ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಇತಿಹಾಸದಲ್ಲಿ ಅತ್ಯಂತ ಯಶಸ್ವಿ ನಾಯಕ ಹಾಗೂ ಆಟಗಾರರ ಪೈಕಿ ಮುಂಚೂಣಿಯಲ್ಲಿರುವ ಆಸ್ಟ್ರೇಲಿಯಾದ ಸ್ಫೋಟಕ ಬ್ಯಾಟರ್ ಡೇವಿಡ್ ವಾರ್ನರ್ ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿ ನಡುವಿನ ಮುನಿಸು ಇನ್ನೂ ತಣ್ಣಗಾದಂತೆ ಕಾಣುತ್ತಿಲ್ಲ.
ಐಪಿಎಲ್ 2026ರ ಆವೃತ್ತಿಯ ಭರಾಟೆಯ ನಡುವೆಯೇ ಡೇವಿಡ್ ವಾರ್ನರ್ ತಾವು ಇನ್ನೂ ಎಸ್ಆರ್ಹೆಚ್ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯಿಂದ ಬ್ಲಾಕ್ ಆಗಿರುವುದಾಗಿ ಬಹಿರಂಗಪಡಿಸಿದ್ದಾರೆ. 2024ರ ಆವೃತ್ತಿಯ ಬಳಿಕ ಐಪಿಎಲ್ನಿಂದ ದೂರ ಉಳಿದಿರುವ ವಾರ್ನರ್, ಸದ್ಯ ಪಾಕಿಸ್ತಾನ್ ಸೂಪರ್ ಲೀಗ್ (ಪಿಎಸ್ಎಲ್) ಸೇರಿದಂತೆ ಪ್ರಪಂಚದಾದ್ಯಂತ ನಡೆಯುವ ವಿವಿಧ ಫ್ರಾಂಚೈಸಿ ಟಿ20 ಲೀಗ್ಗಳಲ್ಲಿ ತಮ್ಮ ಆಟವನ್ನು ಮುಂದುವರಿಸಿದ್ದಾರೆ. ಈ ನಡುವೆ ಅಭಿಮಾನಿಯೊಬ್ಬರು ಮಾಡಿದ ಕಾಮೆಂಟ್ಗೆ ಪ್ರತಿಕ್ರಿಯಿಸುವ ಮೂಲಕ ವಾರ್ನರ್, ತಮ್ಮ ಹಾಗೂ ಹೈದರಾಬಾದ್ ಫ್ರಾಂಚೈಸಿ ನಡುವಿನ ಹಳೆಯ ಗಾಯವನ್ನು ಮತ್ತೊಮ್ಮೆ ಕೆದಕಿದ್ದಾರೆ.
ಅಭಿಮಾನಿಯ ಪ್ರಶ್ನೆಗೆ ವಾರ್ನರ್ ನೀಡಿದ ಅಚ್ಚರಿಯ ಪ್ರತಿಕ್ರಿಯೆ
ಭಾನುವಾರ ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಎಸ್ಆರ್ಹೆಚ್ ಖಾತೆಯ ಸ್ಕ್ರೀನ್ಶಾಟ್ ಹಂಚಿಕೊಂಡ ಡೇವಿಡ್ ವಾರ್ನರ್, ಆ ಖಾತೆಯು ‘ಪ್ರೈವೇಟ್’ (ಖಾಸಗಿ) ಎಂದು ತೋರಿಸುತ್ತಿರುವುದನ್ನು ಪ್ರಕಟಿಸಿದ್ದಾರೆ. ಸಾಮಾನ್ಯವಾಗಿ ಒಂದು ಖಾತೆಯನ್ನು ಬ್ಲಾಕ್ ಮಾಡಿದಾಗ ಮಾತ್ರ ಬಳಕೆದಾರರಿಗೆ ಈ ರೀತಿ ಕಾಣಿಸುತ್ತದೆ. ಇದು ನಿಜಕ್ಕೂ ಎಸ್ಆರ್ಹೆಚ್ ತಂಡದ ಅಧಿಕೃತ ಖಾತೆಯೇ ಎಂದು ಅವರು ಅಭಿಮಾನಿಗಳಲ್ಲಿ ಪೋಲ್ ಮೂಲಕ ಪ್ರಶ್ನಿಸಿದ್ದರು. ಈ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ, ಅಭಿಮಾನಿಯೊಬ್ಬರು