ನವದೆಹಲಿ : ಟೆಕ್ ದಿಗ್ಗಜ ಗೂಗಲ್ ಸಂಸ್ಥೆಯು ಇ-ತ್ಯಾಜ್ಯದ (E-Waste) ಪ್ರಮಾಣವನ್ನು ತಗ್ಗಿಸಲು ಮತ್ತು ಪರಿಸರ ಮಾಲಿನ್ಯ ತಡೆಗಟ್ಟಲು ಅತ್ಯಂತ ಕ್ರಾಂತಿಕಾರಿ ಸಂಶೋಧನಾ ಯೋಜನೆಯೊಂದನ್ನು ಕೈಗೆತ್ತಿಕೊಂಡಿದೆ. ಇನ್ಮುಂದೆ ಗ್ರಾಹಕರು ಬಳಸಿ ಬಿಸಾಡುವ ಹಳೆಯ ಸ್ಮಾರ್ಟ್ಫೋನ್ಗಳನ್ನು ಗೂಗಲ್ ತನ್ನ ಕ್ಲೌಡ್ ಕಂಪ್ಯೂಟಿಂಗ್ ಮತ್ತು ಡೇಟಾ ಸೆಂಟರ್ಗಳ ನಿರ್ವಹಣೆಗೆ ಬಳಸಿಕೊಳ್ಳಲು ಸಜ್ಜಾಗಿದೆ. ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ ಸಂಶೋಧಕರೊಂದಿಗೆ ಕೈಜೋಡಿಸಿರುವ ಗೂಗಲ್, ಹಳೆಯ ಪಿಕ್ಸೆಲ್ ಸ್ಮಾರ್ಟ್ಫೋನ್ಗಳನ್ನು ಕಡಿಮೆ ವೆಚ್ಚದ ಕಂಪ್ಯೂಟಿಂಗ್ ಕ್ಲಸ್ಟರ್ಗಳಾಗಿ ಪರಿವರ್ತಿಸುವ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಅನಾವರಣಗೊಳಿಸಿದೆ.
ಹೇಗೆ ಕೆಲಸ ಮಾಡುತ್ತದೆ ಈ ತಂತ್ರಜ್ಞಾನ?
ಈ ಹೊಸ ಪರಿಕಲ್ಪನೆಯನ್ನು “ಫೋನ್ ಕ್ಲಸ್ಟರ್ ಕಂಪ್ಯೂಟಿಂಗ್” (Phone Cluster Computing) ಎಂದು ಕರೆಯಲಾಗಿದೆ. ಇದರಂತೆ ಹಳೆಯ ಸ್ಮಾರ್ಟ್ಫೋನ್ಗಳಲ್ಲಿರುವ ಡಿಸ್ಪ್ಲೇ, ಬ್ಯಾಟರಿ, ಕ್ಯಾಮೆರಾ ಮತ್ತು ಹೊರಗಿನ ಕವಚದಂತಹ ಅನಗತ್ಯ ಭಾಗಗಳನ್ನು ತೆಗೆದುಹಾಕಲಾಗುತ್ತದೆ. ಕೇವಲ ಪ್ರೊಸೆಸರ್, ಮೆಮೊರಿ (RAM) ಮತ್ತು ಸ್ಟೋರೇಜ್ ಒಳಗೊಂಡಿರುವ ಮುಖ್ಯ ಮದರ್ಬೋರ್ಡ್ಗಳನ್ನು ಮಾತ್ರ ಉಳಿಸಿಕೊಳ್ಳಲಾಗುತ್ತದೆ. ಇಂತಹ ಸಾವಿರಾರು ಮದರ್ಬೋರ್ಡ್ಗಳನ್ನು ಪರಸ್ಪರ ಲಿಂಕ್ ಮಾಡಿ, ಅವುಗಳಿಗೆ ಲಿನಕ್ಸ್ (Linux) ಆಧಾರಿತ ಆಪರೇಟಿಂಗ್ ಸಿಸ್ಟಮ್ ಅಳವಡಿಸಲಾಗುತ್ತದೆ. ಆಧುನಿಕ ಕ್ಲೌಡ್ ತಂತ್ರಜ್ಞಾನದಲ್ಲಿ ಬಳಸಲಾಗುವ ‘ಕುಬರ್ನೆಟೀಸ್’ (Kubernetes) ಪ್ಲಾಟ್ಫಾರ್ಮ್ ಮೂಲಕ ಇವುಗಳನ್ನು ನಿಯಂತ್ರಿಸಿ, ಮಿನಿ ಡೇಟಾ ಸೆಂಟರ್ ಮಾದರಿಯಲ್ಲಿ ಕೆಲಸ ಮಾಡುವಂತೆ ಮಾಡಲಾಗುತ್ತದೆ.
ಗೂಗಲ್ ಆಸಕ್ತಿಗೆ ಅಸಲಿ ಕಾರಣವೇನು?
