ಟೆಹ್ರಾನ್ : ಅಮೆರಿಕದ ದಾಳಿಯ ನಡುವೆಯೂ ಇರಾನ್ ತನ್ನ ಪರಮಾಣು ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಿಕೊಳ್ಳುವ ಉದ್ದೇಶದಿಂದ ನಟಾಂಜ್ ಬಳಿಯಿರುವ ‘ಪಿಕ್ಆ್ಯಕ್ಸ್’ ಪರ್ವತದ ಅತ್ಯಂತ ಸುರಕ್ಷಿತ ಭೂಗತ ಸಂಕೀರ್ಣಕ್ಕೆ ಸಾವಿರಾರು ಪರಮಾಣು ಸೆಂಟ್ರಿಫ್ಯೂಜ್ಗಳನ್ನು ಸ್ಥಳಾಂತರಿಸಿದೆ ಎಂದು ‘ದಿ ವಾಲ್ ಸ್ಟ್ರೀಟ್ ಜರ್ನಲ್’ ವರದಿ ಮಾಡಿದೆ. ಅಮೆರಿಕ ಮತ್ತು ಇಸ್ರೇಲ್ ಅಧಿಕಾರಿಗಳ ಹೇಳಿಕೆಗಳನ್ನು ಉಲ್ಲೇಖಿಸಿ ಸಿದ್ಧಪಡಿಸಲಾದ ಈ ವರದಿಯು, ಜಾಗತಿಕ ಮಟ್ಟದಲ್ಲಿ ತೀವ್ರ ಕಳವಳಕ್ಕೆ ಕಾರಣವಾಗಿದೆ.
300 ಅಡಿ ಆಳದ ಗಟ್ಟಿಯಾದ ಗ್ರಾನೈಟ್ ಶೀಲ್ಡ್
2025ರ ಜೂನ್ನಲ್ಲಿ ನಡೆದ 12 ದಿನಗಳ ಸಂಘರ್ಷದ ವೇಳೆ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನ ಪ್ರಮುಖ ಪರಮಾಣು ನೆಲೆಗಳ ಮೇಲೆ ದಾಳಿ ನಡೆಸಿದ್ದವು. ಈ ದಾಳಿಯ ಕೆಲವೇ ತಿಂಗಳುಗಳ ನಂತರ ಅಂದರೆ ಕಳೆದ ಶರತ್ಕಾಲದಲ್ಲಿ ಈ ಪ್ರಮುಖ ಉಪಕರಣಗಳನ್ನು ಪಿಕ್ಆ್ಯಕ್ಸ್ ಪರ್ವತಕ್ಕೆ ರವಾನಿಸಲಾಗಿದೆ. ಈ ಭೂಗತ ಸೌಲಭ್ಯವು ಸುಮಾರು 300 ಅಡಿಗೂ ಹೆಚ್ಚು ಆಳವಾದ ಗ್ರಾನೈಟ್ ಕಲ್ಲಿನ ಅಡಿಯಲ್ಲಿದ್ದು, ವೈಮಾನಿಕ ದಾಳಿಗಳಿಂದ ಧ್ವಂಸಗೊಳಿಸುವುದು ಅತ್ಯಂತ ಕಷ್ಟಕರವಾಗಿದೆ. ಉಪಗ್ರಹ ಚಿತ್ರಗಳು ಕಳೆದ 15 ತಿಂಗಳುಗಳಿಂದ ಈ ಪ್ರದೇಶದಲ್ಲಿ ನಿರಂತರ ನಿರ್ಮಾಣ ಮತ್ತು ಟ್ರಕ್ ಚಲನವಲನಗಳನ್ನು ಖಚಿತಪಡಿಸಿವೆ ಎಂದು ಇಸ್ರೇಲಿ ಗುಪ್ತಚರ ಸಂಸ್ಥೆಗಳು ಮಾಹಿತಿ ನೀಡಿವೆ.
