ಮಲ್ಲನ್ಪುರ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಯಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಹೊಸ ಇತಿಹಾಸ ಬರೆದಿದ್ದಾರೆ. ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ಎಲಿಮಿನೇಟರ್ ಪಂದ್ಯದಲ್ಲಿ ಕಣಕ್ಕಿಳಿದ ಈ ಯುವ ಆರಂಭಿಕ ಆಟಗಾರ, ಯೂನಿವರ್ಸ್ ಬಾಸ್ ಕ್ರಿಸ್ ಗೇಲ್ ಅವರ ಬಹುಕಾಲದ ಸಿಕ್ಸರ್ ದಾಖಲೆಯನ್ನು ಧೂಳಿಪಟ ಮಾಡಿದ್ದಾರೆ.
ಗೇಲ್ ದಾಖಲೆ ಮುರಿದ 15ರ ಪೋರ
2012ರ ಐಪಿಎಲ್ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪರ ಅಬ್ಬರಿಸಿದ್ದ ವೆಸ್ಟ್ ಇಂಡೀಸ್ ದೈತ್ಯ ಕ್ರಿಸ್ ಗೇಲ್, ಒಂದೇ ಆವೃತ್ತಿಯಲ್ಲಿ ಬರೋಬ್ಬರಿ 59 ಸಿಕ್ಸರ್ ಸಿಡಿಸಿ ಅತಿ ದೊಡ್ಡ ದಾಖಲೆ ಬರೆದಿದ್ದರು. ಇದೀಗ 14 ವರ್ಷಗಳ ನಂತರ, ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ತಮ್ಮ 61ನೇ ಸಿಕ್ಸರ್ ಸಿಡಿಸುವ ಮೂಲಕ ವೈಭವ್ ಸೂರ್ಯವಂಶಿ ಆ ದಾಖಲೆಯನ್ನು ಅಳಿಸಿಹಾಕಿದ್ದಾರೆ. ಈ ಪಂದ್ಯಕ್ಕೂ ಮುನ್ನವೇ ದಾಖಲೆಯ ಸನಿಹದಲ್ಲಿದ್ದ ವೈಭವ್, ಅದ್ಭುತ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಐಪಿಎಲ್ ಇತಿಹಾಸದಲ್ಲಿ ಒಂದೇ ಆವೃತ್ತಿಯಲ್ಲಿ ಅತಿ ಹೆಚ್ಚು ಸಿಕ್ಸರ್ ಬಾರಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ದಾಖಲೆ ನಿರ್ಮಾಣವಾಗಿದ್ದು ಹೇಗೆ?
ಸನ್ ರೈಸರ್ಸ್ ಬೌಲರ್ ಸಾಕಿಬ್ ಹುಸೇನ್ ಎಸೆದ ಇನ್ನಿಂಗ್ಸ್ನ 4ನೇ ಓವರ್ನಲ್ಲಿ ಈ ಐತಿಹಾಸಿಕ ಸಾಧನೆ ಮೂಡಿಬಂತು. ಸಾಕಿಬ್ ಅವರ ಸ್ಲೋವರ್ ಎಸೆತವನ್ನು ಎಕ್ಸ್ಟ್ರಾ ಕವರ್ ನತ್ತ ದಂಡಿಸುವ ಮೂಲಕ ವೈಭವ್ ಮೊದಲು ಕ್ರಿಸ್ ಗೇಲ್ ಅವರ 59 ಸಿಕ್ಸರ್ ಗಳ ದಾಖಲೆಯನ್ನು ಸರಿಗಟ್ಟಿದರು. ಬಳಿಕ ಫುಲ್ಲರ್ ಎಸೆತವನ್ನು ಲಾಂಗ್ ಆಫ್ ನಲ್ಲಿ ಸಿಕ್ಸರ್ಗಟ್ಟಿದರು. ಇದಾದ ಬೆನ್ನಲ್ಲೇ ಶಾರ್ಟ್ ಎಸೆತವನ್ನು ಬ್ಯಾಕ್ವರ್ಡ್ ಸ್ಕ್ವೇರ್ ಕಡೆಗೆ ಪುಲ್ ಮಾಡಿ ಸಿಕ್ಸರ್ ಸಿಡಿಸುವ ಮೂಲಕ ಗೇಲ್ ದಾಖಲೆಯನ್ನು ಮೀರಿಸಿ ಹೊಸ ಇತಿಹಾಸ ಸೃಷ್ಟಿಸಿದರು. ಕೇವಲ ಮೂರು ಎಸೆತಗಳ ಅಂತರದಲ್ಲಿ ಈ ಮಹತ್ವದ ಮೈಲಿಗಲ್ಲು ತಲುಪಿದ್ದು ವಿಶೇಷ.
