ಬೆಂಗಳೂರು : ಕೇಂದ್ರ ಸರ್ಕಾರಿ ನೌಕರರ ವೇತನ, ಭತ್ಯೆಗಳನ್ನು ಹೆಚ್ಚಿಸುವ ದಿಸೆಯಲ್ಲಿ ಕೇಂದ್ರ ಸರ್ಕಾರವು ಈಗಾಗಲೇ 8ನೇ ವೇತನ ಆಯೋಗವನ್ನು ರಚಿಸಿದೆ. ಆದರೆ, ವೇತನ ಆಯೋಗವು ಶಿಫಾರಸುಗಳನ್ನು ಸಲ್ಲಿಸಲು ವಿಳಂಬವಾಗುತ್ತಿದ್ದು, 2027ರ ಅಂತ್ಯದಲ್ಲಿ ಆಯೋಗದ ಶಿಫಾರಸುಗಳು ಜಾರಿಗೆ ಬರಲಿವೆ ಎಂದು ಹೇಳಲಾಗುತ್ತಿದೆ. ಹಾಗಾಗಿ, ಸದ್ಯದ ಮಟ್ಟಿಗೆ ಸರ್ಕಾರಿ ನೌಕರರ ಹೆಚ್ಚಳವಾಗುವುದಿಲ್ಲ ಎಂದೇ ವರದಿಯಾಗಿದೆ. ಆದರೆ, ವೇತನ ಆಯೋಗ ಜಾರಿಯಾದರೆ ನೌಕರರಿಗೆ ಎಷ್ಟು ಅರಿಯರ್ಸ್ ಸಿಗಲಿದೆ ಎಂಬ ಲೆಕ್ಕಾಚಾರ ಮಾತ್ರ ಜೋರಾಗಿ ನಡೆಯುತ್ತಿದೆ.
ಹೌದು, 7ನೇ ವೇತನ ಆಯೋಗದ ಅವಧಿಯು 2025ರ ಡಿಸೆಂಬರ್ 31ಕ್ಕೆ ಮುಕ್ತಾಯವಾಗಿದೆ. ಕೇಂದ್ರ ಸರ್ಕಾರಿ ನೌಕರರಿಗೆ 2026ರ ಜನವರಿ 1ರಿಂದಲೇ 8ನೇ ವೇತನ ಆಯೋಗ ಅನ್ವಯವಾಗಲಿದ್ದು, ಅವರಿಗೆ ಅರಿಯರ್ಸ್ ನೀಡಲಾಗುತ್ತದೆ. 2027ರ ಕೊನೆಯಲ್ಲಿ ಆಯೋಗದ ಶಿಫಾರಸುಗಳು ಜಾರಿಗೆ ಬಂದರೆ 2 ವರ್ಷದ ಅರಿಯರ್ಸ್ ಹಾಗೂ 2027ರ ಮಧ್ಯಭಾಗದಲ್ಲಿ ಜಾರಿಯಾದರೆ 18 ತಿಂಗಳ ಅರಿಯರ್ಸ್ ನೀಡಲಾಗುತ್ತದೆ. ಆಗ ನೌಕರರಿಗೆ ಲಕ್ಷಾಂತರ ರೂಪಾಯಿ ಅರಿಯರ್ಸ್ ಲಭಿಸಲಿದೆ.
8ನೇ ವೇತನ ಆಯೋಗದ ಅನ್ವಯ ನೌಕರರಿಗೆ 3.83ರ ಫಿಟ್ ಮೆಂಟ್ ಆಧಾರದ ಮೇಲೆ ಸಂಬಳ ಹೆಚ್ಚಿಸಲಾಗುತ್ತದೆ ಎಂದು ವರದಿಯಾಗಿದೆ. ಇದರ ಅನ್ವಯ, ನೌಕರರಿಗೆ ಈಗ 18 ಸಾವಿರ ರೂಪಾಯಿ ಬೇಸಿಕ್ ಸಂಬಳ ಇದ್ದರೆ, 8ನೇ ವೇತನ ಆಯೋಗದ ಜಾರಿ ಬಳಿಕ ಅದು 69 ಸಾವಿರ ರೂಪಾಯಿ ಆಗಲಿದೆ. ಅಲ್ಲಿಗೆ, ಕೇಂದ್ರ ನೌಕರರ ಸಂಬಳದಲ್ಲಿ 51 ಸಾವಿರ ರೂಪಾಯಿ ಜಾಸ್ತಿಯಾಗಲಿದೆ.
ತಿಂಗಳಿಗೆ 51 ಸಾವಿರ ರೂಪಾಯಿ ಅರಿಯರ್ಸ್ ಎಂದರೂ, 2 ವರ್ಷದ ಅರಿಯರ್ಸ್ 12.24 ಲಕ್ಷ ರೂಪಾಯಿ ಹೆಚ್ಚುವರಿಯಾಗಿ ನೀಡಲಾಗುತ್ತದೆ. ಇನ್ನು, 18 ತಿಂಗಳ ಅರಿಯರ್ಸ್ ನೀಡಿದರೆ 9.18 ಲಕ್ಷ ರೂಪಾಯಿ ಒಮ್ಮೆಯೇ ನೀಡಲಾಗುತ್ತದೆ. ಇದರಿಂದಾಗಿ ನೌಕರರು ಎಷ್ಟು ತಿಂಗಳ ಅರಿಯರ್ಸ್ ಲಭಿಸುತ್ತದೆ ಎಂಬ ಕುತೂಹಲದಲ್ಲಿದ್ದಾರೆ. 8ನೇ ವೇತನ ಆಯೋಗವು ಶಿಫಾರಸುಗಳನ್ನು ಸಿದ್ಧಪಡಿಸಲು ಈಗಾಗಲೇ ನೌಕರರ ಒಕ್ಕೂಟಗಳೊಂದಿಗೆ ಸಭೆಗಳನ್ನು ನಡೆಸುತ್ತಿದೆ.
ಇದನ್ನೂ ಓದಿ : ಬಿಹಾರದಲ್ಲಿ ಪೊಲೀಸ್ ಹುದ್ದೆ ಆಕಾಂಕ್ಷಿಗಳಿಂದ ರೈಲು ರೋಕೋ : ಕಲ್ಲು ತೂರಾಟ, ಲಾಠಿಚಾರ್ಜ್