ವಾರ್ನರ್ ಅವರ ಇತ್ತೀಚಿನ ಇನ್ಸ್ಟಾಗ್ರಾಮ್ ಪೋಸ್ಟ್ವೊಂದರಲ್ಲಿ ಎಸ್ಆರ್ಹೆಚ್ ಖಾತೆಯನ್ನು ಟ್ಯಾಗ್ ಮಾಡಿ, ವಾರ್ನರ್ ಅವರನ್ನು ಅನ್ಬ್ಲಾಕ್ ಮಾಡುವಂತೆ ಮನವಿ ಮಾಡಿದ್ದರು. ಇದಕ್ಕೆ ತಕ್ಷಣವೇ ಪ್ರತಿಕ್ರಿಯೆ ನೀಡಿರುವ ಡೇವಿಡ್ ವಾರ್ನರ್, “ಅವರು ನನ್ನನ್ನು ಎಂದಿಗೂ ಅನ್ಬ್ಲಾಕ್ ಮಾಡುವುದಿಲ್ಲ” ಎಂದು ಖಚಿತವಾಗಿ ಉತ್ತರಿಸುವ ಮೂಲಕ ಫ್ರಾಂಚೈಸಿ ಹಾಗೂ ಕಾವ್ಯ ಮಾರನ್ ಒಡೆತನದ ಆಡಳಿತ ಮಂಡಳಿಯ ಮೇಲಿನ ಅಸಮಾಧಾನವನ್ನು ಹೊರಹಾಕಿದ್ದಾರೆ.
ಅಚ್ಚಳಿಯದ ದಾಖಲೆ ಬರೆದಿದ್ದ ವಾರ್ನರ್-ಎಸ್ಆರ್ಹೆಚ್ ಜೋಡಿ
ಪ್ರಸ್ತುತ ಇಬ್ಬರ ನಡುವೆ ಎಷ್ಟೇ ಬಿರುಕು ಮೂಡಿದ್ದರೂ, ಐಪಿಎಲ್ ಇತಿಹಾಸದಲ್ಲಿ ಡೇವಿಡ್ ವಾರ್ನರ್ ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಯ ಒಡನಾಟ ಅತ್ಯಂತ ಯಶಸ್ವಿ ಹಾಗೂ ಪ್ರಭಾವಶಾಲಿ ಎಂದು ಪರಿಗಣಿಸಲ್ಪಟ್ಟಿದೆ. 2014ರಲ್ಲಿ ಹೈದರಾಬಾದ್ ಪಾಳೆಯವನ್ನು ಸೇರಿಕೊಂಡ ವಾರ್ನರ್, ತಮ್ಮ ಅಮೋಘ ಬ್ಯಾಟಿಂಗ್ ಮೂಲಕ ತಂಡದ ಬೆನ್ನೆಲುಬಾಗಿ ನಿಂತರು. ಕೇವಲ ಒಂದು ವರ್ಷದ ಅಂತರದಲ್ಲಿ ನಾಯಕತ್ವದ ಪಟ್ಟಕ್ಕೇರಿದ ಅವರು, 2016ರಲ್ಲಿ ತಮ್ಮ ನಾಯಕತ್ವದಲ್ಲಿಯೇ ಎಸ್ಆರ್ಹೆಚ್ಗೆ ಚೊಚ್ಚಲ ಐಪಿಎಲ್ ಟ್ರೋಫಿಯನ್ನು ಗೆದ್ದುಕೊಟ್ಟಿದ್ದರು. ಹೈದರಾಬಾದ್ ಪರ 95 ಪಂದ್ಯಗಳನ್ನಾಡಿರುವ ವಾರ್ನರ್, 49.56ರ ಸರಾಸರಿಯಲ್ಲಿ ಬರೋಬ್ಬರಿ 4014 ರನ್ ಸಿಡಿಸಿದ್ದಾರೆ. ಇದರಲ್ಲಿ ಎರಡು ಶತಕ ಹಾಗೂ 40 ಅರ್ಧಶತಕಗಳು ಸೇರಿವೆ. 2015, 2017 ಹಾಗೂ 2019ರಲ್ಲಿ ಅತಿ ಹೆಚ್ಚು ರನ್ ಗಳಿಸಿ ‘ಆರೆಂಜ್ ಕ್ಯಾಪ್’ ಮುಡಿಗೇರಿಸಿಕೊಂಡಿದ್ದ ಅವರು, ತೆಲುಗು ಸಿನಿಮಾಗಳ ಸಂಭಾಷಣೆಗೆ ರೀಲ್ಸ್ ಮಾಡುವ ಮೂಲಕ ಹೈದರಾಬಾದ್ ಅಭಿಮಾನಿಗಳ ಪಾಲಿಗೆ ‘ಕಲ್ಟ್ ಹೀರೋ’ ಆಗಿ ರೂಪುಗೊಂಡಿದ್ದರು.
