ಚಂಡಿಗಢ : ಐಪಿಎಲ್ 2026ರ ಎಲಿಮಿನೇಟರ್ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ಕೇವಲ ತಮ್ಮ ಅದ್ಭುತ ಬ್ಯಾಟಿಂಗ್ ಮೂಲಕ ಮಾತ್ರವಲ್ಲದೆ, ತಮ್ಮ ಸಂಸ್ಕಾರದ ಮೂಲಕವೂ ಎಲ್ಲರ ಗಮನ ಸೆಳೆದಿದ್ದಾರೆ.
ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ನಿರ್ಣಾಯಕ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶಿಸಿದ ಈ ಯುವ ಪ್ರತಿಭೆ, ಪಂದ್ಯಕ್ಕೂ ಮುನ್ನ ಭಾರತೀಯ ಕ್ರಿಕೆಟ್ ದಿಗ್ಗಜರ ಆಶೀರ್ವಾದ ಪಡೆಯುವ ಮೂಲಕ ನೆಟ್ಟಿಗರ ಮೆಚ್ಚುಗೆಗೆ ಹಾಗೂ ಪ್ರೇಕ್ಷಕರ ಚಪ್ಪಾಳೆಗೆ ಪಾತ್ರರಾಗಿದ್ದಾರೆ.
ಪಂದ್ಯಕ್ಕೂ ಮುನ್ನ ನಡೆದ ಮೋಜಿನ ಹಾಗೂ ಭಾವುಕ ಕ್ಷಣ
ಪಂದ್ಯದ ಆರಂಭಕ್ಕೂ ಮುನ್ನ ಮೈದಾನದಲ್ಲಿ ಅಭ್ಯಾಸ ನಡೆಸುತ್ತಿದ್ದ ವೈಭವ್ ಸೂರ್ಯವಂಶಿ, ನೇರವಾಗಿ ಬ್ರಾಡ್ಕಾಸ್ಟಿಂಗ್ ವಿಭಾಗದತ್ತ ಧಾವಿಸಿದರು. ಅಲ್ಲಿ ಪಂದ್ಯ ಪೂರ್ವ ವಿಶ್ಲೇಷಣೆ ನಡೆಸುತ್ತಿದ್ದ ಭಾರತದ ದಿಗ್ಗಜ ಕ್ರಿಕೆಟಿಗ ಸುನಿಲ್ ಗವಾಸ್ಕರ್ ಹಾಗೂ ಟೀಮ್ ಇಂಡಿಯಾದ ಮಾಜಿ ಕೋಚ್ ಸಂಜಯ್ ಬಾಂಗರ್ ಅವರ ಪಾದ ಮುಟ್ಟಿ ನಮಸ್ಕರಿಸಿದರು.
ಯುವ ಆಟಗಾರನ ಈ ಗೌರವಯುತ ನಡೆಯಿಂದ ದಿಗ್ಗಜರು ಅಚ್ಚರಿಗೊಳಗಾದರು. ಇದಾದ ಬಳಿಕ ವೈಭವ್, ಅಲ್ಲೇ ಇದ್ದ ಖ್ಯಾತ ಟಿವಿ ನಿರೂಪಕ ಜತಿನ್ ಸಪ್ರು ಅವರತ್ತ ತಿರುಗಿದರು. ಆತ ತನಗೂ ನಮಸ್ಕರಿಸಲು ಬರುತ್ತಿದ್ದಾನೆ ಎಂದು ಭಾವಿಸಿದ ಸಪ್ರು, ತಕ್ಷಣವೇ ಹಿಂದೆ ಸರಿದು ಜಿಗಿದು ಪೇಚಿಗೆ ಸಿಲುಕಿದ ಪ್ರಸಂಗ ನೆರೆದಿದ್ದವರಲ್ಲಿ ನಗೆಯುಕ್ಕಿಸಿತು. ಆತಂಕ ಹಾಗೂ ತೀವ್ರ ಒತ್ತಡದಿಂದ ಕೂಡಿದ್ದ ನಾಕೌಟ್ ಪಂದ್ಯದ ಸಂಜೆಯಲ್ಲಿ ಈ ಸಾಂಪ್ರದಾಯಿಕ ಹಾಗೂ ಹಾಸ್ಯಮಯ ಘಟನೆ ಲಘು ವಾತಾವರಣವನ್ನು ನಿರ್ಮಿಸಿತು.
