ಇಂದಿನಿಂದ ಹೊಸ ಸೋಲಾರ್ ನಿಯಮ ಜಾರಿ : ಗ್ರಾಹಕರು, ಸಣ್ಣ ಉದ್ಯಮಿಗಳಿಗೆ ದರ ಏರಿಕೆ ಬಿಸಿ!

ನವದೆಹಲಿ : ಚೀನಾ ಮೇಲಿನ ಅವಲಂಬನೆಯನ್ನು ತಗ್ಗಿಸಿ, ದೇಶೀಯ ಉತ್ಪಾದನೆಗೆ ಉತ್ತೇಜನ ನೀಡುವ ಉದ್ದೇಶದಿಂದ ಕೇಂದ್ರ ಸರ್ಕಾರವು ಭಾರತದ ಸೌರಶಕ್ತಿ ವಲಯದಲ್ಲಿ ಇಂದಿನಿಂದ (ಜೂನ್ 1) ಅತ್ಯಂತ ಪ್ರಮುಖ ಬದಲಾವಣೆಯೊಂದನ್ನು ಜಾರಿಗೆ ತಂದಿದೆ. ಅದರಂತೆ ಸರ್ಕಾರವು ಸೌರ ನಿಯಮಗಳನ್ನು ಮತ್ತಷ್ಟು ಕಠಿಣಗೊಳಿಸಿದೆ.

ಸರ್ಕಾರದ ಈ ನಿರ್ಧಾರದಿಂದಾಗಿ ಇನ್ನು ಮುಂದೆ ನೆಟ್-ಮೀಟರಿಂಗ್ ಮತ್ತು ಓಪನ್-ಆಕ್ಸೆಸ್ ವ್ಯವಸ್ಥೆಯಡಿ ಬರುವ ಸೌರ ವ್ಯವಸ್ಥೆಗಳಲ್ಲಿ ಕಡ್ಡಾಯವಾಗಿ ಭಾರತದಲ್ಲೇ ತಯಾರಾದ ಸೋಲಾರ್ ಸೆಲ್‌ಗಳನ್ನು (ಸೌರ ಕೋಶಗಳನ್ನು) ಬಳಸಬೇಕಾಗುತ್ತದೆ. ಆದರೆ, ಸರ್ಕಾರದ ಈ ನಿರ್ಧಾರವು ಸೌರಶಕ್ತಿ ಉದ್ಯಮಿಗಳು ಹಾಗೂ ಗ್ರಾಹಕರಲ್ಲಿ ಮಿಶ್ರ ಪ್ರತಿಕ್ರಿಯೆಗೆ ಕಾರಣವಾಗಿದ್ದು, ಕೆಲವರು ಇದರ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಏನಿದು ಹೊಸ ನಿಯಮ?

ಇಲ್ಲಿಯವರೆಗೆ ಭಾರತದಲ್ಲಿ ಸೌರ ಫಲಕಗಳನ್ನು (ಸೋಲಾರ್ ಮಾಡ್ಯೂಲ್) ಜೋಡಿಸಲು ಮಾತ್ರ ದೇಶೀಯ ಉತ್ಪನ್ನಗಳನ್ನು ಬಳಸಲಾಗುತ್ತಿತ್ತು. ಆದರೆ, ಇಂದಿನಿಂದ ಜಾರಿಗೆ ಬಂದಿರುವ ನಿಯಮದ ಪ್ರಕಾರ, ಆ ಫಲಕಗಳ ಒಳಗಿನ ಪ್ರಮುಖ ಬಿಡಿಭಾಗವಾದ ‘ಸೋಲಾರ್ ಸೆಲ್’ ಕೂಡ ಕಡ್ಡಾಯವಾಗಿ ಸರ್ಕಾರ ಅನುಮೋದಿಸಿದ ಭಾರತೀಯ ಕಂಪನಿಗಳದ್ದೇ (ALMM ಪಟ್ಟಿ-II ರ ಪ್ರಕಾರ) ಆಗಿರಬೇಕು. ಪ್ರಧಾನಮಂತ್ರಿ ಸೂರ್ಯ ಘರ್ ಮುಫ್ತ್ ಬಿಜ್ಲಿ ಯೋಜನೆ ಸೇರಿದಂತೆ ಮನೆಗಳ ಮೇಲ್ಛಾವಣಿ (ರೂಫ್‌ಟಾಪ್) ಸೋಲಾರ್ ಯೋಜನೆಗಳು ಹಾಗೂ ವಾಣಿಜ್ಯ ಬಳಕೆಯ ಓಪನ್-ಆಕ್ಸೆಸ್ ಯೋಜನೆಗಳಿಗೆ ಈ ಹೊಸ ನಿಯಮ ಅನ್ವಯವಾಗಲಿದೆ. ಈ ನಿಯಮ ಜಾರಿಗೆ ಮತ್ತಷ್ಟು ಕಾಲಾವಕಾಶ ನೀಡಬೇಕೆಂಬ ಉದ್ಯಮಿಗಳ ಬೇಡಿಕೆಯನ್ನು ಸರ್ಕಾರ ಸ್ಪಷ್ಟವಾಗಿ ತಿರಸ್ಕರಿಸಿದೆ.

