ಸೌದಿ : ಅಮೆರಿಕ-ಇರಾನ್ ಯುದ್ಧ ಮುಂದುವರಿದಿರುವಂತೆಯೇ ಯೆಮೆನ್ನ ಹೌತಿ ಬಂಡುಕೋರರು ಸೌದಿ ಅರೇಬಿಯಾ ವಿರುದ್ಧ ನೌಕಾ ದಿಗ್ಬಂಧನ (Naval Blockade) ಘೋಷಿಸಿದ್ದು, ಇದರ ಬೆನ್ನಲ್ಲೇ, ಸೌದಿಯಿಂದ ಭಾರತಕ್ಕೆ ಸುಮಾರು 7 ಲಕ್ಷ ಬ್ಯಾರೆಲ್ ಕಚ್ಚಾ ತೈಲವನ್ನು ಹೊತ್ತು ತರುತ್ತಿದ್ದ ‘ರೋಡೋಸ್’ (Rodos) ಎಂಬ ಬೃಹತ್ ಹಡಗು ಕೆಂಪು ಸಮುದ್ರದಲ್ಲಿ ತನ್ನ ಹಾದಿಯನ್ನು ಬದಲಾಯಿಸಿ ಹಿಂತಿರುಗಿದೆ. ಬಾಬ್ ಅಲ್-ಮಂದೇಬ್ ಜಲಸಂಧಿಯ ಮೂಲಕ ಭಾರತದತ್ತ ಬರಬೇಕಿದ್ದ ಈ ಹಡಗು, ಹೌತಿಗಳ ದಾಳಿಯ ಭೀತಿಯಿಂದಾಗಿ ಈಗ ಸುಯೆಜ್ ಕಾಲುವೆಯತ್ತ ಮುಖ ಮಾಡಿದೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಸೌದಿ ಬಂದರುಗಳಿಗೆ ಹೌತಿಗಳ ಬೆದರಿಕೆ
ಸೌದಿ ಅರೇಬಿಯಾದ ಬಂದರುಗಳಲ್ಲಿ ಸರಕುಗಳನ್ನು ಹೇರುವುದು ಅಥವಾ ಇಳಿಸುವುದನ್ನು ತಕ್ಷಣವೇ ನಿಲ್ಲಿಸಬೇಕು ಮತ್ತು ಈ ಆದೇಶವನ್ನು ಉಲ್ಲಂಘಿಸುವ ಹಡಗುಗಳನ್ನು ಎಲ್ಲಿ ಬೇಕಾದರೂ ಗುರಿಯಾಗಿಸಿ ದಾಳಿ ನಡೆಸಲಾಗುವುದು ಎಂದು ಹೌತಿ ಬಂಡುಕೋರರು ನೌಕಾ ಸಂಸ್ಥೆಗಳಿಗೆ ಇಮೇಲ್ ಮೂಲಕ ಎಚ್ಚರಿಕೆ ನೀಡಿದ್ದಾರೆ. ಈ ಬೆದರಿಕೆಯ ಬೆನ್ನಲ್ಲೇ ಭಾರತಕ್ಕೆ ಹೊರಟಿದ್ದ ‘ರೋಡೋಸ್’ ಮಾತ್ರವಲ್ಲದೆ, ಚೀನಾಕ್ಕೆ 20 ಲಕ್ಷ ಬ್ಯಾರಲ್ ತೈಲ ಹೊತ್ತೊಯ್ಯುತ್ತಿದ್ದ ‘ಕ್ಸಿನ್ ಲಾಂಗ್ ಯಾಂಗ್’ ಹಡಗು ಹಾಗೂ ಸೌದಿಯ ಯಾನ್ಬು ಬಂದರಿಗೆ ತೆರಳಬೇಕಿದ್ದ ‘ನ್ಯೂ ಪ್ರೈಮ್’ ಹಡಗುಗಳು ಕೂಡ ತಮ್ಮ ಪ್ರಯಾಣವನ್ನು ರದ್ದುಗೊಳಿಸಿ ಹಿಂತಿರುಗಿವೆ.