ಮೈದಾನದಲ್ಲಿ ಶುರುವಾಯ್ತು 15ರ ಯುವಕನ ಆರ್ಭಟ
ಹಿರಿಯರಿಗೆ ಗೌರವ ಸಲ್ಲಿಸಿದ ನಂತರ ಬ್ಯಾಟ್ ಹಿಡಿದು ಮೈದಾನಕ್ಕಿಳಿದ ವೈಭವ್ ಸೂರ್ಯವಂಶಿ, ಹೈದರಾಬಾದ್ ಬೌಲರ್ ಗಳ ಬೆವರಿಳಿಸಿದರು. ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ವಿನಾಶಕಾರಿ ಬ್ಯಾಟಿಂಗ್ ಪ್ರದರ್ಶನಗಳಲ್ಲಿ ಒಂದನ್ನು ನೀಡಿದ ಅವರು, ಕೇವಲ 29 ಎಸೆತಗಳಲ್ಲಿ 97 ರನ್ ಸಿಡಿಸಿ ಮಿಂಚಿದರು. ತಮ್ಮ ಅರ್ಧಶತಕವನ್ನು ಕೇವಲ 16 ಎಸೆತಗಳಲ್ಲಿ ಪೂರೈಸಿದ ವೈಭವ್, ಕೇವಲ 3 ರನ್ ಗಳ ಅಂತರದಿಂದ ಐಪಿಎಲ್ ಇತಿಹಾಸದ ಅತಿ ವೇಗದ ಶತಕ ಬಾರಿಸುವ ಐತಿಹಾಸಿಕ ಅವಕಾಶವನ್ನು ಕೈಚೆಲ್ಲಿದರು. ಎಂಟನೇ ಓವರ್ ನಲ್ಲಿ ಚೆಂಡನ್ನು ಮೇಲಕ್ಕೆ ಹೊಡೆದು ಔಟಾಗುವ ಮುನ್ನ, ರಾಜಸ್ಥಾನ್ ರಾಯಲ್ಸ್ ಮೊತ್ತವನ್ನು 125ಕ್ಕೆ ಕೊಂಡೊಯ್ದಿದ್ದರು. ಇವರ ಈ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ತಂಡವು ನಿಗದಿತ ಓವರ್ ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 243 ರನ್ ಗಳ ಬೃಹತ್ ಮೊತ್ತ ಕಲೆಹಾಕಿತು.
ದಾಖಲೆಗಳ ಧೂಳಿಪಟ
ತಮ್ಮ ಈ ಐತಿಹಾಸಿಕ ಇನಿಂಗ್ಸ್ ನಲ್ಲಿ ವೈಭವ್ ಬರೋಬ್ಬರಿ 12 ಬೃಹತ್ ಸಿಕ್ಸರ್ ಗಳನ್ನು ಸಿಡಿಸಿದರು. ಇದು ಐಪಿಎಲ್ ಪಂದ್ಯವೊಂದರಲ್ಲಿ ಭಾರತೀಯ ಬ್ಯಾಟರ್ ಒಬ್ಬ ಸಿಡಿಸಿದ ಅತಿ ಹೆಚ್ಚು ಸಿಕ್ಸರ್ ಗಳ ದಾಖಲೆಯಾಗಿದೆ. ಇದರೊಂದಿಗೆ ಒಂದೇ ಐಪಿಎಲ್ ಆವೃತ್ತಿಯಲ್ಲಿ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದವರ ಪಟ್ಟಿಯಲ್ಲಿ 2012ರಲ್ಲಿ ಕ್ರಿಸ್ ಗೇಲ್ ನಿರ್ಮಿಸಿದ್ದ ದಾಖಲೆಯನ್ನು ಮುರಿದರು. ಇದಲ್ಲದೆ, ಪವರ್ ಪ್ಲೇ ಓವರ್ ಗಳಲ್ಲಿ ಈ ಆವೃತ್ತಿಯಲ್ಲಿ ಒಟ್ಟು 490 ರನ್ ಕಲೆಹಾಕುವ ಮೂಲಕ 2016ರಲ್ಲಿ ಡೇವಿಡ್ ವಾರ್ನರ್ (467 ರನ್) ಬರೆದಿದ್ದ ದಾಖಲೆಯನ್ನೂ ಈ 15ರ ಪೋರ ಅಳಿಸಿಹಾಕಿದ್ದಾನೆ.