ಗ್ರಾಹಕರ ಜೇಬಿಗೆ ಕತ್ತರಿ

ಈ ಹೊಸ ನಿಯಮದ ನೇರ ಪರಿಣಾಮ ಗ್ರಾಹಕರ ಜೇಬಿನ ಮೇಲೆ ಬೀರಲಿದೆ. ಚೀನಾದಿಂದ ಆಮದು ಮಾಡಿಕೊಳ್ಳುವ ಸೋಲಾರ್ ಸೆಲ್‌ಗಳಿಗೆ ಹೋಲಿಸಿದರೆ ಭಾರತದಲ್ಲಿ ತಯಾರಾಗುವ ಸೆಲ್‌ಗಳ ಬೆಲೆ ಗಣನೀಯವಾಗಿ ಹೆಚ್ಚಿದೆ. ಮಾರುಕಟ್ಟೆಯ ಅಂದಾಜಿನ ಪ್ರಕಾರ, ಪ್ರತಿ ಕಿಲೋವ್ಯಾಟ್ (kW) ಸೋಲಾರ್ ಅಳವಡಿಕೆಗೆ ಸುಮಾರು 3,000 ರೂ.ಗಳಷ್ಟು ವೆಚ್ಚ ಹೆಚ್ಚಾಗಬಹುದು.

ಉದಾಹರಣೆಗೆ, ಸಾಮಾನ್ಯ ಮನೆಯೊಂದಕ್ಕೆ 5 ಕಿಲೋವ್ಯಾಟ್ ಸಾಮರ್ಥ್ಯದ ರೂಫ್‌ಟಾಪ್ ಸಿಸ್ಟಮ್ ಅಳವಡಿಸಬೇಕಾದರೆ, ಗ್ರಾಹಕರು ಈಗ ಹೆಚ್ಚುವರಿಯಾಗಿ ಸರಿಸುಮಾರು 15,000 ರೂ.ಗಳನ್ನು ಪಾವತಿಸಬೇಕಾಗುತ್ತದೆ. ಪಿಎಂ ಸೂರ್ಯ ಘರ್ ಯೋಜನೆ ಅಡಿ ಸಿಗುವ ಸರ್ಕಾರಿ ಸಬ್ಸಿಡಿ ಮುಂದುವರಿಯಲಿದೆಯಾದರೂ, ನಿಯಮಗಳ ಪಾಲನೆ ಮತ್ತು ದಾಖಲೆಗಳ ಪರಿಶೀಲನೆ ಇನ್ನು ಮುಂದೆ ಮತ್ತಷ್ಟು ಕಠಿಣವಾಗಲಿದೆ.