16 ಎಸೆತಗಳಲ್ಲೇ ಅರ್ಧಶತಕ
ತಮ್ಮ ಐತಿಹಾಸಿಕ ದಾಖಲೆ ನಿರ್ಮಿಸಿದ ಅದೇ ಓವರ್ ನ ಮೂರನೇ ಸಿಕ್ಸರ್ ನೊಂದಿಗೆ ವೈಭವ್ ಕೇವಲ 16 ಎಸೆತಗಳಲ್ಲಿ ತಮ್ಮ ಸ್ಫೋಟಕ ಅರ್ಧಶತಕವನ್ನು ಪೂರೈಸಿದರು. ಹೈ-ಪ್ರೆಶರ್ ಎಲಿಮಿನೇಟರ್ ಪಂದ್ಯದಲ್ಲಿ ವೈಭವ್ ಅವರ ಈ ಆರ್ಭಟದಿಂದಾಗಿ ರಾಜಸ್ಥಾನ್ ರಾಯಲ್ಸ್ ಕೇವಲ 4 ಓವರ್ಗಳಲ್ಲಿ ಯಾವುದೇ ವಿಕೆಟ್ ನಷ್ಟವಿಲ್ಲದೆ 63 ರನ್ ಗಳಿಸಿತ್ತು.
ಐಪಿಎಲ್ ಆವೃತ್ತಿಯೊಂದರಲ್ಲಿ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ಆಟಗಾರರು:
- ವೈಭವ್ ಸೂರ್ಯವಂಶಿ (2026): 61* ಸಿಕ್ಸರ್
- ಕ್ರಿಸ್ ಗೇಲ್ (2012): 59 ಸಿಕ್ಸರ್
- ಆಂಡ್ರೆ ರಸೆಲ್ (2019): 52 ಸಿಕ್ಸರ್
- ಕ್ರಿಸ್ ಗೇಲ್ (2013): 51 ಸಿಕ್ಸರ್
- ಜೋಸ್ ಬಟ್ಲರ್ (2022): 45 ಸಿಕ್ಸರ್
ಪ್ಯಾಟ್ ಕಮಿನ್ಸ್ ತಂತ್ರವೂ ವಿಫಲ
ಹೈದರಾಬಾದ್ ನಾಯಕ ಪ್ಯಾಟ್ ಕಮಿನ್ಸ್ ಈ ಯುವ ಆಟಗಾರನನ್ನು ಕಟ್ಟಿಹಾಕಲು ಆರಂಭದಲ್ಲೇ ಯಾರ್ಕರ್ ಎಸೆತಗಳನ್ನು ಹಾಗೂ ಆಕ್ರಮಣಕಾರಿ ಫೀಲ್ಡಿಂಗ್ ತಂತ್ರಗಳನ್ನು ಪ್ರಯೋಗಿಸಿದರು. ಆದರೆ, ಸೂರ್ಯವಂಶಿ ಅವರ ಭಯಮುಕ್ತ ಬ್ಯಾಟಿಂಗ್ ಮುಂದೆ ಕಮಿನ್ಸ್ ಅವರ ತಂತ್ರಗಾರಿಕೆ ಹೆಚ್ಚು ಹೊತ್ತು ನಡೆಯಲಿಲ್ಲ. ಮೊದಲ ಓವರ್ನಲ್ಲಿ ಅದ್ಭುತವಾಗಿ ಬೌಲಿಂಗ್ ಮಾಡಿದ ಕಮಿನ್ಸ್, ಒಂದು ಎಸೆತವನ್ನು ಸ್ವಲ್ಪ ಶಾರ್ಟ್ ಪಿಚ್ ಮಾಡಿದ್ದೇ ತಡ, ಅದನ್ನು ಸೂರ್ಯವಂಶಿ ಮಿಡ್-ಆಫ್ ಮೇಲೆ ಸಿಕ್ಸರ್ಗಟ್ಟಿದರು. ಬಳಿಕ ಎಶಾನ್ ಮಾಲಿಂಗ ಅವರ ಬೌಲಿಂಗ್ ನಲ್ಲೂ ಸಿಕ್ಸರ್ ಬಾರಿಸಿ ಅಬ್ಬರಿಸಿದರು. ಒಟ್ಟಾರೆಯಾಗಿ ಹೈದರಾಬಾದ್ ಬೌಲರ್ ಗಳ ಬೆವರಿಳಿಸಿದ ವೈಭವ್, ತಮ್ಮ ಪ್ರಚಂಡ ಆಟದ ಮೂಲಕ ಕ್ರಿಕೆಟ್ ಲೋಕದ ಗಮನ ಸೆಳೆಯುವಲ್ಲಿ ಯಶಸ್ವಿಯಾದರು.
ಇದನ್ನೂ ಓದಿ : 3 ರನ್ನಿಂದ ಕೈತಪ್ಪಿದ ಐತಿಹಾಸಿಕ ಶತಕ : ಮೈದಾನದಲ್ಲೇ ನಿಬ್ಬೆರಗಾಗಿ ನಿಂತ ಸೂರ್ಯವಂಶಿ – ವಿಡಿಯೋ ನೋಡಿ!