2021ರಲ್ಲಿ ಶುರುವಾಗಿದ್ದ ಬಿರುಕು ಹಾಗೂ ನಿರ್ಗಮನದ ಹಾದಿ
ಎಸ್ಆರ್ಹೆಚ್ ಹಾಗೂ ವಾರ್ನರ್ ನಡುವಿನ ಸುಮಧುರ ಬಾಂಧವ್ಯ 2021ರ ಆವೃತ್ತಿಯಲ್ಲಿ ಸಂಪೂರ್ಣವಾಗಿ ಹದಗೆಟ್ಟಿತು. ಕಳಪೆ ಫಾರ್ಮ್ ಹಾಗೂ ತಂಡದ ಸತತ ಸೋಲುಗಳ ಹಿನ್ನೆಲೆಯಲ್ಲಿ ಟೂರ್ನಿಯ ಮಧ್ಯದಲ್ಲಿಯೇ ವಾರ್ನರ್ ಅವರನ್ನು ನಾಯಕತ್ವದಿಂದ ಕೆಳಗಿಳಿಸಲಾಯಿತು. ಪರಿಸ್ಥಿತಿ ಬಿಗಡಾಯಿಸುತ್ತಿದ್ದಂತೆ ಅವರನ್ನು ಆಡುವ ಬಳಗದಿಂದಲೂ ಕೈಬಿಡಲಾಗಿತ್ತು. ಯುಎಇಯಲ್ಲಿ ನಡೆದ ಟೂರ್ನಿಯ ದ್ವಿತೀಯಾರ್ಧದಲ್ಲಿ ಡಗೌಟ್ ಬದಲಿಗೆ ಕ್ರೀಡಾಂಗಣದ ಗ್ಯಾಲರಿಯಲ್ಲಿ ಪ್ರತ್ಯೇಕವಾಗಿ ಕುಳಿತು ಪಂದ್ಯ ವೀಕ್ಷಿಸುತ್ತಿದ್ದ ವಾರ್ನರ್ ದೃಶ್ಯಗಳು, ಆಟಗಾರ ಹಾಗೂ ಫ್ರಾಂಚೈಸಿ ನಡುವಿನ ಅಂತರವನ್ನು ಜಗಜ್ಜಾಹೀರುಗೊಳಿಸಿದ್ದವು. ಅಂತಿಮವಾಗಿ 2022ರ ಮೆಗಾ ಹರಾಜಿಗೂ ಮುನ್ನ ಎಸ್ಆರ್ಹೆಚ್ ಅವರನ್ನು ತಂಡದಿಂದ ಬಿಡುಗಡೆ ಮಾಡಿತ್ತು. ಇದಾದ ಬಳಿಕ 2023ರ ಡಿಸೆಂಬರ್ನಲ್ಲಿ ಪ್ಯಾಟ್ ಕಮಿನ್ಸ್ ಹಾಗೂ ಟ್ರಾವಿಸ್ ಹೆಡ್ ಹೈದರಾಬಾದ್ ತಂಡಕ್ಕೆ ಸೇರ್ಪಡೆಯಾದಾಗ ಅವರಿಗೆ ಶುಭಾಶಯ ತಿಳಿಸಲು ಮುಂದಾದಾಗ, ಎಸ್ಆರ್ಹೆಚ್ ತಮ್ಮನ್ನು ಬ್ಲಾಕ್ ಮಾಡಿರುವ ವಿಚಾರವನ್ನು ವಾರ್ನರ್ ಮೊದಲ ಬಾರಿಗೆ ಬಹಿರಂಗಪಡಿಸಿದ್ದರು. ಇದೀಗ 2026ರ ಆವೃತ್ತಿಯಲ್ಲೂ ಆ ಮುನಿಸು ಮುಂದುವರಿದಿರುವುದು ಸ್ಪಷ್ಟವಾಗಿದೆ.
ಇದನ್ನೂ ಓದಿ : ಪಾಂಡ್ಯ ನಾಯಕತ್ವದ ಬಗ್ಗೆ ಪೊಲಾರ್ಡ್ ಅಸಮಾಧಾನ.. ಬದಲಾವಣೆಯ ಸುಳಿವು?