ಬೇಡಿಕೆ ಮತ್ತು ಪೂರೈಕೆ ನಡುವೆ ಭಾರಿ ಕಂದಕ

ಈ ಹೊಸ ನಿಯಮವು ದೇಶದ ಸಣ್ಣ ಸೌರ ಫಲಕ ತಯಾರಕರನ್ನು ತೀವ್ರ ಆತಂಕಕ್ಕೆ ತಳ್ಳಿದೆ. ಸದ್ಯ ಭಾರತದಲ್ಲಿ ವಾರ್ಷಿಕವಾಗಿ ಸುಮಾರು 50 ಗಿಗಾವ್ಯಾಟ್ (GW) ಸೋಲಾರ್ ಸೆಲ್‌ಗಳ ಬೇಡಿಕೆಯಿದೆ. ಆದರೆ ಭಾರತದ ಸದ್ಯದ ದೇಶೀಯ ಉತ್ಪಾದನಾ ಸಾಮರ್ಥ್ಯ ಕೇವಲ 25 ರಿಂದ 30 ಗಿಗಾವ್ಯಾಟ್‌ಗಳಷ್ಟೇ ಆಗಿದೆ. ಅಂದರೆ ಬೇಡಿಕೆಯ ಅರ್ಧದಷ್ಟು ಮಾತ್ರ ಭಾರತದಲ್ಲಿ ಉತ್ಪತ್ತಿಯಾಗುತ್ತಿದ್ದು, ಇನ್ನುಳಿದ 90 ಪ್ರತಿಶತಕ್ಕೂ ಹೆಚ್ಚಿನ ಭಾಗಕ್ಕೆ ಭಾರತ ಚೀನಾವನ್ನೇ ನೆಚ್ಚಿಕೊಂಡಿತ್ತು. ಈಗ ದಿಢೀರನೆ ಆಮದಿಗೆ ಬ್ರೇಕ್ ಬಿದ್ದಿರುವುದರಿಂದ ಮಾರುಕಟ್ಟೆಯಲ್ಲಿ ತೀವ್ರ ಅಭಾವ ಸೃಷ್ಟಿಯಾಗುವ ಭೀತಿ ಎದುರಾಗಿದೆ.

ಸಣ್ಣ ಉದ್ದಿಮೆದಾರರ ಅಳಿವು-ಉಳಿವಿನ ಹೋರಾಟ

ಸ್ವಂತವಾಗಿ ಸೋಲಾರ್ ಸೆಲ್ ಉತ್ಪಾದಿಸದೆ, ಕೇವಲ ಮಾಡ್ಯೂಲ್ (ಫಲಕ) ಜೋಡಣೆ ಮಾಡುವ 125ಕ್ಕೂ ಹೆಚ್ಚು ಸಣ್ಣ ಪ್ರಮಾಣದ ಉದ್ದಿಮೆಗಳು ಈಗ ಬಿಕ್ಕಟ್ಟಿಗೆ ಸಿಲುಕಿವೆ. ಅವರು ಈಗ ದೇಶದ ದೊಡ್ಡ ಸಮಗ್ರ ಕಂಪನಿಗಳಿಂದಲೇ ದುಬಾರಿ ಬೆಲೆಗೆ ಸೆಲ್‌ಗಳನ್ನು ಖರೀದಿಸಬೇಕಾದ ಅನಿವಾರ್ಯತೆ ಎದುರಾಗಿದೆ. ಪ್ರಸ್ತುತ ದೇಶೀಯ ಸೆಲ್ ತಯಾರಕರು ಸೀಮಿತ ಪೂರೈಕೆಯ ಕಾರಣದಿಂದಾಗಿ ಶೇ.20ರಿಂದ 30ರಷ್ಟು ಲಾಭಾಂಶವನ್ನೂ ಗಳಿಸುತ್ತಿದ್ದರು. ಇಂತಹ ಪರಿಸ್ಥಿತಿಯಲ್ಲಿ ಸಣ್ಣ ಕಂಪನಿಗಳ ಉತ್ಪಾದನಾ ಸಾಮರ್ಥ್ಯವು ಶೇ. 30-40 ಕ್ಕೆ ಕುಸಿದಿದ್ದು, ಮಾರುಕಟ್ಟೆಯಲ್ಲಿ ದೊಡ್ಡ ಕಂಪನಿಗಳ ಏಕಸ್ವಾಮ್ಯ ಸ್ಥಾಪನೆಯಾಗುವ ಹಾಗೂ ಸಣ್ಣ ಉದ್ದಿಮೆಗಳು ಮುಚ್ಚಿಹೋಗುವ ಆತಂಕ ಎದುರಾಗಿದೆ.