ಐಎಇಎ ವೀಕ್ಷಣೆಗೆ ಇರಾನ್ ನಿರಾಕರಣೆ
ಅಂತಾರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆಗೆ (IAEA) ಈ ರಹಸ್ಯ ಸಂಕೀರ್ಣದೊಳಗೆ ಪ್ರವೇಶಿಸಲು ಇರಾನ್ ಅವಕಾಶ ನೀಡಿಲ್ಲ. ಐಎಇಎ ಪ್ರಧಾನ ನಿರ್ದೇಶಕ ರಫೇಲ್ ಗ್ರೋಸಿ ಅವರು ಮಾರ್ಚ್ನಲ್ಲಿ ಮಾತನಾಡಿ, 2021ರಲ್ಲೇ ಇರಾನ್ ಪಿಕ್ಆ್ಯಕ್ಸ್ ಸೌಲಭ್ಯದಲ್ಲಿ ಪರಮಾಣು ಚಟುವಟಿಕೆ ನಡೆಸುವ ಇಚ್ಛೆಯನ್ನು ತಿಳಿಸಿತ್ತು ಎಂದಿದ್ದಾರೆ. ಆದರೆ, ಪ್ರಸ್ತುತ ಅಲ್ಲಿ ನಡೆಯುತ್ತಿರುವ ಚಟುವಟಿಕೆಗಳ ಬಗ್ಗೆ ಯಾವುದೇ ಸ್ಪಷ್ಟ ಮಾಹಿತಿ ಇಲ್ಲದಿರುವುದು ಜಾಗತಿಕ ಮಟ್ಟದ ಉಸ್ತುವಾರಿ ಸಂಸ್ಥೆಗಳಲ್ಲಿ ಆತಂಕ ಮೂಡಿಸಿದೆ.
ಅಮೆರಿಕದಿಂದ ಕಠಿಣ ಎಚ್ಚರಿಕೆ
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ಬೆಳವಣಿಗೆಯನ್ನು ಗಂಭೀರವಾಗಿ ಪರಿಗಣಿಸಿದ್ದು, ಪಿಕ್ಆ್ಯಕ್ಸ್ ಸಂಕೀರ್ಣದ ಮೇಲೆ ಶೀಘ್ರದಲ್ಲೇ ಕಠಿಣ ಸೇನಾ ಕ್ರಮ ಕೈಗೊಳ್ಳುವ ಸುಳಿವು ನೀಡಿದ್ದಾರೆ. ಮಂಗಳವಾರ ಮಾಧ್ಯಮಗಳೊಂದಿಗೆ ಮಾತನಾಡಿದ ಟ್ರಂಪ್, ಸೆಂಟ್ರಿಫ್ಯೂಜ್ಗಳನ್ನು ಇರಿಸಲಾಗಿರುವ ಈ ಜಾಗದ ಮೇಲೆ ಅತ್ಯಂತ ಶೀಘ್ರದಲ್ಲಿ, ಭಾರಿ ಪ್ರಮಾಣದ ದಾಳಿ ನಡೆಸಲಾಗುವುದು ಎಂದು ಎಚ್ಚರಿಸಿದ್ದಾರೆ. ಬೈಡೆನ್ ಆಡಳಿತಾವಧಿಯಲ್ಲಿ ಇರಾನ್ ಉಸ್ತುವಾರಿಯಾಗಿದ್ದ ನೇಟ್ ಸ್ವಾನ್ಸನ್ ಅವರು ಪ್ರತಿಕ್ರಿಯಿಸಿ, ಈ ರಹಸ್ಯ ನೆಲೆಗಳ ಚಟುವಟಿಕೆಯು ‘ರಹಸ್ಯ ಪರಮಾಣು ಅಸ್ತ್ರ ತಂತ್ರಜ್ಞಾನ ಅಭಿವೃದ್ಧಿ’ಗೆ ದಾರಿ ಮಾಡಿಕೊಡಬಹುದು ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
ಇರಾನ್ ತನ್ನ ಪರಮಾಣು ಯೋಜನೆಯು ಕೇವಲ ನಾಗರಿಕ ಬಳಕೆಗೆ ಮಾತ್ರ ಸೀಮಿತ ಎಂದು ಸಮರ್ಥಿಸಿಕೊಳ್ಳುತ್ತಿದ್ದರೂ, ಶಸ್ತ್ರಾಸ್ತ್ರ ದರ್ಜೆಗೆ ಹತ್ತಿರವಿರುವಷ್ಟು ಯುರೇನಿಯಂ ಅನ್ನು ಸಂವರ್ಧಿಸುತ್ತಿರುವುದು ಪಾಶ್ಚಿಮಾತ್ಯ ರಾಷ್ಟ್ರಗಳ ಕಣ್ಣು ಕೆಂಪಗಾಗಿಸಿದೆ.
ಇದನ್ನೂ ಓದಿ : ಹೌತಿಗಳಿಂದ ಎಚ್ಚರಿಕೆ : ಕೆಂಪು ಸಮುದ್ರದಲ್ಲಿ ಭಾರತಕ್ಕೆ ಹೊರಟಿದ್ದ ಸೌದಿ ಕಚ್ಚಾ ತೈಲ ನೌಕೆ ವಾಪಸ್!
