವರೊಂದಿಗೆ ಸ್ನೇಹ ಬೆಳೆಸಿದ ತಕ್ಷಣ ಉಗ್ರ ಎಡಪಂಥೀಯರಾಗಿ ಹಾಗೂ ಕಟ್ಟರ್ ವಾದಿಗಳಾಗಿ ಬದಲಾಗುತ್ತಾರೆ ಎಂದು ಆರೋಪಿಸಿದ್ದರು. ಕಂಗನಾ ಯಾರ ಹೆಸರನ್ನೂ ನೇರವಾಗಿ ಉಲ್ಲೇಖಿಸದಿದ್ದರೂ, ಜೂನ್ 2024ರಲ್ಲಿ ನಟ ಜಹೀರ್ ಇಕ್ಬಾಲ್ ಅವರನ್ನು ವಿವಾಹವಾದ ಸೋನಾಕ್ಷಿ ಸಿನ್ಹಾ ಅವರನ್ನು ಗುರಿಯಾಗಿಸಿಕೊಂಡೇ ಈ ಪೋಸ್ಟ್ ಮಾಡಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ನಡೆದಿತ್ತು.

ಸೋನಾಕ್ಷಿ ಸಿನ್ಹಾ ಪ್ರತ್ಯುತ್ತರ

ಕಂಗನಾ ಅವರ ಈ ‘ಇಸ್ಲಾಮಿಸ್ಟ್’ ಹಾಗೂ ‘ಜೇಬುಗಳ್ಳ’ ನಡವಳಿಕೆಯ ಆರೋಪಗಳಿಗೆ ಸೋನಾಕ್ಷಿ ಸಿನ್ಹಾ ಪರೋಕ್ಷವಾಗಿ ತಮ್ಮ ನಡೆಗಳ ಮೂಲಕವೇ ತಿರುಗೇಟು ನೀಡುತ್ತಿದ್ದಾರೆ. ಈ ಹಳೆಯ ವಿಡಿಯೋಗೆ ಲೈಕ್ ಮಾಡುವ ಮೂಲಕ ಸೋನಾಕ್ಷಿ, ಕಂಗನಾ ಅವರ ಇರುಸುಮುರುಸನ್ನು ಬಯಲಿಗೆಳೆಯಲು ಯತ್ನಿಸಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಈ ಹಿಂದೆ ತಮ್ಮ ವಿವಾಹದ ಕುರಿತು ಸ್ಪಷ್ಟನೆ ನೀಡಿದ್ದ ಸೋನಾಕ್ಷಿ, ತಾವಾಗಲಿ ಅಥವಾ ತಮ್ಮ ಪತಿ ಜಹೀರ್ ಆಗಲಿ ಧಾರ್ಮಿಕವಾಗಿ ಮತಾಂತರಗೊಂಡಿಲ್ಲ, ಬದಲಿಗೆ 1954ರ ವಿಶೇಷ ವಿವಾಹ ಕಾಯ್ದೆಯಡಿ ಕಾನೂನಾತ್ಮಕವಾಗಿ ಮದುವೆಯಾಗಿದ್ದೇವೆ ಎಂದು ತಿಳಿಸಿದ್ದರು.

ಇದನ್ನೂ ಓದಿ : ‘ಬಿಗ್‌ಬಾಸ್-13’ ಅಗ್ನಿಪರೀಕ್ಷೆ ಶುರು : ಲಾಲ್‌ಬಾಗ್‌ನಲ್ಲಿ ವಿಶೇಷ ಎಕ್ಸ್‌ಪೀರಿಯನ್ಸ್ ಝೋನ್!