ಸಾಮಾನ್ಯವಾಗಿ ಗ್ರಾಹಕರು ಪ್ರತಿ ನಾಲ್ಕು ವರ್ಷಗಳಿಗೊಮ್ಮೆ ತಮ್ಮ ಸ್ಮಾರ್ಟ್ಫೋನ್ಗಳನ್ನು ಬದಲಾಯಿಸುತ್ತಾರೆ. ಆದರೆ, ಆ ಫೋನ್ಗಳಲ್ಲಿರುವ ಪ್ರೊಸೆಸರ್ ಮತ್ತು ಸ್ಟೋರೇಜ್ ಚಿಪ್ಗಳು ಅತ್ಯಂತ ಶಕ್ತಿಶಾಲಿಯಾಗಿಯೇ ಇರುತ್ತವೆ. ಗೂಗಲ್ ಪ್ರಕಾರ, ಕೇವಲ 25ರಿಂದ 50 ಸ್ಮಾರ್ಟ್ಫೋನ್ಗಳ ಮದರ್ಬೋರ್ಡ್ಗಳನ್ನು ಒಟ್ಟುಗೂಡಿಸಿದರೆ, ಅದು ಇಂದಿನ ಆಧುನಿಕ ಸರ್ವರ್ಗೆ ಸಮಾನವಾದ ಕಂಪ್ಯೂಟಿಂಗ್ ಸಾಮರ್ಥ್ಯವನ್ನು ನೀಡಬಲ್ಲದು. ಹೊಸ ಸರ್ವರ್ಗಳನ್ನು ತಯಾರಿಸುವಾಗ ಉಂಟಾಗುವ ಇಂಗಾಲದ ಹೊರಸೂಸುವಿಕೆಯನ್ನು ತಡೆಯಲು ಮತ್ತು ಪರಿಸರಕ್ಕೆ ಮಾರಕವಾಗಿರುವ ಇ-ತ್ಯಾಜ್ಯವನ್ನು ಮರುಬಳಕೆ ಮಾಡಲು ಗೂಗಲ್ಗೆ ಈ ಐಡಿಯಾ ಅತ್ಯುತ್ತಮ ಪರ್ಯಾಯವಾಗಿ ಕಂಡುಬಂದಿದೆ. ಗೂಗಲ್ ಡೀಪ್ಮೈಂಡ್ ಮುಖ್ಯ ವಿಜ್ಞಾನಿ ಜೆಫ್ ಡೀನ್ ಕೂಡ ಈ ಸಂಶೋಧನೆಯನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು ಹರ್ಷ ವ್ಯಕ್ತಪಡಿಸಿದ್ದಾರೆ.
ಎನ್ವಿಡಿಯಾ (Nvidia) ಚಿಪ್ಗಳಿಗೆ ಪರ್ಯಾಯವಲ್ಲ
ಈ ಹಳೆಯ ಸ್ಮಾರ್ಟ್ಫೋನ್ಗಳ ಕ್ಲಸ್ಟರ್ಗಳನ್ನು ಗೂಗಲ್ನ ‘ಜೆಮಿನಿ’ಯಂತಹ ಅತ್ಯಾಧುನಿಕ ತಂತ್ರಜ್ಞಾನದ ಬೃಹತ್ ತರಬೇತಿಗಾಗಿ ಅಥವಾ ಎನ್ವಿಡಿಯಾದಂತಹ ಸೂಪರ್ ಪ್ರೊಸೆಸರ್ಗಳ ಬದಲಿಯಾಗಿ ಬಳಸುತ್ತಿಲ್ಲ ಎಂಬುದನ್ನು ಕಂಪನಿ ಸ್ಪಷ್ಟಪಡಿಸಿದೆ. ಈ ಮಿನಿ ಡೇಟಾ ಸೆಂಟರ್ಗಳನ್ನು ವಿಶ್ವವಿದ್ಯಾಲಯಗಳ ಜುಪಿಟರ್ ನೋಟ್ಬುಕ್ ಪ್ಲಾಟ್ಫಾರ್ಮ್ಗಳು, ವೆಬ್ ಸೇವೆಗಳು, ಶೈಕ್ಷಣಿಕ ಸಂಶೋಧನೆಗಳು ಮತ್ತು ದಿನನಿತ್ಯದ ಸಣ್ಣ ಪ್ರಮಾಣದ ಕ್ಲೌಡ್ ಕಂಪ್ಯೂಟಿಂಗ್ ಕೆಲಸಗಳಿಗಾಗಿ ಮಾತ್ರ ಬಳಸಲಾಗುತ್ತದೆ. ಯೂನಿವರ್ಸಿಟಿ ಆಫ್ ಕ್ಯಾಲಿಫೋರ್ನಿಯಾ ಸದ್ಯ 2,000 ಹಳೆಯ ಪಿಕ್ಸೆಲ್ ಫೋನ್ಗಳನ್ನು ಬಳಸಿ ಇಂತಹದೊಂದು ಬೃಹತ್ ಕ್ಲಸ್ಟರ್ ಸಿದ್ಧಪಡಿಸುತ್ತಿದ್ದು, ಕಂಪ್ಯೂಟರ್ ಸೈನ್ಸ್ ವಿದ್ಯಾರ್ಥಿಗಳ ಪ್ರಾಯೋಗಿಕ ತರಗತಿಗಳಿಗೆ ಇದು ಬಳಕೆಯಾಗಲಿದೆ. ತಂತ್ರಜ್ಞಾನದ ಮರುಬಳಕೆಯಲ್ಲಿ ಈ ಹೊಸ ಆವಿಷ್ಕಾರವು ಜಾಗತಿಕವಾಗಿ ಇ-ತ್ಯಾಜ್ಯ ನಿರ್ವಹಣೆಗೆ ಹೊಸ ದಾರಿದೀಪವಾಗುವ ನಿರೀಕ್ಷೆಯಿದೆ.
ಇದನ್ನೂ ಓದಿ : IPL ಮಹಾ ವಿಸ್ತರಣೆಗೆ ಸಿದ್ಧತೆ : 2028ರಿಂದ 94 ಪಂದ್ಯಗಳ ಆಯೋಜನೆ.. ದ್ವಿಪಕ್ಷೀಯ ಸರಣಿಗಳಿಗೆ ಕತ್ತರಿ ಬೀಳುವ ಸಾಧ್ಯತೆ!