ಸರ್ಕಾರದ ಕ್ರಮಕ್ಕೆ ಸಮರ್ಥನೆ

ಮತ್ತೊಂದೆಡೆ, ಸರ್ಕಾರದ ಈ ಹೆಜ್ಜೆಯನ್ನು ಪ್ರಮುಖ ಮತ್ತು ಪ್ರಭಾವಿ ಸೌರಶಕ್ತಿ ಉತ್ಪಾದಕರು ಮುಕ್ತವಾಗಿ ಸ್ವಾಗತಿಸಿದ್ದಾರೆ. ಆಗಸ್ಟ್ 31, 2025ರ ಮೊದಲು ಬಿಡ್ ಮಾಡಲಾದ ದೊಡ್ಡ ಪ್ರಮಾಣದ ಯೋಜನೆಗಳಿಗೆ ಈ ನಿಯಮದಿಂದ ವಿನಾಯಿತಿ ನೀಡಿರುವುದರಿಂದ ಸದ್ಯಕ್ಕೆ ಮಾರುಕಟ್ಟೆಯಲ್ಲಿ ತೀವ್ರ ಹಾಹಾಕಾರವೇನೂ ಸೃಷ್ಟಿಯಾಗುವುದಿಲ್ಲ ಎಂಬುದು ಇವರ ವಾದವಾಗಿದೆ. ಭಾರತೀಯ ಸೌರಶಕ್ತಿ ವಲಯದಲ್ಲಿ ಕೋಟ್ಯಂತರ ರೂಪಾಯಿ ಹೂಡಿಕೆ ಮಾಡಲು ಇಂತಹ ಕಠಿಣ ನೀತಿಗಳು ಅತ್ಯಗತ್ಯವಾಗಿದ್ದು, ಸ್ವಾವಲಂಬನೆಯ ಹಾದಿಯಲ್ಲಿ ಎದುರಾಗುವ ಇಂತಹ ತಾತ್ಕಾಲಿಕ ಹಿನ್ನಡೆಗಳು ಅನಿವಾರ್ಯ ಎನ್ನುತ್ತಾರೆ ದೊಡ್ಡ ದೊಡ್ಡ ಉದ್ಯಮಿಗಳು. ಒಟ್ಟಾರೆಯಾಗಿ, ಚೀನಾದ ಮೇಲಿನ ಅವಲಂಬನೆ ತಗ್ಗಿಸಿ ದೇಶವನ್ನು ಸೌರಶಕ್ತಿ ವಲಯದಲ್ಲಿ ಸ್ವಾವಲಂಬಿಯನ್ನಾಗಿ ಮಾಡುವ ಸರ್ಕಾರದ ಈ ಮಹತ್ವಾಕಾಂಕ್ಷಿ ಹೆಜ್ಜೆಯು, ಗ್ರಾಹಕರಿಗೆ ಹಾಗೂ ಸಣ್ಣ ಉದ್ಯಮಿಗಳಿಗೆ ದರ ಏರಿಕೆಯ ಬಿಸಿ ಮುಟ್ಟಿಸಿರುವುದಂತೂ ಸತ್ಯ.

ಇದನ್ನೂ ಓದಿ : ಮೊಬೈಲ್‌ನಲ್ಲಿ CBSE ಉತ್ತರಪತ್ರಿಕೆ ಸ್ಕ್ಯಾನ್ : ಕೇಂದ್ರದ ವಿರುದ್ಧ ರಾಹುಲ್ ಗಾಂಧಿ ಆಕ್ರೋಶ!