ಸಚಿನ್ ತೆಂಡೂಲ್ಕರ್ ಅವರಿಂದ ಭರಪೂರ ಪ್ರಶಂಸೆ
ವೈಭವ್ ಅವರ ಈ ಅಸಾಮಾನ್ಯ ಹಾಗೂ ಭಯಮುಕ್ತ ಆಟಕ್ಕೆ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಕೂಡ ಫಿದಾ ಆಗಿದ್ದಾರೆ. ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಯುವ ಆಟಗಾರನ ಬಗ್ಗೆ ಅಪಾರ ಮೆಚ್ಚುಗೆ ವ್ಯಕ್ತಪಡಿಸಿರುವ ಸಚಿನ್, ವೈಭವ್ ಸೂರ್ಯವಂಶಿ ಅವರ ಬ್ಯಾಟ್ ಬೀಸುವ ಶೈಲಿ ಅತ್ಯದ್ಭುತವಾಗಿದೆ ಎಂದು ಬಣ್ಣಿಸಿದ್ದಾರೆ.
ಕಾಲಿನತ್ತ ಬರುವ ಎಸೆತಗಳನ್ನು ಆಡಲು ಅವರು ತಮ್ಮ ಮುಂಭಾಗದ ಪಾದವನ್ನು ಸರಿಸುವ ರೀತಿ ಹಾಗೂ ಚೆಂಡನ್ನು ಬಲವಾಗಿ ದಂಡಿಸಲು ಮಾಡಿಕೊಳ್ಳುವ ಜಾಗ ನಿಜಕ್ಕೂ ಅಚ್ಚರಿ ಮೂಡಿಸುತ್ತದೆ. ಅವರ ಈ ಸ್ವಾತಂತ್ರ್ಯವೇ ಅವರಿಗೆ ಇಂತಹ ಆಟವಾಡಲು ನೆರವಾಗಿದೆ, ಈ ಇನಿಂಗ್ಸ್ ಅದ್ಭುತಕ್ಕಿಂತ ಕಡಿಮೆಯಿಲ್ಲ ಎಂದು ಕ್ರಿಕೆಟ್ ದಿಗ್ಗಜ ಕೊಂಡಾಡಿದ್ದಾರೆ. ಆಧುನಿಕ ಕ್ರಿಕೆಟ್ ನ ಶಕ್ತಿಶಾಲಿ ಬ್ಯಾಟಿಂಗ್ ಹಾಗೂ ಭಾರತೀಯ ಪರಂಪರೆಯ ಮೌಲ್ಯಗಳೆರಡರ ಅಪರೂಪದ ಸಮ್ಮಿಲನವಾಗಿ ವೈಭವ್ ಸೂರ್ಯವಂಶಿ ಭಾರತೀಯ ಕ್ರಿಕೆಟ್ ಜಗತ್ತಿನ ಹೊಸ ಸೆನ್ಸೇಷನ್ ಆಗಿ ಹೊರಹೊಮ್ಮಿದ್ದಾರೆ ಎಂದರೆ ಅತಿಶಯೋಕ್ತಿಯಲ್ಲ.
ಇದನ್ನೂ ಓದಿ : ಪಾಂಡ್ಯ ಹೈಡ್ರಾಮಾ : ಮುಂಬೈ ಹೀನಾಯ ಸೋಲಿನ ಬೆನ್ನಲ್ಲೇ ಇನ್ಸ್ಟಾ ಖಾತೆ ಡಿಲೀಟ್!