ಭಾರತದ ತೈಲ ಪೂರೈಕೆಯ ಮೇಲೆ ಪರಿಣಾಮ
ಅಮೆರಿಕ ಹಾಗೂ ಇರಾನ್ ನಡುವಿನ ಸಂಘರ್ಷದಿಂದಾಗಿ ಹೊರ್ಮುಜ್ ಜಲಸಂಧಿ ಮುಚ್ಚಲ್ಪಟ್ಟ ನಂತರ, ಸೌದಿ ಅರೇಬಿಯಾವು ತೈಲ ರಫ್ತು ಮಾಡಲು ಕೆಂಪು ಸಮುದ್ರದ ದಂಡೆಯಲ್ಲಿರುವ ‘ಯಾನ್ಬು’ (Yanbu) ಬಂದರನ್ನು ನೆಚ್ಚಿಕೊಂಡಿತ್ತು. ಈಗ ಈ ಮಾರ್ಗದಲ್ಲೂ ಹೌತಿಗಳ ಉಪಟಳ ಹೆಚ್ಚಾಗಿರುವುದರಿಂದ ಭಾರತಕ್ಕೆ ತಕ್ಷಣದ ತೈಲ ಅಭಾವ ಎದುರಾಗದಿದ್ದರೂ, ಸರಕು ಸಾಗಣೆಯ ವೆಚ್ಚ ಮತ್ತು ವಿಮೆ ವೆಚ್ಚಗಳು ಗಣನೀಯವಾಗಿ ಏರಿಕೆಯಾಗಲಿವೆ. ಸುಯೆಜ್ ಕಾಲುವೆಯ ಮೂಲಕ ಆಫ್ರಿಕಾ ಖಂಡವನ್ನು ಸುತ್ತುವರೆದು ಆಫ್ರಿಕಾದ ದಕ್ಷಿಣದ ತುದಿಯ (Cape of Good Hope) ಮುಖಾಂತರ ಭಾರತವನ್ನು ತಲುಪಲು ತಿಂಗಳುಗಳೇ ಬೇಕಾಗಬಹುದು.
ಆತಂಕದಲ್ಲಿ ಜಾಗತಿಕ ಹಡಗು ಸಾರಿಗೆ ಕ್ಷೇತ್ರ
ಹೌತಿಗಳ ಈ ಹಠಾತ್ ಎಚ್ಚರಿಕೆಯಿಂದಾಗಿ ಸಮುದ್ರ ಮಾರ್ಗದ ಭದ್ರತಾ ಪಡೆಗಳು ಮತ್ತು ಹಡಗು ಚಾಲನಾ ಸಂಸ್ಥೆಗಳು ತೀವ್ರ ಆತಂಕಕ್ಕೆ ಒಳಗಾಗಿವೆ. ಪ್ರಸ್ತುತ ಯಾನ್ಬು ಬಂದರು ಕಾರ್ಯಾಚರಣೆಯಲ್ಲಿದ್ದರೂ, ಸಮುದ್ರದಲ್ಲಿ ಯಾನ ಮಾಡುವ ಹಡಗುಗಳಿಗೆ ‘ಯುದ್ಧದ ಅಪಾಯಕಾರಿ ವಿಮೆ’ (War Risk Insurance) ವೆಚ್ಚ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಸೌದಿ ಬಂದರುಗಳಿಗೆ ತೆರಳುವ ಹಡಗುಗಳು ಕೆಂಪು ಸಮುದ್ರದ ಸಾರಿಗೆಯನ್ನು ಮರುಪರಿಶೀಲಿಸುವಂತೆ ಬ್ರಿಟನ್ನ ಸಾಗರ ಭದ್ರತಾ ಸಂಸ್ಥೆ ‘ಅಂಬ್ರೆ’ ಸಲಹೆ ನೀಡಿದೆ.
ಇದನ್ನೂ ಓದಿ : ರಾಮಮಂದಿರಕ್ಕೆ CEO ಆಯ್ಕೆ ಪ್ರಕ್ರಿಯೆ ಚುರುಕು : 5,500 ಅರ್ಜಿಗಳ ಪರಿಶೀಲನೆ.. ಕೇಂದ್ರ-RSS ಹಸಿರು ನಿಶಾನೆ ಕಡ್ಡಾಯ!
